1 Yesu awakemili wala wavulwa ikumi na ivili, akawapegha ulongosi na makakala gha kuwawinga mahoka hyogha, na uweso wa kulamisa wavina. 2 Hinu akawalaghilila wayendi kuwatangasila wandu Unkosi wa Sapanga na kulamisa wavina. 3 Akawalongela, "Pamtumbula mwanja mkotoho kutola chochose. Mkotoho kutola hiyatu, ng'ogha mhaku, ng'ogha mulyo, ng'ogha mapesa, ng'ogha likoti ghangi. 4 Lighuta lyoyose mteyingila na kupokelwa, mlikali hamu mpaka lipindi lya kuhuka kukimbwani haki. 5 Wandu pawawakanila kuwapokela, mhuki kumbwani hau, na mwenga pamuhuka mupumundi lifu mumaghulu gha mwenga lilando hali mlongelili litewela kilangihi kwa weni kwa mahakata ghao." 6 Hinu wavulwa wala ikumi na ivili wakatumbula mwanja, wapitilili kuvimbwani wekaweka, wakitangasa Habali Maha na kulamisa wandu kila mahala.

7 Hinaa, nkosi Helode yula alongosili ku Galilaya akahyoghanila mighalu hyogha iwelili ikigholwa na Yesu, akavile na holu kwaikiva wawelili wakilongela, Yohanambatisa kahinduka kuhuma kwa kihu. 8 Ghangi walongili yiwa Elia awelili mlota wa Sapanga kahumila, na ghangi walongili yiwa mmonga wa walota wa Sapanga wa dahile kahinduka. 9 Ila Helode akalonga, "Yohananimhengili mutu, hinaa hayu ni ghani nihyoghanila lilando ghaki?" Akavile na luhujulu lya kumlola.

10 Wala wandumindumi pawahuyili, wakamlongela Yesu hyogha wayagholili. Yesu akawatola, wakayenda weka hela kumbwani Betisaida. 11 Ila wala wandu pawamanyili kula ayendili, wakamkovekela. Yesu akawapokela akawalongela vila Unkosi wa Sapanga unguyenda, akawalamisa wala wapalili kulamiswa. 12 Lijuwa palitumbula kuhonga, wala wandumindumi ikumi na ivili wakamuyendela na kumlongela, "Uwalekeseli wandu wayendi kuvimbwani na matawa ya pabehi, wakahakuli mulyo na mahala pakughonja, kwaikiva baha tulikala ni kumanyahi." 13 Ila Yesu akawalongela, "Muwapeghi mwenga mulyo." Wakamuyanga, "Twahela chochose ila mibumunda itano na homba waivili. Tuyendi weni mani tukawahemeleli mulyo wandu wogha baha." 14 Wawelili pala walumi ielufu itano, hinu Yesu akawalongela wavulwa ghaki, "Muwalongeli wandu watami kumapinga gha wandu ihamsini." 15 Wavulwa wakaghola handa walongelilwi, wakawatamisa wogha. 16 Hinu Yesu akaitola hila mibumunda miitano na wala homba waivili akalola kundumba, akamshukwile Sapanga, akavihighila, akavimetula, akawapegha wavulwa ghaki wawapeghi wandu. 17 Wandu wogha wakalyegha, wakayukuta. Wakakungula yasyelili gha mulyo, wavulwa wakamemesa vibeja ikumi na ivili.

18 Lichuwa limonga, Yesu awelili anguyupa weka hela, na wavulwa ghaki wawelili pabehi. Hinu, akawakonya, "Wandu wangulonga yiwa nenga na ghani?" 19 Na weni wakamuyanga, "Ghangi wangulonga yiwa wenga ni Yohana Mbatisa, ghangi, Elia, ghangi, mmonga wa walota wa Sapanga wa dahile avile kahinduka." 20 Pala akawakonya, "Na mwenga ghuli, mngulonga yiwa nenga ni ghani?" Petelo akayanga, "Wenga ndiwa Kilisito yula ahaghulilwi na Sapanga."

