मत्तय 2

दिही उगताअहेंएं जाणकार माटी

1 हेरोद राजाआ✝2:1 लुक 1:5 दिहोमेहें जेहेलाम यहुदीया मेर्‍याआ बेथलेहेम गांवोंमेहें ईसुउ जल्म ओवो,✝2:1 मिखा 5:2; लुक 2:4-7 ताहां पाला, दिही उगताअहें रोत ताराआ आभ्यास कोअनारा हुशार माटी येरुसालेमोमेहें आया, 2 आन फुसा वोल्या, "जियाआ जल्म ओयोहो तो यहुद्याआं राजा का होय? काहाके आमू दिही उगताआ वोगेहे तियाआ तारु देख्युहू आन तियाहा पागे पोड़ा आयाहा."

3 ओं उनाइत हेरोद राजा आन येरुसालेमो मेर्‍येए आखे माअहें काबराइत गोये. 4 ताहां तिये यहुदीइ आखा मुख्य पुंजारा आन कायदाआ मास्तर यांहां एकीज जागे एकठा कोइत फुशो के, "ख्रिस्ताआ जल्म का ओवुहूं जोवत्लो?"

5 माहें राजाहा कोयो, "यहुदीयाआ बेथलेहेम गांवोंमेहें," काहाके भविश्यवक्तां एहें कोइत लेख्योहो के,

6 "ओ यहुदाअ मुलख, बेथलेहेम,

तु आखा आधिकार्‍योंम रोत हानू होय, तेबी काय वांदो ने;

काहाके तामेहें रोत एक एहेलुहू आधिकारी निहे

जो माआं इस्राएल माअहोंअ राखवाली कोए."✝2:6 मिखा 5:2

7 तांहा हेरोद ताराआ आभ्यास कोअनारा तियां माट्योहों ठावकुज हादीत कोइत फुशो के, "जो तारु देखाअयू तो नेमकू केती वेलेहे देखाअयुतो?" 8 आन तियांहां ओं कोत कोइत बेथलेहेमोमेहें मोकल्या, "जावा, तिया पोर्‍याआ बाप्तिमेहें वारुहूं तापास कोआ; आन जाहां तो तुमुहूं जोड़े, ताहां माहूं बी खबर कोअजा, ताहां आंय बी आवित तिया पोऱ्याआ पागे पोड़ीहीं."

9 ताहराआ ते राजाआ ए गोठ उनाइत कोइत निहींया, ताहां पाला, जो तारु तियां दिही उगताआ वोगेहे देख्युतो, तो जिहीं पोर्‍यो ओतो तिया जागापोअ जात उबू रोत गोयू. 10 तिया ताराहा पालीत कोइत तियांहां जाअखीलीही खुसी ओवी. 11 ते कोअमेहें गोया, ताहां तिया पोर्‍याहा तियाआ आयही मरियाअरी देख्यो आन तियां तियाआ हुंबर टुंगा पोड़ीत तियाआ भक्ती कोअयी, ✝2:11 यश 60:3 आन मोगला सामानोअ खोत्लू सोड़ीत होनो, गुगलाआ सिक✝2:11 यश 60:6 आन गंधरस एहेलिही भेट आप्यी.

12 ताहां तियांहां होपनामेहें✝2:12 मत्तय 27:19; इब्री 8:5; 11:7 देवे कोयो, हेरोद राजाअ जागे फाशाअ फिरीत मा जाहा, तियाहा काजे ते बिहीरी वाटे रोत तियांआं देसोमेहें जाता रोया.

मिसर देसोअहें जाअलोअ

13 ताहां ते जाता रोया तिहींइं फासाड़ी, प्रभुउ दुत योसेफोहो होपनामेहें देखाअयू; तिये कोयो, "उठ, पोर्‍याहा आन तियाआ आयहीही लेत मिसर देसोमेहें नाहींत जा, आन आंय ताहूं कोहीं ताअहूं जाआं तिहींज रोजी; काहाके पोर्‍याहा माइलाआ काजे हेरोद होदनारु होय."

14 ताहां योसेफ रातीज उठीत कोइत पोर्‍याहा आन तियाआ आयहीही लेत कोइत मिसर देसोमेहें नाहींत गोयू; 15 आन हेरोद मोयू ताअहूं जाआं तो तिहींज रोयू, याअ काजे के जों वसन प्रभु भविश्यवक्ता वाअहीं कोयोतो तों पुरो ओवुहूं जोवे: "आंय माआं बेटाह्हाहा मिसर देसोम रोत हाद्यू."✝2:15 होशे 11:1

पोर्‍याहां माइत टाकीइलोअ

16 हेरोद राजाहा जेहेलाम तियां जाणकार माट्यों माहूं ठोग्युहू एहेलोहो तियाहा मुंदू गोयू. ताहां तियाहा जुदी खोत लागी. आन जे वेल तियां जाणकार माट्यों कोताप्यी, तियी वेलेए पुरमाणे बेथलेहेमोमेहें आन तियाआ आहने-पाहनेए आखा मुलखोमेहें तियाआ माअहें मोकलीत कोइत बेन वोर्‍ह्योंअ आन तिया रोत कमी वोर्‍ह्योंअ पोर्‍ये ओते, तियां आखाहा माआड़ी देदे.

17 भविश्यवक्ते यिर्मये जों कोयोतो, तों तियी वेले पुरो ओवो, तो एहें कोइते:

18 "रामामेहें किइमाल्लोहो रोड़ीइलोअ आवाज

आन वोडी विखा वाअहीं रोड़ीइलोअ आवाज होंबलाअहे,

राहेल तियीइ पोर्‍यांअ काजे रोड़ेहे,

काहाके ओमे रोत तें ने रोयेमें;✝2:18 यिर्म 31:15

तियाहा काजे ते नाहां होमजीइती."

मिसर देसोमेहें रोत वापिस आवीइलो

19 हेरोद राजा मोयू, ताहां पाला, प्रभुउ दुत मिसर देसोमेहें योसेफोहो दर्शन आपीत कोयो. 20 "ऊठ, पोर्‍याहा आन तियाआ आयहीही लेत इस्राएल देसोमेहें जा, काहाके जें पोर्‍याआ जिव लेअहूं होदतेते, तें मोइत गोयेहे." 21 ताहां योसेफ उठीत पोऱ्याहा आन तियाआ अायहीही लेत इस्राएल देसोमेहें आयू.

22 पोन तो एहेलोह उनाअयू के, आर्खेलाव ओ तियाआ आब्हा हेरोद याआ जागापोअ यहुदीयामेहें राजा बोण्युहूं, ताहां तो तिहीं जाअलोअ काजे बियू, आन होपनामेहें तियाहा देवे तेहें कोइत खबर आप्‍यी, तियाहा काजे तो गालील मुलखोमेहें जातु रोयू. 23 आन तिये नासरेथ नावोअ गांवोंमेहें जात वोहती कोअयी काहाके, "तियाहा नासरी कोये"✝2:23 मार्क 1:9,24; लुक 2:39,51; 4:16; योहान 1:45,46 एहें कोत भविश्यवक्ता जों कोयोहो तों पुरो ओवुहूं जोवे याअ काजे एहलोहो ओवो.