1 ✝ताहां ईसु आरामोअ * दिहोअ दिही खेतोमेहें रोत जातुतो, आन तियाआ सेलाहां फुक लागी, ताहां ते कोहें तोड़ी-तोड़ीइ खाना वोल्या. 2 फरिसी ओं पालीत, ईसुहू कोयो, "पाल, ताआ सेला जो काम कायदाआ पुरमाणे आरामोअ दिहोअ दिही ने कोअहूं जोवे तो काम कोअताहा."

3 ✝ईसु उत्तर आप्यो, "दाविद आन तियाआ हाती फुकवाअला, ताहां तियां कि कोअल्यो तो तुमू नाहां वाश्यो के? 4 ✝ तेबी तो देवोअ मंदिरोमेहें केहें कोइत गोयू, आन देवोहो भेट कोअल्या रोटा कायदाआ पुरमाणे तियाहा आन तियाआ हात्योहों खाअलोअ परवानगी ने ओती, फक्त पुंजाराहा खाअलोअ परवानगी ओती, ते तियां केहें कोइत खादा? 5 ✝ओं तुमू नाहां वाश्यो के? पुंजारा आरामोअ दिहोअ दिही मंदिरोमेहें आरामोअ कायदु तोड़ताहा, तेबी ते निर्दुस ठरताहा. 6 पोन आंय तुमुहूं कोहो के, इंहीं जो होय तो मंदिरो रोत बी वोडु होये. 7 ✝ वसन कोहे, ‘के माहूं दया जोवे, जनवारोअ गाराहा नाहां.’ याआ अर्थ कि होय तो तुमू सोमजीइता, ताहां तुमू निर्दुस माहुंहूं दोशी ने ठरवीइता; 8 काहाके माहुंउं बेटुह्हू आरामोअ दिहोअ बी प्रभु होय."

9 तिहीं रोत सालित कोइत ईसु यहुदीइ आराधनालयोमेहें आयू. 10 तिहीं एक लखवा लागला आथोअ माहुंउं ओतो, फरिसी माअहें ईसु पोअ आरोप लागाड़ीइलोअ काजे तियाहा फुशो के, "आरामोअ दिहोअ दिही बिमारी हुदारीइलोअ ओं कायदाआ पुरमाणे ठीक होय के?"

11 ✝ईसु तियांहां उत्तर आप्यो, "तुमामेहें एहलोहो कोडो होय, जियाआ एक्कुज मेडो ओये, आन तो आरामोअ दिहोअ दिही खाडामेहें पोड़ीत जाय, ताहां तो तियाहा तोइत ने काडे?✝ 12 पाला, माहुंउं किंमत मेडा रोत केतीही वादार होये! तियाहा काजे आरामोअ दिहोअ दिही कायदाआ पुरमाणे हाजो काम कोइलोअ बोराबर होय."✝ 13 ताहां तिये उगाअला आथोवाला माहुंहूं कोयो, "ताआ आथ नांबू कोअ."

ताहां तिये आथ नांबू कोअयू, आन तो आथ बिहीरा हाजा आथोअ होस हाजू ओत गोयू. 14 ताहां फरिसी माट्यों बारथे जात कोइत ईसुहू केहें कोइत माईंलोअ ते योजना कोअयी.

15 ताहां ईसुहू ए गोठ मुंदू पोड़्यी. आन जाअखीलेहे माअहें तियाआ फासाड़ी गोये; आन तिये आखाहा बिमारीम रोत हुदार्‍ये,✝ 16 आन तियांहां कड़क आदेश आप्यू के माआं बाप्तिम बिहीराहा मा कोहा. 17 ओं याआ काजे ओवयो के, जो वसन यशया भविश्यवक्ते कोयो, तो पुरो ओवुहूं जोवे:

18 "पाला, ओ माआं सेवक होय, जियाहा मी निवड़्युहू,

माआं मेरालू होय, यावाअहीं माआं जिव खुस होय.

