1 ईसु तियाआ सेलाहां नाराज ने ओवुहूं जोवे पोन सादाज प्रार्थना कोअया कोअहूं जोवे कोते, एक काईं कोत देखाड्‍यी. 2 तिये कोयो, "एका होयरोमेहें एक न्यायाधिश रोतुतो. तो देवोहो बी ने बितुतो, आन माहुंहूं बी मान ने आपतुतो. 3 तियाज होयरोम एक रोंडोअ बाय रोतीते, आन ते कायम न्यायाधिशोअ जागे आवित कोइत कोतीते के, ‘माआं विरोध अन्याय कोअनाराआं विरुद्दाम माहूं मदत कोअ!’ 4 ताहां वारुज तावणी जाआं तो न्यायाधिश ने मान्यू, पोन आखरी पोअ मोनोम विसार कोअयू, ‘आंय ने देवोहो बित्लू, के ने माहुंहूं मान आपत्लू, 5 तेबी यी रोंडोअ बोईं माहूं ओसवी देदुहू, तियाहा काजे आंय तियीइ हक्काआ कि होय तो पालिहीं, जर आंय ने कोओ ताहां, ते माआं जागे ताल-ताल आवित माहूं ओसवे.’"

6 ताहां प्रभु कोयो, "उनाआ खाराब न्यायाधिश कि कोहे. 7 ओमे, देव तियाआ निवड़ीइल्या माअहूं पोअ ध्यान ने देय के? जे तियाआ जागेहे रातेन दिही रोड़तेहे, केहें तो तियांआं मदत कोइलोअ काजे वाआ लागाड़े? 8 तुमुहूं आंय कोहो, तो तियांआं न्याय मामार कोए, पोन तेबी माहुंउं बेटाह्हाहा यी धरती पोअ विश्वास पालुहूं जोड़े के?"

9 ताहां ईसु जे सोताहा हाजे समजीइतेते आन बाकी माहुंहूं किज ने समजीइतेते तियां माहुंहूं ए काईं कोत आप्यी. 10 एक वारी बेन माटी मंदिरोम प्रार्थना कोआ गोया: एक फरिसी ओतू आन एक नाकेदार ओतू. 11 "तो फरिसी उबू रोत कोइत मोनोमेहें एहेलिही प्रार्थना कोअयी, ‘देवा आंय ताआ आभार मानोहों, काहाके आंय बिहीराअ होस लालसी, लबाड़, आन सिनालो कोअनारु कायनाहां, आन बाकी माहुंहूं होस कायनाहां आन आंय या नाकेदारोअ होस बी कायनाहां. 12 आंय आठीवड़ाम बेन वारी उपास तोअत्लु; आन माआं आखी कामायीइ दाहवू भाग आपत्लू.’"

13 "पोन तो नाकेदार सेटेज उबू रोत, उसे जुगोअहें जाआं नजर टाकीइलोअ हिम्मत ने कोअयी, पोन सातीपोअ आथ ठोकी-ठोकीइ कोहे, ‘ए देवा, आंय पापी होय, मापोअ दया कोअ!’ 14 आंय तुमुहूं कोत देहो, के तो फरिसी नाहां पोन ओ नाकेदार देवोअ नजरेमेहें धर्मी बोणीत कोओ गोयू; काहाके हारेक जो सोताहा वोडु सोमजेहे तो हानू गोणाय, आन जो सोताहा हानू बोणेहे तो वोडु गोणाय."✝18:14 मत्तय 23:12; लुक 14:11

15 थोड़हे माअहें तियांआं पोर्‍याहां ईसुउ जागे आशिर्वाद आपे तेहें काजे लेत आये. पोन सेला ओं देखीत कोइत तियांहां गाई देना वोल्या. 16 पोन ईसु तियां पोर्‍याहां आहने हादीत कोइत कोयो, "पोर्‍याहां माआं जागे आवुहूं द्या. तियांहां मा रुकहा. काहाके देवोअ राज यांआं सारकाआंज होय. 17 आंय हुदाअलीज तुमुहूं कोहो के, एहेलोह कोडो बी जो देवोअ राजोहो एका हाना पोर्‍याअ होस स्विकार ने कोए, तो देवोअ राजोम केदिहींज ने जात सेकनारो."

18 एके यहुदी पुढार्‍ये ईसुहू फुशो, "हाजा मास्तर, अमर जिवन मेलवीइलोअ काजे आंय कि कोओ?"

19 ईसु तियाहा कोयो, "तू माहूं हाजू काहा कोहे? देवोअ सिवाय कोडोज हाजो कायनाहां. 20 ताहूं देवोअ कायदाअ तोम मुंदूज होये: ‘सिनालो मा कोअही; खुन मा कोअही; सोअही मा; ठोगोअ साक्शी मा आपिही; सोताआ आयहीन-आब्हाआ मान-पान कोअजी.’"

