1 Yesu ayingilili kumbwani Yeliko, akavile akityanga kunjila zya mmbwani hula. 2 Pawelili na mundu mmonga haku kumbwani lihina lyaki Zakayu. Akiva mkulu wa watola usulu na hayu awelili mundu mnaisa. 3 Mweni apalili kumlola Yesu yiwa ni mundu liki, ila kwa ikiva gha lipinga likulunga lya wandu na kwa vila awelili mhupi, kasindwa. 4 Hinu akalongolela kwa kutula mbilo kuulongolo gha wandu akakwela kunani gha mkuyu ili amlole Yesu, kwa ikiva Yesu awelili akihika kupitila njila hila. 5 Yesu paahikili pala pahi gha hula mkuyu, akalola kunani, akamlongela, "Zakayu, ughuluki kwa kuloposela, kwaikiva lelo nitevile mhenja ghako ukaya ghako."

6 Hinu Zakayu akaghuluka kwa kuloposela, akampokela Yesu kuukaya ghaki kwa luheku likulunga. 7 Wandu wogha pawayalola ghala, wakatumbula kung'ung'ulika wakilonga, "Kayenda kuvile mhenja kwa mundu mweni sambi."

8 Ila Zakayu akagholoka, akamlongela Yesu, "Mhyoghanili, Bambu, nenga nitewapegha wandu wavile na hindu ng'ogha mandina gha hindu ghangu, na ikiva nimpokola mundu yeyose kindu, nitemuhuyisila mianja inne."

9 Ndiwa Yesu akamlongela, "Lelo, ulokola uyingila ukaya kwa hayu kwaikiva, hayu hilahila ni mhelekwa wa Ibulahimu. 10 Kwaikiva Mwana wa Mundu kahika kuhakula na kulamisa wandu wayaghamilili."

11 Lipindi wandu wawelili wambila wanguhyoghanila hagha, pala awelili akihika pabehi na Yelusalemu na wandu wala waliwachilili yiwa, Unkosi wa Sapanga utehika lipindi lilalila, Yesu akawalongela mlandano hau. 12 Hinu akawalongela, "Kuwelili na mundu mmonga wa ukolu wa kinkosi atumbulili mwanja kuyenda mlima wa kutali ili apokeli lihengu lya unkosi, kuulongolo ahuyi." 13 Hinu, pambila gha kuhuka, akawakema watumikila ghaki ikumi, akawapegha mapesa yatangala kila mmonga na kuwalongela, "Mgholi biasala mbaka nitehika." 14 Ila wandu wa mlima ghaki mweni wawelili wampala ng'ogha. wakayegha laghililo na kulonga, "Tupala ng'ogha hayu mundu avile nkosi wa twenga."

15 "Hata nagha mundu yula akapeghwa Unkosi na kuhuya kumlima ghaki, na paahika akawakema wala watumikila ghaki awelili kawalekela mapesa, ili amanyi yiwa wapokela mapesa ninga kwa kughola biasala na mapesa awapeghili." 16 Mtumikila wa mtumbula akahika na kulonga, "Bambu, kupitila hila imonga unipeghili nighola biasala na iyongeseka mihanja ikumi gha mapesa unipeghili." 17 Yula mkulu akamyanga, "Ughola maheli mtumikila wa maha, kwaikiva ughola vila ipalilwi kugholwa kukindu kinung'una, hinu ningukupegha ulongosi kumimbwani ikumi." 18 Waivili na mweni akahika, akalonga, "Bambu kupitila hila imonga unipeghili iyongeseka mihanja itano mapesa ghangi." 19 Na mweni akamlongela, "Na wenga utevile na ulongosi kumimbwani itano."

20 Mtumikila ghangi akahika, akalonga, "Bambu utoli mapesa ghako imonga unipeghili, niihighili mahala kutambala." 21 "Kwaikiva niwelili na holu, wenga ni mundu mkalipa. Wenga ni mundu uwesa kutola kindu kya wenga ng'ogha na kangi hutungula pala utulili ng'ogha." 22 Mkulu ghaki akamuyanga, "Nakutosa kwa milando ghako mweni, wenga mtumikila mhakata, umanyili yiwa nenga ni mundu mkalipa, niwesa kutola vindu pala nivika ng'ogha na kunokola pala nitulili ng'ogha. 23 Kwa kyani hinaa ukavika ng'ogha kwa wandu wawesa kuvika nyongesa ili panihika, nitoli yala mapesa ghangu na nyongesa ghaki?"

