1 यहोवा देवोअ ओं वसन माआ जागे पोतो: 2 "ए मोनवीइ पोर्‍या, सोरोअ बाप्तिम एक विखाआ गित बोणावीत तियाहा एहें को:

3 "ए सोर, प्रभु देव कोहे, दोऱ्याआ जागे रोनारी, दोऱ्याआ टेकोपोअ रोनारा देसोंअरी ताआ वापारो सालेहे; तु कोहे आंयज हाजी होंव.

4 ताआ होयरोअ हाद्दी दोऱ्याआ विसमेहें रोत होय. बांदनारे ताहूं हाजाम-हाजो बोणायोहो.

5 तियां जाहाजीइ आखे लाकड़े सनीर साड़ोअ बोणाये; जाहाजेपोऱ्युउ खांबाआ काजे तियां लोबानोन डोगोमेऱ्याआ देवदार साड़ोअ वापर कोअयू.

6 तियां साटा बोणावीइलोअ काजे बाशानोमेऱ्याआ अल्लोन साड़ोअ वापर कोअयू;

ताआ बोयठोक कित्तीम बेटोअ आश्शूरी लाकड़ुउ बोणावीत आथीइ दातो वाअहीं जुड़ीत ओत्यी.

7 ताआ जाहाजीइ पोड़दा मिसर देसोम रोत लेतावल्या वेलबुट्टीदारोअ हाजा हुतोअ ओता,

ते ताहूं निशाणी जेहें ओता;

ताआ जाहाजीइ उपऱ्युउ पोड़दू एलीशा नावोअ बेटोपोऱ्याआ निला आन जामण्या रोंगोअ साअकाआ ओतू.

8 सिदोन आन अर्वद वाले रेवासी ताआ जाहाजीही साटा वाअहीं सालाड़नारा ओता.

ए सोर, तामेहें हुशार माटीइ ओता, ते हाजा कारागिर ओता.

9 गेबालोवाला हुशार कारागीर ताआ जाहाजोअ टुट-फुट हुदारताते;

दोऱ्यामेएं आखी जाहाजी

आन तियांआं आखे नावड़े ताआ मालोअ वापारो कोइलोअ काजे तामेहें रोतेते."

10 "ताआ सेयनिकोअरी फारस, लूदी आन पूती यी जागेए सेयनिक ताअरी भरती ओता; ते तामेहें तियांआं ढाल आन टोपा टांगीत मिकताते; ते ताआ नाव वोडो कोअताते. 11 अर्वदवाले माअहें सेयनिकोअरी ताआ मेरेमेरे रोतेते; ताआ होयरोअ वाड़ीइ पितड़ापोअ बाहादीर माटी रोताते; ते ताआ शारी वोल तियांआं ढाल टांगीत कोइत ताआ होबा कोअताते.

12 "आखी बातीइ माल ताआ जागे जाअखीलुहू ओतू तियाहा कोत तार्शीश ताअरी वापारो कोअतोतो. आन ताआ मालोअ हाटे ताहूं होनो, रुपो, लोड़ो, कथील आन सिसो आपतोतो. 13 यावान, तुबल आन मेशेक ए ताअरी वापारो कोअताते; ताआ मालोअ बोदले ताहूं माअहें आन इसत्लेए बासने आपताते. 14 तोगार्माआ पारवाड़ीवाला, ताआ मालोअ बोदले ताहूं कोड़ा, गुगदाड़ीलोअ कोड़ा आन कोसोर गोदड़े आपताते. 15 ददानी माअहें ताअरी वापारो कोअतेते; जाअखीलाहा बेटोवाला ताआ वापाराआ बाजार पोअताते; ते ताआ मालोअ बोदले ताहूं आथीइ दात आन टेंबराआ लाकड़े आपताते. 16 ताआ कारागिरीइ वस्तु जाअखीलुहू ओतू तियाहा काजे अरामी माअहें ताअरी वापारो कोअतेते; ते ताआ मालोअ बोदले ताहूं निलमणी, जामण्या रोंगोअ आन होणोअ हुत्रावे आंगड़े, दोऱ्यामेएं वस्तु आन गोमेद मोणी आपताते. 17 यहुदा आन इस्राएल देसोमेएं माअहें ताअरी वापारो कोअतेते; ते ताआ मालोअ बोदले ताहूं मिन्नीथाआ गोंव, मेवा-मिठाय, मोद, तेल आन मासालो आपतेते. 18 ताआ कारागिरीइ माल जाअखीलुहू होय आन ताआ जागे आखी बातीइ माल जास्ती ओतू, तियाहा काजे दमिश्कवाले ताअरी वापारो कोअतेते आन ताआ मालोअ बोदले ते ताहूं हेल्बोनोअ दाराक्शाआ रोहो आन पांडे ऊनोअ साअके आपतेते. 19 वदान आन यावान ए ताआ माल लेत कोइत ताहूं हुत आपताते; पोलाद, तेजपान आन आगरु ओ ताआ वापाराआ माल ओतू. 20 ददान ताअरी वापारो कोइत ताहूं हाजी जीण आपतोतो. 21 अरब आन केदारोअ आखा पुडारी ताआ वापारी ठोरे; तियां मेडाआ गिद्ले, मेडे आन बोकड़े लेतावीत कोइत ताअरी वापारो कोअताते. 22 शबा आन रामावाला वापारी ताअरी वापारो कोअताते; ते ताआ मालोअ बोदले ताहूं बातीवानीइ हाजामेएं मासालो, मोगला मणी, आन होनो आपताते. 23 हारान, कोन्ने, एदेन, शबा, आश्शूर आन किलमदवाले ताअरी वापारो कोअतेते. 24 ते मालोअ बोदले तियांआं हाजे हाजे आंगड़े, जांबला रोंगोअ बाहरी मेऱ्येए आंगड़े आन हाजा मेऱ्यीइ गुंडाड़ल्यी दोअड़ी एहलीही वापाराआ वस्तु ताहूं आपतेते. 25 तार्शीशोअ जाहाजी ताआ वापाराआ माल आलाग आलाग देसोम लेत जानारी बोण्यी."

