1 "कोडापोअ आरोप मा लागाड़हा, ताहां तुमापोअ बी आरोप ने लागे. 2 काहाके जेहें कोइत तुमू बिहीरा पोअ आरोप लागाड़हा, तेहेंज कोइत तुमापोअ बी आरोप लागे, आन जिया मापोवाअहीं तुमू मापित आपहा, तियाज मापोवाअहीं तुमुहूं बी पोइत जोड़े. 3 तु ताआ डोआ मेर्‍याआ मुहलोअहें पालीइलोअ सोड़ी देत ताआ पायहोअ डोआ मेर्‍याआ हुकलाअहें काहा पालेहे? 4 नेताहां, ‘ताआ डोआ मेर्‍योअ हुकलो माहूं काडी देअहूं दे,’ एहें कोइत तू ताआ पायहोहो केहें कोइत कोत सेकेहे? पाल, ताआज डोआ मेहें तोम मुहल होये. 5 आरे ढोंगी, पेल ताआ डोआ मेर्‍योअ मुहल काडीत टाकेए, ताहां ताआ पायहोअ डोआ मेर्‍योअ हुकलो काडीइलोअ काजे ताहूं वारुहूं हाजो देखाय.

6 "सोकी वस्तु हुंणाहां मा आपहा, आन तुमाआं मोती भुंडड़ाआं आगाड़ी मा टाकहा; जर टाकहा, ताहां केहेंनेत तें तियांआं गुडाअ थुड़ी सेंदीत टाकी देय, आन फिरीत तुमुहूंज वेतरीत टाके.

7 "मागा, ताहां तुमुहूं जोड़े; होदा, ताहां तुमुहूं सापड़े, ठोका, ताहां तुमाआं काजे बाअणो उगड़ीत जाय. 8 काहाके जो कोडो मागेहे तियाहा जोड़ेहे, जो कोडो होदेहे तियाहा सापडेहे, आन जो कोडो ठोकेहे तियाआ काजे उगड़ीत जाहे. 9 तुमामेहें एहेलोहो कोड्लो माहुंउं होय, जों तियाआ पोर्‍यू रोटू मागे, ताहां तियाहा डोण आपे? 10 नेताहां मासू मागे तियाआ वोतीइ जनवार आपे? 11 तुमू खाराब होय तेबी तुमाआं पोर्‍याहा हाजी वस्तु आपीइलोअ मुंदू होय, ते तुमाआं होरगामेर्‍याआ आब्हापोअ जें मागतेहे तियांहां तो हाजी वस्तु केहें ने आपे?

12 "तिहींइं काजे, जेहें कोइत माअहें तुमाअरी सालुहूं जोवे एहेलिही तुमाआं इश्शा होय, तेहेंज कोइत तुमू बी तियांअरी साला, काहाके कायदाअ पुस्तक आन भविश्यवक्ताहांआं पुस्तक बी ओंज सिकाड़ेहे.

13 "हाकड़ी वाटे जावा, काहाके मोकली वाट हुदी होय आन ते नरकाअहें जाहे; आन तिहीं जानारे जाअखे जोएं होय. 14 पोन जिवनोम जाअलोअ बाअणो हाकडो होये, आन तिहीं लेत जानारी वाट कठीण होये, आन थोड़ाज माअहुंहूं ते जोड़ेहे.

15 "ठोग भविश्यवक्ताहां रोत सांबालजा. ते मेडाआं वेहे लेत तुमाआं जागे आवताहा, पोन मांयते वेतरीइनारा कोलवाआं होस होये. 16 तियांआं कामों वाअहीं तुमू तियांहां ओलखीत लेहा. काटाआ साड़ोप रोत दाराक्शे, नेताहां उपकाटाप रोत अंजिर* पाडतेहे के? 17 तेहेंज कोइत हाजा साड़ोहो हाजे फलवे लागतेहे आन खाराब साड़ोहो खाराब फलवे लागतेहे. 18 हाजो साड़ खाराब फलवे ने आपनारो, आन खाराब साड़ हाजे फलवे ने आपनारो. 19 जो साड़ हाजे फलवे नाहां आपतो, तिया साड़ोहो वाडीत आगीम टाकी देतेहे. 20 तिहीं वाअहीं तियांआं कामों वाअहीं तुमू ठोग भविश्यवक्ताहां ओलखीत लेहा.

21 "जों माहूं ‘प्रभु, प्रभु’ एहें कोहे, तों हारेक माहुंउं होरगाआ राजोमेहें जायजे एहेलोहो कायनाहां, पोन जों कोडो माआं होरगामेर्‍याआ आब्हाआ मोर्जीइ पुरमाणे सालेहे तोज जाये. 22 तो न्याय निवाड़ू कोइलोअ दिही आवे, तेदिहीं जाअखीलाहा जोंओं माहूं कोये, ‘प्रभु, प्रभु! आमू ताआ नावोवाअहीं संदेश आप्यू, ताआ नावोवाअहीं पुते काड्ये आन ताआ नावोवाअहीं जाअखीलाहा समत्कार नाहां कोअया के?’ 23 ताहां आंय तियांहां कोहीं, ‘आंय तुमुहूं केदिहींज नाहां ओलखीइतू; ओ खाराब कामे कोअनारां, माआं जागे रोत सेटे जाते रोवा!’

24 "तियाहा काजे, जो कोडो माआं ए हिकवोण उनाअहे आन मानित सालेहे, तो एका हुशार माहुंउं सारकोह होये, जिये तियाआ कोओ खड़कापोअ बांद्यो. 25 आन वोऱ्हात पोड़्यु, खाडू वोहयू, वादुउ बी साल्यू, आन तिया कोओहो आवित ठोकाअयू, तेबी तों कोअ ने पोड़्यो, काहाके तियाआ पायू खड़कापोअ बांद्युतो.

26 "पोन जो कोडो माआं ए हिकवोण उनाअहे आन नाहां मानित सालतो, तो एका फोगा माहुंउं सारकोह होये, तिये तियाआ कोअ रेटापोअ बांद्यो. 27 आन वोऱ्हात पोड़्यु, खाडू आवयू, वादुउ बी आयू, आन तिया कोओहो आवित ठोकाअयू, ताहां तो कोअ पोड़ीत गोयो आन आखो नावासट आरवात गोयो!"

28 जाहां ईसु ए गोठी कोत नेवराअयू, ताहां आखे माअहें तियाआ हिकवोणो वाअहीं बोगलात गोये. 29 काहाके तो तियांहां कायदाआ मास्तरोंअ होस नाहां, पोन आधिकारो वाअहीं सिकाड़तुतो.