1 जाहां ईसु मंदिरोमेहें रोत निहीत जानु वोल्यू, ताहां तियाआ सेला तियाआ जागे तियाहा मंदिरोअ बोणावट देखाड़ीलोअ काजे आया. 2 तिये तियांहां कोयो के, "तुमू आखा ओं देखताहा ना? आंय तुमुहूं नक्की कोहो, इंहीं ने खोदलाय एहेलुहू डोणोपोअ डोण बी ने रोय."

3 आन जाहां ईसु जेयतुन डोगोपोअ बोठू, ताहां सेला आंगेज आवित कोयो, "आमुहूं को के ए गोठी कोयों ओवे? आन ताआ आविइलोअ, आन दुन्याआ आरवाइलोअ की निशाणी रोये?"

4 ईसु तियांहां उत्तर आप्यो, "हेएजा! कोडो बी तुमुहूं ने ठोगुहूं जोवे. 5 काहाके वारुज एहलेहे माआं नाव से आवित कोये, ‘आंय ख्रिस्त होय,’ आन वारुज जोओंहों ठोगी देये. 6 तुमू लढाय आन लढायीइ सर्सा उनाअहा; पाला, काबराइत मा जाहा; काहाके ओं ओवनारोजे. पोन तियी वेले सेवट ने ओवे. 7 काहाके जाती पोअ जाती, आन राज्यापोअ राज्यो लढाय कोए, आन जागे जागे काल पोड़े, आन धरती आले. 8 ए आखी गोठी ठाल्ले पोड़ीइलोअ पेल्ले वेणे जेहें होय.

9 ✝ 24:9 मत्तय 10:22 "ताहां तुमुहूं दुख देअलोअ काजे तोइत आपे, आन माइत टाके आन माआं नावोअ वाखरी आखी जातीइ माअहें माआं वाखरी तुमाआं सीस कोए. 10 तेहेलाम वारुज जोएं तियांआं विश्वास सोड़ी देये, आन एकान बिहीराहा तोइत आपेन, एकान बिहीराआ सीस कोए. 11 ताहां वारुज ठोग भविश्यवक्ता देखाय आन वारुज माअहोंहों ठोगी देये. 12 आन पाप वादीत जाय तिहीं वाअहीं वारुज जोंओंअ मेर हेली पोड़ीत जाये. 13 पोन जो आखरी जाआं धिर खेटीत रोय, तोज वासाय. 14 आन राज्याआ ए हाजी बातमी आखा देसोमेहें साक्शी ओवे तेहें काजे आखा दुन्यामेहें परसार ओवे, ताहां सेवट ओत जाय.

15 "तिहीं वाअहीं जेहेलाम तुमू तियी उजाड़नारी सिसड़ाअली वस्तुहू पवित्र जागामेहें उबी रोल्यी देखहा. जियीइ बाप्तिम दानियेल भविश्यवक्ताआ पुस्तकोमेहें कोयोहो✝24:15 दानि 9:27; 11:31; 12:11 वासनारो समजीत लेअहूं जोवे. 16 ताहां जो कोडो यहुदीयामेहें ओय तो डोगोमेहें गुगदो वोलुहूं जोवे. 17 जो कोओपोअ ओय, तों तियाआ कोओमेर्‍योअ सामान आनो निसे ने उतरुहूं जोवे. 18 आन जों खेतोमेहें ओय, तों तियाआ कोट आनो वापिस फिरीत ने आवुहूं जोवे. 19 तियां दिहोमेहें जे बोईं पोटाअरी आन हाना पोर्‍याहा बुजी खावाड़तीये तियींइं की हाल ओवे! 20 देवोहो प्रार्थना कोआ; के तुमुहूं हियालामेहें नेत आरामोअ दिहोअ दिही गुगदीइलो ने आवे. 21 काहाके तियी वेले एहेलिही कठीण आफत पोड़े, जे दुन्याआ सुरुवातिही रोत ओमे जांआं नाहां पोड़्यी, आन ने केदिहीं पोड़े.✝24:21 यहे 5:9; दानि 12:1; प्रगटी 7:14 22 आन ते दिही जर कमी ने कोआता, ताहां कोडोज ने वासाअतो; पोन निवड़ीइल्या माअहोंअ काजे ते दिही देव कमी कोई देये.

23 "तियी वेले जर एकदो तुमुहूं कोये के, ‘पाला, ख्रिस्त इंहीं होये!’ नेत ‘तिहीं होय!’ ताहां भरिवसू मा कोअहा.✝24:23 लुक 17:23; 21:8 24 काहाके ख्रिस्तविरोधी आन ठोग भविश्यवक्ता उठीत उबा रोये, आन वोडी निशाणी आन वोडे कामे देखाड़े, के जर ओत सेके ते निवड़ीइल्याहां बी ठोगी देये. 25 उनाआ! आंय तुमुहूं पेलरोतुज ओं आखो कोत देदोहो.

26 "तियाहा काजे जर ते तुमुहूं कोय, ‘पाल, तो जंगलोमेहें होय,’ ताहां तिहीं मा जाहा; आन ते कोय, ‘पाला, मांयते खुलीमेहें होय,’ तेबी भरिवसू मा कोअहा. 27 काहाके जेहेंकोइत दिही उगताआ वोगेहे निहीत कोइत दिही बुडताआ वोगेहे विज विजलीइतीज जाहे, तेहेंज कोइत माहुंउं बेटाह्हाआ बी आविइलोअ आवे.

