1 ईसु नजर फेरवीत मालदार माअहोंहों भेटेए पेटी मेहें भेट टाकत्ले देख्ये. 2 तेहेलाम तिये एकी गरीब रोंडोअ बायीही बी बेन तांबाआ रुप्या टाकत्ली देख्यी. 3 ताहां तिये कोयो, "आंय तुमुहूं हुदाअलीज कोहो के, यी गरीब रोंडोअ बोईं बाकी आखा माअहूं रोत वादार भेट कोअयिही. 4 काहाके यां आखा माअहूं तोम तियांआं भारपुर धन ओतो तियाम रोत आप्यो, पोन यी रोंडोअ बायी तोम गरीब होय तेबी तियीइ आखी जिवाख आपी देदी."

5 सेलामेर्‍याआ थोड़ाक जोओं मंदिरोअ बाप्तिम एहेलिही गोठी कोअताते के, तों केताहा हाजा डोणो वाअहीं आन देवोहो आपल्यी भेटेए वस्तु वाअहीं होबाड़्योहो. 6 ताहां ईसु कोयो, एहेलिही वेल आवे, ओं जो किबी तुमू देखताहा यामेहें डोणो पोअ डोण बी ने टिकीत रोय, ते आखा खोदलात पोड़े.

7 तियां फुशो, "गुरुजी, ए गोठी कोयों ओवे? आन ए गोठी पुरी ओवे, तेहेलाम तियाआ निशाणी कि रोय?"

8 ईसु कोयो, "सांबालित रोवा; तुमू ठोगाअहा मा, काहाके माआं नावसे वारुज जोओं आवे आन कोय, ‘तो आंय होय’ एहें बी ‘ते वेल आहने आयीही!’ पोन तियांआं फासाड़ी मा जाहा! 9 जेहेलाम लढाय आन दोंगाअ बाप्तिमेहें उनाअहा ताहां मा बिहा, काहाके ए गोठी पेल ओवुहूंज जोवत्ली. पोन तेहेलाम सेवट ने ओवे."

10 ताहरुउ तिये कोयो, "एक देस बिहीरा देसो पोअ, एक राज्य बिहीरा राज्यापोअ लढाय कोए. 11 वोडे वोडे भुकंपे ओवे, काल पोड़े आन आखी वोगेहे मोराय साले, बिक लागाड़े एहेलिही घटना ओवे आन जुगोमेहें रोत वोडी निशाणी आवत्ली देखाय. 12 पोन ओं आखो ओवीइलोअ पेल तें तुमुहूं ओटक कोए आन तारास कोआड़े; पोन्सामेहें उबे कोए आन जेलेम टाके, माआं नावोअ वाखरी तें तुमुहूं राजाआं आन आधिकार्‍योंअ सामने लेत जाय. 13 यीं गोठी वाअहीं तुमुहूं साक्शी आपीइलोअ गालो मिलीत जाय. 14 तियाहा काजे, कि उत्तर आपीइलो आन केहें कोइत वासाइलो याआ पेलुज फिकर ने कोइलाआ तुमाआं मोनोम ठांइत ल्या. 15 काहाके आंय तुमुहूं एहेलेहे शब्दे आन एहेलिही बुद्दी आपिहीं के सामनेवाला तुमाआं विरोधीही गोगीइलोअ, नेत तुमाआं गोठीइरी टक्कर देअलोअ बिलकुल बी ने जमीत सेके. 16 तुमाआं आयहीन-आब्हू, पाही, कोर्‍येए माअहें आन दोस्ती तुमुहूं ठोगित तोइत आपे; आन तेतोज नाहां तुमामेर्‍याअ थोडहाहा माईंत टाकी देय. 17 माआं नावोअ वाखरी आखे माहें तुमाआं सीस कोए. 18 पोन तुमाआं मुंडीपोर्‍योअ एक सिंग्यो बी वाकडो ने ओत सेके. 19 तुमू सोताआ धिर तोइला वाअहीं तुमाआं जिव वासाड़ीत लेहा."

