25 "Ɔti me folɛdulɛ a le kɛ: Bɛmmadwenle ninyɛne mɔɔ le kɛ aleɛ, nzule anzɛɛ nza, ezukoa nee ndanlɛ nwo. Ɔluakɛ bɛmɛ bɛlɛ ngoane nee nwonane dɛba, na bɛhyia ɛsesebɛ ɛsesebɛ kpole kpalɛ bɛtɛla aleɛ mɔɔ bɛbali nee ndanlɛ mɔɔ bɛbaheda la.

34 "Ɛhye ati bɛmmadwenle ɛhyema ɛdeɛ ne anwo, na mɔɔ bazi ɛhyema la wɔ Nyamenle sa nu. Dwenle ɛnɛ angome anwo na gyakyi ɛhyema.

22 Azɛlɛ ne mɔɔ mbowule ne wɔ zo la, gyi ɛkɛ ne maa nrenyia ne mɔɔ tie Nyamedwɛkɛ ne, na ewiade anu ɛbɛlabɔlɛ nee ye ezukoakpondɛlɛ kakyi mbowule miemia Nyamenle Edwɛkɛ ne na ɔte ye Nyamenle ɛzonlenlɛ ne azo ngyikyi ngyikyi la.

1 Mekɛ zɔhane anu ala, ɛnee menli dɔɔnwo ne ala ɛra dedee mɔɔ ɛto bolɛ bɔbɔ a ɔnga aze a. Na akee ɔhakyile ɔ nye ɔzele ye ɛdoavolɛma ne mɔ kɛ, "Bɛnlea bɛ nwo boɛ kpalɛ kpalɛ wɔ Falasiima ne mɔ anwo, ɔluakɛ bɛle mgbɔvonle. Na bɛ mɛlɛbɛla ne noko ɛnrɛha ɛkɛ ne dahuu. 2 Ɔbala ali wienyi kɛ mgbɔvonle mɔɔ wɔ ɛdɔkɛ nu la pɛɛ. 3 Mɔɔ bɛheha ye azule bo la kpokpoti bala ali wienyi; yɛɛ mɔɔ bɛha ye huhuhuhu wɔ suakunlu noko la, bɛbabɔ bɛ nolo wɔ gua bile zo lɔ!

4 "Ɛhye ati, ayi mɔ, bɛmmasulo ɛhye mɔ mɔɔ kpondɛ ahu bɛ la, ɔluakɛ nwonane ne ala a bɛkɛhola ye ku a; na bɛnlɛ ɛkɛla ne anwo zo tumi biala. 5 Emomu mɔɔ bɛzulo ye la a le Nana Nyamenle, ɔluakɛ yemɔ yɛɛ ɔkola ɔku nwonane ne na eza ɔfuandi ɛkɛla ne ɔto abɔnsam senle ne anu a. Mesi bɛ zo bieko kɛ, ‘Bɛzulo ye.’

6 "Tɛ ezukoa ngapɛlɛ nsa bie a bɛfa bɛtɔ kɛsanloma nnu ɔ? Noko Nana Nyamenle anye ɛmkpa ko bɔbɔ anwo zo ɛlɛ. 7 Na yɛmɛ yɛ ti enrinli mgbane ne bɔbɔ, ɔze ɔ muala ye dodo! Bɛmmasulo, ɔluakɛ bɛsonle bolɛ bɛtɛla kɛsanloma apenle kɛyɛ nyɛ.

8 "Na mesi ye pi meahile bɛ kɛ: Saa bɛdie Mame, Sonla Ra ne bɛto nu wɔ bagua nu kɛ me deɛ a le bɛ a, medame noko mebahanvo bɛ wɔ Nana Nyamenle anwumabɔvolɛma ne mɔ anyunlu. 9 Na bɛdabɛ mɔɔ bɛkɛkpo me wɔ aleɛabo la, medame noko mebakpo bɛ wɔ Nana Nyamenle anwumabɔvolɛma ne mɔ anyunlu. 10 Saa bɛbava sonla mɔɔ ɛdendɛ ɛtia Mame, Sonla Ra ne la ɛtane bɔbɔ bɛahyɛ ye a, ɛnee tɛ bɛdabɛ mɔɔ bɛtendɛ bɛtia Sunsum Nwuanzanwuanza ne la ɔ.

