1 Kuulongolo Yesu akatyanga kummbwani na vimbwani wekaweka, akivula na kutangasa Habali Maha zya Unkosi wa Sapanga. Wala wavula ghaki ikumi na ivili wayendili pamonga. 2 Pamonga na wadala wamonga wala avile kawalamisa mahoka na mavina ghangi, walongosanili na mweni. Wala ndiwa mahina ghao ni Malia wamkemili Magidalena, yula avile ahumisilwi mahoka isaba, 3 Yoana mdala wa Kuza, mghola lihengu mkulu wa Helode, Susana na wadala ghangi watangala. Hagha wadala wawelili wakiwatumikila Yesu na wavulwa ghaki kwa hindu ghao weni.

4 Lipindi limonga wandu wawelili wakimkovekela Yesu kuhuma mmbwani wekaweka, na lipinga likulunga lya wandu walikungulili. Na mweni akawapegha mlandano hau, 5 "Mundu mmonga ayendili kukulila mbeyu ghaki. Paawelili akikweta mbeyu ghaki, ghangi ziguili mnjila, na watyanga mnjila wazitimbili na wambongo wa kundumba wazilyeghili. 6 Ghangi ziguili kumandakali yakongine na maganga, na badili gha kumela ziyomelili kwa kulepelela unyekinyeki. 7 Ghangi ziguili paghati gha mibiki gha mihomi. Hila mibiki gha mbigili badili gha kukula igholili kuitindila. 8 Ghangi ziguili kulutupu lya maha yavile na lutuba, zimelili na kulela mbunji kila limonga mbunji imia," Paawelili akilonga ghala alitova lilowi akilonga, "Yula avile na mapulukilo gha kuhyoghanila na ahyoghanile."

9 Wavulwa ghaki Yesu wamkonyili lukani lwa mlandano hau. 10 Na mweni akayanga, "Mwenga mhighiliwa kumanya uchakaka wa Unkosi wa Sapanga hula umanyika ng'ogha dahile hinaa umanyika, ila hagha ghangi wamanyi ng'ogha, ila hagha hulongelwa kwa milandano, ili pawalola wakotoho kuilola, na pawahyoghanila wawese ng'ogha kumanya."

11 "Hinu hali ndiwa lukani lwa mlandano wa yula mtukutula, mbeyu ni lilando lya Sapanga." 12 Zila ziguili mumnjila zinguwonesa wandu wala wahyoghanila lila lilando, na kuulongolo Lihyukana akahika na lihumisa kumioyu gha weni ili wakotoho kukwinila na kulamiswa. 13 Zila ziguili kumandakali yakongine na maganga ingumanisa wandu wala wavile pawahyoghanila lilando lila hulipokela kwa luheko. Ila handa zila mbeyu, zivile ng'ogha na mikigha kwaikiva ukwinila kwa lipindi lya mayaghani hela, na pawayesilwi huleka lilando lya Sapanga. 14 Zila mbeyu ziguili kumbigili ni mlandano wa wandu wala wapikanila lila lilando, ila lipindi mayaghani, pawayenda ghao, hutindilwa na holu, hindu ngoo, na maghaso gha ngalilu gha kila lichuwa vinguwatindila hata kuwesa ng'ogha kukula kuukwinila wa Sapanga. 15 Na zila ziguili kulutupi gha maha hagha ndiwa wandu wala walipikanila lila lilando, wakalighola kwa moyu maha na kwa kukwinila. Wala hutama nuu mbaka wakalela matungula.

16 Wandu wakosa ng'ogha limbamba na kuligubika kwa lidebi au kulivika mulufungu gha kindanda. Ila huivika kunani gha mbaku ili wandu pawayingila mghati wawese kulola mhana. 17 "Hilahila chochose kihighwa kitegubutuliwa, na kwahela kihighwa kya kusindwa kuwoneka ng'ogha lipala. 18 Kwa nagha, mlikali mihu na vila mvihyoghanila, kwaikiva avile na kindu ateyongesewa, ila yula avile na hindu ng'ogha atepokolwa hata kila aliwachila yiwa kakikola atepokolwa."

