Como era a relação de Jesus com pedro: os maiores ensinamentos de Cristo ao seu seguidor

Ya piglong ni Jisus kan Pédro

15 Pagkatigkas nilan kuman, miglong si Jisus kan Simon Pédro, "Kay Simon na iseꞌ ni Juan, unu, dakulaꞌ ya pagginawa mu kanak kay sa kadég yeiy?" Aw tyumubag si Pédro, "E-e, kay Matas na Pangulu. Kya-ede-an mu na to-o ta kaw pigginawa͡an." Aw miglong si Jisus kanan, "Pakana ya kanak manga karniro." 16 Miglong pa uman si Jisus, "Kay Simon na iseꞌ ni Juan, unu, tengteng aku mu pigginawa͡an?" Aw law ni Pédro, "E-e, kay Matas na Pangulu, kya-ede-an da mu saba na to-o ta kaw pigginawa͡an." Aw miglong pa uman si Jisus, "Diyagayi ya kanak manga karniro." 17 Dun ni katlu na usip ni Jisus, miglong sakanan, "Kay Simon na iseꞌ ni Juan, unu, tengteng aku mu pigginawa͡an?" Migkalat ya ginawa ni Pédro asuntu na pig-usip sakanan ni Jisus na makatlu, "Unu, pigginawa͡an aku mu?" Yanagaw miglong si Pédro, "Kay Matas na Pangulu, nya-edeꞌ kaw sa kadég. Kya-ede-an da mu saba na to-o ta kaw pigginawa͡an!" Aw miglong si Jisus, "Diyagayi ya kanak manga karniro."

28 Aw pigtatawag ni Pédro si Jisus, "Kay Magpalna-uway, kun tengteng na ikaw ya iyan, na, pakadtuwa aku ni sayid mu dun ni tas na tubig." 29 Aw miglong si Jisus kanan, "Adi kaw!" Yanagaw nyanog si Pédro adti balangay aw nyanaw dun ni tas na tubig pasinan adti kan Jisus. 30 Manang pagbatiꞌ nan sa samet, to-o sakanan nyallek, aw un da galu malemes. Yanagaw mig-ulangag sakanan, "Kay Magpalna-uway! Tabangi aku beg!" 31 Aw maksay ni Jisus pig-awidan ya bekten nan aw engata lekat adti tubig, aw piglongan nan, "Tay sa katagbiꞌ na pagsalig mu kanak! Anangaꞌ kaw magduwaduwa?"

Ya pagbalyaw ni Pédro kan Jisus

54 Aw pigdulus nilan si Jisus aw pigpa-agad adti balay na pangulu na manga magdadugsu-ay. Aw dyumalug uman si Pédro kanilan, manang migpa-awatawat sakanan. 55 Adti pamanag na balay, migduluk ya manga utaw aw nyan-ingkud silan dun pada manalang. Aw migpalapit uman si Pédro aw nyingkud adti tampid nilan. 56 Aw awun sambuk na sugu-anen na bubay na kyumitaꞌ kanan na nyingkud dun, aw pigtengtengan nan si Pédro aw miglong, "Ya utaw ini sambuk uman na eped nan!" 57 Manang migbalyaw si Pédro, law nan, "Kay Déꞌ, walaꞌ ku kilala͡a ya utaw yan!" 58 Walaꞌ kadugay, awun da uman eseg na kyumitaꞌ kanan, aw law nan, "Ikaw uman ya sambuk na eped nilan." Manang tyumubag si Pédro, "Bekeꞌ ku, kay Lew!" 59 Lyumabay da ya sangka-udas aw miglong pa uman ya sambuk na utaw, "Ya eseg ini eped nilan saba, kay taga Galiliya sakanan!" 60 Manang miglong si Pédro, "Kay Lew, walaꞌ ku ka-ede-i ya piglong mu!" Sa talana pa nan miglong, tigkan tyumaga-uk ya manuk. 61 Aw lyumingiꞌ si Jisus aw pigtengtengan nan si Pédro. Aw dun da ni Pédro ka-anenganengi ya piglong kanan ni Jisus, "Sa diliꞌ pa tumaga-uk ya manuk kagaya gabi, balyaw aku mu na makatlu." 62 To-o migkalat ya ginawa ni Pédro, yanagaw lyumuwaꞌ sakanan aw to-o migsugaw.