24 Ndiwa akawalongela wala wawelili wagholoka pabehi, "Mumpokole hagha mapesa na mkampeghi yula avile na ikumi." 25 Wakamlongela, "Bambu, ila hayu kana nyongesa kala gha hagha mapesa mihanja ikumi." 26 "Na mweni akawayanga, ‘Ninguwalongela’ kila avile na kindu atepokela na kuyongeswa. Ila yula avile na hindu ng'ogha hata kila kya mmawoko ghaki kitetolwa." 27 Na hinaa, "Wala wahakata wa nenga wakanilili yiwa nenga nkosi ghao ng'ogha, muwayeghi baha, muwakomi bahala kuulongolo gha nenga."

28 Yesu akalonga hagha, hinu akalongolela kuulongolo gha weni wakiyenda Yelusalemu. 29 Paahikili pabehi vimbwani vya Betifage na Betania, pabehi na litumbi lya Mizeituni, akawalaghila wavulwa ghaki waivili, 30 akawalongela, "Myendi kukimbwani kivile kuulongolo mwa mwenga mkilola. Pamvile mkiyingila kukimbwani haki, mtemlola mwanapunda kawopwa avile katumilwa ng'ogha na mundu. Mumuwoposole, mumuyeghi baha.Mwanapunda 31 Na ikiva mundu anguwakonya kwa kyani mngumuwoposola, mumlongeli, ‘Bambu angumpala.’ "

32 Hinu, wakayenda, na weni wakongine na kila kindu handa vila Yesu awalongelili. 33 Pawawelili wakimuwoposola yula mwanapunda, weni wenikaya wakawakonya, "Kwakyani mngumuwoposola hayu mwana punda?"

34 Na weni wakawayanga, "Bambu angumpala." 35 Hinu, wakamyeghela Yesu yula mwana punda. Hinu wakagubika nguu zyao kunani gha yula mwanapunda, wakamkwelesa Yesu kunani ghaki. 36 Yesu akayendelela na mwanja na wandu wakayanjasa nguu zyao munjila.

37 Paahikili pabehi na Yelusalemu, kughuluka libondi lya litumbi lya Mizeituni, lipinga likulunga lya wavulwa wakatumbula kuhekelela kwa kutova lilowi na kumyinula Sapanga kwa lilowi likulunga kwaikiva gha miujisa mikulunga wailolili, 38 "Wawelili wakilonga kahighilwa nkosi yula ayeghilwi kwa lihina lya Bambu." "kuponga kundumba na Ukulu haku kunani kundumba, kila mundu amshukwile Sapanga."

39 Amonga gha Mafalisayo wawelili paghati gha lila lipinga lya wandu wakamlongela, "Mvula, wakalipile wavulwa ghako wanyamali."

40 Yesu akawayanga, "Ninguwalongela mwenga, ikiva hagha wangunyamala, maganga hagha yatetova lilowi."

41 Yesu paahikili pabehi na mmbwani wa Yelusalemu na kuulola mmbwani hula akatumbula kulila 42 akalonga kwa wandu wa mmbwani hula, "Niwelili nikipala hata lelo baha mmanyi mighalu gha kughola yayegha kuponga, ila hinaa yaghighwa kumihu gha mwenga. 43 Kwaikiva machuwa yanguhika, itevile wahakata ghako watechenga likuta likamala na kuutindila mmbwani ghako na kutumbula kukupundangila mbandi zyogha. 44 Watekupundangila nesu wenga pamonga na wandu walikala mghati ghako Yelusalemu. Watekulekesela ng'ogha hata liganga limonga kunani gha ghangi kwaikiva umanyili ng'ogha lipindi Sapanga ahikili kukulokola."

45 Ndiwa Yesu akayingila Mliyugha lya lighuta lya Sapanga akatumbula kuwawinga wala wawelili wakiwusa vindu mula. 46 Na mweni akawalongela, "Iyandikwa kumayandiko gha Sapanga, ‘Lighuta lyangu litevile lighuta lya mayupo’, ila mwenga mulighola kuvile mbaku gha wapokola."

47 Kila lelu Yesu awelili akivula mlyugha lya lighuta lya Sapanga, watambika wakulu na wavula wa laghililo lya Musa na vilongosi wa wandu wawelili wakihakula njila ili wamkome. 48 Ila walolili ng'ogha njila kwa ikiva wandu wogha wamkovekelili Yesu wakihyoghanila milando ghaki kwa kupala ng'ogha maghaso.