1 हांतवा वोरह्योअ पासवा मोयनाआ दाहवा दिही एहेलोहो ओवो के इस्राएलोअ थोड़ाक डायहां प्रश्न फुसीइलोअ काजे माआ आगाड़ी आवीत बोहया. 2 ताहां यहोवा देवे एहें कोयो: 3 "ए मोनव्योअ पोर्‍या, इस्राएलोअ डायहांहां एहें को: प्रभु यहोवा एहें कोहे, केहें तुमू माहूं काविहीं फुसा आयाहा के? प्रभु यहोवा कोहे, माआ जिवोअ शप्पत, तुमू माहूं प्रश्न फुसीत ने सेकहा.

4 "तु तियांआं न्याय ने कोअही के? ए मोनव्योअ पोऱ्या, तु तियांआं न्याय ने कोअही के? तियांहां तियांआं वेगाआ डायहांआं घाण कामे देखाड़ी दे, 5 आन तियांहां को, प्रभु यहोवा एहें कोहे: जेदिहीं आंय इस्राएलोहो निवड़ीत लेदो, आन याकोबोअ कुटूंबाआ पारवाड़ीइरी शप्पत लेदी, आन मिसर देसोम सोताहा आंय तियांपोअ प्रगट ओवू, आन आंय आथ उसा कोइत तियांअरी शप्पत खात कोइत कोयो, आंय तुमाआ यहोवा देव होय, 6 तेदिहींज आंय तियांअरी ए शप्पत बी खादी, के आंय तुमुहूं मिसर देसोम रोत काडीत कोइत दुदो-मोदोअ उकला वोहताहा एहेलाहा तुमाआ कोअते पाल्ल्या देसोमेहें पोताड़ीहीं, तो देस आखा देसोअ हाजा मेऱ्यीइ सुटी होय.✝ 7 ताहां आंय तियांहां कोयो, जियीं सोगद्यी वस्तू पोअ तुमा आखाआ नजर होय, तियीं वस्तुहू टाकी द्या; आन मिसर देसोअ मुर्ती वाअहीं सोताहा एठा मा बोणावहा; आंयुज तुमाआ यहोवा देव होय. 8 पोन तें माअरी बिगड़ीत गोयेहे आन माआ नाहां उनाअहूं होदते; जियीं सोगद्यी वस्तू पोअ तियांआं नजर लागीत रोयीते, तियीं वस्तुहू कोडे बी ने टाक्यी, आन मिसर देसोअ मुर्ती बी ने सोड़्यी.

"ताहां आंय कोयो, आंय इंहींज, मिसर देसोअ विसमेहें तुमापोअ माहूं खोत लागीत जाय. 9 तेबी माआ नावोअ काजे, जिया देसोमेहें तें रोतेते, तियांआं देखताइज माआ नावोअ अपमान ने ओवुहूं जोवे, कोत आंय ओं काम कोअयो; आन आंय तियांहां मिसर देसोम रोत काडीत कोइत तिया देसोअ देखताइज आंय तियांहां प्रगट ओवू.

10 "आंय तियांहां मिसर देसोम रोत काडीत कोइत जंगलोम लेतायू. 11 तिहीं आंय तियांहां नियम लागाड़ीत आप्या, आन माआ नियम बी तियांहां कोत देखाड़्या; ए नियम जों कोडो बी माने तों जिवतो रोय.✝ 12 फाशाआ तियांमेहें आन मामेहें निशाणी ठरुहूं जोवे कोत आंय तियांहां आरामोअ दिही बी आप्यू; तो याआ कोअते के आंय यहोवा तियांहां सोके कोअये ओं तियांहां समजाअहूं जोवे.✝ 13 तेबी इस्राएलोअ माअहूं जंगलोम माअरी राड़ कोअयी; तें माआ नियमोपोअ ने साल्ये, आन माआ नियम एठा मान्या, जियां नियमोहों जर माअहें माने ताहां तें तिहींइं वाखरी जिवते रोय; आन तियां माआ आरामोअ दिहोहो जास्ती एठु कोअयू.

"ताहां आंय कोयो, रानोमेहें आंय यांपोअ खिजवाअहीं आन यांहां सेलीत टाकीहीं. 14 पोन आंय माआ नावोअ वोतीइ एहेलोहो कोअयो के ते तियां देसोअ सामने एठे ने ठरुहूं जोवे, जियांआं देखताइज आंय तियांहां काडीत लेतायुतो. 15 फाशुउ आंय जंगलोमेहें तियांअरी शप्पत लेदी के जो देस आंय तियांहां आपी देदो, आन जो आखा देसोअ हाजा मेऱ्यीइ सुटी होय, जियामेहें दुदो-मोदोअ ताऱ्यी वोहतीही, तिहीं तियांहां ने पोताड़ो,✝ 16 काहाके तियां माआ नियम कमी समज्या आन माआ नियमोपोअ ने साल्ये, आन माआ आरामोअ दिहोहो एठु कोअयुतो; याआ कोअते के तियांआं मोन तियांआं मुर्तीइहें लागीत रोयो.

