2 Tu casa a Tatãlui a meu ari multi locuri, altã soi va vã dzãtseam. Ma mi duc s-vã ndregu un loc. 3 Sh-cãndu s-mi duc s-vã ndregu un loc, va s-mi tornu napoi sh-va vã-ljeau ningã mini, tsi aclo iu escu mini s-hits sh-voi.

9 Dupã tsi li dzãsi aesti, cãndu elji ma lu mutrea, lu-anãltsarã tu tser sh-un nior lu lo dit ocljilji a lor. 10 Sh-cum tsãnea ocljilji cãtrã tser, cãndu elu ma s-anãltsa, ia doi bãrbats cu stranji albi stãturã nãintea a lor, 11 sh-lã dzãsirã: "Bãrbats di Galilea, cãtse stats sh-mutrits cãtrã tser? Aestu Isus, tsi s-anãltsã tu tser dit mesea a voastrã, va si s-toarnã ashã cum fudzi, cum lu vidzut cã s-alinã tu tser."

20 Atsel tsi mãrtirseashti trã aesti dzãtsi: "Ie, mini yin trãoarã." Amin. Haidi, Doamne Isus!

12 "Ia, mini yin trãoarã

sh-plata a mea easti cu mini,

tra s-lji da a cathiunui dupã faptili a lui.

36 "Iarã di dzua atsea sh-di oara atsea vãrã nu shtii, nitsi anghilji dit tser, nitsi Hiljilu, ma singur Tatãl. 37 Shi ashã cum tu dzãlili al Noe, ashã va hibã sh-la vinita a Hiljiu a Omlui. 38 Cã ashã cum tu dzãlili atseali di cama nãinti a nicariljei, oaminjlji mãca sh-bea, si-nsura shi s-mãrta, pãnã cãndu Noeul intrã tu varcã. 39 Elji nu aduchirã tsiva, pãnã cãndu vini nicarea sh-lji lo tuts. Ashã va hibã sh-tu vinita a Hiljilui a Omlui.

32 "Cãt di atsea dzuã sh-di atsea oarã, vãrã nu shtii, nitsi anghilji dit tser, nitsi Hiljilu, ma mash Tatãl.

1 Ti chirolu sh-ti sticurili, frats sh-surãri, nu easti ananghi s-vã scriu, 2 cã voi u shtits ghini cã dzua a Domnului va yinã ashãtsi, ca furlu noaptea. 3 Cã, cãndu dzãcã: "Pace sh-sigurantsã," atumtsea un aspãrgãciuni ni-ashtiptat va cadã pristi nãshi, ashã ca durearili a amintariljei a muljeariljei greauã sh-nu va aibã ascãpari.

42 Stats dishtiptat, cã nu shtits tu tsi oarã va yinã Domnul a vostru. 43 Ma si shtits aestã, cã ma s-shtiea nicuchirlu a casiljei tu tsi oarã a noaptiljei va yinea furlu, va armãnea dishtiptat sh-nu va lu alãsa s-lji intra tu casã. 44 Trã aestã voi s-hits etimãsits, cã Hiljiu a Omlui va yinã tu atsea oarã cãndu voi nu lu ashtiptats."

1 Frats sh-surãri, la yinita a Domnului a nostru Isus Hristos sh-la adunarea a noastrã cãtrã nãsu, vã rugãm 2 s-nu vã ascuturats lishor tu minduirili a voastri shi s-nu vã tulburats di vãrã duh, di vãrã zbor icã di vãrã carti cã taha si-scriu di la noi, tsi vã dzãtsi cã ari vinit dzua a Domnului. 3 Vãrã s-nu vã arãdã cu vãrã ilei, cã atsea dzuã nu va yinã, ni vinit ma nãinti rebilipsirea sh-ni discupirit omlu a amãrtiiljei, hiljiu a aspãrdzeariljei. 4 Elu va s-ncuntreadzã sh-va s-analtsã pristi itsido tsi s-acljeami dumnidzã icã tsi s-tinjiseashti tu ncljinari, ahãntu cãt s-apunã tu templul a Dumnidzãlui shi s-aspunã ca Dumnidzã.

