1 फाशोअ यहोवाआ वसन माआ जागे पोत्यो, 2 "ए मोनव्योअ पोर्‍या, तु विरोद कोअनारा घराणाआ विसमेहें रोहे, जियांहां पालुहूं डोआ ते होय, पोन नाहां देखाअतो, आन उनाइलोअ कान ते होय, पोन नाहां उनाअते; काहाके तें विरोद कोअनारा घराणामेर्‍येए होय.

3 "तियाहा कोत ए मोनव्योअ पोर्‍या, बिडारो बांदीत तियां आखाआ देखताइज निहीत जा; वाअलोहो तियांहां देखाय; तें तोम विरोद कोअनारा घराणा मेर्‍येए होय. 4 तियाहा कोत तु दिहेज तियांआं डोआआ देखताइज ताआ बिडारो बांदीत बारथे काडेए, आन हांजेए वेले तु सेटे पोरदेसोम जानारा गुलामोअ होस निहीत जा. 5 तियांआं देखताइज टाट्लो फाड़ीत ताआ बिडारो बारथे काड्जी. 6 तियांआं देखताइज तु ताआ खांदोपोअ बिडारो उसलीत आंदारामेहेंज निहीत जाजी, आन ताहूं पुंय ने देखाअहूं जोवे काजे ताआ सोब टापित रोजी; काहाके आंय ताहूं इस्राएल घराणाआ कोअते एक निशाणी कोत ठरव्युहू."

7 ताहां जेहेलोहो माहूं कोयो तेहें कोइत मी कोअयो; पारका देशोम बिडारो बांदीत जातेहे तेहलोहो आंय माजोन दिहे माआ बिडारो बारथे काड्यो आन हांजेपोअ सिंजीवड़ो पोड़्यो तेहलाम होयरोअ वाड़ बांदल्या पितड़ाआ डुसू पाड़्यू; आंदारो पोड़ीत गोयो तेहलाम तियांआं देखताइज आंय बिडारो खांदोपोअ लेदोन जातु रोयू.

8 वेगीइ वेल देवोअ वसन माहूं जोड़्यो, 9 "मोनवीइ पोऱ्या, ‘तु कि कोअत्लू’ एहें कोत ताहूं इस्राएलवाले तें विरोदी माहें फुसतेते ना? 10 तियांहां को: प्रभु देव कोहे, के ओं देवोअ शब्द येरुसालेमवाला पुडाऱ्योहों आन जें इस्राएल कुटूंबाआ होय तियां आखाहाज लागू होय. 11 तियांहां एहें को: आंय तुमाआ खुण कोअयीही; आंय तियांहां कोइत देखाड़्योहो तेहेंज कोइत तियांअरी ओवे; ते हाद्दीपार जाय, गुलामीम तोआय. 12 तियांमेऱ्युउ आधिकारी आंदारो पोड़े तेहेलाम खांदोपोअ बिडारोन जातु रोय, तो पितड़ो फोड़ीत डुसाम रोत तों बिडारो लेत जाय; पुंय ने देखाअहूं जोवे कोत तो सोताआ सोब टापित लेय. 13 आंय तियापोअ जाल टाकीहीं ताहां तो माआ आटालाम सापड़े; आंय तियाहा बाबेलोमेहें खास्द्याआं देशोम लेत जाहीं; पोन तो देश तियाहा ने देखाय आन तो तिहींज मोइत जाय. 14 आंय तियाआ सोमकीर तियाहा मदत कोअनाराहां आन तियाआ आखा सेयनिकोहों आरजा-बुरजी कोई देहीं, आन तारवाआ उमाइत तियांआं फाट लागिहीं.

15 "आंय तियांहां देसो देसोम पारका कोई देहीं आन आंय तारवाआ उमाइत तियांआं फाट लागीही, ताहां तियांहां सोमजाय के आंय देव होय. 16 तेबी तिहींमेऱ्याआ थोड़ाज माअहुंहूं तारवाआ, काल आन मोराय यीं आफोतोम रोत वासाड़ीहीं; मोन्ज्ये तें जियां जियां देसोम जाय तिहीं तियांअरी ओवली गोठी तें कोत आपे, ताहां तियांहां सोमजाय के आंय देव होय."

17 तिहींइं फासाड़ी देवोअ ओं वसन माहूं जोड़्यो, 18 "मोनवीइ पोऱ्या, तु थुरथुर कापतू जात रोटू खा; बितू आन फिकरेम पोड़ीत पाईं पी; 19 आन या देसोअ माअहोंहों को के, प्रभु देव येरुसालेम आन इस्राएलवाला रेवाश्याहां कोहे के, तें फिकरेम पोड़ीत रोटू खाय, बिते जात पाईं पिय; काहाके तिया देसोम रोनारा रेवाश्याआं पापोअ वाखरी तिहींइं आखो आरवात जाय आन आखु देश उजाड़ पोड़ीत जाय. 20 ठेहांरु दुन्यावाले होयरे उजाड़ पोड़ीत जाय, जागू हुंद्लू ओत जाय, ताहां तुमुहूं समजाय के आंयज यहोवा देव होय."

21 फाशोअ देवोअ ओं वसन माआ जागे पोतो. 22 "मोनवीइ पोऱ्या, ‘दिही नांबलाअताहा आन दर्शनोअ कोड्लीज गोठी पुरी नाहां ओवती,’ ए जे काईं पोड़्यीही यीइ की अर्थ बोणे? 23 ताहां तियांहां तु को: प्रभु देव एहें कोहे के, आंय यी काईंइं परसार बोंद कोअहीं, आन तिहीं रोत यी काईंइं नाव बी ने लेय. तियांहां को के दिही आहने आवताहा आना आखी गोठी पुरी ओवीइलोअ वेल आहने होय.

24 "ओमे रोत इस्राएलोअ कुटूंबाम फालतू काईं आन ओंहाणनारी गोठी उनाअहूं ने जोड़े. 25 काहाके आंय देव होंव; आंय जों कोहो तों शब्द पुरो ओवनारोज, तियाहा वाहीं वाआ ने लागनारी; काहाके प्रभु देव कोहे, ए विरोदी माअहूं, आंय तुमाआ दिहोमेहें जों शब्द कोहीं तों पुरो कोअहीं."

26 देवोअ वसन फाशोअ माआ जागे पोतो. 27 "मोनवीइ पोऱ्या, पाल, इस्राएलोअ माअहें कोतेहे के, ‘तिये जों दर्शन देख्यो, तियाहा जास्ती वाआ लागनारी; तो जाअखा नांबा दिहोअ बाप्तिम कोत देखाड़ेहे.’ 28 तियाहा काजे तियांहां तु को: प्रभु देव कोहे के, माआ कोड्लाज शब्दाहा वाआ ने लागनारी; आंय कोहीं तों शब्द पुरो ओवनारोज, एहें कोत प्रभु देव कोहे."