Reino dos céus

Msimo wa kiikizo chekufiswacho

44 "Useuta wa uwanga wa Muungu waigana na kiikizo chekufiswacho mwe mnda. Mntu yumwe ekuiyonaho akaifisa vituhu, akawa na kinyemi muno akenda kutaga vintu vyose ekuwavyo navyo, na akaugua uda mnda."

Msimo wa shanga zetangwazo lulu

45 "Naho Useuta wa uwanga kwa Muungu waigana na mtabiashaa yumwe mwoondeza lulu ntana, 46 na ekupataho lulu mwenga ya hea nyingi muno, akenda kutaga vyose ekuwavyo navyo, akaigua ida lulu."

Msimo wa mbeyu yetangwayo haladali

31 Yesu akawamba wantu msimo mtuhu, "Useuta wa uwanga kwa Muungu waigana na mbeyu yetangwayo haladali ekuidoayo mntu yumwe, akaihanda mwe mnda wakwe. 32 Mbeyu iyo ni ndodo kusima mbeyu zose, akini ihotaho yawa mtenge mkuu kusima mitengea yose, naho yakuwa na kutenda mti mkuu na wadege wawezea mti uwo na kuzenga masasa mwe matambi yakwe."

Msimo wa hamila

33 Yesu akawagombeka msimo mtuhu, "Useuta wa uwanga wa Muungu waigana na hamila ekudoayo mvyee yumwe, akaihanganya mwe madebe yakwe maidi ya unga wa ngano na hindi, ata unga wose ukaumuka."

Msimo wa ndago

24 Yesu akawamba wantu msimo mtuhu, "Useuta wa uwanga kwa Muungu waigana na mntu mwekuhanda mbeyu ntana mwe mnda wakwe. 25 Iya wantu wekuwaho wagona akeza mmasa wakwe akahanda ndago gatigati ya mnda wa uhemba, akaita. 26 Naho mbeyu zekuhotaho na mitengea ikakuwa na kuvoka kuvyaa, viyaviya ndago ikavoka kuoneka. 27 Wandima wa yuda mwenye mnda wakamwezea na kumwamba, ‘Mkuu khwekuhanda mbeyu ntana mweunu mnda wako? Inu ndago ilawiiya hahi?’ 28 Yee akawatambaisa ‘Mmasa nee mwekutenda ivyo.’ Wandima wakwe wakamuuza, ‘Ivi, wakunda tiite tikayang’oe?’ 29 Iya akagombeka ‘mwesekuita kuyausa kwaviya kisingi muusaho mainde, mwadaha kuusa ndago hamwe na uhemba.’ 30 Ekani uhemba na mainde vikue vyose hamwe adi kisingi cha ubosi. Kisingi icho nenda niwambe wabosi, wavoke kuika hamwe mainde, wayafunge matitamatita yokwe moto wakabinda waike hamwe na uhemba na kuika mwe taa."

Yesu asosooa msimo wa mainde

36 Naho Yesu akadiaga dia zumwezumwe da wantu, akengia nyumbani. Wahina wakwe wakamtimia na kumwamba, "Tisosoee mana ya uda msimo wa mainde za mwe mnda."

37 Yesu akawatambaisa, "Mhasi wa zia mbeyu ntana ni Mwana wa Mntu, 38 uda mnda ni inusi. Zia mbeyu ntana ni wantu wada ambao Useuta ni wao. Akini yada mainde ni wada wantu wa Ibiisi, 39 mmasa mwe kuhanda ida mainde ni Ibiisi, ubosi ni kisikiizi cha inusi wabondaji ni wandima wa uwanga kwa Muungu. 40 Inga viya muonavyo mainde yaikwavyo hamwe na kokwa moto, nee ivyo vyendavyo viwe mwe kisikiizi cha inusi. 41 Mwana wa Mntu enda awaagiiye wandima wakwe wa uwanga kwa Muungu wawaike hamwe wantu kulawa mwe Useuta wakwe, na wada wose wawatendao wantu wagosoe mavigaviga na wada wose wagosoao ubanasi, 42 na kuwatambika mwe tanuli da moto, na uko wendawaiye na kuuma meno kwaajii maumevu makai. 43 Naho wada wantu wekugosoayo yada yamtamiayo Muungu wendawang’ae inga zua mwe Useuta wa Tate yao. Mwenye magutwi na ategeeze!

