1 Yesu akilongoswa na Mpumulo wa Sapanga paahuya kuhuma kulweni Yoludani, akalongoswa na Mpumulo wa Sapanga kuyenda kuluvagha. 2 Kula akayeswa na Lihyukana kwa lipindi lya machuwa ialobaini. Kwa lipindi lila, mweni kalyegha ng'ogha mulyo. Na badili gha machuwa ghala akawela na njala. 3 Hinu Lihyukana likamuhikila na kumlongela, "Ikiva wenga ni Mwana wa Sapanga, ulaghili maganga hagha yaweli mibumunda." 4 Yesu akamyanga, "Iyandikilwi kumayandiko gha Sapanga, ‘Mundu kanguwesang'ogha kulama kwa libumunda hela.’ " 5 Hinu Lihyukana likamtola na kumyegha kumahala pakunani, likamlangigha unkosi wogha wa mlima wogha kwa lihanja limonga, 6 Lihyukana likamlongela, "Nitekupegha ukulunga kunani gha unkosi hau wogha na faali zyaki ulongose, kwaikiva nipeghilwi havi vyogha na nenga niwesa kumpegha mundu yeyose nimpala. 7 Havi vyogha vitewela hindu ghako wenga, ikiva utenitumikila kwa kutova manung'una." 8 Yesu akamyanga, "Iyandikilwi kumayandiko gha Sapanga, ‘Utemyupila kwa kumtovela manung'una Bambu Sapanga ghako, na kumtumikila mweni weka hela.’ " 9 Hinu Lihyukana likamtola mbaka ku Yelusalemu, likamgholokesa kunani gha kindangawala ku lighuta lya Sapanga na kumlongela, "Ikiva wenga ni Mwana wa Sapanga, ulidangi pahi, 10 kwaikiva iyandikwa kumayandiko gha Sapanga, ‘Sapanga atewalaghila watumikila ghaki wa kundumba wakutange.’ 11 Hilahila, 'na weni watekupokela mumawoko ghao, Ili ukotoho likwala mliganga." 12 Ila Yesu akamyanga, "Iyandikilwi kumayandiko gha Sapanga, 'Ukotoho kumyesa Bambu Sapanga ghako." 13 Lihyukana palimyesili Yesu kwa kila njila likamleka kwa lipindi.

14 Pala Yesu ahuyili kumlima Galilaya akiva na makakala makulunga gha Mpumulo wa Sapanga, na habali zyaki zikalandala kumahala kogha mpabehi. 15 Na mweni akavile kanguwavula wandu kulighuta lya kukonganika Wayahudi na kuyinulwa na wandu wogha.

16 Yesu akahika ku Nazaleti mahala wamlelili, na lichuwa lya Kupumulila, ayingilili kulighuta lya kukonganika Wayahudi handa angughola machuwa hyogha. Akagholoka ili asomi mayandiko mambulete nesu kwa lilowi. 17 Wakampegha kihitabu kya mlota Isaya. Hinu akakigubutula na akalola mahala payandikilwi. 18 "Mpumulo wa Sapanga upamonga na nenga, kwaikiva Bambu kanihaghula na kunipakala mahuta ili niwatangasile wandu wakapuku Habali Maha. Kaniyegha niwalongele wawopwa yiwa watekombolwa na wandu wangalimihu watelola kangi. Kaniyegha niwakombole wahakiliwi. 19 Na kutangasa yiwa lipindi lihika kala lya Bambu kukombola wandu ghaki." 20 Hinu paayomola kusoma, akawopa kila kihitabu, akampegha mtumikila, hinu akatama, wandu wogha wawelili mlighuta lya kukonganika Wayahudi wakamtumbulila mihu. 21 Na mweni akatumbula kuwalongela, "Liyandiko hali mlihyoghanilili lihumila lelo." 22 Wogha wapalilwi nesu na kukangaswa vila anguyendelela kukula kwa luhala. Wakalonga, "Ghuli, hayu mwana wa Yusufu ng'ogha?" 23 Namweni akawalongela mlandano, "Kwa nagha mtenilongela milando hai, ‘Mlamisa ujilamisi mweni,’ na kangi mtelonga, ‘Tuhyoghanila mighalu hyogha ugholili kumbwani Kapelinaumu, hinu uyaghole na baha kumbwani ghako.’ " 24 Na mweni akayendelela kulonga, "Nagha ninguwalongela chakaka, kwahela mlota wa Sapanga anguyitikilwa kumbwani ghaki. 25 Ninguwalongela chakaka, kuwelili na wadala wahovilwi na walumi ghao watangala kumlima wa Izilaeli kumachuwa zya mlota wa Sapanga Elia, lipindi lila kundumba kuwopilwi, ndonya ilekili kutonya kwa lipindi lya machuva itatu na miehi isita na kukavile na njala ngulu kumimbwani hyogha. 26 Hinu Elia kalaghililwa ng'ogha kwa mundu yeyose wa Izilaeli ila kwa mdala ahoviliwi na mlumi wa Saleputa kumlima Sidoni. 27 Hilahila kuwelili wandu watangala wavile na ukalawa ku Izilaeli kumachuwa gha mlota wa Sapanga Elisha, ila pawelili ng'ogha na mmonga alamisilwi, ila ni Naamani hela wa mlima wa Silia." 28 Wandu wogha wawelili mula kulighuta lya kukonganika Wayahudi pawahyoghanila ghala wahyomili nesu. 29 Wakagholoka, wakamukukula Yesu mbaka panji gha mbwani ghao, uchengwili kunani gha kitumbi. Wakamyegha mmbali ili wamdange pahi. 30 Ila mweni akatyanga paghati gha weni na kujiyendela.

