1 नोव्वा वोरह्योअ, दाहवा मोयनाआ दाहावे दिही, यहोवाआ ओं वसन माआ जागे पोतो: 2 "ए मोनवीइ पोर्‍या, तु ए तारीख, आज्यीइ तारीख लेखीत मिक; काहाके यी तारख्ये बाबेलोअ राजा येरुसालेमोहों आवीत केंडवाऱ्योहो.✝ 3 या लबाड़ घराणाहा ए गोठ को; प्रभु यहोवा कोहे:

"आंड्लाहा सुलीपोअ मिकी द्या,

मिकीत कोइत तियामेहें पाईं टाका;

4 ताहां तिहींमेहें जांग, खांद आन आखा

हाजा हाजा डुन्का हाटवीत कोइत मिका;

आन तियामेहें हाजे हाजे आडे पोआ.

5 गोवाराम रोत एक हाजो मेडो निवड़ीत ले;

आन आडे सुड़वीइलोअ कोअते सुलीम लाकड़े हेन्कोअ;

तें वारुहूं सुड़ुहूं दे;

काहाके मायतेए आडे बी सुड़ीत जाय."

6 तियाहा काजे प्रभु यहोवा एहें कोहे: "या खुनी होयरोअ केतिही विते! तो किटाअला आंड्लाआ होस होय, तियाआ किट नाहां विस्टीइती; तियामेएं एकेक तुकड़ू सापड़े काड, तियापोअ सिट्टी ने टाकाअहूं जोवे. 7 काहाके तिया होयरोमेहें खुने कोआयेहे, तिया रक्तावाअहीं तो पोआयोहो, तिये तियापोअ कादुउ टाकीत कोइत नाहां डाट्यो, पोन उगड़ाअला खड़कापोअ पोड़ुहूं देदो. 8 तो रक्त डाटाअहूं ने जोवे कोत आंय तियाहा उगड़ाअला खड़कापोअ मिक्योहो, काहाके बोदलू लेअलाअ काजे खोत पोड़कुहूं जोवे."

9 प्रभु यहोवा एहें कोहे: "तिया खुनी होयरोअ केतिही विते! आंय बी लाकड़ुउ टिग वोडू कोअहीं. 10 लाकड़े भारपुर टाक, आग मजबुत पेटाड़, माहां हाजो सुड़ोव आन मासालो सान्बोअ, आन आडे बी बोलुहूं दे. 11 ताहरोअ ठाल्लो आंड्लो आगीपोअ मिक मोन्ज्ये तो तोपीत जाय आन जाअखो तोपीत कोइत तियाआ मोल मायांआं माय पेटाय, आन तियाआ किट निहीत जाय. 12 तो मेहेंनत कोइ कोईइ थाकीत गोयो, तेबी तियाअरी कड़क लागलू जोंग नाहां निहींयू; जोंगेनहोंग तियाहा आगीम टाक. 13 ए होयर, ताआ एठाय पाले गोल्ये ते जुदी कठीण होय. आंय ताहूं सोको कोअहूं पाल्यो तेबी तु सोको नाहां ओवयो; तिहीं वाअहीं तापोअ माआ खोत हेलाय ताअहूं जाआं तु सोको ने ओवही. 14 आंय यहोवा ओं कोयोहो; आन ओं ओवेज, आंय एहेलोहो कोअहींज; आंय ताहूं ने सोड़ो, आन तापोअ कीइमाय ने कोअ, याआ माहूं पास्तावू ने ओवे; ताआ सोभावोअ आन कामोअ पुरमाणेज ताआ न्याय कोआय, एहें कोइत यहोवा देव कोहे."

15 फाशोअ यहोवाआ वसन माआ जागे पोतो: 16 "ए मोनवीइ पोर्‍या, पाल, आंय ताआ डोआहा गोमेहें तों तापोअ रोत बुउसुहूं कोअहो. पोन तु रोड़ीही बी मा आन रोज्ये बी मा वोहाड़ीही. 17 मोनेज हांहलेए, पोन ते उनाअहूं ने जोवे; मोल्याआ काजे मा रोड़ीही. मुंडीइरी पागड़ी बांद, गुडाम खाहड़े पोव, आन ताआ ओठ मा टापही, विखाआ लायक रोटू मा खाही."

18 वेगीइ माअहुंहूं आंय कोयो, आन हांजेपोअ माआ लाडी मोइत गोयी. ताहां वेगीइ आंय आदेसोअ परमाणे कोअयो. 19 ताहरेए माहें माहूं कोने वोल्ये, "ओं जो तु कोअहे याआ अर्थ आमुहूं ने कोनारु के?"

20 आंय तियांहां कोयो, "यहोवाआ ओं वसन माआ जागे पोतो: 21 इस्राएलोअ घराणाहा एहें को, प्रभु यहोवा कोहे: पाला, आंय माआ सोका जागाहा एठु कोअहूं होय, जियाआ गोड होय तिहीं वाअहीं तुमू उसलीइतेहे, आन जो तुमाआ डोआआ गोमतो होय, आन जियाहा तुमाआ मोन पसन कोअहे; आन ते तुमाआ पोऱ्ये तारवाइ वाअहीं माआय, जियांहां तुमू तिहीं सोड़ीत आवयेहे. 22 जेहेलोहो आंय कोअयोहो तेहेलोज तुमू बी कोअहा; तुमू बी तुमाआ ओठ ने टापहा आन विखाआ लायक रोटू ने खाहा. 23 तुमू तुमाआ मुंडीइरी पागड़ी आन गुडाम खाहड़े पोवीत रोहा, तुमू ने रोड़हा, आन ने विखू कोअहा, पोन तुमाआ गुनाआ कामोम गुसवात ओगलीत जाहा आन एकान बिहीराहा पालीत काहयां कोअहा. 24 एहें कोइत यहेज्केल तुमाआ कोअते निशाणी रोये; जेहेलोहो तिये कोअयो, बोराबर तेहेलोज तुमू बी कोअहा. जाहां ओं ओत जाय, ताहां तुमुहूं जाआंय के आंय यहोवा देव होय."

25 "ए मोनवीइ पोर्‍या, तियांआं मजबुत गोड, तियांआं होबा, आन तियांआं खुसीइ कारण आन तियांआं पोऱ्ये आन तियांआं डोआहा गोमनारी वस्तु, आन मोनोहों गोमनारो तियांप रोत आंय बुउसीत लेहीं, 26 जो तेदिहीं नाहीत वासाय, तो ताआ जागे आवीत कोइत बातमी कोतापे. 27 तेदिहीं ताआ सोब उगड़े, आन तु गोगीइलाअ बंद ने रोही पोन तिया वासाअला माअहोंअरी गोठी कोअही. एहें कोइत तु यां माअहुंउं कोअते निशाणी ठरही; मोन्ज्ये तियांहां समजाय के आंय यहोवा होय."