Msimo wa wavu wakulowa samaki

47 "Naho, Useuta wa uwanga kwa Muungu waigana na wavu wekwasigwao na walowa samaki mwe mazimshindo, ukagwiiya samaki wa kia mbai, 48 Wekumemaho, wantu wakaubuuta adi khandakhanda ya mazimshindo, wakekaa na kuwasaguwa samaki watana na kuwaika mwe majumu yao na samaki wafyaimi wakasigwa." 49 Nee ivyo vyendavyoviwe kisikiizi cha inusi, wandima wa uwanga kwa Muungu wendawalawiiye, na kuwabahua wantu wafyaimi na wantu wedi, 50 nakuwasa awo wafyaimi mwe tanuli da moto. Uko wendawaiye na kuuma meno kwa maumevu makai.

Kinyemi cha kwei

3 "Wendawawe na nyemi wada wantu wamanyao kuwa wamkunda Muungu mwe wekazi wao,

Mana useuta wa uwanga kwa Muungu ni wao.

4 Wendawawe na nyemi wada wekuwao na hovu,

Mana awo wenda wahongezwe.

5 Wenda wawe na nyemi wada wahuhusi,

Mana wendawahokee si ambayo Muungu ekuwaikiayo kiaga endaawekhe.

6 Wenda wawe na nyemi wada wenye saa na khiu ya kugosoa akundavyo Muungu,

Kwaviya wenda weguswe.

7 Wendawawe na nyemi wada wenye mbazi,

Kwaviya wenda wafiiwe mbazi.

8 Wenda wawe na nyemi wada wenao moyo mtana,

Kwaviya awo wenda wamwone Muungu.

9 Wenda wawe na nyemi wada waetao uivanisi,

Kwaviya awo wenda wetangwe wana wa Muungu.

10 Wendawawe na nyemi wada wasuumizwao kwaajii ya kugosoa viya akundavyo Muungu,

Kwaviya Useuta wa uwanga uko kwa Muungu ni wao.

11 "Mwenda muwe na nyemi nywinywi wantu wendaho wawabee na kuwasuumiza na kuwagombeka ya ufyaimi wa mbai yoyose kwa uhokho kwaajii ya miye. 12 Muwe na nyemi muno kwaviya funge yenu ni khuu uko uwanga kwa Muungu. Ivyo nee wekuwasuumizavyo waoni wa Muungu wekuwaaho kisingi khamzati kuwaaho.

Mkuu nindai?

1 Kisingi kiya wahina wakamwezea Yesu, na kumuuza, "Nindai mkuu muno mwe useuta wa uwanga kwa Muungu?"

2 Yesu akamwetanga mwana mdodo na kumgoosa gatigati yao, 3 Aho akawagombeka, "Nawamba kwei, mkesekuhituka na kuwa inga wana khamnamwengiye katu mwe useuta wa uwanga kwa Muungu. 4 Kwaiyo mntu yoyose ajinyenyeekeshae inga mwana uyu, nee endae awe mkuu kusima wose mwe useuta wa Muungu.

14 Yesu akagombeka "Waekeni awo wana weze hangu, naho msekuwakindia, kwaviya Useuta wa uwanga kwa Muungu ni wa wantu wekuwao inga wana awa."

23 Aho Yesu akawamba wahina wakwe, "Kwei nawamba indaiwe khavidahika muno kwa mwenye vintu vingi kwengia mwe Useuta wa uwanga kwa Muungu. 24 Naho nawamba ni vihufu ngamia kwemboka mwe ntundu ya singano kusima mwenye vintu vingi kwengia mwe Useuta wa Muungu."

25 Wada wahina wakwe wekusikiaho ivyo wakahondomaa muno wakauzana, "Nindai adahae kuoholwa?"

26 Yesu akawakauwa, akagombeka, "Kwa mntu mbui inu khaidahika, iya kwa Muungu mbui zose zadahika."

5 Wandugu zangu tegeezeni, ivi Muungu khakuwasagua wada wakiwa wa inusi wawe wenye vintu vingi kwa kuzumiiya na kuuhokea useuta ambao Muungu nee kawaikia kiaga wada wamkundisao?

