1 Lichuwa limonga Yesu akawalongela wavulwa ghaki, "Mighalu imghola mundu kughola uhakata yabaha machuwa hyogha. Ila chondi mundu yula amgholayi mundu agholi uhakata. 2 Mbaha mundu hayu awopwe liganga litopehu lya kusyaghila kuntandala na kudangwa mmasi gha bahali kupiti kumghola mmonga gha wandu wangunikovekela agholi uhakata. 3 Hinu nagha, chondi! Ikiva mlongo ghako kakugholela mahakata,

umkalipile na alekisela uhakata na kukuhyukila, umlekeseli. 4 Ikiva mundu akikugholela uhakata mihanja isaba kwa lichuwa limonga na mihanja isaba akahika kwa wenga akalonga, ‘Nilekiseli,’ umlekeseli."

5 Hinu, wandumindumi ghaki wakamlongela Bambu, "Utuyongeseli kukwinila." 6 Bambu akawayanga, "Ikiva mvile na kukwinila kusokombi handa mbunji gha haladali, mngewesa kuulongela mbiki hau wa mkuyu, ‘Utupuki ukameli mbahali,’ na weni ungawayitikila."

7 "Ikiva mmonga paghati mwa mwenga kana mtumikila angutukutula kulitawa au anguhunga kondolu, ghuli, mkulu hayu atemlongela mtumikila paahika, ‘Uhiki baha utami ulyeghi mulyo?’ 8 Ng'ogha nagha, atemlongela, ‘Unitumikilile kwa kuniyandalile mulyo nilyeghi, vala vila ingupalwa uvali ugholoki, mbaka niteyomola kulyegha na kunywegha ndiwa na wenga ulyeghi na kunywegha.’ 9 Ghuli mundu hayu atemshukwile mtumikila hayu kwaikiva gha kughola yala amlaghilili? 10 Hilahila kwa mwenga. Lipindi pamyomola kughola hyogha mlaghililwi, mlonge, ‘Twenga tuwatumikila hela, tughola kila tupalwa kughola.’ "

11 Yesu paawelili mnjila akiyenda Yelusalemu, apitilili paghati gha Samalia na Galilaya. 12 Paawelili akiyingila kukimbwani kimonga, wandu waikumi wavile na ukalawa wakonganilile na mweni, wakagholoka kwa utali. 13 Wakatova lilowi wakilonga, "Yesu, Bambu, tuwoneli luhungu."

14 Paawalolili akawalongela, "Myendi kwa watambika mkajilangihi."

Hinu ikava pawawelili wakiyenda wakalamiswa. 15 Mmonga paghati gha weni paalolili yiwa kalamiswa kala, akahuya kwa Yesu akimyinula Sapanga kwa lilowi likulunga nesu. 16 Akajidanga pahi kuulongolo kumaghulu gha Yesu akamshukwile. Na mundu hayu awelili kahuma ku Samalia, 17 Yesu akakonya, "Wandu walamisilwi wawelili ikumi ng'ogha? Hinu wala itisa wakugha? 18 Ghuli kwahela mundu ghangi kawesa kuhuya na kumshukwile Sapanga ila hayu mhenja weka yaki?" 19 Hinu akamlongela hayu mundu, "Ugholoki, uyendi zyako, kukwinila ghako kukulamisa."

20 Lipindi limonga, Mafalisayo wamkonyili Yesu, "Unkosi wa Sapanga utehika ligha?" Na mweni akawayanga, "Unkosi wa Sapanga utehika ng'ogha kwa kuloleka handa kindu kinguloleka kwa mihu. 21 Kwahela mundu atewesa kulonga, ‘Wa baha’ au ‘Wa pala,’ Kwaikiva Unkosi wa Sapanga upaghati mwa mwenga."

22 Hinu Yesu akawalongela wavulwa ghaki, "Lipindi linguhika mtepala kulola limonga lya lichuwa lya Mwana wa Mundu, ila mteilola ng'ogha." 23 Wandu watewalongela, "Yula pala". Au "Hayu baha." Mkotoho wabhutukila. 24 Kwaikiva Mwana wa Mundu atehika handa vila mhana ungulangaza na kulangaza kundumba haku na kula ndiwa Mwana wa Mundu atehika. 25 Ila ingumpala atumbuli kughasika nesu na kukanilwa na kiwelekwa haki. 26 Handa iwoneka lipindi lya Nuhu, ndiwa itewoneka hilahila kumachuwa gha Mwana wa Mundu kuhuya. 27 Lipindi lila lya Nuhu wandu wayendelelili kulyegha na kunywegha, kuposa na kuposwa mbaka lipindi lila Nuhu kayingila msafina, hinu masi matopehu yakamemesa mlima wogha na kutumbula kuyalamisa wala wogha wayingila ng'ogha msafina. 28 Ndiwa iwelili vilavila lipindi lya Lutu. Wandu wayendelelili kulyegha na kunywegha, kuhemela na kuwusa, kutulila mbeyu na kuchenga. 29 Ila lichuwa lila Lutu paahuka Sodoma, lyoto likalipa likaghuluka kuhuma kundumba handa ndonya, na kuwayalamisa wandu wogha walikalili pala. 30 "Havi ndiwa itewoneka lichuwa lila Mwana wa Mundu paagubutiliwa.

31 Lichuwa hali, mundu yeyose avili kunani gha lighuta ghaki, akotoho ghuluka kukovekela vindu ghaki vivile mghati gha lighuta ghaki, hilahila na yula atevile mlitawa akotoho huya ukaya kutola chochose. 32 Mkumbwike yamkolili mdala wa Lutu. 33 Mundu yeyose apala kulokola kulama ghaki atekuyaghamila na yeyose ateyaghamila kulama ghaki atekulokola. 34 Ninguwalongela, uhiku wa lichuwa lila wandu waivili watevile wawonja mukindanda kimonga, mmonga atetolwa na ghangi atelekwa. 35 Wadala waivili watevile wakisyagha ukowa pamonga, mmonga atetolwa na ghangi atelekwa." 36 Walumi waivili watevile mulitawa wakighola lihengu, mmonga atetolwa na ghangi atelekwa.

37 Hinu wayitikila ghaki wakamkonya, "Bambu hagha yatehumila kugha?" Yesu akawayanga kwa mlandano akilonga, "Pala paawelili na higha gha likokolo lihova kumanyahi ndiwa mbongo ngwasi watejikungula."