1 एक दिही ईसु एकी जागेहे प्रार्थना कोअतुतो. जेहेलाम तिये प्रार्थना कोइत लेदी, तेहेलाम तियाआ सेलामेहें रोत एके जोएं तियाहा कोयो, "प्रभु, जेहें कोइत योहाने तियाआ सेलाहां प्रार्थना कोइलोअ सिकाड़्यो, तेहलोज आमुहूं बी तु सिकाड़ेए."

2 ईसु तियांहां कोयो, "जाहां तुमू प्रार्थना कोअहा, ताहां कोवा:

"‘आमाआं होरगामेर्‍याआ बा:

ताआ नाव सोको मानाअहूं जोवे,

ताआ राज आवुहूं जोवे.

3 आमाआं दाड़ख्युउ रोटू आमुहूं दाड़ख्युउ आपेए.

4 आमाआं गुनाआं आमुहूं माफ कोअ,

काहाके आमुं बी आमाअरी सुकनाराहां माफ कोअताहा.

आन आमुहूं कठीण परिक्शामेहें मा पोड़ुहूं देही.’"

5 ताहां ईसु तियाआ सेलाहां कोयो, "समजीत ल्या तुमामेर्‍युउ एखु तुमाआं दोस्तीइ कोअ पोरापोर रातीही गोयू आन कोयो, ‘दोस्ता माहूं तीन रोटा उसन्यो आपेए. 6 काहाके एक माआं दोस्ती का तेबी जात्लू तेहलुज माआं जागे आयुहू, आन तियाहा वाटु कोइत आपिइलोअ काजे मापोअ कीज कायनाहां.’ 7 आन समजीत ल्या, तुमाआं दोस्ती कोअमेहें रोत तुमुहूं उत्तर आपे, ‘माहूं मा ओसविही! बाअणो बी वाली देदोहो, आन माआं पोर्‍ये बी माअरी आथरुपोअ हुवित गोयेहे, तिहीं वाअहीं आंय ताहूं रोटू नाहां आपीत सेकतु’ 8 हाजो, ताहां कीमे? आंय तुमुहूं कोहो के, तो आपिइलोअ काजे ने बी तियार ओय, तेबी तो तियाआ दोस्ती होय कोत आन विण लाजेज तो तियापोअ मागेहे काजे तो उठे, आन जेतू जोवे तेतू तियाहा आपे. 9 आन तियाहा काजे आंय तुमुहूं कोहो के, मागा, ताहां तुमुहूं जोड़े; होदा, ताहां तुमुहूं सापड़े; ठोका, ताहां तुमाआं काजे बाअणो उगडे. 10 काहाके जो कोडो मागेहे, तियाहा जोड़ेहे; आन जो कोडो होदेहे, तियाहा सापडेहे; जो कोडो बाअणो खोटकावेहे, तियाआ कोअते बाअणो उगडेहे. 11 तुमा मेहें एहेलुहू कोडू आब्हू ओये, जो तियाआ पोर्‍यो रोटू मागे ताहां डोण आपे, आन मासू मागे, ताहां तियाआ बोदले जनवार आपे? 12 नेताहां इंडो मागे ताहां विसीइ आपे? 13 ताहराआ, तुमू बाक्ता होय, तेबी जर तुमाआं पोर्‍याहां हाजी वस्तु आपीइलोअ तुमुहूं मुंदू होये, ताहां होरगामेएं रोनारु देव आब्हू तियापोअ मागनाराहां पवित्र आत्मा केहें ने आपे!"

14 जाहां ईसु एका मुका पुतोहो काडतुतो, आन तो पुत निहींत गोयू, तेहेलाम तों माहुंउं गोगो वोल्‍यो; आन तें माहें बोगलात गोये. 15 पोन तियां मेर्‍याआ थोड़हा माअहूं कोयो, "ओ तोम बालजाबुल नावोअ पुतोंअ आधिकार्‍योअ सेक्ती वाअहीं पुते काडत्लू."✝

16 बाकी जोएं ईसुहू कोलित पालीइलोअ काजे होरगाआ समत्कार पालुहूं माग्यू, जो देवोअ तरफ रोत ओय. 17 पोन ईसु तियांआं मोनोअ विसार जाईंत कोइत, तियांहां कोयो, "जिया राजोम तियां तियांआंज टोलामेहें भान्गड़्यी ओवतीये, ताहां तो राज जाअखा दिही नाहां टिकीत सेकतो; तेहेंज कोइत एखा कोअमेहें एकान बिहीराअरी भान्गड़्यी ओवतीये, ताहां तो कोअ बी जाअखा दिही जाआं ने टिकनारो. 18 जर सैतान सोताआ राजोअ दुस्मोन बोणीत जाय, आन तियाआज टोलाअरी भान्गड़्यी ओवे, ताहां तियाआ राज केहें कोइत टिकीत रोये? काहाके तुमू तोम माआं बाप्तिमेहें कोताहा, के आंय बालजाबुलोअ सेक्ती वाअहीं पुते काडोहो. 19 जर आंय बालजाबुलोअ* सेक्ती वाअहीं पुते काडतुये, ताहां तुमाआं सेला कोडाअ सेक्ती वाअहीं पुते काडताहा? तियाहा कोत तेज तुमाआं न्यायनिवाड़ु कोए. 20 पोन जर आंय देवोअ ताकते वाअहीं पुते काडतुये, ताहां देवोअ राज तुमाआं जागे आवित लागोहो.

