1 तिहीं रोत तो माहूं तिया जाअखा सोका जागाआ बारथेए बाअणाआं जागे लेत गोयू, तों बाअणो उगतामाआ वोल ओतो आन तों वालीत ओतो. 2 ताहां यहोवा देवे माहूं कोयो, "ओं बाअणो बोंद रोअहूं जोवे, याहा ने उगाड़ुहूं जोवे. काहाके इस्राएलोअ देव यहोवा यामेहें रोत मांय आयुहू. तियाहा काजे ओं बाअणो वाल्ल्योज रोअहूं जोवे. 3 फक्त राजकुमार एतुज राजा कोत तिहीं देवोअ सामने रोटू खानू बोहुंहूं जोवे; तो बाअणाआ जागे खोलीइ वोल रोत मांय जाअहूं जोवे आन तियीज वोल रोत बाअथे निहुंहूं जोवे."

4 तिहीं रोत तो माहूं पालामाआ वोग्याआ बाअणाअहें रोत मंदिरोअ सामने लेत गोयू. ताहां देवोअ मंदिर महिमा वाअहीं पोआत गोयो एहेलोहो मी देख्यो; आन आंय उबडू पोड़ीत गोयू. 5 तेहेलाम यहोवा देवे माहूं कोयो, "मोनवीइ पोऱ्या, कान देत उनाआ आन डोआ वाईं वारुहूं पाल. आंय ताहूं मंदिरोअ नियम आन पद्दतेए बाप्तिम कोत आपोहो तों उनाआ या मंदिरोम जाअलोअ आन सोका जागाआ आखी गोठीपोअ दिहान मिक.

6 "तियां विरोध कोअनारा इस्राएलोहो कोजी, यहोवा देव एहें कोहे, इस्राएलोअ कुटूंबा, तु ताआ आखा खाराब कामोम रोत आथ तुवीत ले. 7 जियांआं खोरु खतना नाहां ओवू, जियां तियांआं जिवन माहूं ने होप्यो एहेला पारका माअहोंहों माआ सोका जागाम लेतावित माआ मंदिरोहो एठो पाड़ीत टाक्योहो. एहें कोइत तुमू माआ शप्पत तोड़्यी आन खाराब कामे वादाड़्ये. 8 तुमू माआ सोकी वस्तुउ सांबाल नाहां कोअयी, तुमू माआ सोकी वस्तु सांबाले तेहें काजे सोताहा रोअहूं देत बिहीराहा नेम्येहे.

9 "प्रभु देव कोहे, जियाआ खोरीज खतना ने ओवुय एहलोहो पारको माहुंउं माआ सोका जागाम ने आवुहूं जोवे."

10 "इस्राएलवाले माआ जागे रोत भटकीत गोये, लेवी कुटूंबाआ माअहें बी माहूं सोड़ी देदुहू, आन मुर्तीइ फासाड़ी जाने वोल्ये, तियांहां तियांआं पापोअ डोंड वेठुहूं पोड़े. 11 माआ सोका जागाम सेवा कोए तेहें काजे लेवी कुटूंबाआ निवड़ कोअयीते; माहें जों गाराहा लेतावे तों माइत सेके, सेवा कोए तेहें काजे सामने उबे कोइत सेके. 12 पोन तों लेवी कुटुंबो माआ विरुद्द मुर्तीइ सामने सेवा साकरी कोअयी, आन तों काम तियांआं काजे पापोम पाड़नारी अड़सन बोण्यी, तियाहा काजे आंय तियांहां डोंड आपोहो, आन तियांहां सोताआ पापोअ फल भोगुहूं पोड़े एहें कोत यहोवा देव कोहे. 13 तें पुंजाराआ काम कोइलोअ काजे माआ सामने ने आवुहूं जोवे; माआ सोकी वस्तुउ जागे आन जाअखी सोकी वस्तुउ जागे तें ने आवुहूं जोवे. पोन तियां बदनामी वेठुहूं जोवे आन तियांआं खाराब कामोअ वाखरी डोंड वेठुहूं जोवे. 14 तेबी आंय तियांहां माआ मंदिरोम सेवा कोए आन तिहीं जे बी सेवा कोइली आवेहे तियाहा कोए एहेलोहो आंय तियांहां ठरवीहीं."

