1 Yesu paayomolili kulonga milando hila hyogha kwa wandu wamuhyoghanilili, akayenda mmbwani Kapelinaumu. 2 Kula kuwelili mkulu wa watovangondo awelili mlumi, na awelili na mtumikila ghaki ampalili nesu. Mtumikila yula awelili mvina pabehi na kuhova.Mtovangondo wa Kilumi 3 Yula mkulu paahyoghanilili habali gha Yesu, akawayegha kwa mweni wagogolo amonga wa Wayahudi, kwa kumkonya ahike kumlamisa mtumikila ghaki. 4 Pawahikili kwa Yesu, wakamluwa amtangi, wakilonga, "Hayu angupalwa kugholelwa mghalu hau," 5 kwaikiva mweni anguupala mlima hau wogha wa twenga, na ndiwa hayu atuchengili lighuta lya kukonganika Wayahudi. 6 Hinu Yesu akayenda pamonga na weni. Paawelili pabehi na kwa yula mkulu wa watovangondo, yula mkulu akawayegha waghanja ghaki kumlongela Yesu, "Bambu, ukotoho kujighasa, kwaikiva nenga nipalilwa ng'ogha uyingile mghati gha lighuta ghangu. 7 Ndiwa kwaikiva niliwonili nipalilwa ng'ogha kuhika kwa wenga. Ila ulongeli lilando hela, na mtumikila ghangu atelama. 8 Kwaikiva nenga kangi ni mundu nivile pai gha ulongosi, na nivile na watovangondo pai kwa nenga. Panimlongela mmonga, ‘Uyendi,’ na mweni huyenda, panimlongela ghangi, ‘Uhiki.’ Namweni uhika, na mtumikila ghangu, ‘Ghola kindu haki.’ Namweni ughola." 9 Yesu paahyoghanila ghala, alikangasili nesu, hinu akahyuka kulilola lila lipinga lya wandu liwelili likimkovekela, akalonga, "Nilola ng'ogha avile na kukwinila handa haku hata paghati gha Izilaeli hyogha." 10 Hinu wala watumikila walaghilililwi pawahika kulila lighuta, na weni wamuwonili yula mtumikila alamili kala.

11 Kuulongolo, Yesu ayendili kumbwani mmonga ukemwa Naini, na wavulwa ghaki na lipinga likulunga lya wandu wayendili pamonga mweni. 12 Paahikili pabei na lilyango lya mmbwani, kukahumila wandu wapapilii higha gha mlumi mmonga mwana weka wa nyongo ahoviliwi na mlumi ghaki. Wandu watangala wa mmbwani hula wawelili pamonga na nyongo yula. 13 Bambu Yesu paamwonili nyongo yula akamwonela luhungu, akamlongela, "Ukotoho kulila." 14 Hinu, akayenda pabehi akaliyavisa lila litendegu lya kuwonjela, na wala wawelili walipapa wakagholoka. Hinu akalonga, "Msongolo. Ningukulongela uyimuki." 15 Yula ahovili akayimuka akatama, akatumbula kulongela. Na Yesu akamlongela yula mwana uyendi kwa nyongo ghako. 16 Wandu wogha wakakolwa na holu, wakavile wangumyinula Sapanga wakilonga, "Mlota wa Sapanga mkulu kahumila paghati gha twenga. Sapanga kahika kuwakombola wandu ghaki." 17 Lilando lila aligholili Yesu lilandalili kogha ku Yudasia na kumilima gha pabehi.

