1 फाशोअ यहोवा देवोअ तरफ से माहूं वसन जोड़्यो. 2 "ए मोनव्योअ पोर्‍या, प्रभु यहोवा इस्राएलोअ पुयींइं बाप्तिमेहें एहें कोहे: सेवट ओवू! देसोअ शारु खुणाआ सेवट आवीत लागुहू!

3 "ताआ सेवट बी आवीत लागुहू, आन आंय माआ खोतेए बाल्लायी ताआ कामोअ पुरमाणे ताहूं डोंड आपीहीं; आन ताआ आखा खाराब कामोंअ फल ताहूं आपीहीं. 4 माआ दयाआ नजर तापोअ ने रोय, ओं कोअहूं माहूं खाराब ने हासवाय, आन जाअहूं जाआं ताआ खाराब कामोंअ पाप तामेहें रोय ताअहूं जाआं आंय ताआ कामोअ फल ताहूं आपीहीं. ताहां तु जाईंत लेही के आंय यहोवा होय."

5 प्रभु यहोवा एहें कोहे: "ओड़सन! एक वोडी ओड़सन आवेहे, पाला! 6 सेवट आवीत लागुहू, आखाआ सेवट आवीत लागुहू; तो ताआ विरुद्दाम जागतू होय. पाला, तो आवेहे. 7 ए इस्राएलोअ रेवासी, ताआ आरवाइलोअ वेल आवीत लागी, आन ताआ काजे आरवाइलोअ फिरको फिरीत सुकोहो, आरवाइलोअ दिही आहने आवीत पोतुहू. डोगोपोअ खुसीइ आवाज नाहां पोन दोंगू मातनारु होये."

8 "ओमे थोड़ाक दिहोमेहें आंय माआं खोत तापोअ भोड़कावीहीं, आन तापोअ पुरी खोत कोअहीं आन ताआ कामोअ परमाणे ताहूं डोंड आपिहीं. ताआ आखा खाराब कामोअ फल ताहूं भोगाड़ीही. 9 तापोअ माआ किव ने रोय आन आंय तापोअ किइमाय ने कोओ. आंय ताआ कामोअ फल ताहूं वेठाड़ीहीं, आन ताआ खाराब कामोअ मोजरी ताहूं आपीहीं. ताहां तु जाईंत लेही के आंय डोंड आपनारु यहोवा होय."

10 "पाल, तिया दिहोहो पाल, तो आवेहे! फिरको फिरीत वोल्योहो, हुसकी फुगीत गोयीही, वोडाय वादीत गोयीही. 11 भान्गड़ वादती वादती पापोअ डोंड बोणीत गोयु; तियांम रोत कोडोज ने वासाय, आन ने तियांआं गोर्दी, आन ने तियांआं मालधनोम रोत वाजिहीं रोय; आन ने तियांमेऱ्याआ कोडाआ काजे विखु होंबलाय.

12 "वेल आवीत लागीही, दिही आहने आवीत लागाहा; वेसातू लेनारु ने खुसी कोइत सेके आन ने वेसनारु दुख कोए, काहाके तियी आखी गोर्दीपोअ डोंड आवीत पोड़े. 13 जर तो जिवतू रोय, तेबी वेसनारु वेसल्यी वस्तुउ जागे जात ने सेके; काहाके दर्शोनोअ ए गोठ पुरा देसोअ आखी गोर्दीपोअ ओवे, कोडोज ने जात सेके; कोडोज बी माहुंउं जो पापोमेहें जिवेहे, तों सोताहा सांबालित ने सेके. 14 तियां तुरी फुक्यी आन आखो तियार कोइ देदो; पोन लोड़ायीमेहें कोडोज नाहां जातो, काहाके देसोअ आखी गोर्दीपोअ माहूं खोत लागीही."

15 "बाअथे तारवाआ आन मायते मोराय होय; जो सापड़ामेहें होय तो तारवाइ वाअहीं मोए, आन जे होयरोमेहें ओय तो फुक आन मोरायी वाअहीं मोए. 16 तियांमेहें रोत जो वासाइत निहे तो वासाय ते खोरो पोन तियाआ पापोमेहें फोसीत रोय, जेहेलोहो काटोमेहें रोनारा पेरवाआ होस डोगोपोअ रोत दुख कोअतो रोय. 17 आखाआ आथ डिल्ला आन आखाआ टोसणे जास्ती कमजोर ओत जाय. 18 तें दुखोअ आंगड़े पोवित लेय, आन तियांआं रुंगहे उबे रोत जाय, आखाआ सोब उगाईत जाय आन आखाआ टालगी कोइत लेय. 19 तें तियांआं सांदी वाटीपोअ टाकी देय, आन तियांआं होनो खाराब वस्तु ठोरे; देवोहो खोत लागे तिया दिहोअ दिही तियांआं होनो सांदी तियांहां ने वासाड़ीत सेकनारो, तिहीं वाअहीं तियांआं जिव खुस ने रोय, तें ने ताराय, काहाके तियां ठोकात कोइत खाराब काम कोअयोहो. 20 तियां माअहुंउं हाजो गोवणो वापरीत मुर्ती बोणावयी, तियांहां तियाआ बाप्तिम वोडाय हासवाअतोतो, तियां जुदी मुर्ती बोणायी, आन तियां जुदी खाराब वस्तु बोणावीत मिक्यीही, तियाहा कोत आंय ते तियांआं कोअते एठी वस्तु बोणावी देहीं.

21 "आंय तियाहा लुटे तेहें पारका देसोअ आथोम, आन मालधन बुउसे तेहें धरतीपोर्‍याआ पापी माअहोंअ आथोम होपी देहीं, आन तें तियाहा एठो कोइ देय. 22 आंय तियांआं वोल रोत सोब फेरवीत लेहीं, ताहां तें माआ मंदिरोहो एठो कोइ देय. बांड फोहीत लुटीत लेय आन तियाहा एठो कोइ देय.

23 "एक हाकल बोणावी दे, काहाके देस खुनोअ गुना वाअहीं, आन होयर दोंगा वाअहीं पोआयोहो. 24 आंय देसो देसोमेहें रोत बाक्ताम रोत बाक्ते माअहें लेत आविहीं. जें तियांआं कोओअ मालिख बोणीत जाय; आन सेक्तीवालाआ वोडाय काडी देहीं आन तियांआं सोका जागा एठा बोणे. 25 नाश वाटेपोअ होय, तें होक होदे पोन वाहीं होक ने जोड़े. 26 ओड़सनीपोअ ओड़सन आवे, वाराआ होस मागोपोअ माग उनाय; आन माअहें भविश्यवक्ताहा दर्शनोअ गोठी फुसे, पोन पुंजाराआ जागे रोत नियम, आन डायहांपोअ हाजु सल्लू आपीइलोअ किज ने रोय. 27 राजा ते विखु कोए, पुडारी दुखोअ आंगड़े पोवे, आन देसोदेसोअ माअहोंअ आथ डिल्ला पोड़े. आंय तियांआं कामोअ पुरमाणे तियांअरी वेवारो कोअहीं, आन तियांआं कामोअ पुरमाणे तियांहां डोंड आपीहीं; ताहां तें जाइंत लेय के आंयज देव होंव."