1 फाशुउ ईसु माअहोंअरी काईं वाअहीं गोठी कोउ वोल्यू. 2 "होरगाआ राज तिया राजाआ होस होये, जिये तियाआ पोर्‍याआ वेहेवालोअ रोटू खावाड़्यू. 3 आन तिये जियांहां वेहेवालोअ नेवतो आप्यो, तियांहां हादे तेहें काजे तियाआ पावरोहो मोकल्या; पोन तियां माअहूं तो नेवतो ने स्विकार कोअयो. 4 ताहां तिये तियाआ पावरोहो ओं कोत कोइत मोकल्या, नेवतो आपल्या माअहुंहूं कोवा: ‘पाला, आंय पांगात तियार कोइ देदीही, माआं पाल्ल्या गोदा आन पाल्ल्ये जनवारे माइत कोइत आखो तियार होये; वेहेवालोअ पांगातीमेहें आवा.’ 5 पोन नेवतो आपल्या माअहूं दिहान ने देदो, आन तें जिव जिवोअ कामे जाते रोये: एखु खेतोमेहें जातु रोयू, ते एखु तियाआ धंदापोअ जातु रोयू, 6 बिहीरा माटी तियां बाकी पावरोहो तोइत अपमान कोअयू आन माईंत टाक्या. 7 ताहां राजाहा जाअखीलिही खोत लागी, आन तिये तियाआ सेयनिकोहों मोकलीत तियां माअनाराहां आरवीत टाक्या, आन तियांआं होयरोहो आग लागाड़ी देदी. 8 ताहां तिये तियाआ पावरोहों कोयो, ‘वेहेवालोअ पांगात तोम तियार होय, पोन हादल्ये माअहें लायक ने ओते. 9 तिहीं वाअहीं तुमू वोडी सड़केपोअ जात कोइत, जें तुमुहूं जोड़े तियां आखाहा वेहेवालोअ पांगातीमेहें लेतावा.’ 10 ताहां ते पावर सडके पोअ जात कोइत हाजे-बाक्ते जेतेहे बी मिल्ये, तेतां आखाहा एकठे कोअये; आन वेहेवालोअ तोंबू माअहूं वाअहीं पोआत गोयू.

11 "जाहां राजा पावणाहां मिलू मांयते आयू, ताहां तिये तिहीं एका माहुंहूं देख्यो, जो वेहेवालोअ आंगड़े ने पेवयेते. 12 राजा तियाहा फुशो, ‘ए दोस्ता; तू वेहेवालोअ आंगड़े बिगर पोवयेज इंहीं केहें आयू?’ ताहां तियाहा किज उत्तर ने आपाअयो. 13 ✝ ताहां राजा तियां पावरोहों कोयो, ‘याआ आथेन गुडा बांदीत बाअथे आंदारामेहें टाकी द्या, तिहीं रोड़ीइलोन दात कोकराविलोअ रोय.’"

14 ईसु कोयो, "हादल्ये ते जाअखीलेहे होये, पोन निवड़ीइल्ये थोड़े होय."

15 ताहां फरिसी जात कोइत तियां तियांज विसार कोआ वोल्या, के केहें कोइत तियाहा प्रश्नामेहें फसाड़ीत सेके. 16 ताहां ते तियांआं थोड़ाक सेलाहां आन हेरोदोअ पार्ठीइ थोड़ाक जोओंहों ओं कोअलो काजे मोकल्या, "गुरु आमू जांअताहां के तू खोरु होय, आन देवोअ वाट हाजी हुतायी सिकाड़ेहे, आन कोडाआ भेदभाव नाहां कोअतू, काहाके तू माअहुंउं सोब पालीत गोठी नाहां कोअतू. 17 तियाहा काजे आमुहूं को के ताआ विसार कि होये? आपाआ कायदाआ पुरमाणे कैसरोहो कर आपिइलोअ हाजो होय के नाहां?"

18 ईसु तियांआं ए खाराब उद्देश जाइंत कोयो, "ए ढोंगी! माहूं काहा पारजाणताहा? 19 कर पोइलोअ आनो माहूं देखाड़ा."

ताहां ते एक आनो लेत आयान तियाहा देखाड़्यो.

20 आन तिये तियांहां फुशो, "यापोअ ओ कोडाआ साप आन नाव होये?"

21 ताहां तियां कोयो "कैसरोअ." ताहां तिये तियांहां कोयो, "जों कैसरोअ होय तों कैसरोहो; आन जों देवोअ होय, तों देवोहो आपा."

