1 फाशुउ तो माहूं बारथे पालामा वोल्यीइ खोलीम लेत गोयू, आन तो माहूं तियीं खुलीम लेत गोयू, जे पालामाआं वोल आवालीइ सामने ओती. 2 ते खुल्यी एक होव आथ नांबी ओती, आन पोन्नास आथ हाकड़ी ओती. 3 विसमेऱ्यीइ खोलीइ सामने मायतीइ वोल आन बारथेए वोल फोरशीइ सामने तिनू मालीइ हुंबाहुंब खोलीइ ओटू ओतू. 4 तियीं खुलीइ सामने मायतीइ वोल जानारी दोहो आथ पोली एक होव नांबी आथ वाट ओती; आन आथोअ एवडीही एक वाट ओती; तियीं खुल्यीइ बाअणे पालामाआं वोल ओते. 5 ओमे उसऱ्यीइ खुली हानी ओती. काहाके खुलीइ ओटाआ वोजेसे निसऱ्यीइ खुली जागू रुकीत लेदुतो. 6 काहाके ते खुल्यी तिनू तालोपोअ ओत्यी, आन निसेए खोलीइ होस तिहीं उसे खांबा ने ओता, तियाहा काजे उसेए जागू हानू ओतू. 7 बारथीइ वोल हारका मापावालो खुलीइ पितड़ो ओतो. शोवरांयशी फुट नांबो ओतो. 8 बारथीइ वोल्यीइ खुलीइ लांबी पोन्नास आथ ओती. मंदिरोअ फासाड़ीइ वोल ओती तियी आवालीइ लांबी पोन्नास मिटर ओती. 9 यीं खुलीइ उगतामाआ वोल निसे माय जाअलोअ बाअणे ओते, तिहींम रोत बारथे जानारे तियीं खुलीम ओवतेज जातेते. 10 देहामाआ वोल खोलीइहीं रोत पितड़ाअरी लागीत तियी सुटली जागाआ सामने खुल्यी ओत्यी. 11 पालामाआं वोल जेहेलिही वाट ओती, तेहेलीही तियाआ सामने बी वाट ओती. ते नांबीन पोली आन तियांआं वाटीइ होसुज ओती. 12 तियां बाअणाआं सारकेज देहामाआं वोल्यीइ खुल्यीइ बाअणे बी तेहेलेज ओते. उगतामाआं वोल रोत आवनारे तियाम फोहतेते.

13 तिये माहूं कोयो, "जो सोड़्युहू या जागाआ सामनेए पालामाआं वोल्यीइ खुली आन देहामाआं वोल्यीइ खुली सोकी ओती आन तियींम देवोअ सामने जानारु पुंजारु जाअखी सोकी वस्तू खाअहूं जोवे. तिहीं ओनोअ भेट, पापोअ काजे गाराहा आन दोशोअ गाराहा एहेलिही जाअखी सोकी वस्तु मिकुहूं जोवे. काहाके तो जागू सोकू होय. 14 पुंजारु तिया सोका जागाम रोत बारथे खोलीम गोयु, ताहां तो होय तेहेलुज ने जाअहूं जोवे, पोन सेवा कोइलोअ काजे वापरीइलेए आंगड़े काडीत तिहींज मिकी देअहूं जोवे, काहाके तें सोके होय. तिहीं रोत तो बिहीरे आंगड़े पेवीत बारथे जाअहूं जोवे."

15 मायवाला मंदिरोअ मोजमाप कोइत लेदो तिहींइं फासाड़ी तों माहुंउं माहूं उगतामाआं वोल्याआ बाअणाआं वाटे बारथे लेत गोयो. आन तिये मंदिरोअ बारथेए खोलीइ शारी वोल मोजमाप कोअयो. 16 तिये डेंगारी वाईं उगताआ वोल्युउ भाग माप्यू. तो आड़ी होव मिटर नांबू निहींयू. 17 ताहां तिये पालामाआ वोल्युउ भाग माप्यू, ताहां तोबी पास होव डेंगार निहींयू. 18 तिहींइं फासाड़ी तिये ते डेंगार लेत कोइत देहोअ भाग माप्यू, ताहां तोबी पास होव डेंगार पोइत निहींयू. 19 तिहीं रोत फिरीत कोइत तिये डेंगार लेत कोइत बुड्ताम्यू भाग माप्यू, ताहां तो बी आड़ी होव मिटर निहींयू. 20 एहें कोइत तिये शारी वोल्यीइ हाद्दी माप्यी, आन तिहीं सोकाहान सादाहा आलाग मिकीइलोअ काजे शारी सोमकीर एक पितड़ो ओतो. तियाहा माप्यो ताहां आड़ी होव मिटर नांबो आन आड़ी होव मिटर पोलो निहींयो.