18 Wavulwa wa Yohanawakamlongela milando hila hyogha ihumilili. Hinu Yohanaakawakema waivili paghati gha weni, 19 na kuwayegha kwa Bambu Yesu kumkonya, "Wenga ndiwa yula Yohanaatulongelili utehika kutukombola au tumlindile mundu ghangi?" 20 Wala wayitikila pawahikili kwa Yesu wakamlongela, "Yohanambatisa katuyegha kwa wenga tukukonye, ‘Yiwa wenga ndiwa yula atulongilile utehika au tumlindile mundu ghangi.’ " 21 Lipindi lilalila Yesu awelili anguwalamisa wandu watangala wawelili wanguhakilwa kwa mavina na wawelili na mahoka na kuwawesesa wandu wangalikulola watangala kulola. 22 Kuulongolo Yesu akawayanga wala wajumbi, "Myende kumlongela Yohanamilando muilola na kuihyoghanila, wangali kulola wangulola, walemafu wangutyanga, wavile na ukalawa wangulamiswa, majogo wanguhyoghanila, wala wahova wanguhinduliwa na wandu wavile na hindu ng'ogha wangulongelwa Habali Maha. 23 Kahighilwa mundu yula avileng'ogha na ungingamo na nenga." 24 Pala wajumbi wa Yohanapawahukili, Yesu akatumbula kuwalongela mapinga gha wandu milando gha Yohanaakilonga, "Myendili kumanyahi kwa Yohana mliwachilili kulola niki? Mpalili kulola lunyahi lukukulilwi na liyegha?" 25 Hinu, myendili kulola niki? Myendili kulola mundu avalili nguu zya maheli? Ng'ogha. Wala wavalili nguu zya mapesa yatangala na kulikala kwa kuhekelela wangulikala kulighuta lya kinkosi. 26 Hinu, mnilongele myendili kulola niki? Myendili kumlola mlota wa Sapanga? Hinaa, ninguwalongela mwenga yula mumlola apiti mlota wa Sapanga. 27 Hayu Yohana ndiwa angulongelwa kumayandiko gha Sapanga, "Sapanga ailongile ningumyegha mtumikila wa nenga akulongoleli kuulongolo, ili akutengeli njila uteityangila," 28 akayomola kwa kulonga, "Ninguwalongela, kuwandu wogha walikalili kumlima wogha kwahela mundu avile mkulu apiti Yohanambatisa. Ila kangi yeyose wamvalangila yiwa mnung'una kuunkosi wa Sapanga anguvalangilwa mkulu apiti Yohana." 29 Pawahyoghanila ghala wandu wogha pamonga na watola usulu wakayitikila yiwa mghalu wa Sapanga ni maha, na wala ndiwa wandu wapokelili ubatiso wa Yohana. 30 Ila Mafalisayo na wavula wa laghilo lya Musa waulemili mghalu wa Sapanga, na kulema kubatiswa na Yohana. 31 Yesu akayendelela kulonga, "Hinu nitewalandisa wandu wa kiwelekwa haki na niki? Wogha walandine na ghani? 32 Ni handa wasongolo wawelili watama kugulilo na kulongelana kwa lilowi likulunga, lipinga limonga na ghangi, ‘Tugholili mhambu wa luheku, ila mkinili ng'ogha. Tuyimba uyimbo wa luhungu ila mlila ng'ogha.’ 33 Kwaikiva Yohanambatisa ahikili, mweni alyeghili ng'ogha libumunda hata kunywegha divai handa weni, na mwenga mlongili, ‘Avile na lihoka.’ 34 Na mweni Mwana wa Mundu ahikili, angulyegha na kunywegha, na mwenga mkalonga, ‘Mumlole hayu angupala kulyegha nesu hayu ka mlowela, ghanja wa watola usulu na wogha wavile na sambi.’ 35 Ila mawachilo gha luhala gha Sapanga yahighilikiswa ni kuwaghola wandu wa maha kwa wogha waikwinila."

36 Mfalisayo mmonga amkonyili Yesu kulyegha mulyo ukaya ghaki. Yesu akayingila ukaya kwa hayu Mfalisayo, akatama kulyegha mulyo. 37 Kumbwani kula kuwelili na mdala mmonga awelili na sambi nesu. Mdala yula paahyoghanilili yiwa Yesu awelili akilyegha kulighuta kwa yula Falisayo, akahika akiyegha supa gha mahuta gha manungilo igholilwi na maganga gha alabasita. 38 Akahika, akagholoka kumaghulu gha Yesu, akilila na masosi ghaki yakamguila Yesu kumaghulu. Yula mdala akapakala maghulu gha Yesu kwa hwila ghaki. Hinu akainonela na kuityelemeka yala manungilo gha mapesa zitangala. 39 Yula Mfalisayo amkemili Yesu paalolili ghala, akaliwachila mmoyu ghaki, "Ikiva mundu hayu mlota wa Sapanga angalimanya yiwa hayu mdala kanogha ng'ogha, kana masambi." 40 Yesu akamlongela yula Mfalisayo, "Simoni, nenga na kindu kya kukulongela." Na mweni Simoni akamlongela, "Hina. Mvula ulonge." 41 "Wandu waivili wawelili watola mapesa kwa mundu mmonga. Mmonga awelili angupalwa kuhipa vipandi imia na itano vya migwala gha feza na ghangi vipandi ihamsini vya maganga gha feza. 42 Pawawesang'ogha kuhipa mapesa ghala, yula mundu akawesesa kuwalekesela wogha waivili. Hinu ni ghani paghati gha wala atempala nesu yula Bambu?" 43 Simoni akamyanga, "Ninguliwachila yiwa yula aweseswa kulekeselwa vipandi vya feza vitangala ndiwa atempala nesu." Na mweni Yesu akamlongela, Utosili kwa uchakaka. 44 Kuulongolo Yesu akamghalambukila yula mdala na kumlongela Simoni, "Simoni ungumlola hayu mdala? Paniyingila mghati gha lighuta ghako, na wenga unipeghili ng'ogha masi gha kughululila maghulu ghangu, ila mdala hayu kaghulula maghulu ghangu na masosi ghaki kwa kuipyata na hwila ghaki. 45 Wenga unijambusili ng'ogha kwa kuninonela, ila hayu mdala kuhuma niyingila baha awelili akininonela maghulu ghangu. 46 Wenga unipakala ng'ogha mahuta kumutu ghangu, ila mweni kapakala manungilo kumaghulu gha nenga. 47 Kwaikiva gha nagha ningukulongela upalo avile mdala hayu kauwonesa ungughihilisa yiwa Sapanga kamlekesela Sambi ghaki yavile yatangala. Ila yula alekelelilwi kwa mayaghani hupala kwa mayaghani." 48 Hinu, Yesu akamlongela yula mdala, "Ulekeselwa sambi syako." 49 Ndiwa wala wawelili pamonga na mweni lipindi lya kulyegha wakakonyana, "Ni mundu wa ghuli hayu hata kanguwesa kukulekesela sambi?" 50 Na mweni Yesu akamlongela yula mdala, "Kukwinila kwa wenga ikulamisa, uyende kwa kuponga."