19 Hinu, nyongo na walongo wa Yesu wakahika kumlola, ila wawesa ng'ogha kuhika pabehi na mweni kwaikiva gha lipinga likulunga lya wandu. 20 Kuulongolo mundu mmonga akamlongela Yesu, "Nyongo ghako na walongo ghako wangukulindila panji, wangupala kukulola." 21 Ila Yesu akawalongela wandu wogha, "Nyongo ghangu na walongo ghangu ni wala wanguyoghanila lilando lya Sapanga na kulighola."

22 Lichuwa limonga, Yesu akwelili whatu pamonga na wavulwa ghaki, akawalongela, "Tughubuki lihiwa tuyendi mpaka mwambu." Hinu, wakatumbula mwanja. 23 Pawawelili wakiyenda kwa kutumila whatu hila, Yesu akolilwi na lughono, akawonja, liyegha litopehu likahika mmasi na masi yakatumbula kuyingila mghati mwa whatu, na weni wakavile mngondu. 24 Wala wavulwa wakamwendela Yesu, wakamuyimusa wakilonga, "Bambu, Bambu. Tunguyalamila." Yesu akayimuka, akaukalipila liyegha na lyeni likaleka kuwumba na masi yakaponga . 25 Hinu akawalongela wavulwa ghaki, "Kukwinila kwa mwenga wa kugha" na weni wakawela na holu na kulikangasa, wakikonyana "Hayu ni mundu ghani? Ikiva angulilaghila liyegha na masi vingumyitikila."

26 Yesu na wavulwa ghaki wakayendelela na mwanja wakavika whatu kumlima wa Wagelasi, ulikalili mbandi gha ipili gha lihiwa Galilaya. 27 Yesu paawelili angughuluka kuhuma muwhatu, akonganili na mundu mmonga wa mlima hula akolilwi na mahoka. Mundu yula kavala lihabiti ng'ogha kuhuma machuwa yatangala hilahila kalikala ng'ogha mghati mwa lighuta ila kumamambi hela. 28 Lipindi amlolili Yesu, akalila kwa lilowi na akalidanga pahi kuulongolo ghaki, na kulonga kwa makakala, "Yesu, Mwana wa Sapanga mweni kuwela kunani, kuna kyani na nenga? Ningukuluwa ukotoho kunihakili." 29 Alongili nagha kwa ikiva Yesu awelili kamlongela hayu lihoka amhuki mundu hayu. Hayu lihoka awelili angumkamula mundu yula mihanja itangala, hata ikavile wandu wamviki mghati na kumuwopa kwa minyololu, ila mweni avidumulili na yula lihoka kumyegha mweni kulivagha. 30 Yesu akamkonya, "Lihina lyako ghani?" Na mweni akamyanga, "Lihina lyangu ni ‘Mtova ngondu.’ " Alongili nagha kwa ikiva mghati mwa mundu yula muwelili na mahoka yatangala. 31 Wala mahoka wakamuluwa Yesu akotoho kuwayegha kuliwumba litali liyendelela. 32 Na pabehi na pala kuwelili na lipinga lya mighuluwi itangala iwelili ikijihakila mulyo kumibondi gha litumbi. Wala mahoka wakamuluwa Yesu awalekeseli wayingili mghati mwa wala mighuluwi. Na mweni akawalekesela. 33 Hinu mahoka wakamuhuka mundu yula na kuyingila mghati mwa wala maghuluwi. Lipinga lyogha lya maghuluwi wakaghuluka mbilo kulitumbi na kujumbukila mghati mwa masi, na weni wakahova masi. 34 Wala wahungaji pawalolili hyogha yahumilili wakabhutuka mbilo, wakayenda kuwalongela wandu kumbwani na kuvimbwani. 35 Wandu wakahika kulola yahumilili, wakamuyendela Yesu, wakamlola yula mundu ahumisililwi mahoka katama upenuni kwa Yesu, kavala nguu, akiva na lughala ghaki, wakawela na holu. 36 Wala wandu walolili yala yahumilili wakawalongela wandu wayendili kulola vila yula akolilwi na mahoka alamisilwi. 37 Hinu wandu wogha wa mlima wa Wagelasi wakakolwa na holu ngulu, hinu wakamkonya Yesu ahuki. Hinu Yesu akayingila mghati gha whatu ili ahuki. 38 Mundu yula ahumisililwi mahoka akamuluwa Yesu wahuki pamonga na mweni, ila Yesu amkanilili, akamlongela, 39 "Uhuyi kuukaya ukalongele hyogha Sapanga akugholelili,"