21 Hinu Yesu akawalaghila nesu wakotoho kumlongela mundu yoyose mlando hula. 22 Akayendelela kulonga yiwa ingupalwa nenga Mwana wa Mundu nipokeli uhakili utangala na kukanilwa na wagogolo na watambika wakulu na wavula wa laghililo lya Musa na kukomwa, ila lichuwa lya itatu atehinduliwa. 23 Hinu akawalongela wandu wogha, "Mundu yeyose paapalwa kuvile mtumikila wa nenga, angupalwa ajikani mweni, atole lipingika ghaki kila lelo, anikovekeli. 24 Kwaikiva, mundu apalili kuulokola ukomu ghaki mweni, ateyalamisa ukomu hau, ila yula ayalamisili ukomu ghaki kwaikiva gha nenga, ateulokola. 25 Ghuli, kana hupo liki mundu kapokela hindu zyogha zya mlima wogha ila akajiyalamisa mweni? 26 Ikiva mundu anguniwonela honi nenga na mavulo ghangu, Mwana wa Mundu atemuwonela honi mundu hayu lipindi atehika kwa ukulu ghaki na wa Tati na watumikila wa kundumba wa Sapanga ghaki. 27 Ninguwalongela unagha, wamonga paghati gha wandu watamili baha watehova ng'ogha mbaka waulole Unkosi wa Sapanga."

28 Palihikili lichuwa lya inane badili gha kulonga ghala, Yesu akawatola Petelo na Yohanana Yakobu, akayenda na weni kulitumbi kumyupa Sapanga. 29 Paawelili akiyupa, wuso ghaki ughalambukili, nguu zing'alile mbulete pee. 30 Bwitu na wandu waivili wakawoneka wakilonga na mweni, na weni wawelili Musa na Elia, 31 Wahumila wakiva na ungalile nesu, wakalonga na mweni vila atehova na njila ateyomwiki yala yayandikilwi kula Yelusalemu. 32 Petelo na wayake wawelili wakolwa na lughono nesu, ila hata nagha wayimukili na kulola ukulu ungalile nesu wa Yesu na wala wandu waivili wawelili wagholoka pamonga na mweni. 33 Hinu, wandu wala waivili pawawelili wakihuka, Petelo akamlongela Yesu, "Bambu, ni maha twenga twa baha. Hinu tuchengi vibimilo viitatu. kimonga kya wenga, kimonga kya Musa, na kimonga kya Elia," na mweni alongili ghala akali kamanya ng'ogha kila akilonga. 34 Petelo paawelili akiyendelela kulonga, lihindu likahumila na kuwagubika. Na wavulwa wala watilili kwa kulola yiwa wagubikilwi na lila lihindu. 35 Na lilowi likahyoghanika kuhuma paghati gha lila lihindu, likilonga, "Hayu ndiwa Mwana wa nenga nimuhaghulili. Mumhyoghanili." 36 kuulongolo gha lila lilowi kuhyoghanilika, Yesu awonikanili akiva weka hela. Wavulwa wawelili watamilinuu kwa mighalu hila, na lipindi lila wamlongelili ng'ogha mundu yoyose mighalu hila wailolili.

37 Kilau ghaki Yesu na wavulwa ghaki waitatu pawawelili waghuluka kala kulitumbi, lipinga likulunga lya wandu likonganilili na Yesu. 38 Pala, mundu mmonga kulipinga lila akatova lilowi, akilonga, "Mvula, ningukuluwa umlamisi mhongolo ghangu mwana ghangu wa weka. 39 Lihoka humkola, na bwitu mhongolo hutumbula kutova lilowi, humpegha kingulengi, na lifulufulu lingumuhumila mumlomo. Huyendelela kumuhakila nesu, na kukotoho kumleka kwa kuloposela. 40 Niwaluwili wavulwa ghako wamvingi lihoka hayu, ila wawesili ng'ogha." 41 Yesu akalonga, "Mwenga kiweleka kiwelili ng'ogha na kukwinila, kileka njila na kihakata. Nitelikala pamonga na mwenga na kutamanuu mbaka ligha?" Hinu akamlongela yula mundu, "Umyeghi mhongolo ghako kwa nenga." 42 Lipindi mhongolo yula pawelili akimuhikila Yesu, yula lihoka likamgua pahi na kumpegha kingulengi. Ila Yesu akamkalipila yula lihoka na akamlamisa yula mhongolo na kumhuyisa kwa tati ghaki. 43 Na wandu wogha wakangasilwi na uweso mkulunga wa Sapanga.

