1 ताहां येरुसालेमोमेहें रोत थोड़ाक फरिसी आन कायदाअ मास्तर ईसुउ जागे आवित कोना वोल्या, 2 "ताआ सेला आपाआ वेगाआ डायहांआं रिती-रिवाजोहों काहा नाहां मानता? ते बिगर आथ तुवयेज रोटू खाताहा." यहुदी माअहोंअ आथ तुवीइलोअ रिती

3 ईसु तियांहां कोयो, "तुमू बी तुमाआं रिती-रिवाजोअ कोअता देवोअ आदेश काहा टाली देताहा? 4 ✝काहाके देवे कोयोहो, ताआ ‘आब्हाआ आन आयहीइ मानपान कोअजी, आन जो कोडो आब्हाहा नेत आयहीही हाराप आपे, तियाहा माईंत टाकुहूं जोवे!’ 5 पोन तुमू कोताहा के जर कोडो तियाआ आयहीन आब्हाहा कोय, ‘जो किबी ताहूं मापोअ रोत लाभ ओवनारु ओतू, तो देवोहो भेट कोइ देदुहू,’ 6 ताहां तो तियाआ आयहीन आब्हाआ मानपान ने कोए, एहें कोइत तुमू तुमाआं रिती-रिवाजोअ काजे देवोअ वसन टाली देदो. 7 ए ढोंगी! यशये तुमाआं बाप्तिमेहें ए भविश्यवाणी बोराबर कोअयीही.

8 "‘एं माअहें ओठो वाअहीं ते माआं मानपान कोअतेहें,

पोन यांआं मोन मारोत सेटे होय.

9 आन एं वायबार माआं भक्ती कोअतेहे,

काहाके एं मोनवीइ नियमोहों देवोअ कायदु कोत सिकाड़तेहे.’"

10 ताहां ईसु माअहुंहूं तियाआ जागे हादीत तियांहां कोयो, "उनाआ आन समजा. 11 जों सोबीमेहें जाहे, तों मोनव्योहो एठो नाहां कोअतो, पोन जों सोबीमेहें रोत निकलेहे, तोंज मोनव्योहो एठो कोअहे."

12 ताहां सेला आवित तियाहा कोयो, "ए गोठ उनाइत फरिसी नाराज ओत गोयाहा ओं ताहूं मुंदू होय के?"

13 ईसु उत्तर आप्यो, "हारेक साड़ जो माआं होरगामेर्‍येए आब्हे नाहां ठांअयों, तों मुलम रोत उफड़ीत टाकी देवाय. 14 तियांहां जाअहूं द्या; ते आंदला पुडारी होये आन जर आंद्लो आंद्लाहाज वाट देखाड़े, ताहां बेनू बी खाड्डामेहें टुटीत पोड़े."

15 ओं उनाइत पेत्र तियाहा कोयो, "ए काईं आमुहूं समजाड़ी दे."

16 ईसु कोयो, "केहें तुमू बी ओमे जाआं नाहां समजीइता के? 17 जों कि बी सोबीमेहें जाहे तो पोटामेहें जाहे, आन तों ओगीइली वाटे बारथे निहींत जाहे ओं तुमू नाहां समजीइता के? 18 पोन जो किबी सोबीइ वाटे रोत बारथे निहेंहें, तों मोनोम रोत निहेंहें आन तोज मोनव्योहो एठो कोअहे. 19 काहाके खाराब विसार, खुन, सिनालो, सोरी, ठोगोअ साक्शी आन निंदा ए गोठी मोनोम रोतीज निहींतिहीं. 20 एंज गोठी होये जे मोनव्योहो एठो कोअतिही, पोन बिगर आथ तुवयेज रोटू खाअलो वाअहीं माहुंउं एठो नाहां ओवतो."

21 ईसु तिहीं रोत निहीत, सुर आन सिदोन मुलखोअ वोगेहे जातु रोयू. 22 तिया मुलखोमेहें रोत एक कनानी बाय निठी, आन आअड़ीत कोनी वोल्यी, "ए प्रभु! दाविदोअ पोर्‍या, मापोअ दया कोअ! माआं बेटिह्हीही पुत जाअखीलुहू तारास देहे."

