मत्तय 25

दोहो कुवांरीइं काईं

1 "ताहां होरगाआ राज तियी दोहो कुवांरी होस रोय जे तियींइं दिवा लेत वोरोहो मिली निठी. 2 तियींमेएं पास जोईं फोगी आन पास जोईं हुशार ओती. 3 फोगी ते तियींइं दिवा लेदा, पोन तियीं उपराव तेल आरी नाहां लेदो. 4 पोन हुशार जे ओती तियीं दिवा आन उपराव तेल बी कुड्यामेहें पोइत लेदो. 5 जाहां वोरोहो आविइलोअ वाआ लागी, ताहां ते आखी उंगाई वोल्यी आन हुवीत गोयी.

6 "आरदी राती एहेलुहू आवाज आयू, के ‘पाला, वोर आवेहे! तियाहा मिले साला.’ 7 ताहां ते आखी दोहू कुवांरी पोर्‍यी उठीत तियींइं दिवा वारुहूं कोइ वोल्यी. 8 आन फोगहीं हुशार जुवान्यीहीं कोयो, ‘तुमाआं तेलोमेहें रोत थोड़ोक आमुहूं बी आपा, काहाके आमाआं दिवा उलाआ वोल्याहा.’ 9 पोन हुशार कुवांरी उत्तर आप्यो, ‘तुमाआं आन आमाआं काजे पुरे एतोहो कायनाहां; तुमू दुकानोमेहें जात कोइत तुमाआं काजे तेल वेसातो लेत लेहा तों पुरड़े.’ 10 ताहां ते फोगी जुवान्यी दुकानोमेहें थोड़ोक तेल वेसाती लेनी गोयी, जेहलामेहें ते जाती रोयी, तेताजमेहें वोर आवित लागू. आन जे पास जोईं तियार ओती ते तियाअरी वेहेवालोअ कोअमेहें जाती रोयी आन बाआ वालित लेदो.

11 "तिहींइं फाटी ते बिहीरी जुवान्यी आवित कोनी वोल्यी, ‘मालिख, मालिख, आमाआं काजे बाआ उगाड़ी द्या.’ 12 वोरे उत्तर आप्यो के, ‘आंय तुमुहूं नक्की कोहो, आंय तुमुहूं ने ओलखीइत्लू.’ 13 तियाहा काजे जागते रोवा, काहाके तुमू तिया दिहोहो नाहां जांअते आन तियी वेलेहे बी नाहां जांअते.

तीन पावरोंअ बाप्तिमेहें काईं

14 "तिये वेले होरगाआ राज एहेलोह रोय. एकवारी एक माटी ओतू जो परदेसोम जानारु ओतू; तिये तियाआ सेवकोहों हादीत तियाआ मालधन सांबाले तेहें काजे तियांहां होपी देदो. 15 तिये एकाहा पास हाजार रुप्या, आन एकाहा बेन हाजार रुप्या, आन एकाहा एक हाजार रुप्या मोन्ज्ये हारेक जोओंहों तियां तियांआं सेक्तीइ पुरमाणे आप्यो, आन तो परदेसोमेहें निहींत पोड़्यू. 16 जियाहा पास हाजार रुप्या आप्या, तिये ताअहांज जात कोइत वापारो कोअयो, आन पास हाजार रुप्या फाश्याआ बी कामावया. 17 एहेंज कोइत जियाहा बेन हाजार आप्या, तिये बी बिहीरा बेन हाजार रुप्या कामावया. 18 पोन जियाहा एक हाजार आप्या, तिये जात कोइत खाडू खुंउंयू, आन तियाआ मालख्योअ पोशा निकाड़ी देदा.

19 "खुब दिहोअ फासाड़ी तियां पावरोअ मालिख आवित इसाब मागू वोल्यू. 20 जियाहा पास हाजार रुप्या आप्याते, तिये फाशाअ बिहीरा पास हाजार रुप्या लेतावीत कोयो, ‘मालिख, तुमे माहूं पास हाजार रुप्या आप्याते, पाल आंय पास हाजार फाशाअ बी कामावयाहा.’ 21 तियाआ मालख्ये तियाहा कोयो, ‘शाबास, हाजा आन इमानदार सेवक, तू थोड़ी गोठीमेहें बी इमानदार रोयू, आंय ताहूं वादार मालधनोअ आधिकारी बोणाविहीं. आव आन ताआ मालख्योअ खुसीमेहें सामील ओव!’ 22 आन जियाहा बेन हाजार आप्या, तिये बी आवित कोयो, ‘मालिख तुमे माहूं बेन हाजार आप्याते, पाल, बेन हाजार रुप्या फाश्याआ बी कामावयाहा.’ 23 तियाआ मालख्ये तियाहा कोयो, ‘शाबास, हाजा आन इमानदार सेवक! तु थोड़ी गोठीमेहें बी इमानदार रोयू, आंय ताहूं वादार गोठीइ आधिकारी बोणाविहीं. आव आन ताआ मालख्योअ खुसीमेहें सामील ओव.’ 24 तिहींइं फासाड़ी जियाहा एक हाजार रुप्या आप्या तिये बी आवित कोयो, ‘मालिख, माहूं मुंदू होय के तू कड़क माटी होये: तु जिहीं नाहां ठांअतू तिहीं रोत वाडेहे, आन जिहीं नाहां ओअतू तिहीं रोत हाटवेहे; 25 तियाहा काजे आंय बियू आन ताआ एक हाजार रुप्या पुंयींमेहें डाटी देदा; पाल, जो ताआ होय, तों ओं होय.’ 26 तियाआ मालख्ये उत्तर आप्यो, के ‘ए खाराब आन आलह्या सेवक, ओं ताहूं मोलोम ओतो, के जिहीं मी ने ठांअयो तिहीं रोत वाडोहो; आन जिहीं मी ने ओअयो तिहीं रोत हाटवोहो. 27 ताहां तू माआं पोशा एखा हावकारोहो आपी देतू, ताहां आंय आवित माआं पोशा वियात्ताज लेत लेतू.’ 28 ओमे याआ ते हाजार रुप्या यापरोत मागित ल्या, आन जियापोअ दोहो हाजार रुप्या होय, तियाहा आपी द्या. 29 काहाके जिया कोडा पोअ होय, तियाहा फाशोअ जोड़े; आन तियापोअ जाअखो ओत जाय; पोन जियापोअ कायनाहां, तियापोअ जो ओय तों बी मागीत लेवाय. 30 आन या आलह्या सेवकोहो बाअथे आंदारामेहें टाकी द्या, जिहीं रोड़ीइलो आन दात कोकराविलोअ रोय.

