यहेज्केल 3

1 देवे माहूं कोयो, "ए मोनव्योअ पोर्‍या, ताहूं जों जोड़्यो तों खात ले; मोन्ज्ये तों पुस्तक खात ले*3:1 खात ले वासीत कोइत वारुहूं समजीत ले, ताहांजात इस्राएलोअ कुटूंबाअरी गोठी कोअजी." 2 आंय माआ सोब आशी, आन तिये माहूं तों पुस्तक खाय तेहें आपी देदो. 3 आन तिये माहूं कोयो, "मोनव्योअ पोर्‍या, जों पुस्तक आंय ताहूं आपोहो तियाहा तू गिइंत ले, आन तारात ले." ताहरोअ आंय तियाहा खात लेदो; तों माआ सोबीम मोदोअ होस मिठो लागो.

4 फाशोअ तिये माहूं कोयो, "मोनव्योअ पोर्‍या, इस्राएलवाला माअहोंअ जागे जात माआ वसन कोत आप. 5 काहाके आंय ताहूं एखु ओजाण्या नेत कठीण बाशावाला माअहोंअ जागे नाहां मोकलीइतू. इस्राएलवालाआं जागेज मोकलोहो. 6 जियांहां तू नाहां ओलखीइतू एहेलां ओजाण्यी आन कठीण बाशावाला माअहोंअ जागे जर आंय ताहूं मोकलीइतू, ताहां तें ताआ उनाअते. 7 पोन इस्राएलोअ कुटूंबाआ माअहें ताआ गोठ ने उनाय; तें माआ गोठी बी नाहां मानते; काहाके तियांआं मोन कठीण आन पिटारो ओत गोयोहो. 8 पाल, आंय ताआ मुखोहो तियांआं होस पिटारो कोइ देहीं आन तियांआं निंडाआ होस ताआ निंड वातड़ो कोइ देहीं. 9 आंय ताआ मुन्को हिराआ होस कड़क आन डोणोअ होस वातड़ो कोइ देहो; तिहीं वाअहीं तू तियांहां मा बिही, तियांहां देखीत मा कापही; काहाके तें रोदी माअहें होय." 10 फाशोअ तिये कोयो, "मोनवीइ पोर्‍या, जेती गोठी आंय ताहूं कोहो, ते आखी गोठी ओर मिक आन कानो वाअहीं उनाआ. 11 जा, ताआ देसोवाला आखा माहुंउं जागे जात कोइत को, ‘प्रभु यहोवा एहें कोइत कोहे,’ ताहां तें उनाय नेत ने उनाय." 12 ताहां देवोअ आत्मे माहूं उसलीत लेदू, आन फासाड़ीइ वोल जुदा वोडा गाजीइलोअ आवाजोम एक शब्द माहूं एहें कोत्लो होंबलाअयो, "होरगामेऱ्यीइ देवोअ महिमाआ धन्यवाद!" 13 तेताजमेहें तियां शारु जिवोअ फाके एकमेकाअरी लागीत तियांआं फोकड़ीइलोअ आवाज आन तियांअरीइ साकाआ आवाज जुदू हुहवीइतुज आयू. 14 आन देवोअ आत्मा माहूं उसलीत लेत जातू रोयू. माआ मोन जास्ती दुखी आन नाराज ओतो; पोन देवोअ आथ मापोअ जास्ती जोरमेहें आयू. 15 आन तेल-आबीब यी जागेहे गुलामीम रोनारा माआ माहुंउं जागे आंय गोयू आन तियांआं जागे बोठू. तें माहें कबार खाडीइ मेरे रोतेते. तियांआं जागे आंय बियबिय हांत दिही जाआं रोयू.

यहेज्केल इस्राएलोअ कुटूंबाआ जागल्यू

16 हांत दिही सेकीत गोया, तिहींइं फाटी माअरी देव गोग्यू. 17 "मोनवीइ पोऱ्या, आंय ताहूं इस्राएल माअहोंअ जागल्यू बोणावोहो; जे सेतावणी आंय ताहूं आपिहीं, ते तू तियांहां कोत देजी. 18 जाहां आंय एका पापीही कोंव, ‘तु हुदाअलीज मोइत जाही;’ पोन जर तुमे तियाहा पापी कामे सोड़ीत तियाआ जिव वासाड़ीलोअ सेतावणी ने आप्यी, आन तों माहुंउं तियाआ पापोजमेहें मोइत गोयो, ताहां तियाआ खुनोअ जाबाबदार ताहूं ठरवीहीं. 19 पोन जर तुमे तियाहा सेतावणी आपी देदी, आन तियाहा बाक्ती गोठी आन बाक्ते कामे सोड़े तेहें कोत देदो, पोन तोंज ने उनाअयो आन मोइत गोयो, ताहां तियाआ पापोअ वाखरी तोंज मोए, पोन तू वासात जाही.

20 "नेत एखु हाजलो माहुंउं खाराब कामे कोओ वोले, आन आंय तियाआ वाटेपोअ ठोकात पोड़े एहेलोहो काविहीं मिकी देदो आन तों मोइत जाय; आन तुमे तियाहा खाराब कामे सोड़े तेहें ने कोयो, ताहां आंय तियाहा ताआ माथे पाड़ीहीं, आन तिये कोअल्ये हाजे कामे बी आंय ने गोणो. 21 पोन तुमे तिया हाजला माहुंहूं पाप ने कोए तेहें काजे कोत देदो आन तिये उनात कोइत पाप कोइलोअ सोड़ी देदो, ताहां तों ने मोए पोन वासात जाय आन एहें कोइत तु बी वासात जाही."

यहेज्केल गोगीइलाम कमजोर

22 ताहां देवोअ सेक्ती मापोअ तिहींज प्रगट ओवी, आन आंय एहें कोत्लाहा उनाअयु, "उठ आन सापड़ाम जा, तिहीं आंय ताअरी गोगीहीं."

23 ताहां आंय उठीत सापड़ाम गोयू आन जेहेलीही महिमा आंय कबार खाडीइ मेरे देख्यी, तेहेलीज देवोअ महिमा आंय इंहीं बी देख्यी; ताहां आंय उबडू पोड़ीत गोयू. 24 पोन देवोअ आत्मा मामेहें फोहीत कोइत माहूं माआ गुडापोअ उबू कोअयू. तिहीं रोत तो माहूं कोनु वोल्यू, "कोअ जा आन बाआ वालीत कोअमेहें ठावकुज केंडात रो. 25 माहुंउं पोऱ्या, माहें आवीत ताहूं दोअड़ा वाअहीं बांदी देय, आन तु बारथे माहूंम ने जात सेकही. 26 आंय ताआ जिब उसऱ्याआ जोड़बाम सिटकाड़ी देहीं, ताहां ताहूं ने गोगाय; तेहेलाम तियां माहुंहूं हान देनारो कोडोज ने रोय; काहाके तें तोम कायम भान्गड़्या कुटुंबामेएं होय. 27 पोन जाहां आंय ताअरी गोगीहीं, तेहेलाम ताआ सोब उगाड़ीहीं आन तु तियांहां एहें कोजी, ‘प्रभु यहोवा एहें कोहे,’ जों उनाअनारो ओय तों उनाय, आन जों ने उनाअनारो ओय तों ने उनाय. काहाके तें तोम कायम भान्गड़्या कुटुंबामेएं होय."