यहेज्केल 47

मंदिरोअहीं रोत वोहनारो नेरायवालो पाईं

1 फाशुउ तो माहूं मंदिरोअ बाअणाअहीं वापिस लेत गोयू, तेहेलाम पाला, मंदिरोअ ओटाआ थुड़ी रोत पाअयोंअ उकलू वोहतुतो; मंदिरोअ हुंबऱ्युउ भाग उगतामाआ वोल ओतू; तो उकलू मंदिरोअ हाजाड़्यीइ वोल देहामाआ वोलेहे निसे देवान्याअहीं रोत वोहतुतो. 2 तो माहूं पालामाआ वोल्यीइ वाटे बारथे लेत गोयू, आन बारथेए वाटे सोमकीर फिरवीत बारथीइ वोल ओतो तिया बाअणाआं उगतामा लेत गोयू, 3 ताहां तो माटी उगतामाआ वोल जानू वोल्यू आन तियाआ आथोम मापपोट्टी ओती. तिये माहूं एक हाजार आथ गालो मापीत कोइत तिहींम सालुहूं लागाड़्यो, ताहां तिहीं पाईं पाट्ल्यी पाट्ल्यी आवतोतो. 4 तिये फाशोअ पोनर आथ गालो मापीत कोइत माहूं पाअयोंम साले तेहें कोयो, ताहां तिहीं पाईं टोसणे जाआं आवतोतो. तिये फाशोअ हाजार आथ माप्योन ताहरोअ माहूं साले तेहें कोयो, ताहां तिहीं पाईं कंबरे कंबरे आवतोतो. 5 तिये फाशोअ एक हाजार आथ माप्यो, ताहां तिहीं माहूं ने सालाओ वोल्यो, काहाके पाईं जास्ती ओतो; तिहींम माहूं तोरीत जाता आवतो, एतीही वोडी खाड ओत गोयी के तिहीं कोडाहा ने जात सेकाअतो. 6 तिये माहूं कोयो, "मोनवीइ पोऱ्या, तुमे ओं पाल्यो ना?" ताहरुउ तो माहूं खाडीइ मेरेमेरे रोत वापिस लेत आयू. 7 वापिस आवतामेहें आंय खाडीइ बेनु मेरे जाअखीलेहे साड़े देख्ये. 8 तिये माहूं कोयो, "ओं पाईं दिही उगताआ वोलेहे वोहतो जात्लो आन तिहीं रोत अराबाम उतरीत दोऱ्याआ वोल जात्लो; ए खाड दोऱ्याम पेलाइत तियाआ पाईं ताजो ओवत्लो. 9 ए खाड जाय तिहीं तिहीं तिहींम रोनारे मासे जिवे आन तें वोदीत जाय, काहाके जिहीं जिहीं ओं पाईं वोहीत कोइत जाय तिहीं तिहीं आखो नेरो ओत जाय, आन जिहीं जिहीं ए खाड जाय तिहीं तिहीं आखे जनवारे जिवते रोय. 10 तियी खाडीइ मेरेपोअ मासारा उबा रोय आन ते एनगेदी रोत ते एन-एग्लाइमोअ जागे जाआं जाल टाके; दोऱ्यामेऱ्याआ मासाआ होस तियांहां बातीवानीइ जाअखीलेहे मासे जोड़े. 11 पोन तिहींइं डाबरा आन खाड्डामेऱ्योअ पाईं ताजो ने ओवे; तों खारोज रोय. 12 खाडीइ बेनु तोड़े जाअखीली जातीइ साड़े उगे; तियांआं पाने केदिहींज नाहां कोमाअते, आन तियांआं फले लागीइलोअ नाहां खुटाअतो. हारेक मोयनाम पाक्के फलवे आपे, काहाके तियी खाडीइ पाईं सोका जागाम रोत निहींयोहो; तियां साड़ोअ फलवे खाअहूं जोगेहे आन तियांआं पाने ओहोड़ ओवे."

देसोअ हाद्दी

13 प्रभु देव कोहे: "तुमू ओ देश इस्राएलोअ बारा वारसा कोत वाटीत आपहा, ताहां तिहींम योसेफोअ बेन वाटा तोइत तियाआ हाद्दी एहें कोइत जोवे. 14 या देशोअ तुमू सारका वाटा पाड़ीत तुमुहूं वारस जोड़े, काहाके ओ देश तुमाआ डायाहां आपिहीं कोत मी आथ उसा कोइत शप्पत खादीही; तिहींवाईं ओ देश तुमाआ वावड़्यू जागू ओत जाय.

15 "देशोअ हाद्दी एहें कोइत रोय: पालामाआ वोल ए हींव विसगाल्या दोऱ्याअहें रोत हेतलोनोअ वाटे हमात आन सादाद कोतेहे तिहीं जाआं; 16 आन तियी हाद्दीइ जागे हमात बेरोथ, सिब्राइम आन होवरानोअ हींवेअहीं हासेर- हात्तीकोनोअ जागे जाआं; 17 तिहीं रोत दमिश्कोअ पालाम्यीइं हींव विसगाल्या दोऱ्याआ जागे रोत ते हसर-एनोन जागे जाआं, आन पालामाआ वोल ए हींव हमात जाआं रोय.

18 "आन दिही उगताआ वोल ए हींव होवरान आन दमिश्कोअ मायती यारदेन खाडीइ जागे जाआं आवेहे, एज हाद्दी उगताम्यी हींव रोय.

19 "देहामी हींव ए तामार कोतेहे तिहीं रोत ते मरिबोत कादेशोअ पांअयोंअ जागे जाआं आन तिहीं रोत मिसर देशोअ खोबरीइ वोल रोत पाद्रीज दोऱ्याआ जागे जाआं; ए देहाम्यी हींव बोण्यी.

20 "बुड्ताम्यी हींव ए देहाम्यी हिवेंएं जागे रोत हमात काटोअ जागऱ्याआ वोडा दोऱ्याआ जागे जाआं; ए बुड्ताम्यी हींव बोण्यी.

21 "एहें कोइत ओ देश तुमू आखा इस्राएल कुटूंबाआ डिठ वाटी द्या. 22 आन एहलोहो कोआ के तुमाआ जागाआ काजे तुमू आन तुमाम रोत कोइत वादनारे पारका देसोअ माअहें याआं विसमेहें वाटीत ल्या, ए पारका देसोअ माअहें इस्राएल कुटूंबाम जल्म लेदोहो एहें कोत मानित साला. तियांहां बी इस्राएल कुटूंबाम जागाआ वाटू आपा. 23 इस्राएल देशोम जिया इलाखाम एखु पारको कुटूंबो रोतोय, ताहां तियाहा बी तिहींम जागू आपजा, एहें कोत प्रभु देव कोहे."