11 "Eza noko saa bɛkye bɛ, bɛ nee bɛ kɔ Dwuuma mgbanyima ne mɔ anyunlu wɔ ayiasua ne mɔ anu a, bɛmmadwenle mɔɔ bɛkɛha bɛkɛlie bɛ nwo la anwo, 12 ɔluakɛ Sunsum Nwuanzanwuanza ne bahile bɛ wɔ dɔnehwele ne anu edwɛkɛ fɔɔnwo ne mɔɔ ɔwɔ kɛ bɛka la."

13 Na akee awie vi menli pemgbenlamgbe ne anu deanle nu zele kɛ, "Yɛmenle, mebodo wɔ, se me diema ne kɛ ɔmaa yɛhyɛ egya agyapadeɛ mɔɔ ɔvale ɔgyakyile yɛ la anu."

14 Gyisɛse buale ye zele kɛ, "Adiema, nwane a yɛle me ndɛnebuavolɛ anzɛɛ ninyɛne ɛhyɛlɛ zo neazovolɛ a? 15 Bɛnlea boɛ! Bɛmmayɛ anyebolo, ɔluakɛ anyiabɛnwo ɛngile ɛbɛlabɔlɛ tenlene."

16 Akee ɔbule bɛ ɛrɛlɛ kɛ: "Nrenyia sukoavolɛ bie zonle ye ɛya, na ɛya ne hyenle kpole. 17 Na mɔɔ bɛbule la, ye mbonwole mɔɔ ɔlɛ bɛ la amuala yiyile tetɛkɛɛ bulubulule zolɛ. Ɛhye gyegyele ye adwenle kpole, 18 na nzinlii ɔyɛle ye adwenle na akee ɔzele ɔ nwo kɛ, ‘Kɛ menzi menyɛ me nwo ɛ? Mebabubu me mbonwole ne mɔ meagua, na meazi mgbole kpalɛ mɔɔ tɛla ɛhye mɔ la, amaa meanyia ɛleka meagua me aleɛ ne. 19 Akee mebadɛnla meanlea me ninyɛne ne mɔ, na akee meaze me nwo kɛ, Wɔzie aleɛ dɔɔnwo wɔmaa ɛvolɛ tendendenlenle mɔɔ bara la. Die ɛ menle bie! Di na no maa ɛ nwo ɛdɔ wɔ.’ " 

20 "Na Nana Nyamenle zele ye kɛ, ‘Koasea!’ Ɛnɛ nɔe ala bɛbalie wɔ ɛkɛla ne bɛavi ɛ sa nu. Na nwane a ɛhye mɔ amuala bayɛ ye deɛ a?"

21 "Ɔle nɔhalɛ kɛ, awie biala mɔɔ kɛkpondɛ agyapadeɛ kɛzie azɛlɛ ye azo, na yeamkpondɛ bie yeangua anwuma maanle ne anu la, ɛnee ɔle tomiamgba amgba."

22 Akee ɔzele ye ɛdoavolɛma ne mɔ kɛ, "Bɛmmadwenledwenle mɔɔ bɛkɛli anzɛɛ bɛkɛnlo, anzɛɛ mɔɔ bɛkɛheda la anwo. 23 Ɔluakɛ ngoane hyia tɛla aleɛ nee ndanlɛ. 24 Bɛnlea anwomanyunlu nloma bɔbɔ bɛnlua yɛɛ bɛmbu, yɛɛ bɛnlɛ bonwole bɔbɔ na bɛava debie bɛagua zo, noko dahuu bɛnyia mɔɔ bɛdi la, ɔluakɛ Nana Nyamenle maa bɛ aleɛ. Na asoo bɛnzonle bolɛ bɛndɛla nloma ne mɔ noko ɔ?