Na wala wogha pawawelili wakilikangasa kwa mighalu hila hyogha agholili Yesu, mweni akawalongela wavulwa ghaki, 44 "Mhyoghanili maha hagha ninguwalongela. Mwana wa Mundu anguyenda kuvikwa mumawoko gha wandu." 45 Ila wala wavulwa wamanyili ng'ogha yiwa lilando lila lingumanisa niki. Lilando lila liwelili lihighwa kwa weni ili wakotoho kumanya, na weni wakatila kumkonya mlando hula.

46 Kukahumila malongelano paghati gha wala wavulwa yiwa ghani paghati gha weni awelili mkulu apiti wogha. 47 Yesu akamanya mawachilo kumioyu ghao. Hinu akatola mwana akamvika pabehi na mweni, 48 na kuwalongela, "Yula ampokela mwana mnung'una handa hayu kwa lihina lya yula ayeghilwi na kupeghwa ulongosi na Sapanga. Anipokeli nengang'ogha, ila angumupokela yula aniyeghili nenga. Kwaikiva yula kawela mnung'una paghati mwa mwenga ndiwa mkulu apiti wogha paghati mwa mwenga."

49 Na Yohanaakalonga, "Bambu, tumlolili mundu mmonga akivinga mahoka wandu kwa lihina lya yula ayeghilwi na kupeghwa ulongosi na Sapanga, na twenga tumkanisa, kwaikiva mweni wa lipinga lya twenga ng'ogha." 50 Ila Yesu akamlongela, "Mkotoho kumkanisa, kwa ikiva yula kangingama na mwengang'ogha kambandi gha mwenga."

51 Lipindi gha Yesu gha kutolwa kundumba palivile pabehi. Mweni alamulili kuyenda ku Yelusalemu, 52 Hinu, akawayegha wajumbi wamlonguleli, na weni wakayenda wakayingila kimbwani kimonga kya Wasamalia ili wamtengeli kila kindu. 53 Ila wakola mlima wa pala wakanili kumpokela Yesu, kwaikiva awelili kumwanja kuyenda Yelusalemu. 54 Wavulwa ghaki, Yakobu na Yohanapawalolili mighalu hila, wakalonga. "Bambu, ghuli ungupala tulaghili lyoto liwaghulukili kuhuma kundumba na kuwayalamisa?" 55 Ila Yesu akawahiyukila na kuwakalipila. 56 Hinu wakahuka na kuyenda kukimbwani kingi.

57 Pawawelili kumwanja, mundu mmonga akamlongela Yesu, "Nitekukovekela kokose uteyenda." 58 Yesu akalonga, "Likokolo walikema Mbweha wavile na mambaku, na mbongo wa kunani wavile na vijaka ila Mwana wa Mundu avile ng'ogha mahala pakupumlilila." 59 Kangi akamlongela mundu mghangi, "Nikovekeli."

Hayu akalonga, "Bambu, nilekeseli lihanja limu niyendi kumsika tati ghangu."

60 Yesu akamlongela, "Uwaleki wandu wavile na holu mmoyu wawasiki wandu wa weni, ila wenga uyendi ukatangasi Unkosi wa Sapanga."

61 Mundu ghangi akalonga, "Bambu, nitekukovekela ila unilekeseli lihanja limonga niwatauli walongo ghangu."

62 Yesu akamlongela, "Yeyose akolili lihuka kwa kutukutula na kangi angulola kuyetu, kamaha ng'ogha kwa Unkosi wa Sapanga."