2 माआं आब्हाअ कोअमेहें जाअखीलुहू रोअलाआ जागू होये, जर ने रोतू ताहां आंय तुमुहूं कोत देतु; काहाके आंय तुमाआं काजे जागू तियार कोउ जाहो. 3 आन जर आंय जात कोइत जागू तियार कोअहीं, ताहां फाशुउ आवित कोइत तुमुहूं माआं जागे लेत जाहीं के जिहीं आंय रोहीं तिहीं तुमू बी रोहा.

9 ओं कोत कोइत तो तियांआं देखते देखतेज उसे विसाइत गोयू, आन वादले तियाहा तियांआं नजरेम रोत टापित लेदू.

10 तियाआ जाअलोअ वेले जेहेलाम तें जुगोअहें एक सारकेज पालित रोयेते, तेहेलाम पाला, बेन माटी पांडे साअके पोवित रोल्या तियांआं जागे आवित उबा रोया, 11 आन कोयो, "ए गालीलवाला, तुमू काहा जुगोअहें पालतेहे? ओज ईसु, जो तुमाआं जागे रोत होरगामेहें विसाइत गोयुहू, जेहें कोइत तुमू तियाहा होरगामेहें जात्लाहा देख्युहू, तेहेंज कोइत तो फाशुउ वापिस आवनारु होय."

20 यीं गोठीइ साक्शी आपनारु एहें कोहे, "होव, आंय वेगुज आवोहो!" आमेन! प्रभु ईसु आव!

12 ईसु कोहे, "उनाआ! आंय वेगुज आवोहो! आन हारेक जोओंहों जियां तियांआं कामोंअ पुरमाणे बक्शीस आपिहीं.

36 "कोडाहाज तियी वेलेए आन दिहोअ बाप्तिम नाहां मुंदू, नेत होरगाआ दुतोहो, आन नेत बेटाह्हाहा, पोन निस्तो बाह्हाहा एतोज मुंदू होये. 37 जेहेलाहा नोहाअ दिही ओता, तेहेंज कोइत माहुंउं बेटाह्हाआ बी आविइलोअ ओवे. 38 काहाके जेहेलाम रेल आवल्यी तिया गालाहा माअहें खातेतेन-पितेते, आन तियांमेहें वेहेवाले बी ओवतेते. जाअहूं जाआं नोहू जाहाजीम ने सोढ़्यू, 39 आन एक्काइजे रेल आवित कोइत तियां आखाहा वोहाड़ीत लेत ने गोयी, ताअहूं जाआं तियांहां किज मुंदू ने गोयू; तेहेंज माहुंउं बेटाह्हाआ बी आविइलोअ आवे.

32 "तिया दिहोअ नेताहां तियी वेलेए बाप्तिम कोडाहाज नाहां मुंदू, ने होरगाआ देवदुतोंहों के ने बेटाह्हाहा; पोन आब्हाहा एतूज मुंदू होय.

1 पोन विश्वासी पाव्हीइला, वेल आन वाडोअ बाप्तिम तुमुहूं लेखीइलोअ कीज गरज कायनाहां. 2 काहाके तुमू सोताहाज वारुहूं जांअतेहे के, जेहें कोइत बांड राती होल्याज आवेहे, तेहेंज कोइत प्रभुउ दिही बी आवनारु होय. 3 जेहेलाम माअहें कोय, "होक होय, आन हाजे हुतेहे होय," ताहां जेहें कोइत पोटाअरीइ बायी पोअ तारास आवेहे, तेहें कोइत उसकाहीज तियां पोअ नाश आवित पोड़े; आन किबी कोइत बी तें वासाअनारे कायने.

