1 बारावा वोरह्योअ बारावा मोयनाआ पेलठे दिही यहोवा देवोअ ओं वसन माआ जागे पोत्यो: 2 "ए मोनव्योअ पोर्‍या, मिसरोअ राजा फारोअ बाप्तिमेहें विखाआ गित बोणावीत कोइत तियाहा उनाड़: आखी राज्याआ माअहूंमेहें ताआ गोणती बाहर सिंहाअरी आप्यीते, पोन तु दोर्‍यामेर्‍याआ मोगरावाआ होस होय; तु ताआ खाडीमेहें उडीत पोड़्यु, आन तियींइं पाअयोंहों गुडावाअहीं डोरो कोइ देदो. 3 यहोवा देव एहें कोहे: आंय जाअखीलीही देसोअ सभा वाअहीं तापोअ माआ जाल पोसरावीहीं आन ते ताहूं माआ वोडी जालेमेहें खेसीत लेय. 4 ताहां आंय ताहूं पुंयपोअ सोड़ीहीं, आन जंगलोम उडाड़ीत कोइत जुगोमेर्‍याआ आखा सिड़ाहां तापोअ बोहाड़ीहीं; आन ताआ माहां खावाड़ीत आखी धरतीइ जिव-जनवारोहों तारवीहीं. 5 आंय ताआ माहां डोगोपोअ मिकीहीं, आन बार्‍यीही ताआ जाडा डिलो वाअहीं पोई देहीं. 6 जिया देसोमेहें तु तोरेहे, तियाहा डोगोअहीं जाआं आंय ताआ रक्तावाअहीं हिपड़ीहीं; आन तियाआ खाड्यी ताआ रक्तावाअहीं पोआइत जाय. 7 जेहेलाम आंय ताहूं आरवू वोलीहीं, ताहां आंय जुगोहो टापीहीं आन ताराहा साका-साकाज कोइ देहीं; आंय दिहोहो वादला वाअहीं निकाड़ीहीं, आन सांद तियाआ उजवोड़ ने आपे.✝ 8 जुगोमेहें जेत्ता उजालाआ दिवा होय; तियां आखाहा आंय ताआ वाखरी फिका कोइ देहीं, आन ताआ देसोमेहें आंदारो कोइ देहीं, यहोवा देव एहेंज कोहे."

9 "जाहां आंय आरवाइलाअ खबर देसो देसोमेहें आन ताआ ओजाण्या देसोमेहें पोसरावीहीं, ताहां वोडा वोडा देसोअ माअहुंउं मोनोमेहें बीक उब्जाड़ीहीं. 10 आंय जाअखीला राज्याआ माअहुंहूं तावाअहीं बोगलाड़ी देहीं, आन जेहेलाम आंय तियांआं राजाआ सामने माआ तारवाआ मोकलीहीं, तेहेलाम तावाअहीं तियांआं रुंगहे उबे रोत जाय, आन ताआ पोड़ीइलोअ वेले ते जिवज्योअ जिवोअ काजे काप्या कोए. 11 काहाके यहोवा देव एहें कोहे: बाबेलोअ राजाआ तारवाआ तापोअ साले. 12 आंय ताआ माअहोंहों एहेला बाहादिरोअ तारवाइ वाअहीं पाड़ीहीं जे आक्खा राज्यामेहें निवड़ाइत होय. ते मिसरोअ वोडाय काडीत टाके, आन तियाआ आखे माअहें नावासट आरवाइत जाय. 13 आंय तियाआ आखा जनवारोहो जाअखीलाहा पाअयोंअ टेकोपोअ रोत आरवी देहीं; आन भविश्यामेहें तों पाईं ने माअहुंउं गुडा वाअहीं आने ने जनवारोअ खुर्‍यी वाअहीं डोरो ओवो. 14 तेहेलाम आंय तियीं खाडीइ पाईं आसल कोइ देहीं, आन तियांआं खाड्यी तेलोअ होस वोहे, एहें कोत यहोवा देव कोहे. 15 आंय मिसर देसोवालाहां माइत देस उजाड़ कोइ देहीं आन तिहींम ओय तेतो आखो खाली कोई देहीं, ताहां तियांहां मुंदू जाय के आंय यहोवा देव होय. 16 माअहुंहूं विखु कोइलोअ काजे विखाआ गित ओंज होय; राज्या राज्यामेहें बोईं या गितोहो गावे; मिसर आन तियाआ आखा माअहोंअ बाप्तिम ते बोईं ओंज विखाआ गित गावे, एहें कोत यहोवा देव कोहे."

17 फाश्योअ बारावा वोरह्योअ पेलठा मोयनाआ पोंद्रावे दिही यहोवा देवोअ ओं वसन माआ जागे पोत्यो: 18 "ए मोनव्योअ पोर्‍या, मिसर देसोअ काजे विखु कोअ, आन तियाआ वोडा राज्याआ पोर्‍यीहीं माहणोम डाटल्या माअहोंअ जागे अधोलोकोम उतारीत पाड़. 19 तु कोडा रोत जाअखो हाजो होय? तु उतरीत कोइत विण खतना वालाअरी पोड़ीत रो.