25 "Na bɛ nuhua ne boni bɔbɔ a ɔdaye ɔse ɔkɛhola ɔkɛva kenle kokye bɔbɔ ɔkɛzɔ ye ngoane zo a? Awie biala ɛnle ɛkɛ ne zɔhane! 26 Na saa adwenledwenle ɛnrɛhola ɛnrɛmaa yɛnrɛyɛ ɛhye mɔ bɔbɔ mɔɔ le ekyi la a, ɛnee akee duzu ati a yɛkɛdwenledwenle mɔɔ tɛla ɛhye mɔ la anwo a?

27 "Bɛnlea ɛya nu silikoko bɔbɔ! Bɛnyɛ gyima, yɛɛ bɛmpomgba adɛladeɛ bɛnwula, noko akee Sɔlɔmɔn bɔbɔ, wɔ ye anyunlunyia kosooti anu anziezie ɔ nwo kɛ bɛmɛ la. 28 Na saa Nana Nyamenle keda ndotolo mɔɔ bɛwɔ ɛke ɛnɛ, ɛhyema ɛnee bɛminli la ɛdanlɛ zɛhae a, ɛnee bɛnlie bɛnli kɛ ɔkɛheda bɛdabɛ noko ɛdanlɛ ɔ, bɛmɛ mɔɔ bɛnlɛ diedi a? 29 Eza noko bɛmmadwenle aleɛ mɔɔ bɛkɛli anzɛɛ mɔɔ bɛkɛnlo la anwo fee zɛ; bɛmmamaa bɛ adwenle yɛ bɛ kesee. 30 Deɛ mɔɔ aleɛabo maanle maanlema kpondɛ la ala a le ninyɛne ɛhye mɔ, noko bɛ Ze ne mɔɔ wɔ anwuma la ze mɔɔ hyia bɛ la amuala kpokpoti. 31 Bɛmaa ye Belemgbunli maanle ne anwo ɛhyia bɛ ɛdɛla debie biala, na ɔdaye noko ɔbava ɛhye mɔ amuala yeaboka bɛ nwo.

32 "Ɛhye ati bɛmmasulo, bɛmɛ mboane ekpunli ekyi. Ɔluakɛ ɔyɛ bɛ Ze fɛ totohyia kɛ ɔkɛva Belemgbunli maanle ne ɔkɛmaa bɛ a. 33 Bɛdɔne mɔɔ bɛlɛ ye la, na bɛva bɛhyɛ ehyiavolɛma. Ɛhye bamaa bɛanyia ahatualɛ kpalɛ mgbole wɔ anwuma maanle ne anu! Agyapadeɛ mɔɔ bɛkpondɛ bɛzie ye wɔ anwuma maanle ne anu la ɛnwie ɛlɛ. Awule noko ɛnwua, yɛɛ nvɔlekɛ noko ɛngola ɛnzɛkye ye. 34 Na bɛhakye kɛ, ɛleka mɔɔ wɔ agyapadeɛ wɔ la, ɛkɛ ne a wɔ ahonle ne nee wɔ adwenle noko wɔ a.

35 "Bɛboɔboa bɛ nwo na bɛmaa bɛ kɛnlaneɛ ne ɛda, 36 amaa bɛahola bɛahendɛ bɛ Awulae wɔ mekɛ mɔɔ ɔkɛvi atɔfolɛlielɛ bo ɔkɛra la, amaa saa ɔba na ɔbabɔ anlenkɛ ne anu a, bɛabuke ye ndɛndɛ ne ala. 37 Nyilalɛ nee fɛlɛko kpole baha bɛdabɛ mɔɔ saa menlelɛ ne ba a ɔbarado bɛ kɛ bɛlɛkendɛ ye la. Ɔdaye mumua ne a ɔbamaa bɛ ebia na eza yeazonle bɛ a! 38 Bie a ɛnee ɔbara kɛyɛ nɔɔzo dɔne ngɔnla, anzɛɛ alevinli-mu-nwiɔ avinli bɔbɔ. Noko akee mekɛ biala mɔɔ ɔkɛra la, menli mɔɔ bali fɛlɛko kpalɛ ne la a le nuhua ne mɔ mɔɔ bɛboɔboa bɛ nwo bɛwie la.