hinu yula mundu akayenda akitangasa kila mahala kummbwani hula mighalu hyogha Yesu amgholelili.

40 Yesu paahuyili upandi ghangi wa lihiwa, lipinga lya wandu limpokelili kwa luheku, kwaikiva wogha wawelili wakimlindila. 41 Mkulu mmonga wa lighuta lya kukonganika Wayahudi lihina lyaki Yailo akahika. Akajidanga pahi kuulongolo gha Yesu na kumuluwa ahiki kwa mweni, 42 Kwa ikiva awelili na mwana mdala wa weka avile na ukulunga wa machuva ikumi na ivili, na awelili pabehi na kuhwegha. Yesu paawelili akiyenda kula, lipinga likulunga lya wandu liwelili likimtindila na kumghasa. 43 Paghati gha weni kuwelili na mdala mmonga avile na uvina wa kuhuma mwahi kwa lipindi lya machuva ikumi na ivili. Kawesa kutumila hindu ghaki hyogha kuwapegha walamisa, ila kwahela hata mmonga kawesa kumlamisa. 44 Mdala hayu akahika kuyetu gha Yesu na kuyavisa liviniku lya lihabiti ghaki. Na bwitu akalamiswa hula uvina wa kuhuma kwa mwahi. 45 Yesu akakonya, "Ni ghani aniyavisili?" Wandu wogha wakanili, ila Petelo akalonga, "Bambu, ungulola ng'ogha yiwa wandu wangukutindila na kukukovekela." 46 Ila Yesu akalonga, "Kuvile na mundu kaniyavisa kwaikiva ninguhyoghanila nimlamisa mundu kwa makakala ghangu." 47 Yula mdala paalolili yiwa kamanyika, akahika akihihimila kwa holu na kutundamila manung'una pahi kuulongolo gha Yesu. Na pala kuulongolo gha wandu wogha, akalongela vila amyavisili na kulamiswa bwitu. 48 Yesu akamlongela, "Biti, kukwinila ghako ukulamisa. Uyendi kwa kuponga." 49 Yesu paawelili angali akilonga, Yailo akayeghelwa lilando kuhuma kuukaya, "Mwana ghako ahovili kala, ukotoho kuyendelela kumghasa mvula." 50 Yesu paahyoghanila ghala akamlongela Yailo, "Ukotoho kuwela na holu, ukwinili hela na mweni atelamiswa." 51 Paahikili kuukaya kwa Yailo kamlekesela ng'ogha mundu kuyingila mghati gha lighuta pamonga na mweni, ila Petelo na Yohanana Yakobu na walela wa hayu mwana. 52 Wandu wogha wawelili wakilila na kulumbilila kwaikiva gha yula biti ahovili. Ila Yesu akawalongela, "Mkotoho kulila, kwaikiva mwana kahova ng'ogha, kaghonja hela." 53 Na weni wakamuheka Yesu kwaikiva wamanyili yiwa awelili kahova kala. 54 Ila Yesu akamkola liwoko akalonga, "Mwana, uyimuki." 55 Mpumulo gha mwana ukamuhuyila, akayimuka bwitu Yesu akawalongela wampeghi mulyo. 56 Walela ghaki walikangasili, ila Yesu akawalongela wakotoho kumlongela mundu yeyose yala yahumilili.