42 तियाहा काजे जागते रोवा, काहाके तुमू नाहां जांअते के तुमाआं प्रभु कोड्ले दिहे आवे. 43 पोन ओं जाईंत ल्या के जर कोअ धोणी ओं जांअतू के बांड केती वेले आवे, ताहां तो जागतू रोतू; आन तियाआ कोअमेहें सोरी ने ओवहूं देतू.✝ 44 तियाहा काजे तुमू बी तियार रोवा, काहाके जियी वेलेए बाप्तिम तुमू विसार बी नाहां कोअते, तियी वेले माहुंउं बेटुह्हू आवित लागे.

1 विश्वासी पाव्हीइला, ओमे आपू आपाअ प्रभु ईसु ख्रिस्ताआ फाशोअ आविइलाअ, आन तियाअरी हुंबाहूंब आपाआ टोलू वोलीइलाअ बाप्तिमेहें आंय तुमुहूं रावणी कोअहो:

2 तुमू ओं विसार कोइत के जिहीं मेहें कोयोय के, प्रभुउ दिही आवित पोत्युहू कोत हेलमेहें सकराअहा मा. आन एखा विसारो वाईं नेत एखू भविश्यवाणी नेत, संदेश, नेताहां आमू लेखल्या पत्रावाईं बी मा काबराअहा. 3 तुमू सोताहा किबी कोइत कोडा वाअहीं बी ठोगाअहा मा. काहाके तिया दिहोअ आविइलोअ पेल विश्वास निहींत जाय आन तो खाराब नितीइ माटी मोन्जे आरवाअनारु बेटुह्हू प्रगट ओवे. 4 जो विरोद कोअहे आन जियाहा देव नेत महाराज कोतेहे, एहेला आखा रोत सोताहा वोडु ठरवेहे, तेतोज नाहां पोन तो देवोअ मंदिरोमेहें बोहीत कोइत सोताहा देव होमजेहे.

16 काहाके प्रभु सोताहाज होरगाम रोत उतरे; तियी वेले पोअ वोडू आवाज, आन मुख्य देवदुतोअ शब्दाआ आवाज होंबलाय, आन देवोअ तुरी फुकाय; आन ख्रिस्तामेहें जे मोयेहे, तें पेल जिवित उठे. 17 तेहेलाम आपू जे जिवते आन वासाइत रोहूं, तेहलेज तियाअरी वादला पोअ हावामेहें प्रभुहू मिलीइलोअ काजे विसाइत जाहूं.

24 "तियां दिहोमेहें, तिया तारासोअ फासाड़ी दिही आंदारावालू ओत जाय, आन सांद उजवड़ ने आपे;✝ 25 आन जुगोम रोत तारा निसे टुटीत पोड़े; आन जुगोमेर्‍यीइ सेक्ती आलवाईत जाय.✝ 26 ताहरेए माअहें माहुंउं बेटाह्हाहा वोडी सेक्ती आन महिमाआं आरी वाद्लामेहें आवत्लुज पाले.✝ 27 तियी होमसे तो तियाआ देवदुतोंहों मोकलीत कोइत, धरतीइ ये जोड़पे रोत जुगोअ तिये जोड़पे जाआं, शारी ओरी रोत देवोअ निवड़ीइल्या माअहुंहूं टोलू कोए.

31 "जाहां माहुंउं बेटुह्हू तियाआ महिमामेहें आखा देवदुतोअरी आवे, तेहेलाम तो तियाआ महिमाआ राजगादीपोअ बोहे. 32 आन आखे माअहें तियाआ सामने एकठे कोए; आन जेहलुहू डोरक्यू मेडाहां बोकड़ाम रोत आंगे कोइ देहे, तेहेंज कोइत तो तियांहां एकान बिहीरा रोत आंगे कोए. 33 आन तो मेडाहां तियाआ हाजाड़ीइ वोगेहे आन बोकड़ाहां तियाआ बांगाड़्यीइ वोगेहे उबे कोए.