17 "तेबी आंय तियांपोअ मेरेए नजर टाक्यी, आन तियांहां ने आरव्ये, आन जंगलोमेहें तियांहां एकसोट्येज ने आरवीत टाक्ये. 18 तेहेंज कोइत आंय जंगलोम तियांआं पारवाड़ीही कोयो, तुमाआ डायहांआं नियमोपोअ मा सालहा, आन तियांआं रितीही मा मानहां आन तियांआं मुर्तीही पुंजीत कोइत सोताहा एठे मा कोअहा. 19 आंय तुमाआ यहोवा देव होय, माआ नियमोपोअ साला, आन माआ नियम पालीइलाम सांबालजा, 20 आन माआ आरामोअ दिहोहो पवित्र माना, काहाके ते माआ आन तुमाआ विसमेहें निशाणी ठरुहूं जोवे, आन जियावाअहीं तुमुहूं मुंदू जाय के आंयुज तुमाआ यहोवा देव होय.

21 "पोन तियांआं पारवाड़ बी माअरी राड़ कोअयी; आन ते माआ नियमोपोअ ने साल्ये, आन माआ नियम मानीइलोअ ने इतव्यो; जियांहां जर माअहें माने, ताहां तो तियांआं वोतीइ जिवतो रोय; आन माआ आरामोअ दिहोहो तियां एठा कोअया. ताहां आंय कोयो, आंय रानोमेहें तियांपोअ खिजवाअहीं. 22 तेबी आंय माआ आथ रुकीत लेदा, काहाके माआ नावोअ अपमान ने ओवुहूं जोवे आन तियां देसोअ सामने ते एठे ने ठरुहूं जोवे, जियांआं देखताइज आंय तियांहां काडीत लेत आवयुतो. 23 फाशोअ आंय तुमुहूं जाती जातीमेहें वेरासेर कोअहीं, आन देसो देसोमेहें पेई देहीं, एहेलिही तियांअरी जंगलोमेहें आथ उसा कोइत आंय शप्पत लेदी,✝ 24 काहाके तियां माआ नियम ने मान्या, आन माआ नियमोहो एठु समजीइयू, माआ आरामोअ दिहोहो एठु कोअयू, आन तियांआं डायहांअ मुर्तीइहें तियांआं नजर लागीत रोयी.

25 "ताहां आंय तियांआं कोअते एहेला एहेला नियम ठरव्या जे ने हाजा ओता आन एहेली एहेलिही रिती जिहीं वाअहीं तें जिवते ने रोत सेके; 26 मोन्ज्ये ते तियांआं आखा पेल्लाआ बेटाह्हाहा गाराहा कोए वोले; एहें कोइत आंय तियांहां तियांआंज भेटे वाअहीं एठे कोअये जियी भेटे वाअहीं तियांहां निर्वंश कोइ देंव; आन आंय यहोवा होय एहें कोइत ते तेहेलाम जाइंत लेअहूं जोवे."

27 "ए मोनव्योअ पोऱ्या, तु इस्राएलोअ घराणाहा को, प्रभु यहोवा एहें कोहे: तुमाआ डायहां माआ विश्वास तोड़्यू, आन यामेहें बी माआ निंदा कोअयी. 28 काहाके जेहेलाम आंय तियांआं बाप्तिम आथ उसा कोइत शप्पत खादीते, ताहां ते हारेक उसा टेंबान हारेक पांअजाअले साड़े देखीत कोइत तिहीं तियांआं गाराहा सोड़वे वोल्ये; आन खोत लागाड़ीलोअ भेट सोड़वे वोल्ये आन तिहींज हाजी गुंदाअनारी वस्तु पेटाड़े वोल्ये, आन तिहीं तियांआं पियाआ गाराहा ओले वोल्ये. 29 ताहां आंय तियांहां फुशो, जिया उसा जागापोअ तुमू जातेहे, तों की होय? याज वाअहीं तियाआ नाव ‘बामा’* कोवाअहे. 30 तियाहा काजे इस्राएलोअ घराणाहा को, प्रभु यहोवा तुमुहूं ओं फुसेहे: केहें तुमू बी तुमाआ डायहांअ रितीपोअ सालीत कोइत एठे ओवीत, आन तियांआं सोगद्या कामोअ परमाणे सिनालाआ होसऱ्येए कामे कोअतेहे के? 31 आज जाआं जाहां तुमू तुमाआ भेट सोड़वीइतेहे आन तुमाआ पोऱ्याहा गाराहा कोइत आगीम सोड़वीइतेहे, ताहां तुमू तुमाआ मुर्तीइ वाखरी एठे ठरतेहे. ए इस्राएलोअ घराणा, केहें तुमू माहूं फुसीत सेकहा के? प्रभु यहोवाआ ओं वसन होय, माआ जिवनोअ शप्पत, तुमू माहूं फुसीत ने सेकहा.

32 "तुमू तुमाआ मोनोम कोतेहे, ‘आपू लाकड़ुउ आन डोणोअ भक्ती कोइत राज्या राज्याआ आन देसो देसोअ कुलोअ हारके बोणीत जाहूं,’ ते विसार जोलोम ने पुरा ओवे."