Khiwamanya nywie

21 "Khio kia mntu anetangae ‘Zumbe, Zumbe,’ enda engie mwe Useuta wa uwanga kwa Muungu iya ni yudadu mgosoa yada ya Tate yangu wa uwanga.

19 Naho mntu yoyose mwendaabade kutongea miko na kuwahinya wantu ivyo, endaetangwe mdodo muno mwe Useuta wa uwanga kwa Muungu, iya mntu azigosoae na kuzihinya, uyo endaetangwe mkuu mwe Useuta wa Uwanga uko kwa Muungu 20 Nawagombeka, mwakundigwa mugosoe yada Muungu ayakundayo kusima viya wekugosoavyo wahinyi wa miko ya Musa na Mafalisayo, ama khivyo khamnamwengie mwe Useuta wa uwanga uko kwa Muungu.

9 Naho ivi nemkundigwavyo kuvika,

‘Tati yetu mwe uko uwanga kwa Muungu,

Zina dako ditogolwe muno.

10 Useuta wako weze.

Yada ukundayo yagosoke uko uwanga kwako Muungu na yagosoke mwe inusi

Yohana Mbatiiza abiikia wantu

1 Misi ziya Yohana Mbatiiza keza akibiikia mwe nyika ya Uyahudi na akigombeka, 2 "Mhitukieni Muungu na mbade mavigaviga yenu kwamana useuta wa uwanga kwa Muungu uhehi."

17 Kuvokea kisingi icho, Yesu akavoka kubiikia akagombeka, "Hitukani na mbade mavigaviga yenu kwamana useuta wa uwanga kwa Muungu uhehi."

7 Na mwiitaho biikiani ivi, ‘Useuta wa uwanga kwa Muungu uhehi!’

11 Iya nawamba kwei wantu wangi wendaweze kulawa awio da zua na engiiyo da zua naho wendawekae he ntafuno hamwe na Ibulahimu, na Isaka na Yakobo mwe Useuta wa uwanga kwa Muungu.

11 Nagombeka kwei mwa wantu wekuvyaigwao na wavyee, khazati kulawiiya mntu mkuu inga Yohana Mbatiiza, akini ambae ni mdodo muno mwe useuta wa uwanga kwa Muungu, ni mkuu kusima Yohana 12 Kuvokea kisingi cha Yohana Mbatiiza adi isasa Useuta wa uwanga kwa Muungu wapatikana kwa nguvu, naho wantu wenye udaho wageeza kuudoa.

28 Kwaviya tahokea Useuta uda ambao khaudaha kuzingizwa na tiwe na ntogoo, ivyo timvike Muungu kwa viya vimtamwizavyo kwa kweonyesha kumtunya muno. 29 Kwaviya Muungu yetu ni inga moto mkai udagamizao.

10 Kwa ivyo, wandugu zangu, fundana kutendesa kuugosoa uwo wetango wenu mwekwetangiwao na Muungu uwe mbui ya misi zose he kwekaa kwenu, ati mkekaa ivyo khamnamgwe katu, 11 Kwa sia iyo mwendamjaiwe kwekhigwa haki kamii ya kwengia mwe useuta wa kae wa Zumbe na Mwohozi yetu Yesu Klistu.

18 Zumbe endaaniohoe na mbui zose za makwasukwasu na kunidoa pheho adi mwe useuta mkuu wakwe wa uwanga kwa Muungu. Kwakwe kuwe ukuu wa misi yose kwesiho kisiikizi.

Utajii wa uwanga kwa Muungu

32 Msekuogoha, nywinywi zumwezumwe dodo, kwaviya Tati yenu katamiwa kuwekha Useuta.

5 Manyeni pwii kuwa, mkianga na wagosoao usama na wenye khwiina ya vintu, mntu inga uyo aigana na mvika vizuu awo wose khawana waupate useuta wa Muungu.