23 पोन ईसु तियीही किज उत्तर ने आप्यो, ताहां तियाआ सेला आवित तियाहा रावणी कोअयी, "यिही वाटे लागाड़, काहाके ए आपाआ फाटी आअड़ीतीज आवेहे."

24 ईसु उत्तर आप्यो, "आंय इस्राएलोअ घराणाआ टाकाअला मेडाआ काजे एतुज आयुहू."

25 पोन ते बाय आवयी, आन ईसुहू पागे पोड़ीत कोनी वोल्यी, "प्रभु माहूं मदत कोअ."

26 ईसु उत्तर आप्यो, "पोर्‍याआ रोटू तोइत हुंणाआं आगाड़ी टाकीइलोअ नाहां हाजो."

27 तियी कोयो, "खोरो होय प्रभु, पोन हुंणे बी तोम तियांआं मालख्योअ टेबलोपोअ रोत वेराअला रोटाआ सुउवूउ विसीत खातेहे."

28 ताहां ईसु तियीही उत्तर आप्यो, "ए बाय ताआ विश्वास वोडू होय. जेहलीही ताआ इश्शा तेहलोज ताआ काजे ओत जाअहूं जोवे." आन तियीइ बेटिह्ही तेताजमेहें हुदरीत गोयी.

29 ईसु तिहीं रोत गालील दोर्‍याअ जागे आयू, आन डोगोपोअ सोढीत बोहीत गोयू. 30 ताहां गोवरान गोवरा माअहें तियाआ जागे आवये. ते तियांअरी लेंगडाहां, आंद्लाहां, मुकाहां, पांगलाहां आन बिहीरा जाअखीला जोओंहों ईसुउ जागे लेत आवये, आन तियांहां तियाआ गुडाआ जागे मिकी देदे, आन तिये तियांहां हुदारी देदे. 31 जाहां माअहूं देख्यो के मुके गोगतेहे, आन पांगले हुदरीइतेहें, आन लेंगड़े सालतेहे, आन आंद्ले देखतेहे, ताहां तें बोगलाअये आन इस्राएलोअ देवोअ स्तुती कोअयी.

32 ईसु तियाआ सेलाहां हाद्या आन कोयो, "माहूं या माअहुंउं गोवारा पोअ दया आवेहे, काहाके तें तीन दिहीर्‍येए माअरीज होये, आन यांपोअ खाअलोअ काजे किज कायनाहां, आन यांहां फुकल्येज मोकलीइलोअ माआं इश्शा कायनाहां, काहाके एहलोहो ने ओवुहूं जोवे के तें वाटेज थाकीत जाय."

33 सेला तियाहा कोयो, "आमुहूं या जंगलोमेहें का रोत एतुहू रोटू जोड़े के आमू एता वोडा माअहुंउं गोवाराहा तारवीत सेको?"

34 ईसु तियांहां फुशो, "तुमापोअ केताहा रोटा होय?"

तियां कोयो, "हांत रोटा, आन थोड़ेक हाने मासे."

35 ताहां ईसु माअहुंहूं पुंयींपोअ बोहे तेहें कोयो. 36 आन तिये हांत रोटा आन मासे लेत धन्यवाद कोइत रोटा मुड्या, आन तियाआ सेलाहा आपतू गोयू, आन सेला माअहुंहूं आपता गोया. 37 एहें कोइत आखे खात ताराइत गोये, आन सेला उगरीइल्या रोटाआ कुटका वाअहीं पोआली हांत टोपली विश्यी. 38 खानारे बोईंन पोर्‍ये सोड़ीत शार हाजार माटी ओता.

39 ताहां ईसु माअहुंउं गोवाराहा वाटे लागाड़ीत नावड़ामेहें बोहीत गोयू, आन मगदान इलाखाअ हाद्दीइहीं आयू.