1 O Nana Nyamenle, tie me nzɛlɛlɛ; mmaye ɛ nzo ɛfi me ɛbizalɛndeɛ zo! 2 Tie me, na bua me; ɔluakɛ me amaneɛnwunlɛ ɛbo me nwo zo.

3 Me kpɔvolɛ ne ɛnwunlonwunlanlɛ ne mɔ ɛdu me ahonle; ɔlua bɛ nzisi ne ati. Bɛfa ngyegyelɛ dɔɔnwo bɛbɛlɛ me; na wɔ bɛ ɛyavalɛ nu, dahuu bɛtwehwe ɛkpɔlɛ bɛmaa me. 4 Me ahonle ɛlɛdi nyane wɔ me nu, na ewule nwo ɛzulolɛ ɛde ɛdɔ me nwo zo. 5 Anwowozolɛ nee ɛzulolɛ ɛva me aze; me nwo mɔra ɛdu bɔkɔɔ. 6 Me kunlu anu a anrɛɛ melɛ ndɛbalɛ kɛ abubule la! Anrɛɛ medu mehɔ hwehwe mehɔkpondɛ ɛlɛka bie melie me ɛnwomenle. 7 Ɛhɛe, anrɛɛ menwɔkpɔsa menwɔdwu moamoa, na meahɔdɛnla fiemgbole bie azo. 8 Mebakpondɛ feabelɛ ndɛndɛ zo, meavi ahumu totohyia ye mɔɔ ɛlɛtu la anu.

9 O Awulae, sɛkye bɛ atiakunlutane ngyehyɛleɛ mɔɔ, bɛlɛyɛ la amuala; ɔluakɛ menwu basabasayɛlɛ nee konle wɔ sua ne azo. 10 Alehyenlɛ nee aledwolɛ muala, bɛbɔ ye mbane ne mɔ anwo mgbɔlɛka; na mgbondedolɛ nee begyebegyeyɛlɛ wɔ sua ne azo. 11 Deɛzekyelɛ ɛra sua ne azo; yɛɛ akee noko nzisi nee amumuyɛ nyɛleɛ ɛnvi ye gua nu ɛlɛ.

12 Tɛ me kpɔvolɛma yɛɛ yelɛyela me nwo a, yɛɛ tɛ bɛdabɛ mɔɔ bɛko bɛtia me, anzɛɛ bɛdabɛ mɔɔ bɛ nye ɛnzɔ debie la yɛɛ nee me di apelepele a, yemɔ anrɛɛ menwɔhola menwɔzɔ nuhua na akee meahwe me nwo meavi bɛ nwo. 13 Noko akee ɛhye yemɔ ɔle me gɔnwo, ɔle me ti pɛne, ɔle me gɔnwo kpalɛ kpalɛ. 14 Anrɛɛ yɛ muala yɛɛ yɛbɔ nu yɛdi adwelie a; yɛɛ yɛ muala noko a yɛdua nwo yɛkɔ asɔne a.

15 O Awulae, maa ewule ɛde ɛdɔ bɛ nwo zo; maa bɛhɔ ɛbolɔ kuma ne abo anyewɔzo nu; maa bɛva ɛzulolɛ bɛwu bɛhɔ bɛ ewule kuma ne mɔ anu. 16 Noko akee mesu mefɛlɛ Nyamenle; na Nana Nyamenle tie me. 17 Nɔsolɛ, nwonlomɔ ɔ nee ewiazo amuala, mekponle, meteɛdea nu mefa me edwɛkɛ meto me Nyamenle anyunlu, na ɔtie me ɛzunlɛ noko. 18 Ɔbalie me ɛkɛla ne yeavi konle ne mɔɔ bɛ nee me ɛlɛko la anu; ɔluakɛ me kpɔvolɛma ne mɔ zonle somaa. 19 Awulae badie me edwɛkɛ, na yeabɛlɛ bɛ aze; yemɔ yɛɛ sumunli mɔlebɛbo ne, yezie ewiade dedee yerakpula ɛnɛ a; ɔluakɛ bɛnli ye mɛla zo, na eza bɛnzulo ye.

20 Me gɔnwo ne honle tiale ɔ gɔnwo mɔ, na ɔbule ye ɛwɔkɛ ne azo. 21 Ɔ nloa anu edwɛkɛ, yemɔ ɔle menlemenle zɛhae; noko akee ye ahonle nu, yemɔ ɛkpɔlɛ ngome. Ye ɛdendɛlɛ le bɛtɛɛ kɛ ɔnze nwolɛ bie la; noko akee bɛpɛ kɛ dadeɛ dɛma la.

22 Fa wɔ adesoa muala to Nana Nyamenle anwo zo, na ɔbaho yealie wɔ; ɔnrɛmaa bɛnrɛli nɔhavoma anwo zo konim ɛlɛ. 23 Na wɔmɔ Nana Nyamenle, ɛbavuandi bɛ wɔagua kuma ne abo nehane; ahodiawu ɔ nee adalɛma ɛhye mɔ. Bɛnrɛli bɛ mekɛ ne foa ko bɔbɔ wɔ azɛlɛ ɛhye azo. Na mame mɔ, mebava me rɛle meawula wɔ nu.