1 तिया गालाहा गालील भागोअ राजा हेरोद, ओ ईसुउ सर्सा उनाअयू. 2 आन तियाआ आधिकार्‍योहों कोयो, "ओ बाप्तिस्मा आपनारु योहान होये, जो मोल्यामेहें रोत जिवीत उठ्युहू, तियाहा काजे तो वोडे वोडे कामें देखाड़ेहे."

3 ✝काहाके हेरोद तियाआ पाही फिलीप याअ लाडी हेरोदिया यीइ वाखरी, योहानोहो तोइत बांद्यू आन जेलेमेहें केंडी देदूतो.✝ 4 ✝काहाके योहाने हेरोदोहो कोयोतो के, "ताआ काजे हेरोदियाहा राखीइलोअ हाजो कायनाहां." 5 तियाहा काजे हेरोद तियाहा माईं देअहूं कोअतुतो, पोन तो यहुदी माअहुंहूं बितूतो, काहाके तें योहानोहो भविश्यवक्तू कोत मानतेते.✝

6 पोन जाहां हेरोद राजाआ जल्माआं दिही आयू, ताहां हेरोदियाआ बेट्टीही दरबारोमेहें नासीत हेरोद राजाहा खुस कोअयू. 7 ताहां तिये आथवसन आप्यो के, "जो किबी तू मागही तो आंय ताहूं आपिहीं."

8 ते तियीइ आयही कोयो तेहेंज कोइत कोयो, "बाप्तिस्मा आपनारा योहानोअ मुनको ठालीमेहें इंहींज माहूं लेतावीत आप."

9 राजा दुखी ओवू, पोन तियाआ आथवसनोअ, आन आरी बोहनाराआं वाखरी, तों आपी देय तेहें काजे आदेश आपी देदू. 10 आन तिये जेलेमेहें माहें मोकलीत योहानोअ मुनको वाडीत टाक्यो; 11 आन तियाआ मुनको ठालीमेहें लेत आवया आन पोर्‍यीही आप्यो, तो मुनको ते तियीइ आयहीइ जागे लेत गोयी. 12 ताहां योहानोअ सेला आवया आन तियाआ तोड़, लेत गोया आन डाटी देदो, आन जात कोइत ईसुहू खबर आप्यी.

13 जाहां ईसु योहानोअ मोयातीइ खबर उनाअयू, ताहां तो नावड़ामेहें बोहीत तिहीं रोत हुंदली जागे जातु रोयू. माअहें ओं उनाइत होयर सोड़ीत तियाआ फासाड़ी पागे पागेज गोये. 14 तिये नावड़ाप रोत उतरीत कोइत एक वोडी गर्दी देख्यी, आन तियांपोअ तियाहा किइमाय आवयी आन जें बिमार ओते तियांहां हुदार्‍ये.

15 हांजे पोअ तियाआ सेला तियाआ जागे आवित कोयो, के "ओ हुंदलू जागू होये आन वाआ बी लागेहे, यां माअहुंहूं जाअहूं दे, मोन्ज्ये तें वोहतीमेहें जात कोइत जिव जिवोअ काजे रोटू वेसातू लेत लेय."

16 "पोन ईसु तियांहां कोयो, ते ने जाअहूं जोवे! तुमूज याहां कि तेबी खायतेहें आपा!"

17 तियां तियाहा कोयो, "इंहीं आमापोअ पास रोटा आन बेन मासे या वासी बिहीरो किज कायनाहां."

18 ईसु कोयो, "ते माआं जागे लेतावा!" 19 ताहां तिये माअहुंहूं डोमटा पोअ बोहे तेहें कोयो, आन ते पास रोटा आन बेन मासा आथम लेत कोइत होरगाअहें पालीत देवोअ धन्यवाद कोअयो, आन रोटा मुड़ी-मुड़ीइ सेलाहां आप्या, आन सेला माअहुंहूं आप्या. 20 जाहां आखे खात ताराईत गोये, ताहां सेला उगरीइल्या कुटकाआ बारा टोपली पोअयी. 21 आन खानारामेएं बोईं आन पोर्‍ये सोड़ीत पास हाजार माटी ओता.

22 ताहां ईसु ताबुड़ तियाआ सेलाहा नावड़ामेहें सोड़ीत तालावोअ तियी तोड़े जाय तेहें काजे कोयो. ताअहूं जाआं तो माअहुंहूं वाटे लागाड़नारु ओतू. 23 तो माअहुंहूं वाटे लागाड़ीत कोइत, प्रार्थना कोउ बिहीरा डोगोपोअ जातु रोयू; आन हांजे पोअ तो एखलुज ओतू. 24 ताहां नावड़ो दोऱ्याअ विसमेहें सेलका वाअहीं आलतोतो, काहाके वारो सामनेए वोल ओतो.

25 आन ईसु रात्र्युउ तीन ते सोव वाजता पाअयों पोअ सालतूज तियांआं जागे आयू. 26 सेला तियाहा पाअयों पोअ सालत्लाहा देखीत बित गोया. आन कोना वोल्या, "ओ पुत होय!" आन बिके वाअहीं किगला वोल्या.

27 ताहां ईसु तियांअरी लगेज गोठी कोअयी आन कोयो, "हिम्मत मिका! आंय होय, बिहा मा!"

28 पेत्र तियाहा कोयो, "प्रभु, जर तूज ओय, ताहां माहूं ताआ जागे पाअयों पोअ सालित आविइलोअ आदेश आप."

29 ईसु तियाहा कोयो, "आव!" ताहां पेत्र नावड़ा पोअ रोत उतरीत ईसु जागे जाअलो काजे पाअयों पोअ सालु वोल्यू. 30 पोन वादुहू पालीत बित गोयू, आन जेहेलाम बुडू वोल्यू तेहेलाम आअड़ीत कोयो, "प्रभु, माहूं वासाड़!"

31 ईसु लगेज आथ आगाड़ी कोइत तोइत लेदू आन तियाहा कोयो, "ताआ विश्वास केतुहू कमी होय! तू काहा सौंसू कोअयू?"

32 जाहां ते बेनू नावड़ामेहें सोढीत लागा, ताहां वादुउ आल्हात गोयू. 33 ताहां सेला जे नावड़ामेहें बोहीत रोया ते ईसुउ पागे पोड़्या आन कोयो के "तू खोरीज देवोअ बेटुह्हू होय."

34 ते तियी तोड़ उतरीत कोइत गनेसरेतोमेहें पोतीत गोया, 35 तिहींइं माअहें ईसुहू ओलखीत लेदू आन आहने-पासेए आखा देसोमेहें खबर मोकल्यी, आन आखा मांदवाड़्याहां तियाआ जागे लेत आये. 36 आन तियाहा रावणी कोए वोल्ये, के तु आमुहूं निस्तु ताआ साअकाआ कोरेहे एतुज तोअहूं दे; आन जेते जोएं तियाहा आथल्ये ते आखे हाजे ओत गोये.