31 Hinu Yesu akayenda Kapelinaumu, kumlima wa Galilaya lichuwa lya kupumulila palihikili, akawavula wandu. 32 Na weni wakakangaswa nesu kulola njila awavulili, kwaikiva awavulili handa mundu avili na ulongosi paailongile. 33 Na mlighuta lya kukonganika Wayahudi kuwelili mundu akolilwi na lihoka, na mweni akalila kwa lilowi likulunga, 34 "Uvile na kyani na twenga, wenga! Yesu wa Nazaleti? Ghuli, uhika kutuyalamisa? Ningukumanya wenga ni ghani. Wenga uhika kuhuma kwa Sapanga." 35 Yesu akamkalipila, akimlongela lihoka nagha, "Unyamali, na uhuki mghati mwa mundu hayu." Na yula lihoka likamdanga yula mundu pahi kuulongolo gha wandu, akahuka mghati mwa mundu yula ng'ogha kumhakili. 36 Wandu wogha wakangasilwi nesu na kulongelana, "Haki ni kyani? Mundu hayu anguwalongela mahoka kwa ulongosi na makakala ghaki, na weni wanguhuka." 37 Na habali gha Yesu zikalandala kumlima hula wogha.

38 Yesu akahuka mghati mwa lila lighuta lya kukonganika Wayahudi, akayenda kulighuta lya Simoni. Nyongo mkwahanu wa Simoni awelili kakolwa na ulwala ukalipa, hinu wakamkonya Yesu amlamise. 39 Yesu akahika na kumgholokela upenuni, akakalipila hula ulwala, na weni ukamleka. Yula nyongo akagholoka bwitu akatumbula kuwatumikila. 40 Lijuwa palihongili, wakamyeghela Yesu wandu wekaweka wavile na mavina. Akavika mawoko ghaki kunani kwa kila mmonga wa weni, akawalamisa. 41 Mahoka yakahuma mghati mwa wandu watangala, wakatova lilowi wakilonga, "Wenga ni Mwana wa Sapanga" Ila Yesu awakalipilili, wakotoho kulonga, kwaikiva wamanyili yiwa mweni ndiwa Kilisito.

42 Kilau ghaki malawila, Yesu akahuka akayenda mahala pakulihigha. Wandu wakavile wakimhaka. Wala wandu pawahikili mahala awelili, wayesili kumkingama ili akotoho kuhuka kwa weni. 43 Ila mweni akawalongela, "Ningupalwa kutangasa Habali Maha gha Unkosi wa Sapanga kumilima ghangi kangi, kwa ikiva Sapanga kanilaghila kughola nagha." 44 Na mweni akayendelela kutangasa ku Yudasia mghati mwa mighuta gha kukonganika Wayahudi.