1 Gyisɛse vi Asɔne Sua Kpole ne anu zɔhane kenle ne ɔbahɔ la, ye ɛdoavolɛma ne mɔ ko zele kɛ, "Kilehilevolɛ, nea azua ngɛnlɛma ngɛnlɛma ɛhye mɔ! Nea kɛ bɛzi bɛva awole bɛyɛ bane ne mɔ anwo kɛnlɛma bie a."

2 Gyisɛse buale bɛ kɛ, "Amgba, na emomu, bɛnlea! Bɛnrɛgyakyi bolɛ kokye bɔbɔ mɔɔ la ko anwo zo mɔɔ yemɔ bɛnrɛbu bɛnrɛgua ye aze a."

3,4 Na mɔɔ ɔde Boka Ɔlivi ne agye nu mɔɔ di kɔne Gyɛlusalɛm azo ɛkɛ la, Pita, nee Gyemise nee Dwɔn, nee Andelu mɔ rale ɔ nwo ɛkɛ na bɛbizale ye kɛ, "Kenle zu pi yɛɛ ɛhye mɔ amuala bazi wɔ Asɔne Sua Kpole ɛhye anwo zo a? Na saa ɛhye mɔ amuala bayɛ ɛkɛ ɛdeɛ a, ɛnee nwolɛ sɛkɛleneɛ a le boni?"

5 Ɛhye anwo, akee Gyisɛse hanle edwɛkɛ dɔɔnwo, ɔzele bɛ kɛ, "Bɛmmamaa awie biala bɛlɛbɛla bɛ, 6 ɔluakɛ, dɔɔnwo ne ala bara wɔ me duma nu araze kɛ, bɛmɛ a bɛle bɛ Ngoanedievolɛ ne a, na bɛbamaa menli dɔɔnwo ne ala avo adenle ne. 7 Na konle konle noko basisi ɛleka ɛleka moamoa nee yɛ bo anwo ɛke ala, noko akee ɛhye ɛngile kɛ awieleɛ mekɛ ne ɛdwu.

8 "Ɔluakɛ, maanle maanle baho atia bɛ nwo ngoko ngoko, na azɛlɛkpusulɛ dɔɔnwo bara wɔ ɛleka dɔɔnwo ne ala, na ɛhɔne noko ara. Na ɛhye mɔ amuala kile anwubɛnyunlu kpole ne mɔlebɛbo ne ala. 9 Na saa ɛhye mɔ bɔ ɔ bo kɛ ɔsisi a, ɛnee bɛnlea bɛ nwo boɛ! Ɔluakɛ, bɛbahɔ amaneɛnwunle nu. Bɛbaye bɛ bɛ nee bɛ ahɔ mgbanyinli anyunlu wɔ bagua nu; na bɛabo bɛ wɔ ayialeka ne mɔ, na bɛagyinla amɛnladoma nee arelemgbunli anyunlu na bɛabua bɛ ndɛne wɔ mame me ti, na bɛava bɛali daselɛ kɛ bɛle me ɛdoavolɛma. Na ɛhye noko a le bɛ mekɛ kpalɛ ne mɔɔ ɔwɔ kɛ bɛka Edwɛkpa ne bɛkile bɛ a. 10 Na ɔwɔ kɛ bɛdumua bɛda Edwɛkpa ne noko ali bɛkile maanle maanle kosooti kolaa na awieleɛ mekɛ ne adwu. 11 Na saa bɛkye bɛ, na saa bɛkabua bɛ mgbɔvodɛne a, bɛmmamaa edwɛkɛ mɔɔ bɛbaha bɛalie bɛ nwo la yɛ bɛ adwenledwenle. Bɛha edwɛkɛ biala mɔɔ Nyamenle ɔdaye ɔkɛze bɛ ala la. Ɔluakɛ, tɛ bɛ a bɛbadendɛ a, na emomu, Sunsum Nwuanzanwuanza ne ɔ.

12 "Mediema bayeye bɛ nwo ngoko ngoko amaa ewule; selɛma baye bɛ mra amaa, yɛɛ ngakula noko baye bɛ awovolɛma amaa kɛ bɛhu bɛ. 13 Na awie biala bakpɔ bɛ kɛmɔ bɛle me deɛ la ati. Na awie biala mɔɔ kɛgyinla kpundii kɛhɔ awieleɛ, mɔɔ ɔnrɛkpo me la, yemɔ a bɛbalie ye ngoane a.

14 "Na saa bɛnwu kɛ deɛ anwo ɛzulolɛ ɛzulolɛ ne gyi Asɔne Sua Kpole ne anu, wɔ ɛleka mɔɔ ɔnle kɛ ɔgyinla la a, adiema kengavolɛ, te ɛhye abo kpalɛ o! tu, saa ɛkɛhola a, kɔ kɔvea Dwudiya awoka ne mɔ avinli. 15,16 Nriandi kpalɛ! Saa ɛde abenlana bie anu wɔ wɔ sua ti zo bɔbɔ a, mmaka kɛ ɛdwu aze wɔahɔwolo wɔ sua ne anu, yɛɛ eza mmakɔfa debie biala wɔ sua ne anu noko. Eza saa ɛwɔ ɛya nu noko a, mmasia ɛ nzi bieko ɛbafa wɔ ezukoa anzɛɛ wɔ agyapandeɛ bɔbɔ.

