1 देवे कोयो, "मोनवीइ पोऱ्या, इस्राएलोमेऱ्याआ डोगोहो भविश्यवाणी कोइत को. देवोअ गोठ कान देत उनाआ, 2 यहोवा देव आगल्यीइ गोठी कोहे: दुस्मोने ताम तुमाआ बाप्तिम कोयोहो, ‘आरे वा! जुना कालोमेऱ्याआ उसा जागा ओमे आमाआ आथोम आवित गोयामे!’

3 "तियाहा काजे मोनवीइ पोऱ्या, भविश्यवाणी कोइत को, देव यहोवा एहें कोहे: जागऱ्याआ देसोवालां तुमुहूं उजाड़ी देदे आन शारी ओरी रोत तुमुहूं खुंदऱ्ये, तुमू बिहीरा देसोअ ताबाम ओत गोये. तेहेलाम बिहीरे माहें निंदा कोअतेहे. 4 तियाहा काजे इस्राएलवाला डोगों, तुमू यहोवा देवोअ कोल्ये उनाआ, तो डोगोअ, टेंबा, बारादोऱ्यी, उजाड़ जागा, उजाड़ होयरोहों एहें कोहे, जागेवाला देसोवाअहीं तुमू लुटाअयेहे आन तें तुमाआ मोज्याक उडाड़तेहे;"

5 देव यहोवा एहें कोहे, "हुदाअलीज आंय खोतेए बाल्लायी जागेवाला देसोहोंन खास कोइत एदोम देशोहो कोयो के यां माआ देसोहो लुटात जाय तेहें काजे वोडी रोडे वाअहीं ताबाम कोइत लेदू."

6 "तियाहा काजे इस्राएल देसोअ बाप्तिम भविश्यवाणी कोइत डोगोहो, टेंबाहा, खाडीही आन बारादोऱ्यीही को: पाला, यहोवा देव कोहे, तुमू देसो-देसोंअ माहुंउं निंदा वेठ्यीही, तिहीं वाअहीं आंय खोतेए बाल्लायी गोग्युहू. 7 देव यहोवा एहें कोहे: जियां तुमाआ निंदा कोअयीही तियां मेरेमेरे वाला देसोहों बी निंदा उनाअहूं पोड़े. 8 पोन तुमू इस्राएलोअ डोगों, तुमापोअ साड़े वोलीत उठे आन फलवे लागे वोले, माआ माहें वेगेज वापिस आवित लागे. 9 आंय तुमाआ वोल वोलीहीं, तुमापोऱ्येए खेते खेड़ेन ओए एहलोहो आंय कोइ देहीं. 10 तुमापोअ इस्राएल माहें जास्ती वोहती कोइत रोने वोले, इंहीं होयरे बोहीत जाय, उजड़ीइल्या जागा वापिस बोणीत जाय. 11 आंय तुमापोअ माअहें आन जनवारे जाअखे वादाड़ीहीं; तें पोलते पोलते जाय आन जाअखे वादते जाय, आन आंय तुमुहूं पेल रोतेहे तेहेलेज कोई देहीं. ताहां तुमू जांइत लेहा के आंय यहोवा देव होय. 12 आंय माआ माअहुंहूं, इस्राएलवालाहां लेत आविहीं, तें तुमापोअ साल्या कोएन फिऱ्या कोए; तें तुमाआ मालिख ओवे आन तुमू तियांआं वावड़्यू जागू ओत जाहा, आन तें तुमाआ उस्ती विण पोऱ्याआ ने रोय."

13 यहोवा देव एहें कोहे: "जें माहें एहें कोया कोअतेहे, ‘ओ जागू माहुंउं खानारु होय, तियापोअ बोठला माहुंहूं सेली देहे,’ 14 तिहींवाईं ओमे तु माहुंहूं ने खाही, आन तापोअ वोहती कोअनारा माहुंहूं बी ने सेलही, माआ प्रभु देवोअ ओ आवाज होय. 15 ओमे रोत आगाड़ी राज्या राज्याआ माअहूंम ताआ बेइजती ने ओवुहूं देंव. आन फाशेए माहें ताहूं ने डांणवे, तुमापोअ बोठला माहुंहूं तुमू ने तुलपाड़हा. माआ देव प्रभु यहोवा एहें कोहे."

16 फाशोअ देवोअ वसन माआ जागे पोतो: 17 तिये कोयो, "ए मोनवीइ पोऱ्या, जाहां इस्राएलवाले तियांआं देशोम रोतेते, तेहेलाम तें सोताआ आथोवाईं तियांआं जागू एठु पाड़तेते. माहूं ते तियांआं ए सोगदाय फोली ते मुन्सोलावाली बोईंइं होस लागेहे. 18 तियां जें खुने पाड़्ये आन मुर्ती वाअहीं आखू देश एठु पाड़ीत टाक्यू. तिहींज वाअहीं आंय तियांपोअ जुदू खिजवाअयू. 19 मी तियांहां बिहीरा बिहीरा देशोम ओड़ीत काड़्ये, तें देसो-देसोम जात कोइत वेरात गोये. तियांआं बाक्ता सोभाव आन खाराब कामोअ वाखरी मी तियांहां डोंड आप्यू. 20 पोन तें जिहीं गोये, तियी जागे माआ सोका नावोहो एठो ठरव्यो, काहाके माहें तियांआं बाप्तिम कोतेते के, ‘एं ताम यहोवा देवोअ माहें होय, पोन तियाआ देसोम रोत याहां काडी देदेहे.’ 21 पोन इस्राएल घराणो जिहीं जिहीं गोयो, तिहीं तिहीं तियां माआ सोका नावोहो एठो पाड़्यो, तियाहा कोत आंय माआ नावोहो सांबाल्यो.

