1 जेहेलाम ईसु ए गोठी कोत नेवराअयू, तेहेलाम तो गालीलोमेहें जातु रोयू, आन यारदेनोअ तियी तोड़ यहुदीयाआ मुलखोमेहें आयू. 2 ताहां वोडी गर्दी तियाआ फाटी आवी वोल्यी, आन तिये तियांहां तिहीं हुदार्‍ये.

3 ताहां फरिसी तियाहा फारकीइलोअ कोअते आहने आवित कोना वोल्या के, "कोड्ला बी कारणो वाअहीं आपाआ कायदाआ पुरमाणे सोताआ बोईंही सोड़ीइलोअ ठीक होय के?"

4 ✝ ईसु उत्तर आप्यो, "तुमू कायदाआ पुस्तकोम नाहां वाश्यो के, जिये तियांहां बोणाये, तिये सुरुवातीमेहें रोत माटी आन बोईं कोत बोणाये?

5 ✝ "आन ताहरोअ देवे कोयो, ‘तिहींइं वाखरी माटी तियाआ आयहीन आब्हाअहीं रोत आंगे ओत तियाआ लाडीइरी रोय, आन तें बेनू एक जिव ओवे.’ 6 तिहींवाअहीं ओमे तें बेन नाहां, पोन तें एक जिव होय, ताहां जियांहां देवे जुड़्येहे, तियांहां कोडो माअहुंउं आंगे ने कोअहूं जोवे."

7 फरिसी माट्यों तियाहा कोयो, "ताहरोअ मोशे कायदाम ओं काहा ठरव्यो के सोड़सिट्टी आपीत तियीही सोड़ी देअहूं जोवे?"

8 ईसु तियांहां कोयो, "मोशे तुमाआं कड़क मोनोअ वोजेसे तुमुहूं जिव जिवोअ बोईंहीं सोड़सिट्टी आपेतेहें आदेश आप्यू, पोन कोलीइ सुरुवातीही रोते एहलोहो ने ओतो. 9 आन आंय तुमुहूं कोहो के, जो कोडो सिनालाअ वासी बिहीरा एखा कारणोअ वोजेसे तियाआ बोईंहीं सोड़ीत बिहीरीइरी वेहवाल कोअहे, तो सिनालो कोअहे."

10 तियाआ सेला तियाहा कोयो, "जर माट्योअ बोईंइंरी एहेलोह नातो ओय, ताहरोअ जी वेहवाल ने कोअल्ये हाजो रोनारो."

11 ईसु तियांहां कोयो, "आखेज ओं वसन स्विकार नाहां कोइत सेकते, फक्त तेंज स्विकार कोइत सेकतेहे, जियांहां एहलोहो दान आप्योहो. 12 काहाके थोड़ेक सोडले एहलेहे होय, जें आयहीइ पोटाजमेहें रोत एहलेहे जल्माहां आवयेहे, आन थोड़ेक सोडले एहलेहे होये, जियांहां माअहूं सोडले बोणाये, आन थोड़ेक सोडले एहलेहे होय, जियां होरगाआ राजोअ काजे सोताआ जिवन सोडलो मेक्येहो. जो ओं स्विकार कोइत सेकेहे, तो स्विकार कोए."

13 ताहरेए माअहें पोर्‍याहां ईसुउ जागे लेतावये के तो तियांपोअ आथ मिके आन प्रार्थना कोए, पोन सेला तियांहां बावराआ वोल्या. 14 ईसु कोयो, "पोर्‍याहां माआं जागे आवुहूं देवा, आन तियांहां रुकाहा मा, काहाके के होरगाआ राज यांआं होसर्‍याआंज होये."

15 आन तिये तियांपोअ आथ मिकीत तिहीं रोत जातु रोयू.

16 एक माअहुंउं ईसु जागे आयो, आन तियाहा कोयो, "ए गुरु, आंय कोड्लो हाजो काम कोओ, के माहूं हादाफल्योअ जिवन जोड़ीत सेके?"

17 ईसु तियाहा कोयो, "कि हाजो होये एहें कोत तू माहूं काहा फुसेहे? हाजू ताम एकुज होये, पोन जर तू जिवनोमेहें जाअलोअ कोअतुये, ताहां आदेशोअ पालन कोअजी."

18 तिये तियाहा कोयो, "कोड्ला आदेशे?"

ईसु तियाहा कोयो, "खुन मा कोअही, सिनालो मा कोअही, सोरी मा कोअही, खोटी साक्शी मा आपिही, 19 ताआ आब्हान आयहीइ मान-पान कोअजी, आन आहनेवालां पोअ ताआज होस मेर कोअजी."

20 तिये जुवाने कोयो, "यां आखा आदेशोंहों आंय मानोहो, ओमे मामेहें फाश्यीइ कोड्ली गोठीइ कमी होये?"

21 ईसु तियाहा कोयो, "जर तु पुरो ओवीइलोअ कोअतुये, ताहां जा, ताआ आखो मालधन वेसीत गोरब्योहों आपी दे, आन ताहूं होरगामेहें धन जोड़े, आन तू आवित कोइत माआं फाटी सालेए."

22 पोन तो जुवान ए गोठ उनाइत नाराज ओत कोइत जातु रोयू, काहाके तो खुब मालदार ओतू.

23 ताहां ईसु तियाआ सेलाहां कोयो, "आंय तुमुहूं खोरो कोहो के मालदारोअ होरगाआ राजोमेहें जाअलोअ जाअखो कठीण होय. 24 तुमुहूं फाशुउ कोहो के, देवोअ राजोमेहें मालदार जाय तेतोहो जी हुयीइ नाकोम रोत उटड़ो सोरकीत जाय तों जाआं सोपो होये."

25 ओं उनाइत सेला खुब बोगलात गोया. तियां फुशो, "ताहां कोडाआ तारण ओवे?"

26 ईसु तियांअहें पालीत कोयो, "माअहूं वाअहीं ते ओं नाहां ओत सेकतो, पोन देवोअ काजे आखो ओत सेकेहे."

27 ताहां पेत्रे कोयो, "पाल आमू ते आखो सोड़ीत ताआ फाटी आयाहा: ताहां आमुहूं कि जोड़े?"

28 ईसु तियांहां कोयो, "आंय तुमुहूं खोरो कोहो, के नोवी कोलीमेहें जाहां माहुंउं बेटुह्हू तियाआ महिमामेहें राजगादीपोअ बोहे, तेहेलाम तुमू बी जे माआं फाटी आवयाहा, बारा राजगादीपोअ बोहीत इस्राएलोअ बारा पारवाड़ीइ न्यायनिवाड़ु कोअहा. 29 आन जिये कोडे बी कोअ, नेते पाही, बोअह्हीं, आब्हाहा, नेत आयहीही, नेत पोर्‍याहा, खेतोहो माआं नावोअ काजे सोड़ी देदोये, तियाहा होव पोट मिले, आन तो हादाफल्याआ जिवनोअ आधिकारी ओवे. 30 पोन वारुज जोंअ जे पेहला होये ते सेवट्याआ बोणे; आन जे सेवट्याआ ते पेहला बोणे.