20 "जेहेलाम तुमू येरुसालेमोहों सैनिको वाअहीं केंडवारीत रोल्य पालहा, ताहां तुमुहूं मुंदू जाय के, तियाआ आरवाइलोअ वेल आवित लागीही. 21 ताहां जे यहुदीयामेहें ओय, ते डोगोम गुगदे वोलुहूं जोवे; आन जे होयरोम ओय तें बारथे निहींत जाअहूं जोवे, आन जें गाँवों मेहें ओय तें होयरोम ने जाअहूं जोवे. 22 जे गोठी लेखाअली होय, ‘तो डोंडोअ दिही,’ ते आखी गोठी पुरी ओत जाय.✝ 23 काहाके तियां दिहोंम जे पोटाअरी बोईं होय, आन जे पोर्‍याहा बुजी खावाड़तीही, तियींहीं जुदी वाजे! काहाके यी धरती पोअ जाअखी वोडी पिड़ा आवे, देसोपोअ वोडी अड़सन आवे आन आखा माअहूं पोअ देवोअ डोंड आवे. 24 थोड़हे तारवाअ वाअहीं मोए आन बाकी जोओंहों तोइत जेलेम टाकी देये; आन येरुसालेमोहों परदेसी माअहोंअ वेल ने पुरी ओवे, ताअहूं जाआं गुडाआ थुड़ी सेंदे."

25 "दिहीन, सांदे, तारा यांमेहें जुदीज निशाणी देखाय, धरती पोर्‍याअ आखा देसोपोअ आफत पोड़े आन घांगरीइनारा दोर्‍याअ सेलकाअ देखीत माहें काबराइत जाये. 26 बिके वाअहीं आन दुन्यापोअ आवनारी घटनाहां वाट जोवी-जोवीइ बिके वाअहीं माअहें मोये-मोयेज ओत जाय, काहाके जुगोमेर्‍यीइ सेक्ती आलवात जाये. 27 आन तेहेलाम तें माहुंउं बेटाह्हाहा वोडी ताकत आन वोडी महिमा वाअहीं एका वादलाम आवत्लाहा देखे. 28 जेहेलाम ए गोठी ओवीइलोअ सुरवात ओवे, तेहेलाम होल्लेज उबे रोवा, आन तुमाआं मुंड उसो कोआ, काहाके तुमाआं सुटका आहने होये."

29 ताहां ईसु तियांहां एक काईं कोत आप्यी, अंजिरोअ साड़ आन बिहीरा साड़ोहो पाला. 30 तियांहां डिरा फुटा वोल्या के तुमू जाईंत लेतेहे उनालू आहने आवयुहू. 31 तेहेंज कोइत ए गोठी ओवत्ली देखाय, ताहां तुमू समजीत जाजा के देवोअ राज आहने आवित लागोहो.

32 आंय तुमुहूं खोरीज कोहो, के ए गोठी जाअहूं जाआं पुरी ने ओवे, ताअहूं जाआं या जमानाअ सेवट ने ओवे. 33 जुग आन धरती जाते रोये, पोन माआं वसन कायम रोय.

34 तियाहा काजे, तुमू सांबालित रोवा! तुमू उदाशे पिइलोन खाअलोअ, दुन्याअ सिंता, आज्याआ दिहोअ कालजी यीं गोठी वाअहीं बोयरे मा ओत जाहा, आन नेते तो दिही तुमापोअ सापलाअ होस उसकाहीज आवित पोड़े. 35 काहाके यी धरतीपोअ रोनारा आखा माअहूं पोअ तो एहेंज कोइत आवित पोड़े. 36 तियाहा काजे तुमू जागते रोवा आन कायम प्रार्थना कोअते रोवा, एताआ काजे के तियीं बादी गोठीमेहें रोत हाजी हुतायी निहींत माहुंउं बेटाह्हाअ सामने उबा रोअलोअ काजे तुमू लायक बोणीत सेकहा.

37 तियां दिहोम ईसु दाड़ख्युउ मंदिरोम सिकाड़तुतो आन सिंजिवड़ो ओवो के जेयतुन नावोअ डोगो पोअ रात काडीइलोअ काजे जातु रोतुतो. 38 आन आखे माअहें वेगऱ्येए उठीत कोइत तियाआ गोठी उनाइलोअ काजे तियाआ जागे आवया कोअतेते.