15 "इस्राएलोअ कुटूंबो माहूं सोड़ीत भटकीत गोयो, तेहेलाम सादोकोअ पोऱ्या लेवी पुंजारका माआ सोकी जागे सेवा साकरी कोअयी, तियाहा काजे तें माआ जागे आवित माआ सेवा कोए, माआ सामने उबा रोत कोइत माहूं सरबी आन रक्त गाराहा कोए एहें कोत प्रभु देव कोहे. 16 ते माआ सोकी जागेहे आवे, ते माआ सेवा कोइलोअ काजे माआ टेबलोअ जागे आवे, आन माआ सोकी वस्तुउ सांबाल कोए. 17 ते दरवाजाअहें मायवाली खोलीइहें जाय तेहेलाम हुतोअ आंगड़े पेवुहूं जोवे, मायवाली खोलीइ जागे बाअणाअहीं मंदिरोम माआ सेवा कोए तेहेलाम उफाले आंगड़े ने पेवुहूं जोवे. 18 ते मुंडीपोअ हुतोअ पागड़ी बांदुहूं जोवे, आन कंबरेमेहें बी हुतोअ साड्डो पेवुहूं जोवे आन गोजर वोले एहेला उफाला साअकाआ कंबर ने बांदुहूं जोवे.✝ 19 ते बारथे खोलीम जाय तेहेलाम तियां पेवल्ये सोके आंगड़े तियी सोकी खुलीम मिकीत कोइत सादे आंगड़े जाअहूं जोवे, ताहां तियां सोका आंगड़ाहा माहें आथ ने लागाड़े आन सोके ने ओत सेके.✝

20 "ते मुन्को टालगो ने कोअहूं जोवे, आन सिंग्ये नांबे ने वादुड़ुहूं जोवे, पोन तें कातरावीत लेअहूं जोवे. 21 पुंजारु मायतेए खोलीम जाताम दाराक्शाआ रोह ने पीइहूं जोवे. 22 तो रोंडाअली बोईंइंरी नेताहां वेहेवाल कोइत सोड़ल्यी बोईंइंरी वेहेवाल ने कोअहूं जोवे, पोन इस्राएलोअ कुटुंबांमेऱ्यीइ कुवांरी पोऱ्यीइरी कोअहूं जोवे, नेताहां एखा पुंजाराआ रोंडाअली बोईंइंरी वेहेवाल कोए तेबी साले.✝

23 "ते माआ निवड़ीइल्या माअहुंहूं सिकाड़ुहूं जोवे, सोको किन एठो कि तियाआ फरक कोत आपुहूं जोवे. 24 भान्गड़्यी ओवी ताहां ते मिटाड़ीइलोअ काजे तियार रोअहूं जोवे, आन तों बी माआ नियमोअ परमाणे मिटाड़ुहूं जोवे. आखा तिवारोम ते माआ नियम आन पद्दत मानुहूं जोवे आन माआ आरामोअ दिहोहो सोकू मानुहूं जोवे.

25 "ते मोल्या तोड़ोहो आथलीत एठा ने पोड़ुहूं जोवे; पोन जर आयही नेताहां आब्हू, पोऱ्यु नेताहां पोऱ्यी, पाही नेताहां वेहेवाल ने ओवीय तियी बोअह्हींइं तोड़ आथल्यो, ताहां तों एठो पोड़े तेबी साले. 26 तो पुंजारु सोकू ओवू तिहीं रोत हांत दिही जाआं मोजुहूं जोवे. 27 ताहां तो सोका जागाम मोन्ज्ये मायतीऱ्यीइ खोलीम जात कोइत सेवा कोऊ जाय तेहेलाम तो सोताआ पापोअ वाखरी गाराहा आपुहूं जोवे, एहें कोत प्रभु देव कोहे.

28 "तियांहां इस्राएलोअ जागाम रोत वाटू मा आपहा. तियांआं वावड़्यु वाटू एकुज रोय, आन तो आंयुज होंव. 29 गाराहा आपल्यो ओन, नेताहां सुकीइ बोदले आपल्यो गाराहा, नेताहां पापोअ बोदले आपल्यो गाराहा ओज तियांआं वाटू रोय. 30 आखी जातीइ पेल्लोअ फल, देवोहो होपल्यो फल, गाराहा आपीइलोअ वस्तु पुंजाराआ वाटू रोय. नोवायीइ पेहलू भाग बी पुंजाराआ रोअहूं जोवे ताहां तुमाआ कोओपोअ आशिर्वाद रोय. 31 तिया तियाआज मोल्यो कोड्लोज बी डोगरो, बोकड़ो, कुकड़ो नेताहां सिड़ो नेत काविहीं जनवार ओय तियाहा पुंजारो ने खाअहूं जोवे."✝