1 "हेएजा! तुमू माअहोंहों देखाड़ीइलोअ काजे सेवाभक्तीइ कामें मा कोअहा, जर तुमू एहें कोअहा, ताहां तुमाआं होरगामेर्‍याआ आब्हाप रोत तुमुहूं किज इलाम ने जोड़े.

2 "तिहीं वाअहीं जाहां तू गोरब्योहो दानधरम कोअही, ताहां आगाड़ी आगाड़ी भोंगू मा वाजाड़ही, जेहें कोइत वोडार्‍या आराधनालयोमेहें आन वाटेपोअ माअहें तियांआं वोडाय कोए तेहें काजे भक्ती कोअताहा, तेहलोहो तू वोडू देखावू मा कोअही. आंय तुमुहूं खोरीज कोहो, के तियांआं फल तियांहां जोड़ीत गोयोहो. 3 पोन जाहां तू गोरब्योहो दानधरम कोअही, ताहां तों मोनेज कोअजी, जो ताआ हाजाड़्यू आथ कोए, तों बांगाड़्या आथोहो ने मुंदू जाअहूं जोवे. 4 तिहीं वाअहीं, ताआ दानधरम तू मोनेज कोअहूं जोवे, आन ताआ होरगामेऱ्युउ आब्हू, जो ताहूं एखलामेहें पालेहे, तो ताहूं तियाआ फल आपे.

5 "जेहेलाम तू प्रार्थना कोअही, तेहेलाम तू वोडार्‍याआं होस मा कोअही! काहाके तियांहां आराधनालयोमेहें आन वाटे पोअ उबा रोत प्रार्थना कोइलोअ गोमत्लो. आंय तुमुहूं खोरीज कोहो, के तियांहां तियांआं फल जोड़ीत गोयोहो. 6 पोन जेहेलाम तू प्रार्थना कोअही, तेहेलाम तू ताआ खुलीम जा; आन बाअणो वालित ले, आन ताआ होरगा मेऱ्याआ आब्हाहा एखलामेहें प्रार्थना कोअ. ताहां ताआ होरगा मेऱ्युउ आब्हू जो ताहूं एखलामेहें पालेहे तो ताहूं फल आपे.

7 "जाहां तू प्रार्थना कोअही, ताहां बिगर यहुदी माअहुंउं होस उदड़ीज मा पोणीहीं; काहाके तियांहां लागेहे के आपू जाअखा गोगहूं, ताहां देव आपाअ उनाइत लेय. 8 पोन तुमू तियांआं होस मा बोणहा, काहाके तुमुहूं कि गरज होय तों तुमाआं मागीइलोअ पेल तुमाआं आब्हाहा मुंदू होय.

9 "तिहीं वाअहीं तुमू एहें कोइत प्रार्थना कोआ:

"‘ओ आमाआं होरगामेर्‍याआ बा,

ताआ नाव सोको मानाअहूं जोवे.

10 ताआ राज आवुहूं जोवे. जेहें कोइत होरगामेहें तेहें कोइत धरती पोअ बी

ताआ ईश्शाआ परमाणे ओवुहूं जोवे.

11 आमाआं दाडख्‍युउ रोटू आज आमुहूं आपेए.

12 आन जेहें कोइत आमू आमाआं गुनेगारोहों माफ कोअयेहे,

तेहेंज कोइत तू आमाआं गुना माफ कोअ.

13 आन आमुहूं परिक्शाम मा लेत जाही,

पोन बाक्तायी रोत वासाड़; काहाके राज, ताकत आन महिमा कायम ताआज होय.’ आमेन.

14 "तियाहा काजे जर तुमू माअहुंउं गुना माफ कोअहा, ताहां तुमाआं होरगामेर्‍युउ आब्हू बी तुमुहूं माफ कोए. 15 पोन जर तुमू बिहीराहा माफ ने कोअहा, ताहां तुमाआं आब्हू बी तुमाआं गुना माफ ने कोए.

16 "तुमू जाहां उपास कोअहा, ताहां ढोंगड़ा कोअनाराअ होस आखाहा देखाय तेहें काजे कोमाअली सोबीज उपास मा कोअहा. आंय तुमुहूं नक्की कोहो के, तियांहां तियांआं फल मिलीत गोयोहो. 17 तु जेहेलाम उपास कोअही, तेहेलाम ताआ मुंडोअरी तेल हारीत ले, ताआ सोब तुवीत, सिंग्ये ओखवीत ले. 18 मोन्ज्ये, तू उपास कोअही तों माअहोंहों नाहां, पोने देव आब्हाहा देखाअहूं जोवे, जो ताहूं गुप्तमेहें उपास कोअत्लू देखीत कोइत बक्शीस आपे.

