1 ईसु पवित्र आत्मा वाअहीं पोआइत यारदेन खाडीइहीं रोत वोलीत आयू. ताहां आत्मा तियाहा हुंद्ला रानोम लेत गोयू; 2 आन सालिही दिही जाआं तिहीं सैतान तियाहा कोलीत पाल्‍यू. तियां दिहोम तिये कीज ने खादो, आन जाहां ते दिही पुरा ओवा, ताहां तियाहा फुक लागी.

3 ताहां सैताने तियाहा कोयो, "जर तु देवोअ बेटुह्हू ओय, ताहां या डोणोहो रोटू बोणीत जायतेहें कोत दे."

4 पोन ईसु तियाहा उत्तर आप्यो, "वसनोमेहें लेख्योहो, ‘माहुंउं फक्त रोटा वाअहीं एतोज ने जिवे.’"*

5 ताहां सैतान तियाहा उसा जागा पोअ लेत गोयू आन एक्कुज तालम दुन्याआं आखो राज देखाड़्यो. 6 ताहरुउ तियाहा कोयो, "आंय ओ आखु आधिकार आन बादो मालधन ताहूं आपिहीं, काहाके ओं आखो माआं आथोम होपाअयोहो, आन आंय माआं मोर्जी वाअहीं जियाहा आपो लागे तियाहा आपित सेकोहो. 7 तियाहा काजे जर तू माआं भक्ती कोअही, ताहां ओं आखो ताआ ओत जाये."

8 ईसु तियाहा उत्तर आप्यो, "वसन कोहे, तु ताआ प्रभु जो देव होय तियाआज भक्ती कोअ, आन तियाआज सेवा कोअ!"

9 ताहां सैतान तियाहा येरुसालेम सेहरोम लेत गोयू आन मंदिरोअ सुटी पोअ उबू कोअयू आन तियाहा कोयो, "तु जर देवोअ बेटुह्हू ओय, ताहां तु सोताहा इंहीं रोत निसे उडीत पोड़. 10 काहाके देवोअ वसन कोहे के, ‘तो ताआ कोअते तियाआ देवदुतोंहों ताहूं सांबाले तेहें काजे आदेश आपे. 11 आन ताआ गुडा डोणोहो ठोकाअहूं ने जोवे कोत ते ताहूं उसाअ उसेज सेलवित लेये.’"

12 ईसु तियाहा उत्तर आप्यो के, "देवोअ वसन एहें बी कोहे के, तु ताआ प्रभु जो देव होय तियाहा मा कोलित पालही."*

13 जाहां सैतान ईसुहू बादी वोलेहे रोत कोलीत पालिइलोअ पुरो कोअयो, ताहां एका तालोअ कोअते तियाहा सोड़ीत जातु रोयू.

14 ताहरुउ ईसु आत्माआं ताकते वाअहीं पोआलुज गालील इलाखामेहें वापिस आयू, आन तियाआ बाप्तिमेर्‍यीइ गोठ पुरा भागोमेहें वेराइत गोयी. 15 आन तो यहुदी आराधनालयो मेहें सिकाड़ु वोल्यू आन आखा तियाआ स्तुती कोअयी.

16 फाशुउ तो नासरेथोम आयू, जिहीं तो हानू रोत वोडु ओवूतो; आन तियाआ पद्धती वाअहीं आरामोअ दिही यहुदी आराधनालयो मेहें जात कोइत वसन वासीइलो कोअते उबू रोयू. 17 यशया भविश्यवक्ताआ पुस्तक तियाहा आप्‍यो, आन तिये पुस्तक उगाड़ीत एहेलुहू भाग काड्यू जिहीं एहेलोह लेख्योतो:

18 "प्रभुउ आत्मा मापोअ आयुहू,

काहाके तिये माहूं गरिबोहों हाजी बातमी होंबलाड़ीलोअ काजे अभिशेक कोअयुहू,

तिये माहूं बांदाअलाहां सुटकाआ

आन आंद्लाहां फाशेए देखते कोइलाआ,

आन थुड़ दाबाअलाआं सुटका कोइलोअ काजे मोकल्युहू,

19 आन जेहेलाम प्रभु तियाआ माअहुंहूं वासाड़े,

ते पुकारु कोइलाआ वेल आयीही."*बिड़ू वाल्ल्यो पुस्तक

20 ताहां ईसु पुस्तक बोंद कोइत सेवकोअ आथोम आपी देदो आन बोहीत गोयू; आन आराधनालयो मेहें आखा माहुंउं नजर तियापोअ ओती. 21 ताहां तो तियांहां कोनु वोल्‍यु, "आज तुमाआं उनाइला वाअहीं वसनोअ ओं लेख्यो पुरो ओवोहो."

22 ताहां आखे माअहें तियाआ हाजो नाव काडे वोल्‍ये, आन तियाआ मेरवानीइं गोठी उनाइत बोगलाइत गोये, आन कोने वोल्‍ये, "ओ योसेफोअ बेटुह्हू नाहां के?"

