यहेज्केल 30

देव मिसरोहो डोंड आपे

1 यहोवाआ ओं वसन माआ जागे पोत्यो: 2 "ए मोनव्योअ पोर्‍या, भविश्यवाणी कोइत को, यहोवा देव एहें कोहे:

"दुख कोआ आन कोवा, तिया दिहोपोअ केतीही वाजे!

3 काहाके तो दिही मोन्ज्ये यहोवा देवोअ दिही आहने होय;

तो वाद्लाआ दिही आन देसोअ डोंडोअ वेल रोय.

4 मिसर देसोमेहें तारवाआ साले,

आन जेहेलाम मिसर देसोमेहें माहें माइत टाकाय,

ताहां कूश देसोम बी ओड़सन आवे, माअहें मिसर देसोहो लुटीत लेत जाय,

आन तियाआ पायू ओदाली देवाय."

5 "कूश, पूत, लूद, कुब आन आक्खे माय सान्बू माअहें आन तियांअरी करार कोअल्या देसोअ रोनारे, तारवाइ वाअहीं तियांअरीज मोइत जाय."

6 "यहोवा देव एहें कोहे, मिसर देसोहो सांबालनारे बी उठलीत पोड़े, आन तियांआं जियी सेक्तीपोअ मिसरवाले फुगतेहे, ते सेक्ती टुटे; मिग्दोल रोत ते सवेने जाआं तियाम रोनारे बी तारवाइ वाअहीं माआंय, एहें कोइत यहोवा देव कोहे. 7 तें उजड़ीइल्या देसोमेहें उजड़ीइल्ये बोणे, आन तियांआं होयरे खेकराअला होयरोमेहें गोणाय. 8 जेहेलाम आंय मिसर देसोम आग लागाड़ीहीं आन तियाआ आखे मदत कोअनारे आरवाये, तेहेलाम तें जाइंत लेय के आंय यहोवा होय.

9 "तेदिहीं माआ सामने रोत बिगर बियेज दूत जाहाजीपोअ सोड़ीत कोइत निहे आन कूशोवालाहां बिवाड़े; आन तियांपोअ एहेलिही आफत आवे, जेहेलीही के मिसर देसोअ डोंडोअ होमसे आवयीते; काहाके पाल, तो दिही आवेहे!"

10 "यहोवा देव एहें कोहे: आंय बाबेलोअ राजा नबुकदनेस्सरोअ आथे मिसर देसोअ दुन्याहां आरवी देहीं. 11 तो तियाआ माअहें लेत कोइत तिया देसोहो आरवीइलोअ काजे पोताड़ाय, जों आखा देसोमेहें कोठीण होय; आन ते मिसरोअ विरुद्दाम तारवाआ काडीत कोइत देसोहो मोल्या माअहूं वाअहीं पोइ देय. 12 आंय नोयीही आटवीत टाकीहीं, आन देसोहो खाराब माअहुंउं आथोम कोइ देहीं; आन आंय पारका माअहूं वाअहीं देसोहो, आन जों किबी तियामेहें ओय, तों उजाड़ पाड़ी देहीं; आंय यहोवाज एहें कोयोहो."

13 "यहोवा देव एहें कोहे: आंय नोप होयरोमेऱ्यीइ आखी मुर्तीही आरवीत टाकीहीं; तिहीं रोत कोड्लुज राजकुमार मिसर देसोम रोत ने उठे; आन आंय मिसर देसोमेहें बिक लागाड़ीहीं. 14 आंय पत्रास होयरोहो उजाड़ीहीं, आन सोअन होयरोम आग लागाड़ीहीं, आन नो होयरोहो डोंड आपीहीं. 15 मिसरोअ मजबुत गोड सीन होय, तियापोअ माआ खोत वादाड़ीहीं, आन नो होयरोअ आखी दुन्याहां आरवी देहीं. 16 आंय मिसरोम आग लागाड़ीहीं; सीन होयर जाअखीलोहो थुरथुर कापे; आन नो होयर फाड़ीत टाकाय आन नोपोअ दुस्मोन दिहेज उठे. 17 आवेन आन पिबेसेतोअ जुवान तारवाइ वाअहीं पोड़े, आन एं होयरे गुलामीम जाते रोय. 18 जाहां आंय मिसरोअ जुहरोअ हिवले तहपन्हेन्सोमेहें मुड़ीहीं, ताहां तियामेहें दिहेज आंदारो पोड़े, आन तियाआ सेक्ती आरवात जाय, जियापोअ तो वोडाय कोअहे; तियाहा वादलो टापीत लेय आन तियाआ बेट्यिह्ही गुलालीम जात्यी रोय. 19 एहें कोइत आंय मिसर देसोहो डोंड आपीहीं. ताहां ते जाईंत लेय के आंय यहोवा देव होय."

मिसरोअ राजाआ टुटली सेक्ती

20 फाश्योअ इग्यारवा वोरह्योअ पेलठा मोयनाआ हांतवे दिही यहोवाआ ओं वसन माआ जागे पोतो: 21 "ए मोनव्योअ पोर्‍या, आंय मिसरोअ राजा फारोअ आथ तोड़ी देदुहू; आन पाल, नाहां जुड़ाअयू, नाहां तियापोअ दावा लागाड़ीत कोइत पोट्टी बांद्यी के तो बांदीइला वाअहीं तारवाआ तोइलाआ लायक बोणीत सेके. 22 तियाहा काजे प्रभु यहोवा एहें कोहे: पाल; आंय मिसरोअ फारो राजाआ विरुद्दाम होय, आन तियाआ हाजला आन मुड़ाअला बेनु आथोहो तोड़ीहीं; आन तारवाइही तियाआ आथोम रोत ओदारीत पाड़ीहीं. 23 आंय मिसरवालाहा राज्या राज्यामेहें वेरासेर कोअहीं, आन देसो देसोमेहें वेरी देहीं. 24 आंय बाबेलोअ राजाअ आथोहो बली कोइत माआ तारवाआ तियाआ आथोम आपीहीं; पोन फारोअ आथोहो तोड़ीहीं, आन तो तियाआ सामने एहेलुहू रोड़ी रोड़ीइ बिखारी मागे जेहेलोहो जाअखीलोहो दुखाअलो माहुंउं काहायां कोअहे. 25 आंय बाबेलोअ राजाआ आथोहो सांबालीहीं, आन फारोअ आथ डिल्ला पोड़े, ताहां तें ओलखे के आंय यहोवा देव होय. जेहेलाम आंय माआ तारवाआ बाबेलोअ राजाआ आथोम आपीहीं, ताहां तो तियी तारवाइही मिसर देसोपोअ सालवे; 26 आन आंय मिसरीही राज्या राज्यामेहें वेरासेर कोअहीं आन देसो देसोमेहें वेरी देहीं. ताहां ते जाइंत लेय के आंय यहोवा होय."