19 "धरती पोअ तुमाआं काजे धन मा हाटवाहा, जिहीं ओदायो आन किट लागीत आरवात जाहे, आन बांड कोअ फोड़ीत कोइत सोइत लेताहा. 20 तियाहा काजे होरगामेहें तुमाआं काजे धन हाटवा, जिहीं ओदाय ने लागे आन किट ने लागे आन बांड कोअ फोड़ीत सोरी बी नाहां कोअता. 21 काहाके जिहीं ताआ धन होय तिहीं ताआ मोन बी लागीत रोय.

22 "डोऊ शरीरोअ दिवू होय; याआ काजे ताआ डोऊ हाजू ओय, ताहां आखो शरीर बी उजालामेहें रोय. 23 पोन ताआ डोऊ बाक्तू ओय, ताहां ताआ आखो शरीर आंदारामेहें रोय, तिहीं वाअहीं तामेर्‍योअ उजालोज जर आंदारो रोय, ताहां तों आंदारो किजातीइ वोडो रोये!

24 "कोडो बी बेन धण्योअ साकरी नाहां कोइत सेकतो, काहाके तों एकाहा सीस कोए आन बिहीराहा मेर कोए; नेत एकाअरी हाजो आन बिहीराअरी बाक्तो रोय. तुमू देवोअ आन पोशाआ बेनुउं साकरी एकवाऱ्यीज नाहां कोइत सेकते.

25 "याआ काजे आंय तुमुहूं कोहो के, आपाआ जिवोअ काजे ए सिंता मा कोअहा, के आमू कि खाहूं आन कि पीहूं; आन नेत आपाआ शरीरोअ काजे कि पेवहूं. केहें जिव रोटा रोते आन शरीर आंगड़ा रोत मोगो नाहां के? 26 जुगोमेर्‍याआ सिड़ाअहें पाला; के तें नाहां पेएते, नाहां वाडते, आन नाहां हाटवीत मोठीमेहें मिकते; तेबी तुमाआं होरगामेर्‍युउ आब्हू तियांहां खायतेहें आपेहे; तुमू तियां रोत वादार मोगे नाहां के? 27 तुमामेहें कोडो होय, जो सिंता कोइत तियाआ जिवणाआ वय एक आथ पोइत वादाड़ीत सेकेहे?

28 "आन आंगड़ाआ काजे काहा सिंता कोअतेहे? जंगलोमेर्‍याआ फुलोअहें पाला, तें केहें कोइत वोदतेहे? तें काम नाहां कोअते, नेत तियांआं काजे आंगड़े नाहां बोणावते. 29 पोन आंय तुमुहूं कोहो के, शलमोन राजा बी तियाआ आखी महिमा वाअहीं तिंया आखाम रोत एका फुलोअ होस बी हाजे आंगड़े नाहां पेवये. 30 जो रानोमेर्‍योअ खोड़ आज होय आन हांदाआ आगीम जातो रोहे, तियाहा जर देव एहेलुहू पेरवट पेवाड़ेहे, ताहां ओ लुला विश्वासी, तो तियां रोत वादार तुमुहूं पेरवट ने पेवाड़े के?

31 "तिहीं वाअहीं तुमू सिंता कोइत एहें मा कोहा के आपू कि खाहूं, नेत कि पीहूं, नेत कि पेवहूं. 32 काहाके ए आखी गोठी मेलवीलोअ काजे दुन्याआ माअहें तोड़पीइतेहें. तुमुहूं यीं आखी गोठीइ गरज होय ओं तुमाआं होरगामेर्‍याआ आब्हाहा मुंदू होय. 33 तियाहा काजे पेल तुमू देवोअ राज आन सतीपण होदीइलोअ कोशित कोआ, ताहां तियाअरी ए आखी गोठी बी तुमुहूं जोड़ीत जाय. 34 तियाहा काजे हांदार्‍यीइ सिंता मा कोअहा, काहाके हांदार्‍यीइ सिंता हांदाआ; आज्‍याआ दिहोअ दुख आज्याआ दिहोअ कोअते पुरतो होय.