मत्तय 17

ईसुउ बोदलाअलू रुप

1 सोव दिहोअ फासाड़ी ईसु पेत्र आन याकोब आन तियाआ पाही योहान यांहां आरी लेदा, आन तियांहां सामसुम जागे एका डोगोपोअ लेत गोयू. 2 तिहीं तियांआं सामने ईसुउ रुप बोदलाअयू, आन तियाआ सोब दिहोअ होस सोमक्यी वोल्यी आन तियाआ साअको दिवाआ होस उजलो ओत गोयो. 3 ताहां मोशे आन एलिया तियाअरी गोठी कोअत्ला तियां तीनू सेला देख्यो. 4 ताहां पेत्रे ईसुहू कोयो, "प्रभु आपाआ इंहीं रोअलोअ हाजो होय. जर ताआ मोर्जी ओय ते आंय इंहीं तीन तंबा बोणावोहो; एक ताआ काजे, एक मोशेए काजे, आन एक एलियाआ काजे."

5 तो गोग्याज कोअत्लू तेहेंज एक आसलो वादलो तियाहा टापित लेदू, आन तिया वादला मेहें रोत एहेलुहू आवाज आयू के, "ओ माआं मेरालू बेटुह्हू होये, जिया वाअहीं आंय खुस होय याआ उनाआ!"✝17:5 कायदा 18:15; यश 42:1

6 सेला ओं उनाइत उबडा पोड़ीत गोया, काहाके ते जाअखीलाहा बित गोयाते. 7 ईसु आहने आवित तियांहां आथ लागाड़ीत कोयो, "उठा, बिहा मा." 8 ताहां तियां तियांआं डोआ उगाड़्या, पोन तियांहां ईसु वासी बिहीरो कोडोज ने देखाअयो.

9 जाहां ते डोगोपोअ रोत निसे उतीरताते ताहां ईसु तियांहां ओ आदेश आप्यू, "जाअहूं जाआं माहुंउं बेटुह्हू मोइत फाशुउ जिवित ने उठे, ताअहूं जाआं जो किबी तुमू देख्योहो तो कोडाहाज मा कोहा."

10 ✝ 17:10 मला 4:5 ताहां तियाआ सेला तियाहा फुशो, "कायदाअ मास्तर काहा कोताहा के एलियाआ पेल आविइलोअ जरूरी होय?"

11 ईसु कोयो, "एलिया ते नक्की आवे आन आखो हुदारे. 12 ✝17:12 मत्तय 11:14 पोन आंय तुमुहूं कोहो के एलिया आवित गोयुहू, आन माहें तियाहा ने ओलख्यु, पोन जेहलोहो पोटे तेहलोहो तियाअरी कोअयो. एहेंज कोइत माहुंउं बेटुह्हू बी तियांआं आथे दुख वेठे."

13 ताहां सेला समज्यो के तिये आपुहूं बाप्तिस्मा आपनारा योहानोअ बाप्तिमेहें कोयोहो.

ईसु पुत लागला पोर्‍याहा हुदारत्लू

14 जाहां ते गर्दीइ जागे पोत्या, ताहां एक माअहुंउं तियाआ जागे आयो, आन पागे पोड़ीत कोनो वोल्यो, 15 "प्रभु, माआं पोर्‍यापोअ दया कोअ! काहाके याहा फेपरो आवेहे, आन तो खुब तारास कोअहे, आन ताल-ताल आगीमेहें आन ताल-ताल पाअयोंमेहें टुटीत पोडेहे. 16 आंय ताआ सेलाआ जागे लेत गोयूतो, पोन ते तियाहा हाजो ने कोइत सेक्या."

17 ईसु उत्तर आप्यो, "ए विण विश्वासोवालां आन कोंबड़्या माअहों, आंय तुमाअरी कोयों जाआं रोंव? कोयों जाआं तुमाआं वेठो? या पोर्‍याहा माआं जागे लेतावा." 18 ताहां ईसु पुतोहो आदेश आप्यू, आन तो पुत तियामेहें रोत निहीत गोयू; आन तो पोर्‍यू तियीज घेड़ी हुदरीत गोयू.

19 ताहां सेला नेवराज ईसुउ जागे आवित कोइत कोयो, "आमू तिया पुतोअ आत्माहां काहा ने काडीत सेक्या?"

20 ईसु तियांहां कोयो, "तुमाआं कमी विश्वासोअ वोजेसे, काहाके आंय तुमुहूं खोरीज कोहो, जर तुमाआं विश्वास एका रायीइ दाणाअ एवडुहू बी ओय, ते या डोगोहो बी तुमू कोत सेकाहा के, ‘इंहीं रोत होरकीत तिहीं जातु रो,’ ताहां तो जातु रोय; आन कोड्लीज गोठ तुमाआं काजे कठीण ने रोय. 21 पोन यी जातीइ पुते बिगर प्रार्थना आन उपासोवाअहीं नाहां निहींते."*17:21 थोड़ाक लेख्याम ओं वसन नाहां जोड़तो.

ईसु फाशुउ तियाआ मोतोअ बाप्तिमेहें कोत आपत्लू

22 जाहां ते गालीलोमेहें ओता, ताहां ईसु तियांहां कोयो, "माहुंउं बेटुह्हू माअहुंउं आथे तोआये, 23 तें तियाहा माईंत टाके, आन तो तिसरे दिही जिवीत उठे."

यी गोठी पोअ सेला जास्ती नाराज ओवा.

मंदिरोअ फालू

24 जाहां ईसु आन तियाआ सेला कफर्णहुम पोता, ताहां मंदिरोअ फालू लेनारा पेत्राआ जागे आवित फुशो के, "तुमाआं गुरु मंदिरोअ फालू ने आपत्लू के?"

25 पेत्रे कोयो, "होव, आपत्लू."

जाहां पेत्र कोअमेहें आवयू, ताहां ईसु तियाआ फुसीइलोअ पेलुज तियाहा कोयो, "ए शिमोन तू कि विसार कोअहे? धरतीइ राजा फालू नेत कर कोडापोअ रोत लेताहा? तियांआं पोर्‍यापोअ के पारकापोअ?"

26 पेत्रे तियांहां कोयो, "पारकापोअ."

ईसु तियाहा कोयो, "ताहां बेटुह्हू कर आपिइलाम रोत वासाइत गोयू. 27 तेबी आपावाअहीं याहां माठो ने लागुहूं जोवे, तु दोर्‍याअहीं जा, आन मासे माइलोअ गोली टाक, आन जो मासु पेल लागे; तियाआ सोब उगाड़ही, ताहां ताहूं एक सांदीइ रुप्यु*17:27 सांदीइ रुप्यु ग्रीक सलन स्टाटेर: याआ किंमत शार जोओंअ फालू आपित सेके एतीही ओती. जोड़े, तो लेत जात माआं आन ताआ बोदले तियांहां कर आपी देजी."