1 ए गोठी ओयी तिहीं रोत प्रभु 72 जोओंहों निवड़्या आन जिया-जिया होयरोम आन भागोम तियाहा सोताहा जाअलो ओतो, तिहीं तियांहां बेन-बेन जोओंहों तियाआ आगाड़ी मोकल्‍या. 2 तिये तियांहां कोयो, "खेतोमेहें वाडीइलोअ जाअखो होय, पोने मोजर्‍ये थोड़े होये, तियाहा काजे खेतोअ धण्योहो तियाआ खेतोमेहें ओन वाडीइलोअ काजेहे मोजर्‍ये मोकले तेहें प्रार्थना कोआ. 3 जावा! पाला, आंय तुमुहूं मेडाआं बासाअ होस, कोलवाआं विसमेहें मोकलोहो. 4 तियाहा काजे मा खोत्लू लेहा, ने डोप्टू, नेते खाहड़े लेहा, आन वाटे कोडाहा मा जाराहा. 5 जिया कोडाअ कोअमेहें तुमू जाहा, पेल कोवा, ‘या कोअमेहें होक रोये.’ 6 जर तिया कोअमेहें होकेहे रोनारो माहुंउं ओय, ताहां तुमाआं होक तियापोअ रोय, जर होकेहे रोनारो माहुंउं ने ओय, ताहां तुमाआं होक वापिस तुमा पोअ आवित लागे. 7 तियाज कोअमेहें रोवा, आन जो किबी तियांअहीं रोत जोड़े तोज खावान-पिवा, काहाके काम कोअनारांहां तियांआं मोजरी जोड़ुहूं जोवे. एकान बिहीरा कोओं मा फिरते इंडाहा. 8 आन जेहेलामेहें एखा होयरोम तुमू जाहां आन तिहींइं माअहें तुमुहूं स्विकारे, ताहां जो किबी तुमाआं आगाड़ी वाटु कोइत आपे तोज खावा. 9 तिया होयरोमेर्‍याअ मांदवाड़्याहां हुदारा आन तिहींइं माअहुंहूं कोवा, ‘देवोअ राज्य तुमाआं आहने आवित लागोहो.’ 10 पोन जाहां तुमू एखा एहेला होयरोम गोया, आन तिहींइं माअहें ने रोअहूं देदो, ताहां बारथे वाटे पोअ जावा आन कोवा, 11 ‘तुमाआं होयरोअ तुलो बी जो आमाआं गुडाअरी लागोहो, तो आमू तुमाआं विरुद्दाम इंहींज फोकड़ीत टाकताहा. तेबी तुमू जाइंत ल्या के देवोअ राज तुमाआं आहने आयोहो!’ 12 आंय तुमुहूं कोहो के, न्याय निवाड़ाआ दिही तिया होयरो रोत बी सदोमोअ दशा हाजी रोय!"

13 ए खुराजीन! ए बेथसैदा! तुमाआं जुदी वाजे! काहाके जे वोडे कामे तुमामेहें कोअयेहे, जर तें कामे सुर आन सिदोनोमेहें ओवते, ताहां ते पेंडीइ पोताआ साअके फांगीत आन खाँओंम बोहीत कोइत काअहांआं मोन फेरवीत लेते. 14 पोन देव न्याय निवाड़ाआ दिही तियाआ दया तुमाप रोत वादार सुर आन सिदोनोह देखाड़े. 15 आन ए कफर्णहुम, केहें तु होरगाआ एतोहो उसो ओवीही? तु तोम अधोलोको रोत बी निसे जाही.

16 ईसु तियाआ सेलाहां कोयो, "जो तुमाआं गोठी उनाअहे, तो माआं बी उनाअहे; आन जो तुमुहूं नाकारेहे, तो माहूं नाकारेहे; आन जो माहूं नाकारेहे, तो माहूं मोकलीइनाराहा नाकारेहे."

17 ते बाहात्तर सेला खुसी कोअताज आया, आन कोना वोल्‍या, "प्रभु, ताआ नावो वाअहीं पुते बी आमाआं आदेश मानतेहे!"

18 ईसु तियांहां कोयो, "आंय सैतानोहों विजेए होस जुगोम रोत पोडत्लाहा देख्यू. 19 पाला, आंय तुमुहूं हापोहों आन विश्योहों गुडाआ थुड़ी पिइड़ीइलाआ, आन दुस्मोनोअ आखी सेक्तीपोअ आधिकार आप्‍युहू; आन कोड्लीज गोठी वाअहीं तुमुहूं किज नुकसान ने ओवे. 20 तेबी यी गोठी वाअहीं खुस मा ओवाहा के पुते तुमाआं आदेश मानतेहें, पोन यी गोठी वाअहीं खुस ओवजा, के तुमाआं नावे होरगाम लेखाअयेहे."

21 तियीज घेड़ी ईसु पवित्र आत्मामेहें खुसी वाअहीं पोआइत गोयू, आन कोयो, "बा, जुग आन धरतीइ प्रभु! आंय ताआ महिमा कोअहो, के तुमे यीं गोठीहीं जाणकार आन सिकाअला माअहोंप रोत निकाड़ीत मेक्‍यी, आन पोर्‍याहां देखाड्‍यी. ए बा, काहाके ताहूं एहेलोह कोइलोज हाजो गोम्यो."