28 "जिहीं मोल्यो तोड़ रोय, तिहीं डिगरावा टोलू वोले.

29 "तियां दिहोमेर्‍याआ तारासोअ फाटी ताबुड़ दिही कालू ओत जाय, आन सांदोअ उजालो जातो रोय, आन तारा जुगोमेहें रोत टुटीत पोड़े आन जुगोमेर्‍यीइ आखी ताकत तियीइ जागे रोत आलित जाय. 30 आन तियी वेले माअहुंउं बेट्टाहाआ निशाणी जुगोम देखाय; आन ताहां धरतीइ आखे माअहें रोड़े; जेहलामेहें तें माहुंउं बेटाह्हाहा जुगोमेर्‍याआ वाद्ला पोअ वोडी सेक्ती आन ताकते वाअहीं आवत्लाहा देखे. 31 आन तुरीइ वोडू आवाज आवे, तेहेलाम तो तियाआ देवदुतोहों मोकले, आन ते जुगोअ एका खुणामेहें रोत ते बिहीरा खुणाम जाआं तियाआ निवड़ीइल्या माअहोंहों टोलू कोए.

32 "अंजिर साड़ोप रोत ए गोठ सिकाआ: जाहां तियाआ डालीइ डिरा फुटताहा आन पाने वोअलीतेहे, ताहां तुमू जाइंत लेतेहे, के उनालू आहने होय. 33 एहेंज कोइत, जाहां तुमू ए आखी गोठी पालहा, ताहां ओं जांअजा, के वेल आहने होय, निस्ती बाअपुरेज होय. 34 आंय तुमुहूं नक्की कोहो, के जाअहूं जाआं ए आखी गोठी पुरी ने ओत जाय, ताअहूं जाआं ए पिड़ी ने सेलाय. 35 जुगेन धरती आरवात जाय, पोन माआं वसने केदीहींज ने आरवाय.

36 "कोडाहाज तियी वेलेए आन दिहोअ बाप्तिम नाहां मुंदू, नेत होरगाआ दुतोहो, आन नेत बेटाह्हाहा, पोन निस्तो बाह्हाहा एतोज मुंदू होये. 37 जेहेलाहा नोहाअ दिही ओता, तेहेंज कोइत माहुंउं बेटाह्हाआ बी आविइलोअ ओवे. 38 काहाके जेहेलाम रेल आवल्यी तिया गालाहा माअहें खातेतेन-पितेते, आन तियांमेहें वेहेवाले बी ओवतेते. जाअहूं जाआं नोहू जाहाजीम ने सोढ़्यू, 39 आन एक्काइजे रेल आवित कोइत तियां आखाहा वोहाड़ीत लेत ने गोयी, ताअहूं जाआं तियांहां किज मुंदू ने गोयू; तेहेंज माहुंउं बेटाह्हाआ बी आविइलोअ आवे. 40 तियी वेले बेन जोएं खेतोमेहें रोय, एक विसाइत जाय आन बिहीरो रोत जाय. 41 बेन बाय कोअटी ओड्या कोए, तिहींमेएं एक विसाइत जाय आन बिहीरी रोत जाय. 42 तियाहा काजे जागते रोवा, काहाके तुमू नाहां जांअते के तुमाआं प्रभु कोड्ले दिहे आवे. 43 पोन ओं जाईंत ल्या के जर कोअ धोणी ओं जांअतू के बांड केती वेले आवे, ताहां तो जागतू रोतू; आन तियाआ कोअमेहें सोरी ने ओवहूं देतू.✝24:43 लुक 12:39-40 44 तियाहा काजे तुमू बी तियार रोवा, काहाके जियी वेलेए बाप्तिम तुमू विसार बी नाहां कोअते, तियी वेले माहुंउं बेटुह्हू आवित लागे.

45 "ताहां इमानदार आन हुशार सेवक कोडो होय, जियाहा मालख्ये तियाआ नौकरों-साकर्‍या पोअ मुकड़दम ठरव्यू, के वेलेपोअ तियांहां रोटू आपे. 46 हाजू होय तो सेवक, जियाहा तियाआ मालिख आवित एहेलोह कोअत्लाहा देखे. 47 आंय तुमुहूं नक्की कोहो; मालिख तिया सेवकोहो तियाआ आखा मालधनोपोअ आधिकारी ठरवे. 48 पोन जर तो सेवक मोनोम खाराब विसार कोऊ वोले के, माआं मालख्योहो वाआ लागेहे. 49 आन जर तो आरीइ हाती नौकरोहों देनू वोले, आन पिदाड़ोंअरी खायेन-पिये. 50 ताहां तिया सेवकोअ मालिख एहेला दिहोपोअ आवे, जेहेलाम तो सेवक तियाआ वाट बी ने जोवतुये, आन एहेलिही वेले के तियाहा मुंदू बी ने ओये, 51 आन मालिख तियाहा डुनकान डुन्का कोई देय, तियाआ भाग ढोंगड़ाय कोअनाराअरी ठरवे: तिहीं रोड़ीइलोन दात कोकराविलोअ रोय.