1 "ए मोनव्योअ पोर्‍या, तु इटो ले, आन तियाहा ताआ हुंबर मिकीत कोइत तियापोअ एक होयर, मोन्ज्ये येरुसालेमोअ सित्र काड; 2 ताहां तियाहा शारी वोल रोत केंडीत ले मोन्ज्ये तियाआ विरुद्द किल्लू बोणाव आन तियाआ आगाड़ी उतार बोणाव; आन पोड़ावू टाक, आन तियाआ शारु वोल लोड़ायीइ वस्तु लागाड़. 3 ताहां तु लोखिंडाआ कोड़ायू लेत कोइत तियाहा लोखिंडाआ पितड़ो सोमजीत आन तिया होयरोअ विसमेहें उबो कोइ दे, ताहां ताआ सोब तियाआ हुंबर कोइत तियाहा केंडीत ले, एहें कोइत तु तियाहा केंडीत मिक, ए इस्राएलोअ घराणाआ निशाणी रोय.

4 "फाशोअ तु बांगाड़्यीइ वोल लोटीत कोइत इस्राएलवाला घराणाआ पाप तापोअ ले, काहाके जेताहा दिही तु बांगाड़्यीइ वोल लोटीत रोही, तेताहा दिही जाआं तु तियां माअहोंअ पापोअ वोजू वेठतू रोही. 5 आंय तियांआं पापोअ वोरह्योअ होस ताआ काजे दिही ठरव्याहा, मोन्ज्ये तिन होव नोव्वोद दिही; एताहा दिही जाआं तु इस्राएलोअ कोअते दुख वेठीही. 6 जेहेलाम एताहा दिही पुरा ओत जाय, ताहां तु हाजाड़्यीइ वोल लोटीत कोइत यहुदाआ घराणाआ पापोअ वोजू वेठीत लेजी; आंय तियाआ काजे बी आन ताआ काजे सालीही दिही, मोन्ज्ये एकेका वोरह्योअ काजे एकेक दिही ठरव्युहू.

7 "तु येरुसालेमोहों केंडारे तेहें काजे ताआ बेनू आथ उगाड़ीत ताआ सोब तिवोग कोइत तियाआ विरुद्दामेहें भविश्यवाणी कोअ. 8 पाल, आंय ताहूं राही वाअहीं बांदीहीं, आन जाअहूं जाआं तियाआ केंडवारीलोअ दिही पुरा ने ओवे, ताअहूं जाआं तु बिहीरी वोल नाहां फिरीत सेकतू.

9 "तु गोंवें, टोहाल गोंवें, पापड़्ये, मोसुर, बाजरा, आन काठ्ये गोंवें, लेत कोइत एक बासनोमेहें मेकीत कोइत तियां वाअहीं रोटू बोणावया कोअजी. जेताहा दिही तु बांगाड़्यीइ वोल लोटीही, तेताहा दिही मोन्ज्ये तिन होव नोव्वोद दिही जाआं तो खाया कोअजी. 10 जो रोटू तु खाही, तो मोजीत खाजी, मोन्ज्ये दाड़ीइज विही विही शेकेल* पोइत खाजी, आन तो वेले वेलेपोअ खाजी. 11 पाईं बी तु मापीत कोइत पिजी, मोन्ज्ये दाड़ीइज बेन गिलास; आन तों वेले वेलेपोअ पिजी. 12 टोहाल गोंवोंअ रोटाआ होस तो रांदीत खा, आन तो माअहुंउं सामने मोनव्योअ ओग्याआ लेंडकापोअ सुड़ोव."

13 फाशोअ यहोवा देवे कोयो, "आंय तियांहां इस्राएल सोड़ीत जिया देसोम ओड़ीत काडीहीं तिया देशोमेहें तें एहें कोइत जिवज्योअ रोटू सोगदायी खाया कोए."

14 ताहां आंय कोयो, "ओं कि, यहोवा देवा पाल, माआ मोन केदिहीं एठो नाहां ओवो, आन हानू रोत ते वोडू ओवू ताअहूं जाआं मोते मोअल्ये आन रान्ठ्या जनवारो वेतरीइल्या जनवारोअ माहां नाहां खादो, आन नाहां खाराब माहां माआ सोबीम गोयो."

15 ताहां तिये माहूं कोयो, "पाल, आंय ताहूं माहुंउं ओग्याआ लेंडकाआ बोदले डोगराआ साणे वापरुहूं देहीं, आन तियाज वाअहीं तु ताआ रोटू हेकजी."

16 फाशोअ तिये माहूं कोयो, "ए मोनव्योअ पोर्‍या, पाल, येरुसालेमोअ ओनोअ आधार आंय तोड़ी देहीं; माअहोंहों कमी रोटू खाअहूं जोड़े; आन पाईं थोड़ थोड़ो वापरीत पिया कोए. 17 आन एहें कोइत तियांहां रोटू आन पाईं जोवे तेतोहो ने जोड़े; आन तें आखे बिये, आन तियांआं पापोमेहें फोसल्येज मोइत जाय."