Apocalipse 4

होरगामेहें भक्ती

1 याआ फासाड़ी आंय बिहीरो दर्शन पाल्यो, आंय देख्यो के होरगामेहें एक बाआ उगाड़्योहो आन तो तुरीइ होसर्‍युउ आवाज, जियाहा आंय पेल बी माअरी गोठी कोअत्लाहा उनाअयुतो, कोहे: "इंहीं, उसे आव, आंय ताहूं देखाड़ीहीं के याआ फासाड़ी की ओवनारोहो." 2 तुरतूज आंय आत्मामेहें पोआइत गोयु, आंय पाल्यो, के होरगामेहें एक राजगादी मिक्यीही आन तियापोअ कोडो तेबी बोहीत रोयोहो. 3 जो तियापोअ बोठुहू, तो यास्फे आन सार्दीइ होस ओतू. राजगादीइ मेरेमेरे मरकतोअ होस एक बाण देखाअहे. 4 तियी राजगादीइ मेरेमेरे बिहीरी शोवीस राजगादी होय; आन तियीं राजगादीपोअ शोवीस डायहां पांडे आंगड़े पोवित कोइत बोहीत रोयाहा, आन तियांआं मुन्कापोअ होनाआ टोपा होय. 5 तियी राजगादीमेहें रोत विजलीइलोअ आन गाजीइलाअ आवाज निहीतुतो; आन राजगादीइ आगाड़ी आगीइ हांत दिवा पेटाअताहा, ते देवोअ हांत आत्मा होय.

6 राजगादीइ आगाड़ी खासोअ दोर्‍या जेहें कितेबी देखाअतोतो.

राजगादीइ विसमेहें आन राजगादीइ मेरेमेरे शार जनवारे होय, जियांआं आगाड़ी फासाड़ी डोआन डोआ होय. 7 पेल्लोअ जनवार सिहांअ होस होय, आन दुसरो जनवार बोलदोअ होस होय, तिसरा जनवारोअ सोब माहुंउं होस होय, आन शोवथो जनवार उड्नारा मोरागाआ होस होय. 8 तियां हारेक जनवारोअ सोव सोव फाके होय; आन ते जनवारे मायते बारथे आन मेरेमेरे डोआ वालेज ओते; आन ते रातेन दिही बिगर थाक मुड़्येज एहें कोयाज कोअतेहे,

"पवित्र, पवित्र, पवित्र प्रभु देव, आखाम रोत वोडी ताकतवालु,

जो ओतु, जो होय आन जो आवनारु होय."

9 जाहां तें शार जनवारे जो राजगादीपोअ बोहीत रोयुहू, तिया हादाजलम जिवता रोनाराआ महिमा, मानपान आन आभार मानतेते; 10 ताहां ते शोवीस डायहां राजगादीपोअ बोहनाराआ सामने उबडू पोड़ताहा, हादाजलम जिवता रोनाराआ आराधना कोअता आन एहें कोत कोइत राजगादीइ सामने तियांआं टोपा टाकी देताहा आन कोताहा,

11 "आमाआ प्रभु देव,

तुज महिमा, मानपान आन ताकतोअ लायक होय;

काहाके तुमेज पुरी कोलीही बोणावयी

आन ताआज मोर्जी वाअहीं ते उब्ज्यी आन बोणावयीही."