"तियीं जाहाजी वाअहीं तु दोऱ्याम रोत कोइत जुदो कुन्बी

आन ताकतवालो ओत गोयू.

26 ताआ सालाड़नारा ताहूं उंडा दोऱ्यामेहें पोताड़ी देदुहू,

आन उक्तातामाआ हावा ताहूं दोऱ्याआ पोरापोर मुड़ीत टाक्यू.

27 जेदिहीं तु बुडही, तेदिहींज ताआ मालधन,

वापाराआ माल, जाहाजीइ आधिकारी, सालाड़नारा,

हुदारीइलोअ काम कोअनारा, वापारो कोअनारा,

आन तामेहें जेता बी सिपायी होय,

आन ताआ आखी गोरदी दोऱ्यामेहें पोड़ीत जाय."

28 "ताआ जाहाज सालाड़नाराआ किगला वाअहीं

ताआ आसेपासेए जागू कापू वोले.

29 आखा सालाड़नारा आन आधिकारी,

आन दोऱ्यामेहें जेता सालाड़नारा होय,

तें तियां तियांआं जाहाजीम रोत उतरे.

30 आन ते पुंयपोअ उबे रोत कोइत ताआ दशा वाअहीं

जाअखीलेहे रोड़े.

तें तियां तियांआं मुन्कापोअ तुलो टाकीत कोइत खाँओंमेहें ओंअडे.

31 आन तें ताआ विखा वाखरी सिंग्ये टालगी कोइत लेय,

आन कंबरेम गुंठो बांदीत कोइत ताआ बाप्तिम विसार वाली वालीइ

मोनोम दुख लेत कोइत रोड़े आन मुंडोपोअ आथ मिके.

32 ते विखु कोअते जात ताआ बाप्तिम विखाआ ओं गित गावे:

‘दोऱ्यामेहें सामसुम पोड़ीत रोल्या सोरोअ होस,

बिहीरा एखाआ दशा ओवीही के?

33 जेहेलाम ताआ माल दोऱ्याअ जागे रोत निहीतुतो,

ताहां जाअखीलीही जातीइ माअहें ताराअतेते;

ताआ धन आन वापाराआ माल जाअखू

तिहीं वाअहीं धरतीइ राजा मालदार ओत गोयाते.

34 जेहेलाम तु उंडा पाअयोंम सेलकावाअहीं टुट्यू,

तेहेलाम ताआ वापाराआ माल,

आन ताआ आखे रोनारे बी ताआ

मायतेज रोत कोइत आरवात गोये.’"

35 "दोऱ्याआ मेरेए आखा देसोअ रोनारे माअहें तावाअहीं बोगलाअये; आन तियांआं आखा राजहांआं रुंग्हें उबे रोत गोये, आन तियांआं सोबीपोअ नाराजी आवीत गोयी. 36 देसो देसोअ आखा वापारी ताआ विरुद्दाम सोकताहा; ताआ दशा पालीत माअहुंहूं बिक लागेहे, आन तु एकसोट्योज आरवात जाही."