11 ताहां आंय होरगो उगड़ीइल्यो पाल्यो, आन एक पांडू कोड़ु देखाअयू; तियापोअ जो बोठ्लू होय, तियाहा इमानदार आन खोरु कोतेहे; आन तो निती वाअहीं न्याय आन लड़ाय कोअहे.✝ 12 तियाआ डोआ आगीइ हांगाड़ाआ होस आन तिया मुन्कापोअ जाअखीलाहा टोपा होय, आन तिये डिलोपोअ एक नाव लेख्योहो, जियाहा तियाहा सोड़ीत बिहीरा कोडाहाज नाहां मुंदू. 13 तो रक्तामेहें बुल्ल्ये आंगड़े पोवित होय, आन तियाआ नाव "देवोअ शब्द होय." 14 होरगा मेर्‍यीइ सेना पांडे सोके मोवे आंगड़े पोवित आन पांडा कोड़ापोअ बोहीत कोइत तियाआ फासाड़ी फासाड़ी सालेहे. 15 आखा देसोअ माअहुंहूं माइलाआ काजे तियाआ मुखोम रोत वाडाली तारवाआ निहेंहे. तो लोड़ाआ राजडेंगारा वाअहीं तियांपोअ राज कोए आन आखाम रोत वोडी ताकतवाला देवोअ खोतेए दाराक्शाआ रोहोअ कुंडे सुउवी देय. 16 तियाआ जांगेपोअ आन साअकापोअ ओं नाव लेख्योहो: "राजाआं राजा आन प्रभुउं प्रभु."

26 जर एखू माआं आन माआं हिकाड़ल्यी गोठी पोअ लाजवाये, ताहां माहुंउं बेटुह्हू बी जेहेलाम सोताआ आन तियाआ देव आब्हाअ आन पवित्र देवदुतोंअ महिमाअरी आवे ताहां, तो बी लाजवाये.

8 ✝पोन माआं मेराला, एक गोठ मा विहीराअहा के, देवोअ नजरेमेहें एक दिही हाजार दिहोअ होस होय आन हाजार वोरह्ये एका दिहोअ होस होय.

9 प्रभु तियाआ वायदाअ बाप्तिम वाआ नाहां लागाड़तू, जेहेंकोइत थोड़ेक माअहें समजीइतेहे; पोन तुमाआं बाप्तिमेहें धिर तोअहे, आन कोडो आरवात जाय एहलिही तियाआ इश्शा नाहां, ते आखेज मोन फेरवुंहूं जोवे एहलिही तियाआ इश्शा होय.

10 ✝पोन प्रभुउ दिही बांडोअ होस आवे, तिया दिहोपोअ जुग जुदो तुदड़ीइतोज जातो रोय, तत्वे तोपीत ओगलीत जाय, धरती आन धरतीपोर्‍येए कामे बोलीत जाय*.

11 एहेंकोइत ओं आखो आरवात जानारो होय, ताहां तुमू केहेलेहे रोअहूं जोवे? तुमाआं रोअलोअ पवित्र जोवे आन भक्तीमेहें देवोहो होपाअले माअहें रोअहूं जोवे. 12 तिया देवोअ दिहोअ केहें कोइत वाट जोवुहूं जोवे, आन आपू केतीही कोशित कोअहूं जोवे; जिहींवाईं जुग बोलीत आरवात जाय आन जुगोमेर्‍योअ आखो जास्ती तोपीत ओगलीत जाय. 13 ✝तेबी तियाआ आथवसनोअ परमाणे आपू एक नोवो जुग आन नोवी धरतीइ वाट जोवतेहे जिहीं देवोअ सतीपण रोय.

27 आन जेहलोहो मोनवीइ एकुज वारी मोइलो तिहींरोत न्यायनिवाड़ु ठरवीत मिक्युहू. 28 तेहेंज कोइत ख्रिस्ते बी जाअखीला जोओंअ पापोहों विसीत लेअलोअ काजे एकुज वारी गाराहा बोण्यु; आन बिहीरी वारी तो जें माहें तियाआ वाट जोवतेहे, तियांआं पापोअ काजे नाहां, पोन तियांआं तारणोअ काजे देखाये.