16 cã idyiul Domnu cu ursirea, cu boatsea a arhanghilui sh-cu trumbeta a Dumnidzãlui, va dipunã dit tser sh-mortsãlji tu Hristos va s-nyeadzã protslji. 17 Deapoea noi tsi him ninga yiu sh-avem armas, va him arãchit deadun cu nãshi tu niori tsi s-adunãm Domnul tu tser. Sh-ashã va him totãna deadun cu Domnul.

24 "Tu atseali dzãli, dupã munduirea atsea, soarili va si scutidiseascã sh-luna nu va s-da lunjina a ljei. 25 Stealili a tserlui va s-cadã sh-puterili di tu tseruri va s-trundueascã. 26 Atumtsea va lu veadã Hiljilu a Omlui yininda pri niori, cu puteari mari sh-mãriri. 27 Atumtsea elu va pitreacã anghilji a lui sh-va lji-adunã aleptsilji a lui dit patruli vimturi, dit mardzina a loclui pãnã tu mardzina a tserlui."

31 "Cãndu s-yinã Hiljiu a Omlui tu mãrirea a lui, deadun cu tuts anghilji, atumtsea va s-apunã pri thronlu a mãririljei a lui. 32 Sh-tuti natsiunili va s-adunã nãintea a lui, sh-elu va li dispartã unlu di alantu ashã cum disparti picurarlu oili di cãprili. 33 Sh-oili va li bagã di nandreapta a lui sh-cãprili di nastãnga.

11 Deapoea vidzui tserlu discljis, sh-ia, un cal albu, sh-cãvãlarlu tsi eara pri nãsu tsi s-acljima Pistimen sh-Alihios. Elu giudicã sh-alumtã cu ndriptati. 12 Ocljilji a lui eara ca fleaca a foclui sh-pri caplu a lui avea multi curunji. Aclo avea scriatã unã numã, cai nu u shtia vãrã altu dicãt mash elu. 13 Eara nviscut cu stranji aumti tu sãndzi sh-numa a lui eara "Zborlu a Dumnidzãlui". 14 Armata a tserlui lu urma ncãlicat pri calji alghi, nviscuts cu pãndzã di ljin albã sh-chischin. 15 Dit gura a lui ishea unã spatã struxitã cu cai s-agudea natsiunili. Elu va lji picurãreascã cu bãstun di her sh-va calcã voza a yinlui a turbariljei al Dumnidzãu Tutãpututul. 16 Pri stranji sh-pri coapsa a lui avea scriatã unã numã:

Amirãlu a Amiradzlor sh-Domnul a Domnjilor.

26 Cã, macã a vãrui lji yini arushini di mini sh-di zboarili a meali, sh-a Hiljilui a Omlui va lj-yinã arushini di nãsu, cãndu s-yinã tu mãrirea a lui sh-a Tatãlui sh-a sãmtsãlor anghilji.

8 Ma unã tsiva s-nu agãrshits, multu-vruts: cu Domnul unã dzuã easti ca unã njilji di anji, sh-unã njilji di anji ca unã dzuã. 9 Domnul nu amãnã cu tsãnearea a tãxiriljei a lui, cum minduescu niscãntsã cã elu amãnã. Ma easti arãvdãtor cu voi, sh-nu va tra s-chearã vãrã, ma tsi tuts s-toarnã tu mitãnjiusiri. 10 Dzua a Domnului va yinã ca un fur. Atsea dzuã tserurili va chearã cu vrondu, elementili a naturãljei va s-aspargã di foclu, sh-loclu sh-itsido tsi suntu tu nãsu va s-ardã tuti.

11 Macã tuti aesti va s-aspargã, atumtsea tsi oaminji prindi s-hits voi? Voi prindi s-fãtsets unã banã sãmtã sh-dumnidzãsitã, 12 ashtiptãnda sh-cilistisãnda ti apruchearea a dzuãljei a Dumnidzãlui, di la cai tserurili ljea foc sh-va s-aspargã, sh-elementili a naturãljei arsã di dugoarea va s-tucheascã. 13 Ma noi, dupã tãxirea a lui ashtiptãm tseruri nolji sh-loc nou, tu cai bãneadzã ndriptatea.

27 Dupã cum easti apofãsitã ti oaminjlji tra s-moarã mash unã oarã, sh-dupã aestã yini giudicata, 28 ashãtsi sh-Hristolu, cum s-curbãnsi unã oarã ti amãrtiili a multsãlor, va si aspunã di a doaua oarã, fãrã di amãrtii trã atselji tsi lu ashteaptã ti ascãpari.