39 "Saa aakomenle ze mekɛ mɔɔ awule barawua ye a, anrɛɛ ɔnrɛdo ye aako ne mgbane. 40 Ɛhye ati bɛziezie bɛ nwo dahuu, ɔluakɛ Sonla Ra ne bara wɔ melɛ mɔɔ awie biala anye ɛnla ye adenle la."

41 Pita bizale ye kɛ, "Awulae, ɛnee yɛ ngome a ɛlɛka ɛhye wɔahile yɛ anzɛɛ yɛ muala ɔ?"

42-44 Na Awulae buale ye zele kɛ, "Melɛka meahile awie biala mɔɔ di nɔhalɛ, na ɔ nye gyi ɔ ti anwo kpundii na ɔ menle ɛva gyima ɛwula ɔ sa kɛ ɔmaa ye ngɛkɛlɛ mɔɔ ɛha la aleɛ la. Saa ɔ menle ne sia ba bato kɛ ye kanranli ne amgba ɛyɛ ye gyima ne bɔkɔɔ a, ɔbamaa ye nwolɛ ahatualɛ, na eza noko yeava debie biala mɔɔ ɔlɛ ye la yeawula ɔ sa nu yeamaa yeanlea zo.

45 "Na saa ɔba ye kɛ, ahenle ne suzu kɛ, ‘Me menle ɛtɛnyianle ɛtɛsiale ɛtɛbale’, na ɔbɔ ɔ bo kɛ ɔbo mrenyia nee mraalɛ ne mɔ mɔɔ bɛva bɛwula ɔ sa kɛ ɔnlea bɛ la, na eza ɔto ɛkponle mgbole yeanlo ye nza yeabo a, 46 yemɔ mɔɔ bazi la a le kɛ, ɔ menle ne bazia ara wɔ melɛ mɔɔ ɔ nye ɛnla la, na yeadu ye yeavi ɛkɛ ne yeamaa yeahɔboka menli mɔɔ ɛnli nɔhalɛ la anwo. 47 Ɔ nzohwenlɛ ɛdeɛ ne bayɛ totohyia, ɔluakɛ ɔze mɔɔ ɔwɔ kɛ ɔyɛ la yɛɛ yeanyɛ a.

48 "Na awie mɔɔ ɛnze kɛ mɔɔ ɔlɛyɛ la ɛnle kpalɛ la, yemɔ bɛbazuzu bɛahwe ɔ nzo. Ɔboalekɛ awie biala mɔɔ bɛkɛmaa ye dɔɔnwo la, yemɔ a bɛkpondɛ dɔɔnwo bɛfi ɔ sa nu a.

49 "Mera kɛ mefa senle meara azɛlɛ ye azo, na me kunlu anu a anrɛɛ yezɔ dɛbadɛba! 50 Azubɔlɛ mɔɔ sonle bolɛ la wɔ ɛkɛ mɔɔ ɔwɔ kɛ bɛbɔ me a, na saa me sa ɛtɛkanle zɔhane azubɔlɛ ne a, me nwo ɛtɛtɔle me!

