यहेज्केल 35

एदोमोहों देवोअ डोंड

1 देवोअ वसन माआ जागे पोतो: 2 ए मोनवीइ पोऱ्या, ताआ सोब सेईर डोगोअ वोल कोइत तियाआ विरुद्दाम भविश्यवाणी कोअ, 3 आन तियाहा को, यहोवा देव एहें कोहे,

"ए सेईर डोगोअ, आंय ताआ विरुद्दाम होंव,

आथ उसा कोइत आंय ताहूं डोंड आपीहीं आन ताहूं उजाड़ कोई देहीं.

4 आंय ताआ होयरोहो आरवीत टाकिहीं, तु उजाड़ ओत जाही;

ताहां तु जांइत लेही के आंय यहोवा देव होय.

5 "काहाके तु इस्राएलोअरी कायम दुस्मोनी मिकतुतो, आन इस्राएलोहो तियाआ पापोअ वोतीइ शिक्शा जोड़तीते, तेहेलाम तु तियांपोअ तारवाआ सालाड़्यी." 6 तियाहा काजे देव यहोवा एहें कोहे, "माआ जिवनोअ शप्पत, तु मोए तेहें काजे आंय ताहूं तियार कोअहीं, आन मोत ताआ फाट लागे; माहें माइलोअ ताहूं हाजो लागो, तियाहा काजे मोत ताहूं ओड़ीत लागे. 7 एहेंज कोइत सेईर डोगोहो आंय उजाड़ कोई देहीं, आन जो यामेहें आवेहेन जाहे, तियाहा आंय माइत टाकीहीं. 8 तिया डोगोहो आंय मोल्या माहूं वाअहीं पोई देहीं; ताआ टेंबान खायाराम तारवाइ वाअहीं मोल्ये तोड़े पोड़ीत रोये. 9 आंय ताहूं एकसोट्युज उजाड़ कोइत टाकी देहीं, आन ताआ होयरे फाशेए ने बोहे. ताहां मुंदू जाय के आंय यहोवा देव होंव."

10 "काहाके तुमे कोयोहो, ‘एं बेन राज्ये, एं बेनू देश माआ ओत जाय; आन आमूज याआ आधिकारी ओत जाहूं,’ पोन यहोवा देव तिहीं ओतू. 11 तिहींइं काजे, माआ देव यहोवा कोहे, माआ जिवनोअ शप्पत, तु जेहें कोइत माहूंपोअ खिजवाअयू तेहेंज कोइत आंय बी तापोअ खिजवाअहीं, जाहां ताआ न्याय ओत जाय तेहेलाम आंय सोताहा तापोअ प्रगट ओवीहीं. 12 ताहां ताहूं बी मुंदू जाय के तुमे गाई देदोहो तों देव उनाअयुहू. इस्राएलोअ डोगोअ बाप्तिम तु जास्ती खाराब गोग्यू, तुमे कोयो, ‘ए इस्राएलोअ डोगोअ उजाड़ ओत गोयाहा, तें आमाआ सारु ओत गोयेहे.’ 13 ताहूं माआ विरुद्दाम वोडाय सोड़्यी, तिहीं वाईं तु माआ विरुद्दाम गोग्यू, तों आखो आंय उनाअयुहू."

14 माआ देव यहोवा कोहे, "आंय ताहूं आरवीहीं ताहां कोलीइ माअहें खुस ओवे. 15 इस्राएल कुटूंबो सोताआ जागाम रोत उजड़ीत गोयो ताहां ताहूं खुसी ओवी, तियाहा काजे आंय बी ताअरी तेहेंज कोअहीं. ए सेईर डोगोअ, ए एदोमोअ देश, तु उजड़ीत जाही, ताहां ताहूं मुंदू जाय के आंय देव यहोवा होय."