आखरीइ न्यायनिवाड़ु

31 "जाहां माहुंउं बेटुह्हू तियाआ महिमामेहें आखा देवदुतोअरी आवे, तेहेलाम तो तियाआ महिमाआ राजगादीपोअ बोहे. 32 आन आखे माअहें तियाआ सामने एकठे कोए; आन जेहलुहू डोरक्यू मेडाहां बोकड़ाम रोत आंगे कोइ देहे, तेहेंज कोइत तो तियांहां एकान बिहीरा रोत आंगे कोए. 33 आन तो मेडाहां तियाआ हाजाड़ीइ वोगेहे आन बोकड़ाहां तियाआ बांगाड़्यीइ वोगेहे उबे कोए. 34 ताहां राजा तियाआ हाजाड़्यीइ वोगर्‍याअ माअहुंहूं कोये, ‘ए माआं आब्हाआ आशिर्वादीत माअहूं! आवा, तिया राजोअ आधिकारी ओत जावा! जो दुन्याआं पेल रोत तुमाआं काजे तियार कोअयोहो. 35 काहाके आंय फुकल्यू ओतू, तेहेलाम तुमू माहूं रोटू आप्यू; तिहील्यू ओतू, तेहेलाम तुमू माहूं पाईं पिवाड्यो; आंय परदेसी ओतू, तेहेलाम तुमू माहूं कोअमेहें हाद्यू. 36 आंय उगड़ाअलुज ओतू, तेहेलाम तुमू माहूं आंगड़े पोवाड़्ये; आंय बिमार ओतू, तेहेलाम तुमू माहूं वेंडार्‍यू; आंय जेलेम ओतू तेहेलाम तुमू माहूं मिले आये.’ 37 ताहां धर्मी तियाहा उत्तर आपे, ‘प्रभु, आमू ताहूं काअहां फुकल्यू देख्यू आन खावाड़्यो, नेत तिहील्यू देख्यू आन पाईं पिवाड़्यो? 38 आमू ताहूं कोयों परदेसी देख्यू आन आमाआं कोअमेहें मिक्यू नेत उगड़ाअलुज देख्यू, आन आंगड़े पोवाड़्ये? 39 आमू ताहूं कोयों बिमार देख्यू नेत जेलेम देख्यू आन ताहूं मिले आये?’ 40 ताहां राजा तियांहां उत्तर आपे, ‘आंय तुमुहूं नक्की कोहो, के तुमू जों माआं या हानाम रोत हाना पाव्हीइला कोडा एकाअरी बी कोअयो, तों माअरीज कोअयो!’

41 "ताहां तो बांगाड़्यीइ वोल्याहां कोये, ‘ए देवोअ हारापल्या माअहूं, माआं सामने रोत तियी हादाजल्मार्‍यीइं आगीम जाते रोवा! जे सैतान आन तियाआ दुतोअ काजे तियार कोअयिही. 42 काहाके आंय फुकल्यू ओतू, आन तुमू माहूं खाअहूं ने आप्यो, आंय तिहील्यू ओतू, आन तुमू माहूं पाईं ने पिवाड्यो; 43 आंय परदेसी ओतू, आन तुमू माहूं तुमाआं कोअमेहें ने हाद्यू; आंय नागरु ओतू, आन तुमू माहूं आंगड़े ने पोवाड़्ये; आंय बिमार आन जेलेम ओतू, तेहेलाम तुमू माआं कालजी ने लेदी.’ 44 ताहां तें उत्तर आपे, ‘प्रभु, आमू ताहूं कोयों फुकल्यू, नेते तिहील्यू, नेते परदेसी, नेत नागरु, नेते बिमार, नेते जेलेम देख्यू, आन ताआ मदत ने कोअयी?’ 45 ताहां तो राजा तियांहां उत्तर आपे, ‘आंय तुमुहूं नक्की कोहो के तुमू जों या हानामेहें रोत हाना एकाअरी बी ने कोअयो, तों माअरी बी ने कोअयो.’ 46 ताहां एं हादाजलम्युउं डोंड भोगे, पोन धर्मी हादाजल्म्याआं जिवनोमेहें जाये."✝25:46 दानि 12:2