23 ताहां तो तियांहां कोनु वोल्यू, "तुमू माआं कोअते ए काईं ते पाड़हाजे के, ‘ए डाक्टर, तु सोताहा हुदरेए ताअहूं’ आन एहेलोह बी कोहा के ‘जे गोठी आमुं कफर्णहुमो मेहें उनाअयेहे ते इंहीं आपाआ गाँवोम बी कोइत देखाड़.’" 24 आन तिये तियांहां कोयो, "आंय तुमुहूं खोरीज कोहो कोड्लाज बी भविश्यवक्ताहा तियाआ सोताआ गांवोंमेहें स्विकार नाहां कोअते.* 25 आंय तुमुहूं खोरीज कोहो के, एलियाआ वाडोमेहें वारुज रोंडोअ बायहीं ओती, जेहेलाम इस्राएलोमेहें साड़े तीन वोरह्ये जाआं जुगोम रोत वोऱ्हात ने पोड़्यू, तेहेलाम वोडु काल पोड़्युतो. 26 तेबी एलियाहा बिहीरा कोडाअ जागे नाहां मोकल्यू, पोन सिदोन मुलखोअ सारफथ होयरोअ एकी रोंडाअली बायीइ जागे तियाहा मोकल्यू. 27 आन भविश्यवक्ता एलिशाआ वाडोमेहें इस्राएल देसोम जाअखीलेहे वोडा दुखोअ माअहें ओते, पोन सिरिया मेहें रोनारा नामानोह सोड़ीत कोडाहा बी सोको नाहां कोअयो."

28 ए गोठी उनाइत यहुदी आराधनालयो मेर्‍याआ आखा माअहुंहूं जाअखीलिही खोत लागी. 29 ते आखे उठ्ये आन ईसुहू होयरोअ बारथे काडी देदू, आन जियी टेकड़ीपोअ तियांआं गांव बोठोतो, तियाआ टेको पोअ रोत तियाहा निसे लुडवी देअलोअ कोअते तिहीं जाआं लेत गोये. 30 पोन तो तियांआं विसमेहें रोत निहीत कोइत तिया तियाआ वाटे जातु रोयू.

31 ताहां ईसु गालील मुलखोअ कफर्णहुम सेहरोम गोयू आन आरामोअ दिहोअ दिही माअहुंहूं संदेश आपतुतो. 32 तें तियाआ हिकवोणो वाअहीं पोंगलात गोये, काहाके तो आधिकारो वाअहीं संदेश आपतुतो.* 33 तिया यहुदी आराधनालयोमेहें एक माहुंउं ओतो जियामेहें खाराब आत्मा ओती, तो जोरमेहें आअड़ीत उठ्यो, 34 "ए! ईसु नासरेथकर, ताहूं आमा पोअ रोत कि जोवे? केहें तु आमुहूं आरवू आयुहू? माहूं मुंदू होय तू कोडू होय? तु देवोअ सोकू खबर्‍यु होये!"

35 ईसु तियाहा बावराइत कोयो, "ठावको रो, आन यामेहें रोत निहीत जा!" ताहां तो पुते तिया माहुंहूं विसमेहें आसाटीत कोइत विण तारास देदेज तिया माहूंम रोत निहीत गोयू.

36 यावाअहीं तें आखे माअहें बोगलात गोये, आन एकान बिहीराअरी गोठी कोए वोल्‍ये, "एं किरोंगे शब्दे होये? काहाके तो आधिकारो वाअहीं आन ताकते वाअहीं खाराब आत्माहां जाआं आदेश आपेहे, आन तें बारथे निहीत जातेहे." 37 एहें कोइत शारी ओरी आखी जागे ईसुउ सर्सा पसरीत गोयी.

38 ईसु यहुदी आराधनालयोम रोत निहीत शिमोनोअ कोअ गोयू. शिमोनोअ हावेह्हे जाअखी जोराअरी ओती, आन तियां तियाहा विनंती कोअयी. 39 ईसु तियीइ आहने उबू रोत जोराहा बावराअयू, आन जोरु उतरीत गोयू, आन ते ताबुड़तुड़ उठीत कोइत तियांआं सेवा-साकरी कोइ वोल्‍यी.

40 दिही बुटताअरीही, जियां-जियांअहीं बातीवानीइ मांदवाड़्ये माअहें ओते, तियांहां तें ईसुउ जागे लेत आवये, आन तियांहां तो एकेका पोअ आथ मिकीत हुदारी देदे. 41 आन पुतें बी वारुज माअहूं मेहें रोत एहें कोतेज निहीत गोये के, "तु देवोअ बेटुह्हू होये!"

पोन ईसु तियांहां आदेश आप्यू आन गोगुहूंज ने देदे, काहाके तियांहां ओं मुंदू ओतो के, तो ख्रिस्त होय.

42 दिही उगू ताहां ईसु होयर सोड़ीत एकी हुंद्ली जागेहे गोयू, आन गर्दीन गर्दी माअहें तियाहा होदते-होदते तियाआ जागे आवये, आन ते तियाहा ने जाय तेहें कोत रुके वोल्‍ये. 43 पोन तिये तियांहां कोयो, "माहूं बिहीरा होयरोम बी देवोअ राजोओ हाजी बातमी परसार कोइलोअ जरुरी होय, काहाके यीज गोठीइ काजे देवे माहूं मोकल्‍युहू."

44 आन तो गालीलोअ यहुदीयाअ आराधनालयो मेहें परसार कोअतू रोयू.