21 "जाहां ताकतवालो माहुंउं बादे आथ्यारे आरी लेत कोइत कोओअ राखवाली कोअहे, ताहां तियाआ आखो मालधन वासात रोहे. 22 पोन जाहां तिया रोत वादार ताकतवालो माहुंउं तियाअरी लड़ाय कोइत तियाहा जिकीत लेहे, ताहां तिया पोर्‍येए आथ्यारे, जियांपोअ तियाआ भरिवसू रोहे, तियांहां बुउसीत लेहे, आन तियाआ मालधन लुटीत कोइत सोताआ हात्योहों वाटीत आपेहे.

23 "जो कोडो माअरी नाहां तो खोरीज माआं विरुद्दाम होये, आन जो माअरी नाहां टोलू कोअतो, तो वेरेहे.✝

24 "जेहेलाम पुत माहूंमेहें रोत निहीत जाहे, तेहेलाम तो हुंद्ला रानोम जागू होदीत फिरेहे, आन नाहां जोड़तू, ताहां तो कोहे, ‘जिया कोअमेहें रोत आंय निकल्‍यू, तियाज मेहें वापिस जातु रोहीं.’ 25 आन ताहरुउ वापिस आवित कोइत तो कोअ साफसुप आन मोस्तेए देखेहे. 26 ताहां फाशुउ तो तिया रोत बी जाअखा खाराब साँत पुतोहों तियाअरी लेतावेहे, आन ते तिहींमेहें फोहीत रोना वोलताहा, एहें कोइत तिया माहुंउं पेल्लीइ रोत बी जास्ती खाराब दशा ओत जाहे."

27 जेहेलाम ईसु ए गोठी कोयाज कोअतुतो तेताज मेहें गर्दीम रोत एक बोयोंअ उठ्यी, आन जोरेज कोयो, "ताहूं जियी बोईं जल्म आप्यो, आन जियीइ बुजी तुमे खादी ते धन्य होय!"

28 पोन ईसु उत्तर आप्यो, "धन्य तोम तें होय, जें देवोअ वसन उनाअतेहे आन मानतेहे!"

29 जेहेलाम वोडी गर्दी गोड़ा ओवतीते, ताहां तो कोनु वोल्‍यु, "यी पिढ़ीइ* माअहें केतेहे पापी होय; के तें समत्कार मागतेहे; पोन याहां योनाअ समत्कार सोड़ीत कोड्लूज समत्कार ने जोड़नारु. 30 जेहलुहू योना निनवेए माहुंउं कोअते समत्कार ठर्‍यु, तेहलुज माहुंउं बेटुह्हू बी या जमानाआं माहुंउं कोअते समत्कार ठरे!✝ 31 पालामाआं वोग्यीइ राणी उठीत कोइत न्याय निवाड़ाआ दिही यी पिढ़ीइ माअहूं पोअ आरोप लागाड़े, काहाके ते शलमोनोअ शिक्शण उनाइत धरतीइ एके जोड़पे रोत आयी, ताहां पाला, इंहीं जो होय, तो शलमोनो रोत बी वोडु होये. 32 निनवेए माअहें न्याय निवाड़ाआ दिही उबे रोय, आन यी पिढ़ीइ माअहूं पोअ आरोप लागाड़े, काहाके तियां योनाअ संदेश उनाइत कोइत पापोम रोत मोन वाल्योतो, आन पाला, इंहीं जो होय, तो योना रोत बी वोडु होय."

33 कोडो बी माहुंउं दिवू पेटाड़ीत निकाड़ीत नेताहां खिवड़्याआ थुड़ी टापित नाहां मेकतो, पोने मांय आवनारा जानाराहां उजालो देखाय तेहें काजे उसा जागाम मिकेहे. 34 ताआ शरीरोअ दिवू ताआ डोआ होय, तियाहा कोत ताआ डोआ साप ओय ताहां पुरो शरीर बी उजालो वाअहीं पोआत जाय; पोन डोआज खाराब ओय ताहां, पुरो शरीर बी आंदारा वाअहीं पोआत जाय. 35 तिहीं वाअहीं तामेर्‍योअ जो उजालो होय, तो आंदारो ने बोणीत जाअहूं जोवे, कालजी ले. 36 जर ताआ पुरो शरीर उजाला वाअहीं पोआलो रोय, आन शरीरोअ कोड्लूज भाग आंदाराम ने रोय, ताहां जेहलुहू दिवू उजालो टाकतुज सोमकेहे, तेहलोहो तो ताहूं उजाली देये.