21 तिये माट्ये कोयो, "ए आखी गोठी आंय हानुज रोत मानतु आयुहू."

22 जेहेलाम ईसु ओं उनाअयू, ताहां तिये तियाहा कोयो, "ओमेज बी एकी गोठीइ तामेहें खामी होय. तापोअ जो ओय ने ओय तो आखो वेसी दे, आन जे पोशा आवे ते गरिबोहों वाटीत आपी दे, ताहां ताहूं होरगामेहें मालमिलकत जोड़े. आन तु सोताहा माआं फासाड़ी आव." 23 पोन जाहां यहुदी पुडारी ओं उनाअयू ताहां खुब नाराज ओत गोयू, काहाके तो खुब मालदार ओतू.

24 तो खुब नाराज होय एहलोहो ईसु देख्यो, ताहां तिये जियां पोअ धन होय तियां माहुंहूं कोयो, "जे मालदार होय, तियांआं कोअते देवोअ राजोम जाअलोअ केतोह कठीण होय! 25 मालदारोअ देवोअ राजोम जाअलो रोत जी, हुयीइ डुसामेहें रोत उटड़ो सोरकीत जाय तों जाअखो सोपो ओये."

26 जियां माअहूं ए गोठी उनाअये, तियां कोयो, "एहेलोह ओय ताहां जीव कोडो वासाइत सेकेहे?"

27 ईसु उत्तर आप्यो, "जे गोठी माहुंउं वाअहीं नाहां ओत सेकती, ते देवो वाअहीं ओत सेकेहे"

28 ताहां पेत्रे कोयो, "पाल! आमू ताआ फासाड़ी आविइलोअ काजे कोअ-बाआ सोड़ी देदोहो."

29 "होव!" ईसु तियांहां कोयो, आन "आंय तुमुहूं हुदाअलीज कोहो, के देवोअ राजोअ काजे जिये सोताआ कोओ नेते लाडी नेते पाव्हीइले नेते आयही नेत आब्हू, नेते पोर्‍याहां सोड़ी देदे ओये; 30 तियाहा आज्याआ दिहोम जाअखीलाहा पोट जोड़े आन आवता दिहोम अमर जिवन जोड़े."

31 ईसु तियाआ बारा सेलाहां आंगेज लेत जात कोयो, "उनाआ! आपू उसे येरुसालेमोम जाताहा आन तिहीं माहुंउं बेटाह्हाअ बाप्तिम जो भविश्यवक्ता लेख्योहो तो पुरो ओवनारो होये. 32 तो बिगर यहुदीइ आथोम होपात जाय, आन ते तियाहा डांणवे, तियाआ निंदा कोए, आन तियापोअ थुपे. 33 तियाहा सापका देय, माईंत टाके, पोन तो फाशुउ तीन दिहोअ फासाड़ी जिवित उठे."

34 पोन सेलाहां यीं गोठीइ अर्थ ने समजाअयो के ईसु किहाअ बाप्तिम कोहे. ए गोठ तियां रोत दोडपात रोयी, आन तिये कोड्ली गोठीइ बाप्तिम कोल्यो तो तियांहां मुंदू ने गोयू.

35 जेहेलाम ईसु यरीहोअ जागे आवतुतो, तेहेलाम तिहीं एक आंदलु वाटेए मेरे बोहीत बिख माग्या कोअतुतो. 36 जेहेलाम तिये आंदले माअहोंअ गर्दीइ आवाज उनाअयू, ताहां तिये फुशो, "ए किहाअ गर्दी होय?"

37 माअहूं तियाहा कोयो, "ईसु नासरी एहें रोत जाहे."

38 तिये जोरेज रोडीत कोयो, "ईसु, दाविदोअ बेटाह्हा मापोअ दया कोआ!"

39 आगाड़ी सालनारा माअहूं तियाहा ठावको रोय तेहें कोयो. पोन तो फाशुउ बी वादार जोरे बोंबलीत कोनु वोल्यू, "दाविदोअ बेटाह्हा, मापोअ दया कोअ!"

40 ईसु रुकात कोइत आन आंदलाहा आहने लेतावे तेहें काजे आरीवालाहां कोयो, तो आंदलु आहने आवयू, ताहां ईसु तियाहा फुशो, 41 "आंय ताआ वोतीइ कि कोअहूं जोवे, एहेलिही ताआ इश्शा होय?"

तिये कोयो, "प्रभु, माहूं फाशोअ देखाओ वोलुहूं जोवे."

42 ईसु तियाहा कोयो, "ताहां पालु वोल! ताआ विश्वासे ताहूं हुदार्‍युहू."

43 आन तुरतुज तियाहा देखाओ वोल्यो, आन तो देवोअ भक्ती कोअतूज ईसुउ फासाड़ी सालु वोल्यू; आन ओं देखीत कोइत आखे माहें देवोअ स्तुती कोअयी.