22 "तियाहा काजे तु इस्राएलोअ कुटुंबाहा को, देव यहोवा एहें कोहे के, ए इस्राएलोअ कुटूंबा, आंय ओं काम तुमाआ काजे नाहां, पोन माआ सोका नावोअ वाखरी कोअनारु होय, जियाहा तुमू एठो पाड़्योहो. 23 आंय माआ महान नावोहो सोको ठरवीहीं, जियाहा तुमू बिहीरा देसोम जात कोइत एठो पाड़्योहो. जेहेलाम आंय तुमावाअहीं तियां देसोम माआ नाव सोको ठरवीहीं ताहां तियांहां मुंदू जाय के आंयज प्रभु होय. देव यहोवाआ एज गोठ होय. 24 आंय तुमुहूं देसो देसोम रोत काडीत एकीज जागे टिग वालीहीं, आंय तुमुहूं तुमाआ देसोम वापिस लेताविहीं. 25 आंय तुमापोअ सोको पाईं हिपड़ीहीं तेहेलाम तुमू सोके ओत जाहा; आन आंय तुमुहूं तुमाआ आखी सोगदायीम रोत आन मुर्तीइ घाणीम रोत तुवी देहीं. 26 आंय तुमुहूं एक नवो मोन आपीहीं, तुमामेहें नवी आत्मा टाकिहीं; आंय तुमामेऱ्योअ ठोहजाअलो मोन काडीत तुमुहूं माहोंवालो मोन आपिहीं. 27 आंय माआ आत्मा तुमामेहें मेकीहीं ताहां तुमू माआ नियमोअ पालन कोअहा आन मी आपल्या आखा आदेशोअ तुमू पालन कोअहा. 28 तेहेलाम मी तुमाआ डायहांहां आपल्या देशोम तुमू रोहा. तुमू माआ माहें आन आंय तुमाआ देव ओविहीं. 29 आंय तुमुहूं एठी पाड़नारी आखी गोठीम रोत वासाड़ीहीं. आंय ओन जाअखो पाके तेहें काजे आदेश कोअहीं, ताहां तुमाआ विसमेहें काल ने पोड़े. 30 आंय तुमाआ साड़ोअ फलवे आन ओन वादाड़ीहीं, ताहां तुमुहूं काल पोड़ेहे बिहीरा देसोम निसो मुंड ने कोअहूं पोड़े. 31 ताहां तुमुहूं तुमाआ खाराब कामे ओर आवे आन तुमू कोअल्या गुनाआं वाखरी तुमुहूं लाज आवे. 32 प्रभु यहोवा कोहे, ए इस्राएलवाला, तिहींवाअहीं तुमू जांइत ल्या के ओं काम आंय तुमाआ उस्ती नाहां कोअतु, तुमुहूं सोताआ कामे ओर कोइत लाज आवुहूं जोवे, होरमाअलेज तुमाआ मुंड निसो ओवुहूं जोवे."

33 माआ प्रभु यहोवा एहें कोहे: "जेदिहीं आंय तुमाआ खाराब कामे तुवी देहीं, तेदिहीं आंय तुमुहूं तुमाआ होयरोम आवुहूं देहीं; ताहां तुमाआ उजड़ीइल्यू जागू फाश्युउ पोआय. 34 माअहें जिया जागाहा पोड़्याठ कोतेते, तियाज जागाम खेते कोए. 35 वाटारे एहें कोतेज जाय, ‘ओ देश ताम उजाड़ पोड़ीत रोयुतोन ओमे का एदेन बोगिसाआ होस ओत गोयुहू, जें होयरे उजाड़ आन खाकलाविसल ओते, तें ओमे का हाजला गोड बांदीत बोठेहे.’ 36 ताहां आरीइ देसोवाले माअहें जांइत लेय के आंय यहोवा देवे उजाड़ पोड़ल्याहां फाशेए बोहाड़्येहे आन खाकलाविसल ओवेय, तियांहां फाशेए ठिकाणे लागाड़्येहे. आंय प्रभु यहोवा ओं कोयोहो."

37 यहोवा देव एहें कोहे, "इस्राएलवाले माअहें माहूं ए गोठी कोए तेहें काजे कोय के, आंय तियांआं गोणती मेडा-बोकड़ाआं होस वादाड़ो. 38 जेहेलोहो येरुसालेम होयरोम सोका तिवारोअ होमसे मेडे-बोकड़े जाअखीलेहे रोतेहे, तेहें कोइत आंय पेल उजाड़ पोड़ल्या होयरोम माहुंउं टोलान टोला गर्दी ओत जाय, ताहां तियांहां मुंदू जाय के आंय यहोवा होंव."