1 "इस्राएलोअ पुडाऱ्योंअ बाप्तिम तु ओं विखाआ गित कोत आप:

2 "ताआ आयही एक केहेलिही सिहीं ओती!

ते सिहांआं विसमेहें रोतीते आन तियीइ बासे जुवान सिहांआं विसमेहें वोडे कोअतीते.

3 तियीइ पोऱ्यामेहें रोत तियी एकाहा पाल्यू आन तो जुवान ओत गोयू, आन हावोज तोइलाअ टेवात गोयू;

तिये माअहुंहूं बी फाड़ीत खानु वोल्यू.

4 देसो देसोअ माअहें तियाआ माग उनाअये,

आन तियाहा तियांआं खाडामेहें फोसीत गोयु,

आन तियाआ नाकोम नाथ कालीत कोइत तियाहा मिसर देसोम लेत गोये.

5 तियीइ मेहेंनत वाया गोयी, आन तियीइ आहरापोअ पाईं फिरीत गोयो एहेलोहो जाहां तियाआ आयही पाल्यो,

ताहां तियी फाशोअ एका बासाहा लेदो,

आन तियाहा वोडो कोअयो, तियी तियाहा जुवान सिहूं बोणावयू.

6 ताहां तो जुवान सिहों ओत कोइत सिहांआं विसमेहें इंडू वोल्यु,

आन तो बी हावोज तोइलाअ टेवात गोयू;

आन माअहोंहों बी फाड़ीत खानु वोल्यू.

7 तिये तियांआं किल्ला बिगाड़्या, आन तियांआं होयरे उजाड़्ये;

तियाआ घांगरीइलाआ आवाज उनात कोइत पुरो देस

आन तियाम रोनारे बिकेवाअहीं कापे वोल्ये.

8 ताहरेए शारु ओरीइ देस देसोअ माअहें तियाआ विरुद्दाम उठ्ये,

आन तियांआं कोअते जाल मांड्यी;

आन तो तियांआं जालेम फोसीत गोयू.

9 ताहां तें तियाहा ठोगीत पिंजरामेहें केंड्यू,

आन बाबेलोअ राजाआ जागे लेत गोये;

इस्राएलोअ डोगोपोअ फाशोअ तियाआ आवाज उनाअहूं ने जोवे

तियाहा कोत तियाहा किल्लामेहें टाक्यू.

10 ताहूं जल्म आपनारी आयही,

ते खाडीइ मेरे लागाड़ल्या दाराक्शाआ वेलाआ होस ओती,

आन मजबुत पाईं ओतो तिहीं वाअहीं लोग्यी वाअहीं

आन फोलवा वाअहीं पोआत ओतो.

11 राज कोअनाराआ राजडेंगारीइ कोअते

तियामेहें मजबुत डाल्यी ओती;

आन ते एतीही वाद्यी के ते वादलाम जाआं पोत्यी;

आन तियाआ जाअखीलीही लोग्यी वाअहीं जुदो उसो देखाअतोतो.

12 तेबी तो खोतेवाअहीं उफड़ीत कोइत पुंय पाड़ी देवाअयो,

आन तियाआ फलवे उक्तामी हावा वाअहीं उगात गोये;

आन तियाआ मजबुत डाल्यी उगात गोयी;

आन ते आगीवाअहीं आरवात गोयी.

13 ओमे तों रानोम ठांआंयो,

एतोज नाहां पोन तों कोअड़ा मुलखोम ठांआंयोहो.

14 तियाआ लोगीम रोत आग निहींयी,

आन तियी आगीवाअहीं तियाआ फोलवे आरवात गोये,

आन राज कोइलाअ लायक राजडेंगारीइ कोअते

ओमे एक बी पेडी डाल ने रोयी.

ओंज विखाआ गित होय, आन ओं विखाआ गित टिकीत रोय."