22 माआं आब्हे आखो बादो माहूंज होपी देदोहो; आन आब्हाअ सिवाय कोडाहाज नाहां मुंदू के बेटुह्हू कोडू होय, आन बेटाह्हा सिवाय कोडाहाज नाहां मुंदू के आब्हू कोडू होये, जियाहा बेटुह्हू देखाड़ुहूं होदे तियाहाज.

23 ताहां ईसु सेलाअहें फिरीत तियांहां मोनेज कोयो, "जो तुमू देखताहा तों देखनारे धन्य! 24 काहाके आंय तुमुहूं कोहो के, जाअखीलाहां भविश्यवक्ताहां आन राजहां जे गोठी तुमू देखताहा, ते पालीइलोअ इश्शा कोअयी, पोन पालित ने सेक्या, आन जे गोठी तुमू उनाअताहा ते उनाइलाअ इश्शा कोअयी, पोन ने उनाइत सेका."

25 आन पाला, एक कायदाअ मास्तर उठ्यू आन एहें कोत ईसुहू फोसाड़ीइलोअ काजे कोशित कोअतू जात कोलित पालु वोल्‍यु के, "ए गुरु, अमर जिवन मेलवीइलोअ कोअते आंय कि कोओ?"

26 ईसु तियाहा कोयो, "कायदामेहें कि लेख्योहो? तु कि कोइत वासत्लु?"

27 तिये माहें उत्तर आप्यो, "तु प्रभु ताआ देवोहो ताआ पुरो मोन आन ताआ पुरु जिव आन ताआ पुरी ताकत आन ताआ पुरी बुद्दी वाअहीं प्रभु देवोपोअ मेर कोअ; आन ताआ जागेवालाहां ताआ होसुज मेर कोअ."

28 ईसु तियाहा कोयो, "तुमे बोराबर कोयो, ओंज कोअही ताहां तु जिवतु रोही."

29 पोन तिये सोताहा धर्मी बोणीइलाआ विसारो वाअहीं ईसुहू फुशो, "ताहां माआं जागेवालू कोडू होये?"

30 ईसु उत्तर आप्यो, "एक माहुंउं येरुसालेम रोत यरीहो जातोतो ताहां, बांडों तियाहा केंडवारित लेदो आन तियाआ आंगड़े काडीत लेदे, देय-देय जिवखाअलोहो सोड़ीत जाता रोया. 31 आन एहेलोह ओवो के एक पुंजारु तियीज वाटे जाया कोअतुतो, पोन जाहां तिये तिया माहुंहूं देख्यो, ताहां तो बिहीरी वाटे रोत टोलीत सोरकीत गोयू. 32 तियीज वाटे एक लेवी बी आयू, आन तो बी तिया माहुंहूं देख्यो, आन बिहीरी वाटे टोलीत सोरकीत गोयू. 33 पोन एक शोमरोन वालू वाटारु तियीज वाटे आयू, आन जाहां तिये तिया माहुंहूं देख्यो, ताहां तियाहा किव आयी. 34 तो तियाआ जागे आवयू आन तिये तियाआ जखमे पोअ तेल आन दाराक्शाआ रोह हारीत कोइत पट्टी बांद्यी, आन सोताआ गोदड़ा पोअ मिकीत कोइत तियाहा एकी धर्मशाड़ाम लेत गोयू, आन तियाआ सेवा साकरी कोअयी. 35 बिहीरे दिही तिये बेन सांदीइ पोशा धर्मशाड़ाआ मालख्योहो आप्या, आन कोयो, ‘याअ सेवा साकरी कोअजी, आन या रोत वादार जो किबी याअ काजे खर्स कोअही, तो आंय वापिस वोलीइली वेले आपी देहीं.’"

36 आन ईसु तियाहा कोयो, "को, ओमें ताआ विसारो मेहें यां तीनू मेहें रोते डाखाआ आथोम पोड़ल्या माट्योअ जागेवालू कोडू बोण्यु?"

37 कायदाअ मास्तरे उत्तर आप्यो, "जिये तियापोअ दया कोअयी तोज."

ईसु तियाहा कोयो, "जा तु बी तेहेंज कोअ."

38 जाहां ईसु आन तियाआ सेला वाटे सालताते, ताहां ते एका गाँवोम आया, तिहीं एक बाय ओती, तियीइ नाव मार्था ते तियांहां तियीइ कोअ हादीत लेत गोयी. 39 मरिया नावोअ तियीइ एक बोअह्हीं, ते प्रभुउ गुडाअहीं बोहीत तियाआ शिक्शण उनाअतीते. 40 पोन मार्था काम कोइ कोईइ ओसवाअयी, आन ताहरीइ ईसुउ जागे आवित कोइत कोनी वोल्‍यी, "प्रभु तुमुहूं किज बी कालजी नाहां के? माआं बोअह्हीं मरिया आखो काम मापोअ एतोज सोड़ी देदोहो? तियाहा काजे माहूं मदत कोए तेहें तियीही कोत दे!"

41 प्रभु तियीही उत्तर आप्‍यो, "मार्था, ए मार्था! तु जाअखीलिही गोठीइ कालजी कोअहे, आन काबराइत जाहे. 42 पोन निस्ती एकी गोठीइ गरज होय. मरिया हाजाम हाजी गोठ निवड़ीत लेदीही, आन ते तियी पोअ रोत ने बुउसीता आवे."