आंय माआं आत्मा तियापोअ मोकलिहीं,

आन तो बिगर यहुदीही न्यायोअ बातमीइं परसार कोए.

19 तो भान्गड़ ने कोए, आन ने आअड़े,

आन बाजारोमेहें तियाआ आवाज ने कोडो उनाय.

20 तो आडा पोड़ल्या बुआंहां ने मुड़े,

आन पेटात्ली बत्तिही तो ने उलवे,

जाअहूं जाआं तो न्यायोहो मजबुत ने कोए.✝

21 आन आखे माअहें तियाआ नावोपोअ आशा मिके."✝

22 ताहां माअहें एक आंद्ला-मुकाहा ईसुउ जागे लेतावये, जियामेहें पुत ओतू; ईसु तियाहा हुदार्‍यु, आन तो पालु वोल्यू आन गोगु वोल्यू. 23 ए घटना देखीत आखे माअहें बोगलात गोये आन कोने वोल्ये, "केहें ओ दाविदोअ पोर्‍यू नाहां के?"

24 पोन फरिसी ओं उनाइत कोयो, "ओ पुतोअ आधिकारी बालजाबुलोअ* आधारो वाअहींज पुते काडेहे."

25 ईसु तियांआं मोनोअ विसार जाइंत तियांहां कोयो, "जिया राजोमेहें टोला पोड़ताहा, तो उजड़ीत जाहे, आन एकदो होयर नेत कुटूंबो, जियामेहें टोला पोड़ताहा, तों ने टिकीत सेके. 26 आन जर सैतानोहो सैतानुज काडे, ताहां तियांआं सोतामेहेंज टोला पोड़ीत गोया, ताहरोअ तियाआ राज कि कोइत टिकीत सेके? 27 पोन जर आंय बालजाबुलोअ आधारो वाअहीं पुते काडोहो, ताहां तुमाआं पोर्‍ये कोडाआ सेक्ती वाअहीं पुते काडतेहे? तिहीं वाअहीं तेंज तुमाआं न्यायनिवाड़ु कोए. 28 पोन जर आंय देवोअ आत्माआं मदतो वाअहीं पुते काडोहो, ताहां देवोअ राज तुमाआं जागे आवित लागोहो."

29 "नेत ताकतवान माट्योहो पेल बांद्या सिवाय तियाआ कोअमेहें फोहीत तियाआ धन लुटता आवे के? तियाहा बांदे ताहांज तो तियाआ कोअ लुटीत सेकेहे."

30 ✝ "जो माआं हाती कायनाहां तो माआं विरोदी होय, आन जो माअरी टोलू नाहां कोअतू तो वेरेहे. 31 तियाहा काजे आंय तुमुहूं कोहो के माअहोंअ आखी जातीइ पाप आन निंदा माफ ओवे, पोन पवित्र आत्माआं निंदा माफ ने ओवे. 32 ✝ जो कोडो माहुंउं बेटाह्हाआ विरोदो मेहें कोड्ली बी गोठ कोये, ते तियाआ गुनू माफ ओत जाय, पोन जों कोडो पवित्र आत्माआं विरुद्दामेहें गोगे, तियाआ गुनाआं माफी ने यी कोली ने तियी कोली ओवे."

33 ✝ जर साड़ हाजो ओय, ते तियाआ फल बी हाजो रोय, जर साड़ ने हाजो ओय, ताहां तियाआ फल बी ने हाजो रोय, काहाके साड़ तियाआ फलो वाअहीं फारकात जाहे.✝ 34 ✝ ए हापोअ पिलां, तुमू खाराब होय तेबी हाजी गोठी केहें गोगतेहे? काहाके जों मोनोम पोआलो होय, तोंज सोबीइ वाटे सोकतेहे. 35 हाजो माअहुंउं तियाआ हाजा मोनोअ भांडारोम रोत हाजी गोठी काडेहे, आन खाराब माअहुंउं तियाआ खाराब मोनोअ भांडारोमेहें रोत खाराब गोठी काडेहे.

