यहेज्केल 33

देवे यहेज्केलोहो इस्राएलोअ जागल्यू कोत निवड़्यू

1 यहोवा देवोअ ओं वसन माआ जागे पोतो: 2 "ए मोनव्योअ पोर्‍या, ताआ माअहोंहों को, जाहां आंय एखा देसोपोअ तारवाआ सालाड़ू वोलीहीं, आन तिया देसोअ माअहें एखाहा तियांआं जागल्यू कोत ठरवे, 3 ताहां जर तो ओं पालीत कोइत के या देसोपोअ तारवाआ सालनारीही, तुरी फुकीत कोइत माअहुंहूं सेतावणी आपी देय, 4 ताहां जों कोडो तुरीइ आवाज उनाइत कोइत बी तियार ने ओवे आन तारवाआ सालीइलोअ वाअहीं मोइत जाय, तियाआ रक्त तियाआज मुंडी रोय. 5 तों तुरीइ आवाज उनाअयो, पोन ने तियार ओवो; तियाहा काजे तियाआ खुनोअ पाप तियाहाज लागे. पोन जर तों तियार ओत जातो, ताहां तों तियाआ जिव वासाड़ीत लेतो. 6 पोन जर जागल्यू ओं देखीत कोइत के तारवाआ सालनारी होय तुरी फुकीत कोइत माअहुंहूं तियार ने कोए, आन तारवाआ सालीइलो वाअहीं तियांमेर्‍योअ एखु मोइत जाय, ताहरोअ तो तियाआ गुनामेहें आलाइत मोइत जाय, पोन तियाआ खुनोअ इसाब आंय जागल्याज पोअ लेहीं.

7 "तियाहा काजे, ए मोनव्योअ पोर्‍या, आंय ताहूं इस्राएल घराणाआ जागल्यू ठरवी देदुहू; तु माआ सोबीवाअहीं वसन उनाय उनाय तियांहां माआ वोल रोत सेतावणी आपी दे. 8 जर आंय पाप्योहो कोहीं, ‘ए पापी, तु खोरीज मोअही,’ ताहां जर तु पाप्योहो तियाआ वाटेए बाप्तिम ने हान देही, ताहां तों पापी तियाआ पापोजमेहें मोए, पोन तियाआ खुनोअ लेख्यो आंय ताजपोअ लेहीं. 9 पोन जर तु पाप्योहो तियाआ वाटेए बाप्तिम हान देही के तो तियाआ वाटेम रोत वोले आन तो तियाआ वाटे रोत ने वोले, ताहां तों ते तियाआ गुनामेहें आलाअलोज मोइत जाय, पोन तु ताआ जिव वासाड़ीत लेही.

जिवज्योअ जाबाबदारी

10 "ए मोनव्योअ पोर्‍या, इस्राएलोअ घराणाहा एहें को, तुमू कोतेहे: ‘आमाआ गुनाआ आन आमाआ पापोअ वोजू आमाजपोअ मिकल्यू होय आन आमू तियाआ वाखरी आरवाअते जातेहे; आमू कि कोइत जिवते रोहूं?’ 11 तियाहा काजे तु तियांहां एहें को, यहोवा देवोअ ओ आवाज होय: आंय शप्पत खात कोहो, आंय पाप्योअ मोइलाअ पोअ खुश नाहां ओवतु, पोन यावाअहीं खुश ओवोहो के पापी तियाआ वाटे रोत वोलीत कोइत जिवतो रोअहूं जोवे; ए इस्राएलोअ घराणा, तुमू तुमाआ खाराब वाटे रोत वोला; तुमू काहा मोअहूं जोवे?

12 "ए मोनव्योअ पोर्‍या, ताआ माअहोंहों एहें को, जाहां धर्मी माहुंउं गुनू कोए, ताहां तियाआ हाजे कामे तियाहा वासाड़ीत ने सेके, आन पापी बी जाहां तियाआ पापोअहें रोत वोलीत जाय, ताहां तिया पापोवाअहीं तो ने पोड़े; आन धर्मी माहुंउं जर पाप कोए, ताहां तियाआ हाजा कामोवाअहीं जिवतो ने रोय. 13 जर आंय धर्मीहीं कोंव के तु पाक्कू जिवतु रोही, आन तो तियाआ धर्मी कामोपोअ भरिवसू तोइत खाराब कामे कोओ वोले, ताहां तियाआ धर्मी कामोमेर्‍याहा कोड्लाज कामोहों ने ओर कोआय; जें खाराब कामे तिये कोअये ओय तों तियां कामोमेहेंज आलाइत मोए. 14 फाश्युउ जाहां आंय पाप्योहो कोंव, तु पाक्कू मोअही, आन तो तियाआ पापोअहें रोत वोलीत कोइत धर्मी आन न्यायोअ कामे कोअ वोले, 15 मोन्ज्ये जर पापी माहुंउं उसन्यो मागल्यी वस्तु वापिस कोइ देय, तिये सोअल्यी वस्तु पोइ देय, आन खाराब कामे सोड़ीत कोइत जिवनोअ नियमोपोअ सालो वोले, ताहां तों ने मोए; पोन जिवतो रोय. 16 जेताहा पाप तिये कोअया ओय, तियांमेर्‍याआ कोड्लाज पापोहो ओर ने कोआय; तिये न्यायोअ आन धर्मीइ कामे कोअये आन तो पाक्को जिवतो रोय.

