1 अब्राहामोअहीं रोत ते दाविदोअ जागे जाआं ईसु ख्रिस्ताआ* पारवाड़ एहें कोइत होय✝:

2 अब्राहामोहो इसाहाक, ✝आन इसहाकोहो याकोब,✝ याकोबोहो यहुदा✝ आन तियाआ पाही ओवा, 3 यहुदाहा तामारे वाअहीं पेरेस आन जेरह ओवा: पेरेसोहो हेस्रोन ओवू,✝ आन हेस्रोनोहो अराम, 4 अरामोहों अम्मीनादाब, अम्मीनादाबोहो नहशोन आन नहशोनोहो शलमोन, 5 शलमोन आन राहाबेए बोवाज ओवू, बोवाज✝ आन रुथेहे ओबेद, आन ओबेदोहो इसाय ओवू.

6 आन इसायोहो दाविद राजा ओवू, ✝ दाविदोअ लाडी जे पेल्लीइ उरीयाआ लाडी✝ ओती, तियी पोअ रोत दाविदोहो शलमोन ओवू, 7 शलमोनोहो रहबाम, रहबामोहो आबिया, आबियाहा आसा, 8 आसाहा यहोशाफाट, यहोशाफाटोहो योराम, योरामोहो उज्जीया:✝ 9 उज्जीयाहा योथाम, योथामोहो आहाज✝, आहाजोहो हिजकिया ओवू, 10 हिजकियाहा✝ मनश्शे, मनश्शेहे आमोन, आमोनोहो योशिया ओवू, 11 आन बाबेलोमेहें ओटक✝ कोइत लेत गोये तेहेलाम योशियाहा✝ येखन्यू आन तियाआ पाही ओवा;

12 बाबेलोमेहें ओटक कोइत लेत गोये, तेहेलाम येखन्याहा✝ शेल्तीएल, शेल्तीएलोअ जेरुब्बाबेल ओवू✝, 13 जेरुब्बाबेलोहो अबीहूद, अबीहूदोहो एल्याकीम, एल्याकीमोहो आज्जूर, 14 आज्जूरोहो सादोक, सादोकोहो याखीम, याखीमोहो एलीहूद, 15 एलीहूदोहो एलाजार, एलाजारोहो मत्तान, मत्तानोहो याकोब ओवू, 16 आन याकोबोहो योसेफ ओवू. ओ योसेफ तियी मरियाआ कोओ धोणी ओतू, जियी मरियाआ पेटे ईसु जल्माहा आयू, जियाहा ख्रिस्त✝ कोतेहे.

17 एहें कोइत अब्राहामोअहीं रोत ते दाविदोअ जागे जाआं आखी सुहूद पिढ़ी ओवी; आन बाबेलोमेहें ओटक कोइत लेत गोये तिहीं रोत ते ख्रिस्ताआ जागे जाआं सुहूद पिढ़ी ओवी.

18 ईसु ख्रिस्ताआ जल्म एहें कोइत ओवो; तियाआ आयही मरिया ए योसेफोअ कोअते फुसाअली ओती. पोन एहेलोह देखाअयो के, ते वेहवाल ओवीइलोअ पेल पवित्र आत्मा वाअहीं उंगलीत रोयी.✝ 19 तियीइ ओवनारु माटी योसेफ ओ धर्मी माटी ओतू, तिहीं वाअहीं तियीइ नाव बिगाड़ीलोअ तियाआ मोर्जी ने ओती. तियाहा काजे तिये मोनेज होगाय तोड़ी देअलोअ विसार कोअयू, 20 एहें कोत तो तियी गोठीइ बाप्तिम विसार कोअया कोअतुतो, ताहां पाला, प्रभुउ एक देवदुत तियाहा होपनामेहें दर्शन आपीत कोयो, "दाविदोअ पोर्‍या, योसेफ, तू मरियाअरी वेहवाल कोइलोअ बिही मा, काहाके तियीइ जो पोटू होय, तो पवित्र आत्मा वाअहीं होय. 21 तियीही सोऊ ओवे, आन तू तियाआ नाव ईसु✝ मिकजी, काहाके तोज तियाआ माअहुंहूं तियांआं पापोमेहें रोत वासाड़े."

22 ओं आखो याआ काजे ओवो, काहाके जों वसन प्रभुउ भविश्यवक्तां वाअहीं कोयो, तों पुरो ओवुहूं जोवे: 23 "पाल, एक कुवांरी पोटाअरी रोये आन तियीही सोऊ ओवे, आन तियाआ नाव ‘इम्मानुएल’ मिके; या नावोअ अर्थ होय ‘देव आपाअरी.’"✝

24 ताहरुउ योसेफ निंदेमेहें रोत उठ्यू, ताहां तिये प्रभुउ दुतोअ आदेशोअ पुरमाणे कोअयो, तिये मरियाअरी वेहवाल कोअयो. 25 आन तियीही सोऊ ओवू, ताअहूं जाआं तो तियीही आथ ने लागाड़्यु*; आन तिये तिया सोआआ नाव ईसु✝ मिक्यो.