20 "ते तारवाइ वाअहीं माआलाआं विसमेहें पोड़े, तियांआं काजे तारवाआज ठोरवाअयीही; तियाहा काजे मिसरोहो तियाआ आखा माअहोंहों नेहें ओडीत लेत जावा. 21 सेक्तीमान बाहादीर तियाअरी आन तियाआ सांबालनाराअरी अधोलोकोमेहें गोठी कोए; तें विण खतनावाले माअहें तिहीं तारवाइ वाअहीं मोइत पोड़ीत रोय.

22 "तियाआ पुरी सभा नेहें आश्शूर बी तिहीं होय, तियाआ माहणे तियाआ मेरेमेरे होय; आक्खे तारवाइ वाअहीं माआयेहे. 23 तियाआ माहणे खाडाआ कोप्रामेहें बोण्येहें, आन तियाआ माहणोअ मेरेमेरे तियाआ सेना होय; ते आक्खे जे जिवता माअहोंमेहें बिक लागाड़तेते, ओमे ते तारवाइ वाअहीं मोइत पोड़ीत रोयेहे.

24 "तिहीं एलाम होय, आन तियाआ माहणोअ मेरेमेरे तियाआ माअहें होय; ते आक्खे तारवाइ वाअहीं माआयेहे, ते विण खतनावाले अधोलोकोम उतरीत गोयेहे. ते जिवता माअहोंमेहें बीक टाकतेते, पोन ओमे माहणोमेहें जानाराअरीज तियांआं सोबीपोअ बी अपमानोअ वोजू आवीत लागुहू. 25 तियाआ आखा माअहोंअरी तियाहा मोल्याआ विसमेहें जागू जोड़्यू, तियाआ माहोंण तियाआज मेरेमेरे होय, ते आक्खा विण खतनावाली तारवाइ वाअहीं माआया; तियां जिवता माअहोंमेहें बिक गाजाड़्यीते, पोन ओमे माहणोमेहें आन डाटल्याआ आरी तियांआं सोबीपोअ अपमान होय; आन ते मोअल्याआ विसमेहें तियांहां मिक्येहे.

26 "तिहीं तियांआं पुरा माअहोंअरी मेशेक आन तुबल होय, तियांआं मेरेमेरे माहणे होय; ते आक्खा विण खतनावाली तारवाइ वाअहीं माआया, काहाके जिवता माअहोंमेहें ते बिक टाकताते. 27 तियां पोड़ल्या विण खतनावाला बाहादिरोंअरी तें ने पोड़ीत रोय जे जिवज्योअ लोड़ायीइ आथ्यारे लेत अधोलोकोमेहें उतरीत गोयाहा, तिहीं तियांआं तारवाइ तियांआं मुंडीइ थुड़ी मिकीत रोयाहा; आन तियांआं गुनाआ कामे आडोमेहें पोसरीत होय; काहाके जिवता माअहोंमेहें तियांवाअहीं बाहादिरोहों बी बिक लागाड़तुतो.

28 "याहा काजे तु बी विण खतना वालाअरी मुड़ात-तोड़ात तारवाइ वाअहीं मोल्याअरी पोड़ीत रोही.

29 "तिहीं एदोम आन तियाआ आखा राजा आन तियाआ आखा प्रधान बी होय, जे जोरावार ओत कोइत बी तारवाइ वाअहीं मोल्याअरी मिक्याहा; खाडाम गाड़ल्या विण खतनावाला माअहोंअरी ते पोड़ीत रोय.

30 "तिहीं पालामा वोल्याआ आखा प्रधान आन आक्खे सिदोनी बी होय जें मोल्याअरी उतर्‍येहे; ते तियांआं जोरो वाअहीं बिक गाजाड़्यीते, पोन ओमे तें होरमाइत आन तारवाइ वाअहीं आन मोअल्याअरी ते बी विण खतनाआ पोड़ीत रोयाहा, जें तारवाइ वाईं मोयेहे. एं माहणोम जनवारोअ होस तियांआं बी अपमान ओत जाय.

31 "यांहां पालीत कोइत फारो बी तियाआ आखा माअहोंअ बाप्तिमेहें होक जोड़े, होव फारो आन तियाआ आखी सेना तारवाइ वाअहीं मोयीही, एहें कोत यहोवा देव कोहे.

32 "काहाके आंय तियाआ वाखरी जिवता माअहोंमेहें बिक टाक्यीते; तियाहा काजे तो आखा माअहोंअरी तारवाइ वाअहीं आन मोअल्ये नेहें विण खतना वालाआ विसमेहें लोटाड़ी देवाय, एहें कोइत यहोवा देव कोहे."