37 जेहेलाम ईसु ए गोठी पुरी कोअयी, तेहेलाम एके फरिसी तियाहा कोअ रोटू खानु हाद्यू, ताहरुउ तो गोयू आन मांय जात कोइत रोटू खानु बोठू.

38 ताहां तो फरिसी ओं देखीत बोगलात गोयू, काहाके ईसु रोटू खानु बोहीइलोअ पेल आथ ने तुवयाते. 39 ताहां प्रभु तियाहा कोयो, ए फरिसी तुमू वाटका आन ठाली तोम उपोअ एताज उजालत्ला, पोन तुमाआं मांयते लालसाय आन बाक्ताय होये. 40 आरे फोगा! जिये देवे बारथेए भाग बोणावयू, केहें तिये मांयतेए भाग बी नाहां बोणावयू के? 41 तियाहा काजे जो किज बी मांयतेर्‍योअ ओय, तो गोरब्योहों दान कोइ द्या, आन पाला, तुमाआं काजे आखोज सोको ओत जाय.

42 "ए फरिसी तुमाआं जुदी वाजे! काहाके तुमू पुदिना*, वारालो* आन आखी बातीइ पाजा पालाआ दाहवू भाग ते आपताहा, पोन देवोअ न्याय आन मेरेहे टाली देताहा; पोन तुमू ओं बी ने टालीइलो ओतो, आन तों बी ने सोड़ीइलो ओतो.

43 "ए फरिसी तुमाआं जुदी वाजे! काहाके तुमुहूं यहुदी आराधनालयोमेहें हाजू-हाजू जागू जोवत्लू आन बाजारोमेहें माअहें तुमुहूं जारत्ले तों गोमत्लो. 44 तुमाआं जुदी वाजे! काहाके तुमू बिगर निशाणी वाला माहणोअ होस होये, जियांपोअ माअहें विण जांअयेंज सालतेहे."

45 ताहां एके कायदाअ मास्तरे उत्तर आप्यो, "गुरु, यीं गोठी वाअहीं तु आमाआं बी बदनामी कोअहे!"

46 ईसु तियांहां उत्तर आप्यो, "ए कायदाअ मास्तरों, तुमाआं बी केतीही वाजे! काहाके तुमू माअहूं पोअ एहेलुहू वोजू टाकताहा, जो तियांहां नाहां उसलाअतू, आन तुमू सोताहा तो वोजू उसलीइलोअ कोअते एक आंगुउ बी नाहां लागाड़ता. 47 तुमाआं जुदी विते! काहाके तुमू तियां भविश्यवक्ताआ काजे माहणें बोणावताहा, जियांआं खुने तुमाआंज वेगाआ डायहां कोअयेते. 48 ताहां या कामों वाअहीं तुमू तुमाआं डायहांअरी गोवांद्या ओवा, काहाके तियां भविश्यवक्ताहां माईंत टाक्या, आन तुमू तियांआं माहणें बोणावताहा. 49 तियाहाज काजे देवोअ बुद्दी बी कोयोहो, ‘आंय भविश्यवक्ताहां आन खबर्‍याहां तियांआं जागे मोकलिहीं; ते तियां मेर्‍याआं थोड़हाहां माईंत टाकी देये, आन थोड़हाहां तारास कोआड़े.’ 50 तियाहा काजे, जेता बी भविश्यवक्ताआं खुने सुरवाती रोत ओवेहे, तियां आखाआ ईसाब यी पिढ़ीइ माअहुंहूं आपुहूं पोड़े. 51 आंय तुमुहूं कोहो हाबेलोअ खुन ओवोहो तिहीं रोत ते जखर्‍याआ खुन जो देवोअ मंदिर आन देवान्याअ विसमेहें ओवो तिहीं जाआं, यां आखाआ ईसाब यी पिढ़ीइ माहुंहूं आपुहूं पोड़े."

52 ए कायदाअ मास्तरों, तुमाआं केतीही वाजे! काहाके शिक्शणोअ बाअणो उगाडीइलोअ किल्ली तोम तुमू लेदी, पोन तियामेहें तुमू सोताह बी ने फोटा, आन जें माहें मांय जाअहूं होदतेते तियांहां बी ने जाअहूं देदे.

53 जेहेलाम ईसु तिहीं रोत जातु रोयू, ताहां कायदाअ मास्तरहों आन फरिसी तियाहा जुदा कांय कांय कोना वोल्या, आन वारुज गोठीइ काजे प्रश्ने फुसा वोल्या, 54 आन तियाहा एखू गोठीम तोइलू काजे हेंहता रोया.