यहेज्केल 41

मंदिरोअ पोरापोर

1 फाशुउ तो माहूं मंदिरोअ पोरापोर लेत गोयू; ताहरोअ तिये तिहीं खांबाआ माप लेदो, ताहां ते बेनु वोग नोव-नोव फुट जाडा निहीया; तियांआं माप खांबाआ तोंबाआ एतोहो ओतो. 2 दरवाजू पोनोर फुट पोलू, आन बेनु वोग हाड़ा हांत फुट हाकड़ू ओतू, तिये मंदिरोअ पोरापोर्‍युउ जागू माप्यू, ताहां साट फुट पोलू आन तिस फुट हाकड़ू ओतू.

3 ताहां तिये मायते जात कोइत तिया दरवाजाआ जागऱ्याआ खांबोअ माप लेदो, ताहां तो तिन फुट जाडू निहीयु. दरवाजू नोव फुट उसू आन हाड़ा दोहो फुट पोलू ओतू. 4 तिये पोरापोर्‍युउ जागू माप्यू, ताहां, बेनु वोग तिस-तिस फुट निठू; तिये माहूं कोयो, "ओ जाअखू सोकू जागू होय."

मंदिरोअ पितड़ाआ विरुद्दाम खुली बोणायी

5 तिये मंदिरोअ पितड़ो नोव फुट निहींयो; मंदिरोहो लागीत आखी वोल खुल्यी ओत्यी; तें सोव फुट पोली ओती. 6 एकी वोग ओती ते खुल्यी एकापोअ एक तिन माल्यी ओती, ते रांगेमेहें तिस ओत्यी; मंदिरोअ आसेपासे जों पितड़ो ओतो तियाहा टेकतीज ते खुल्यी ओत्यी, तेबी मंदिरोअ पितड़ाहा टेकतीज ते ने ओती. 7 मंदिरोअ सोमकीर जेहें-जेहें उसे गोये तेहें-तेहें खुल्यी हाकड़ी ओवती गोयी. तियाहा कोत मंदिरोअ उसेए बाजू हाकड़ी-हाकड़ी ओवती गोयी, उसे रोत निसे विसगाल्यी जागे जारिक कमी हाकड़ो ओतो, तिहीं रोत निसे पोलो ओतो. 8 मंदिरोअ पायू उसू ओतु तों आंय पाल्य; बाजूमेएं खुल्यीइ पाया बी वोडा ओता, ते मोज्या ताहां सोव आथोअ डेंगार पोइत निहींया, 9 एकी वोगर्‍यीइ खुल्यीइ बाअथीइ वोल्योअ पितड़ो पास आथ जाडो ओतो; मंदिरो एकी वोगेहे रोत टेकतीज एका कोओअ जागू मोकलुज ओतू. 10 खुल्यीइ बारथीइ वोल मंदिरोअ आसे-पासे विही आथोअ गालो ओतो. 11 एकी वोगेए खुल्यीइ बाअणे ते उगड़ाअलेज ओते, एक बाअणो पालामाअहें देहामाअहें ओतो; ओ खुल्लू जागू सोमकीर पास आथ हाकड़ू ओतू.

12 मंदिरोअहें रोत बुड्तामा वोगर्‍याआ मोकला जागाआ सामने जों कोअ ओतो तों सत्तर आथ हाकड़ो ओतो आन तियाआ पितड़ो सोमकीर पास आथ जाडो ओतो, आन तों नोव्वोद आथ नांबो ओतो.

13 तिये मंदिरोहो एक होव आथ माप्यो, रिकामू जागू सोड़्यू तो पितड़ाहा लागाड़ीत एक होव आथ निठू. 14 मंदिरोअ आगाड़ी जागू आन उगतामा वोल्युउ रिकामू जागू नेहें एकेक होव आथ निहींयू. 15 मंदिरोअ सामने उगारल्या जागाआ आगाड़ी, कोओअ बेनु वोग, मायते, खोलीमेएं ओं तिये माप्यो ताहां एक होव आथ निहींयो. 16 तिनू मालीपोऱ्याआ दरवाजाआ उंबीरठा, खिड़की आन ओटू यांआं पाट्ल्यी ओती; निसे रोत खिड़कीइ जागे जाआं पितड़ाहा बी लाकड़ुउ पाट्ल्यी बोहाड़्यीते, आन खिड़की बी टापी देदीते. 17 मंदिरोमेहें आन, मंदिरोअ बाअथेए दरवाजाआ जागऱ्याआ पितड़ाआ मायतेए आन बाअथेए जागू आखू बोराबर मापित ओतू. 18 तियापोअ करुब आन खारक्याआ साड़े कोरव्येते; बेन-बेन करुबोमेहें एकेक खारक्याआ साड़ ओतो आन आखा करुबोअ बेन-बेन सोब्यी ओत्यी. 19 एहें कोइत एकेक खारक्याआ साड़ोअ वोल मोनवीइ मुख बोणायोतो, आन बिहीरी वोग जुवान सिहांवागोअ मुख बोणायोतो. एहेंज कोइत पितड़ाआ शारी वोल बोणायोतो. 20 पुंयीपोअ रोत ते उसे जाआं करुब आन खारक्याआ साड़ कोड़ीत बोणायेते. 21 सोकी जागे बेनू जागऱ्येए पितड़े सोवकड़्ये ओते.

लाकड़ुउ देवान्यो

22 देवान्यो लाकड़ुउ बोणायोतो. तों उसामेहें तिन आथ, नांबो बेन आथ ओतो. तियाआ खुणा, पाट्ला आन तियाआ पितड़ो बी साड़ोओज ओतो, आन तिये माहूं कोयो, "ओ ते देवोअ सामनेए टेबल होय."

सोका जागाआ बाअणो.

23 मंदिर आन सोका जागाआ बाअणाआं बेन-बेन किवाड़े ओते. 24 आखे बाअणे बेन हाना दरवाजाआ बोण्येते, आन हारेक किवाड़ोअरी बेन-बेन पात्रे ओते. 25 बिहीरा पितड़ाआ सारकोहो मायतेए खुलीइ बाअणाअरी करुब देवदूत आन खारक्याआ साड़े कोरवीइल्ये ओते. 26 खिड़कीइ मेरेमेरे सोवकोट ओती. आन तियापोअ खारक्याआ साड़े कोरवीत बोणायेते.