17 "तेबी तुमाआ माहें कोताहा, प्रभुउ वाट बोराबर कायनाहां; पोन तियांआंज वाट बोराबर कायनाहां. 18 जाहां धर्मी माहें हाजे कामे सोड़ीत कोइत खाराब कामे कोए वोले, ताहां तों खोरीज तियांमेहें फोसल्योज मोइत जाय. 19 जाहां पापी तियाआ खाराब कामे सोड़ीत सिदे आन हाजे कामे कोओ वोले, ताहां तों तियाआ कामोवाअहीं जिवतो रोय. 20 तेबी तुमू कोतेहे, ‘प्रभुउ वाट बोराबर कायनाहां?’ ए इस्राएलोअ घराणा, आंय हारेक माअहुंउं न्याय तियाआ कामोअ पुरमाणेज कोअहीं."

येरुसालेमोअ आरवाइलोअ बातमी

21 फाश्योअ आमाआ वेठार्‍याआ इग्यारवा वोरह्योअ दाहावा मोयनाआ पासवे दिही, एक माहुंउं जों येरुसालेमोम रोत नाहीत कोइत वासाइत गोयोतो, तों माआ जागे आवीत कोइत कोनो वोल्यो, "होयर आरवात गोयो."✝33:21 2 राजां 25:3-10; यिर्म 39:2-8; 52:4-14 22 तों नाहनारो माहुंउं माआ जागे आवीइलोअ पेल हांजेपोअ यहोवा देवोअ सेक्ती मापोअ आवयीते; तों माहुंउं वेगीइ माआ जागे आवीइलोअ पेल तिये माआ सोब उगाड़ी देदी; ताहरीइ माआ सोब उगड़ाअलीज रोयी, आन आंय फाश्युउ मुकू नाहां रोयु.

माअहुंउं पाप

23 ताहरोअ यहोवा देवोअ ओं वसन माआ जागे पोत्यो: 24 "ए मोनव्योअ पोर्‍या, इस्राएल देसोअ उजड़ीइल्या जागाम रोनारे एहें कोतेहे, ‘अब्राहाम एखलु माटी ओतू, तेबी देसोअ आधिकारी बोण्यु; पोन आमू जाअखीलेहे होय, तियाहा काजे देस हुदाअलीज आपाआज आधिकारोम आपी देदुहू.’"

25 "तियाहा काजे तु तियांहां को, यहोवा देव एहें कोहे: तुमू ते माहां रक्तोनहोक्तो खाताहा आन तुमाआ मुर्तीइहें नजर टाकताहा, आन खुन कोअताहा; ताहरेए केहें कोइत तुमू तिया देसोअ आधिकारी बोणीत सेकहा? 26 तुमाआ तारवाइ पोअ भरिवसू मिकताहा, आन घाण कामे कोअताहा, तुमाआ आहनेवालाआ बोईंइ इजोत लुटताहा: फाशोअ केहें तुमू तिया देसोअ आधिकारी रोत सेकहा? 27 तु तियांहां ओं को, यहोवा देव एहें कोहे, माआ जिवोअ शप्पत, नक्की जें माअहें उजड़ीइल्या जागाम रोतेहे, तें तारवाइ वाअहीं मोए, आन जें सापड़ा रानोमेहें रोतेहे, तियाहा आंय रानठ्या जनवारोअ हावोज बोणावी देहीं, आन जें किल्लाम आन दोरसाम रोतेहे, तें मोरायी वाअहीं मोए. 28 आंय तिया देसोहो उजाड़ेन उजाड़ पाड़ी देहीं; तियाआ सेक्तीइ वोडाय जाती रोय; आन इस्राएलोअ डोगोअ एहेलाहा उजाड़ी देहीं के तियापोअ कोडोज ने साले. 29 तियाहा कोत जाहां आंय तियां माअहुंउं कोअल्या खाराब कामोअ वाखरी तिया देसोहो उजाड़ेन उजाड़ कोइ देहीं, ताहां तें समजीत जाय के आंय यहोवा देव होय."

भविश्यवक्ताआ संदेशोअ फोल

30 "ए मोनव्योअ पोर्‍या, ताआ माअहें भिंताआ जागे, आन कोओअ बाओअहीं ताआ बाप्तिम गोठी कोअतेहे आन एकानेकाहा कोतेहे, ‘आवा, उनाआ, यहोवा देवोअहें रोत कोड्लो वसन निहेंहें.’ 31 ते टोलान टोला ताआ जागे आवतेहे, ते माआ खाजगी माअहुंउं होस ताआ आगाड़ी बोहतेहे, ते ताआ गोठी उनाअतेहे, पोन माआ वसनोअ पुरमाणे नाहां सालते; सोबी वाअहीं ते जास्ती मेर देखाड़तेहे, पोन तियांआं मोन लालसायीमेहेंज लागीत रोहे. 32 तु तियांआं नजरेम एक मेरेए गिते गावनारु आन हाजा वाजाड़नाराआ होस ठर्‍युहू, काहाके तें ताआ वसन उनाअतेहे ते खोरे, पोन तियांपोअ नाहां सालते. 33 तियाहा काजे जाहां ए गोठ ओवे, आन ते नक्की ओवनारी! ताहां तियांहां मुंदू जाय के आमाआ विसमेहें एक भविश्यवक्तु आयुतो."