17 "Nrenzɛvolɛma nee mrɛladane mɔɔ bɛlɛtete bɛ mra wɔ zɔhane mekɛ ne anu la, bɛ gyakɔ. 18 Na bɛzɛlɛ ɛsesebɛ ɛsesebɛ ne ala kɛ, bɛ ɛnriandinlɛ ɛhye mmasi wɔ fɔsɛlɛ mekɛ nu. 19 Ɔluakɛ mɔɔ bazi la le nwanwanedeɛ mɔɔ sumunli kɛ bɛbɔle ewiade la bie ɛtɛsile ɛlɛ a, yɛɛ bie zɔhane noko ɛnrɛzi bieko. 20 Na saa Awulae ampɛ anwubɛnyunlu zɔhane azo sikalɛ ko a, yemɔ ɛkɛla biala ɛnle ɛkɛ ne mɔɔ yemɔ ɔbanyia ngoane wɔ azɛlɛ ye azo a. Noko ɔlua ye menli mɔɔ yekpa bɛ la ati ɔbapɛ zɔhane mekɛ ne azo sikalɛ.

21 "Na mekɛ zɔhane anu, saa awie biala se bɛ kɛ, ‘Ngoanedievolɛ ne ɛne’ a, anzɛɛ kɛ, ‘Yemɔ a lua lɔ la,’ a, bɛduodua bɛ nzo, bɛmmadie bɛdi. 22 Ɔluakɛ, Ngoanedievolɛma adalɛ nee ngapezoma adalɛma dɔɔnwo ne ala badwazo mɔɔ bɛbayɛ nwanwane ninyɛne dɔɔnwo na bɛahile sɛkɛlɛndeɛ ɛzulolɛ ɛzulolɛ, mɔɔ saa wɔannea bɔbɔ a bɛbava bɛabɛlɛbɛla Awulae Nyamenle mumua ne Ɔ mra mɔɔ yekpa bɛ bɔbɔ la a. 23 Bɛnlea boɛ! Mebɔ bɛ kɔkɔ dɛbadɛba!

24 "Na wɔ anwubɛnyunlu ne anzi, akee sɛnzɛne ne bayɛ kusuu, na siane ne noko ɛnrɛda, 25 na nwɔlɛra ne mɔ noko badudu agua aze na anwuma maanle ne amuala bawozo gyigyi gyigyi zɛhae ala.

26 "Akee aleɛabo amra amuala banwu Medame, Sonla Ra ne, kɛ mevi amungu kusuu ne anu melɛba wɔ tumi nee anyunlunyia kpole nu. 27 Na akee mebazoa anwumabɔvolɛma ne mɔ amaa bɛahɔboɔboa me menli mɔɔ mekpa bɛ wɔ ewiade ɛleka biala la anloa.

28 "Akee bɛva ɛzukoalɛdeɛ ɛhye bɛvi dɔma baka ne anwo. Saa ɔbɔ ɔ bo kɛ ɔbɔ ndotolo, na ɔwula nya a, ɛnee bɛze kɛ fɔsɛlɛ mekɛ ɛbikye ala ɛne. 29 Zɔhane ala noko yɛɛ saa mɔɔ meha la bɔ ɔ bo kɛ ɔsisi a, ɛnee bɛnwu ye wienyi na bɛlie bɛli kɛ me maleɛ ne ɛkpumgbu zo a, kɛ, ɛnee medwu wɔ anlenkɛ ne anloa bɔkɔɔ.

30 "Nɔhalɛ, mese bɛ kɛ, ɛhye mɔ a le me maleɛ ne anzɛɛ ewiade ye awieleɛ ne anwo sɛkɛlɛndeɛ a. 31 Anwuma nee aze bapɛ nu aze ahɔ, na me edwɛkɛ ne ɛdeɛ, yemɔ bɛnrɛpɛ nu bɛnrɛze ɛlɛ, ɔwɔ ɛkɛ ne dahuu dahuu.

32 "Na kenle kpɔkyee zɔhane anzɛɛ dɔnehwele holɛ ko ne mɔɔ ɛhye mɔ amuala bazi nuhua la ɛdeɛ, yemɔ awie biala, bɔbɔ Anwumabɔvolɛma ne mɔ mɔɔ wɔ anwuma belemgbunli maanle ne anu la, anzɛɛ mame bɔbɔ, biala ɛnze; Selɛ ne ala a ze a. 33 Na suzuamgba ala mɔɔ bɛnze mekɛ mɔɔ ɛhye mɔ amuala bazi la ati, bɛla bɛ nwo zo. Bɛmaa bɛ nye ɛla me ade, wɔ me maleɛ ne anwo.

34 "Me maleɛ ne le kɛ nrenyia bie mɔɔ dule adenle hɔle maanle gyɛne zo la. Ɔhyɛle ye ɛkpavolɛma gyima ne ɔmaanle bɛ kɛ bɛyɛ kolaa na yeahɔ, na eza noko ɔzele ye aako sinzavolɛ ne kɛ ɔmaa ɔ nye ɛla ye ade.

35-37 "Ɛhye ati bɛgua bɛ nye aze kpalɛ! Ɔluakɛ, bɛnze kenle mɔɔ mebara a, saa wɔ nɔsolɛ nu o, saa nɔɔzo o, saa aleɛbahye o, anzɛɛ saa ewiazo o, bɛnze! Bɛmmamaa mebato bɛ kɛ bɛdeda o. Bɛzinza bɛhendɛ me maleɛ ne! Ɛhye a le me nrɛlaleɛ mɔɔ melɛfa meamaa bɛ nee awie biala a."