36 "आन आंय तुमुहूं कोहो के, जें जें शब्दे माहें गोगे, तियां हारेक फालतू शब्दाआ न्यायनिवाड़ु ओवे तेदिहीं तियांहां ईसाब आपुहूं पोड़े. 37 काहाके तु ताआ गोठी वाअहीं निर्दुस आन ताआ गोठीज वाअहीं दोशी ठरही."

38 ताहां थोड़ाक कायदाआ मास्तर आन थोड़ाक फरिसी तियाहा कोयो, "ए मास्तर, आमू तुमे कोअल्यू एक समत्कार पालुहूं कोअताहा."

39 ✝ तिये तियांहां उत्तर आप्यो, "यी कोलीइ खाराब आन सिनाल माअहें समत्कार होदतेहे, पोन योना नावोअ भविश्यवक्ताआ समत्कारो वासी बिहीरु कोड्लू समत्कार तियांहां ने जोड़े. 40 ✝ योनू तीन दिहीन तीन रात जाअखीला वोडा मासाआ पोटामेहें रोयू, तेहेंज कोइत माहुंउं बेटुह्हू बी, तीन रातेन दिही धरतीइ पोटामेहें रोये. 41 ✝ निनवे होयरोअ माअहें न्यायनिवाड़ाआ दिही या जमानाअ माअहोंअरी उठीत तियांहां दोशी ठरवे, काहाके तियां योनाअ परसार उनाइत तियांआं पापोअहें रोत मोन फेरव्यो, आन फाशोअ पाला, इंहीं जो होय तो योना रोत बी वोडु होये. 42 ✝ देहोअ वोग्‍यीइ राणी न्यायनिवाड़ाआ दिही यी कोलीइ माअहोंअरी उठीत तियांहां दोशी ठरवे, काहाके ते शलमोन राजाआ हिकवोण उनाइलोअ काजे तियीइ देसोमेहें रोत आयी, आन पाला, इंहीं जो होय तो शलमोन राजा रोत बी वोडु होये."

43 "जाहां खाराब आत्मा माहूंमेहें रोत निहीत जाहे, ताहां आराम कोइला कोअते उगाअलू जागू होदती फिरेहे, पोन नाहां जोड़तू. 44 ताहां कोहे के, ‘आंय माआं तिया कोअमेहें जिहीं रोत निहींयीही तिहींज वापिस वोलीत जाहीं,’ आन जाहां तियाहा तो हुंद्लो, बाअल्यो, होबाड़ल्यो देखाअहे. 45 ताहां तो जात कोइत तिया रोत बी वादार हांत खाराब आत्मे तियाअरी लेत आवेहे, आन तें तियामेहें वाहा टाकीत रोने वोलतेहे, आन तिया माहुंउं दशा पेल्लीइ रोत बी वादार उत्यार ओत जाहे. या जमानाअ माअहोंअ दशा बी एहेलीज ओवे."

46 जाहां ईसु माअहोंअरी गोग्याज कोअतुतो, तेहेलाम तियाआ आयही आन पाही बाअथे तियाअरी गोठी कोइलो काजे उबे रोयेते. 47 ताहां कोडे तेबी तियाहा कोयो, "पाल, ताआ आयही आन पाही नेहें ताअरी गोठी कोइलोअ काजे बाअथे उबे रोयेहे."

48 ओं उनाइत ईसु तिया कोनाराहा उत्तर आप्यो, "कोडो होय माआं आयही? आन कोडो होय माआं पाही?" 49 आन तियाआ सेलाअहें आथ देखाडीत कोयो, "पाला, माआं आयही आन पाही एं होये! 50 काहाके जो कोडो माआं होरगाआ आब्हाआ मोर्जी पुरमाणे साले, तोज माआं पाही, आन माआं बोअह्हीं, आन माआं आयही होये."