51 "Bɛdwenle kɛ anzondwolɛ a me nee ye ɛra azɛlɛ ye azo anzɛɛ? Mese bɛ kɛ, Kyɛkyɛ! Ɔnle zɔ! Emomu konle nee mgbakyemgbakyenu ɔ! 52 Ɔvi ɛnɛ mɔɔ kɔ la, mbusua nu bakpakyekpakye; saa bɛlua nnu a, ɔlua me ti, nuhua nsa ne batia nwiɔ, ne, na nwiɔ ne noko batia nsa ne. 53 Selɛ batia ralɛ nrenyia; yɛɛ ninli noko batia ralɛ raalɛ; yɛɛ azebia nee azebia, ɔ nee azebɛla nee azebɛla avinli badondo."

54 Akee ɔdole ɔ nye wɔ menli dɔɔnwo ne anwo na ɔzele kɛ, "Saa amungu ye kisikisi wɔ sɛnzɛndɔleɛ a, bɛse, ‘Ezule ne badɔ.’ Na ɔyɛ zɔ noko amgba.

55 "Yɛɛ saa bɛnwu kɛ nyevile nu anwoma ɛlɛbɔ a, ɛnee bɛse, ‘Wuluwulu ɛlɛba.’ Na amgba noko ɔye zɔ. 56 Bɛmɛ adalɛ nabalabama! Duzu ati a bɛkola bɛnea anwomanyunlu bɛka mɔɔ bazi la, na akee bɛyɛ kɛ asɛɛ bɛtɛnwunle mɔɔ ɛlɛsisi ɛnɛ mekɛ ye anu la a? 57 Duzu ati a bɛkpo kɛ bɛkɛva ɛzukoalɛdeɛ bɛkɛvi nu a?

58 "Saa ɛnwu kɛ wɔ kpɔvolɛ bie nee wɔ ɛlɛkɔ kɔɔto a, bɔ mɔdenle kɛ ɛ nee ye bɛkɛziezie bɛ avinli, kolaa na edwɛkɛ ne adwu ndɛnebuavolɛ ne anyunlu; wɔanyɛ ye zɔ na bɛkɔdwu lɔ a, yemɔ bɛbua wɔ fɔlɛ na bɛto wɔ efiade. 59 Na saa ɔba ye zɔhane noko a, kyesɛ ɛda nu dedee kɔkpula mekɛ mɔɔ bɛkɛhile wɔ la dwu, anzɛɛ kɛ ɛkɛdua kapɛlɛba ne bɔbɔ mɔɔ wɔ kakɛ biala mɔɔ bɛkɛbɔ wɔ la azo la tua la."

22 Fa wɔ adesoa muala to Nana Nyamenle anwo zo, na ɔbaho yealie wɔ; ɔnrɛmaa bɛnrɛli nɔhavoma anwo zo konim ɛlɛ.

19 Saa me ahonle nu adwenledwenle ne so a, wɔ arɛlekyekyelɛ ne a maa me anyelielɛ a.

9 O Awulae, ɛdawɔ ɛze me ngyianlɛndeɛ muala; ɛze me huutwa huutwa muala abo.

27 "Anzondwolɛ a mefa meagyakyi bɛ a; medame me anzondwolɛ a mefa meamaa bɛ a; tɛ anzondwolɛ ne mɔɔ ewiade fa maa la a mefa meamaa bɛ a. Bɛmmamaa bɛ ahonle tu, eza noko mmamaa bɛsulo.

1 "Bɛmmamaa bɛ ahonle tu. Kɛmɔ bɛdie Nana Nyamenle bɛdi la, zɔhane ala yɛɛ bɛlie medame noko bɛli a.

11 Na saa bɛkye bɛ, na saa bɛkabua bɛ mgbɔvodɛne a, bɛmmamaa edwɛkɛ mɔɔ bɛbaha bɛalie bɛ nwo la yɛ bɛ adwenledwenle. Bɛha edwɛkɛ biala mɔɔ Nyamenle ɔdaye ɔkɛze bɛ ala la. Ɔluakɛ, tɛ bɛ a bɛbadendɛ a, na emomu, Sunsum Nwuanzanwuanza ne ɔ.