22 जाहां ते ओं उनाअया ताहां पोंगलाईत गोया; आन तियाहा सोड़ीत जाता रोया.

23 ✝ तिये दिहे सादूकी आवित कोना वोल्या के मोतोमेहें रोत फाशोअ जिवीत उठीइलोअ एहेलोह होयज नाहां, आन तियाआ जागे आवित फुशो, 24 ✝"ए गुरु, मोशे कोयोतो के जर कोडो बिगर पोर्‍याआ मोइत जाये, ते तियाआ पाही तियाआ लाडीइरी वेहवाल कोइत तियाआ पायहोअ काजे वंश उब्जाड़े. 25 ओमे आमाआं हांत पाही ओता; पेल्लूउ पाही वेहवाल कोइत मोइत गोयू, आन पोर्‍ये ने ओवये तियाहा काजे तियाआ लाडी तियाआ पायहोअ काजे सोड़ीत गोयू. 26 एहेंज कोइत दुसरे आन तिसरे बी कोअयो, आन सांतू जोओंअ ओंज ओवो. 27 सेली सेलवाआ ते बाय बी मोइत गोयी. 28 ओमे जिवीत उठे ताहां तियां सांतूमेहें रोत ते कोडाआ लाडी बोणे? काहाके ते आखाआ लाडी बोण्यीते."

29 ईसु तियांहां उत्तर आप्यो, "तुमू वसन आन देवोअ ताकत नाहां जांअता; तिहीं वाअहीं तुमू केताहा सुकिम पोड़्याहा! 30 काहाके मोल्ये जिवीत उठे, ताहां तें होरगामेर्‍याआ देवदुतोंअ होस रोये आन तें ने वेहवाल कोए. 31 पोन, मोल्याआं जिवीत उठीइलोअ बाप्तिमेहें केहें तुमू ओं वसन नाहां वाश्यो के जो देव तुमुहूं कोयो: 32 ✝ ‘आंय अब्राहामोअ देव, इसहाकोअ देव, आन याकोबोअ देव होय, तो जिवताआं देव होय मोल्याआं नाहां.’" 33 जेहेलाम ओं उनाअये ताहां माअहें तियाआ हिकवोणो वाअहीं बोगलाइत गोये.

34 जाहां फरिसी उनाअया के ईसु सादूकीइ सोब बोंद कोअयी, ताहां ते एकठा ओवा, 35 आन तियांमेहें रोत एक जोऊं जो कायदाआ हिकवणेएं मास्तर ओतू, तिये तियाहा फारकीइलोअ काजे तियाहा फुशो, 36 "मास्तर, कायदामेहें कोड्लू आदेश वोडू होये?"

37 ✝ईसु उत्तर आप्यो, "‘तू ताआ प्रभु देव यापोअ पुरा मोनोवाअहीं, पुरा जिवोवाअहीं, पुरी ओकले वाअहीं मेर कोओ,’ 38 ओज वोडू आन मुख्य आदेश होये. 39 ✝आन याआज होस ओ बिहीरु बी होय के, ‘तू ताआ जागेवाला पोअ ताआज होस मेर कोअ.’ 40 एज बेनू आदेश मोशेए कायदाआ आन भविश्यवक्ताआं शिक्शणोअ आधार होय."

41 जाहां फरिसी टोलू वोलीत रोयाते, तेहेलाम ईसु तियांहां फुशो,

42 "मसीहाआ बाप्तिमेहें तुमू कि विसार कोअताहा? तो कोडाआ पोर्‍यू होये?" तियां तियाहा कोयो, "दाविदोअ."

43 ईसु तियांहां फुशो, "ताहां दाविद आत्मामेहें आवित तियाहा ‘प्रभु’ काहा कोहे?

44 ✝ "प्रभु माआं प्रभुहू कोयो:

‘जाअहूं जाआं आंय ताआ दुस्मोनोहों ताआ गुडाआ थुड़ी ने टाकी देंव

ताअहूं जाआं माआं हाजाड़ीइ वोगेहे बोहो.’

45 "ताहां, दाविद मसीहाहा ‘प्रभु,’ कोहे, ताहां तो तियाआ पोर्‍यू केहें कोइत बोण्यु?"

46 ईसुउ उत्तरोम तेदिहीं रोत कोडाहा बी तियाहा प्रश्न फुसीइलोअ हिम्मत ने ओवी.