33 "प्रभु यहोवा एहें कोहे, माआ जिवनोअ शप्पत, आंय माआ मजबुत खांदो वाअहीं, ताकतवाला आथोवाअहीं आन खोतेए बाल्लायी वाअहीं आंय तुमापोअ राज कोअहीं. 34 आंय मजबुत खांदो वाअहीं, ताकतवाला आथो वाअहीं आन खोतेए बाल्लायी वाअहीं देसो देसोअ माअहूंम रोत लेतावहीं, जिया देसोअ तुमू वेरासेर ओत गोयेहे तिया देसोम रोत एक्ठे कोअहीं; 35 आन आंय तुमुहूं देसो देसोअ जंगलोमेहें लेतावीत कोइत तिहीं तियांआं आमने सामने तुमाआ न्याय कोअहीं. 36 आंय मिसर देसोअ जंगलोम तुमाआ डायहांअ न्याय कोअयू, तेहेंज कोइत तुमाआं बी न्याय कोअहीं, एहें कोइत प्रभु यहोवा कोहे.

37 "आंय तुमुहूं डेंगाराआ निसे सालाड़हीं, आन तुमुहूं शप्पतेए बंधनोम टाकीहीं; 38 माअरी लोबाड़ी कोअनाराहा आंय तुमाम रोत आलाग कोअहीं, आन तुमुहूं सोके कोअहीं, ते तात्पुरते वोहती कोइत होय तिया देसोम रोत आंय तियांहां बारथे काडी देहीं; पोन इस्राएल देसोम तियांहां आवुहूं ने देंव. ताहां आंय यहोवा होय ओं तुमुहूं समजाय."

39 "प्रभु यहोवा एहें कोहे, ए इस्राएल घराणा, जा, ताआ पोटे तियी मुर्तीइ पुंजन कोअ; आन जर तुमू माआ ने उनाअहा, ताहां आगाड़ी बी ओंज कोअजा; पोन माआ सोका नावोहो तुमाआ भेटेवाअहीं आन मुर्ती वाअहीं फाशोअ एठो ने कोइत सेकहा. 40 काहाके प्रभु यहोवाआ ओं वसन होय, इस्राएलोअ पुरो घराणो तियांआं देसोम माआ सोका डोगोपोअ, इस्राएलोअ उसा डोगोपोअ, आक्खे बोठे भक्ती कोए; तिहीं आंय तियांवाअहीं खुस ओवहीं, आन तिहीं आंय तुमाआ भेट आन इसल्यी हाजी हाजी वस्तु, आन तुमाआ आक्खी सोकी कोआली वस्तु तुमापोअ रोत लेया कोअहीं. 41 आंय तुमुहूं देसो देसोम रोत बारथे लेतावहीं आन जिया देसोम तुमू वेरासेर ओत गोयेहे, तियाम रोत तुमुहूं टोलू वालीहीं, ताहां आंय हाजी गोंदाअनारी वस्तुउ परमाणे तुमाआ स्विकार कोअहीं आन तुमावाअहीं बिहीरा माअहोंअ सामने आंय सोकू ठरिहीं. 42 जो इस्राएल देस आंय तुमाआ डायहांहां आपीइलोअ उसा आथ कोइत शप्पत खादीते, तियाम आंय तुमुहूं लेतावहीं, ताहां तुमुहूं होमजाय के आंय यहोवा देव होय. 43 जियां कामोवाअहीं तुमू सोताहा एठे ओवेहे, तिहीं तुमू ओर कोअहा, आन तुमाआ आखा खाराब कामोअ वोतीइ सोताआ नजरेम घाण ठोरहा. 44 ए इस्राएल घराणा, यहोवा कोहे, तुमाआ खाराब वाटेए परमाणे, तुमाआ बिगड़ीइल्या कामोअ परमाणे नाहां, पोन माआ नावोअ कोअते आंय तुमामेहें कामे कोअहीं, ताहां तुमुहूं समजाय के आंय प्रभु यहोवा होय."

45 यहोवाआ तरफ से ओं वसन माहूं जोड़्यो: 46 "ए मोनव्योअ पोर्‍या, ताआ सोब देहामाअहें कोअ, देहामाअहें वसन उनाड़ आन देहामा देसोअ उजाड़ीइ बाप्तिम भविश्यवाणी कोअ; 47 देहामा मेर्‍यीइ उजाड़ीही को, यहोवाआ वसन उनाआ; प्रभु यहोवा एहें कोहे, पाल, आंय तामेहें आग पेटाड़ीहीं, आन ते आग तामेऱ्येए हारेक निले साड़े आन हारेक उगाअले साड़े आरवी देय; तियीइ हांगाड़ू ने उलाय, आन तियी वाअहीं देहामाअहें रोत्ते पालामाम जाआं आखाआ मुख सुल्लात जाय. 48 ताहां ए आग यहोवाज पेटाड़्यीही एहेलोहो आखाहा माअहुंहूं देखाय; आन ते आग केदिहीं ने उलाय."

49 आंय कोयो, "बा बाहबा! यहोवा देवा! माअहें माआ बाप्तिम एहें कोतेहे के, ‘ओ काईं कोनारु नाहां के?’"