1 यहोवा देवोअ ओं वसन माआ जागे पोतो. 2 "ए मोनव्योअ पोर्‍या, इस्राएलोअ कुटूंबाहा ए काईं को; 3 यहोवा देव कोहे: वोडा फाकाआ आन रोंगाअला नांबा फिसाआ नेहाजू वोडू एक मोरागू लोबानोन डोगोपोअ आयू; तो देवदार साड़ोअ एक सिगू तोड़ीत लेतायू. 4 तिये सिगू मुड़ीत कोइत वापारो कोअनारा देसोम लेत गोयू, आन लेणा-देणावाला एका होयरोम मिक्यू. 5 ताहां तिहींमेएं एक मिंजो लेत कोइत खेतोमेहें ठाईं देदो, तियाहा जाअखीलाहा पाअयोंवाला जागामेहें वेलो* ठांअयों. 6 तों उगीत कोइते हानो वेलाअनारो दाराक्शाआ वेलो बोणीत गोयो. जियाआ डाली तियाआज वोल ओणाअयी, तियाआ मुले तियाआज निसे पोसऱ्ये, एहें कोइते तों दाराक्शाआ वेलो वादीत कोइत डिरा फोड़ो वोल्यो आन पालाओ वोल्यो.

7 "फाशुउ बिहीरु एक नांबा फाकावालू आन जाअखीलाहा फिसावालू वोडू मोरागू ओतू; आन तो दाराक्शाआ वेलो पिगतो रोअहूं जोवे काजे तियी जागे रोत तिया बिहीरा मोरागाआ वोल तियाआ मुले टाको वोल्यो आन डाल्यी तियाअहें ओणाओ वोल्यो. 8 पोन तियाहा डिरा फुटुहूं जोवे, आन फोलुहूं जोवे, आन दाराक्शाआ हाजो वेलो बोणुहूं जोवे काजे हाजा जागामेहें जाअखीलाहा पाअयोंअ जागे ठांअयोंतो.

9 "तियाहा काजे तु एहें को, प्रभु यहोवा ओं फुसेहे: केहें तो फुले फले के? केहें तो तियाहा मुलोम रोत उफड़ीत ने टाके ताहां आन तियाआ फलवे ने सेंदड़ीत टाके ताहां तो तियाआ आखो नोवो पालो नेहें उगात जाय के? तियाहा मुलोम रोत उफड़ीत टाकीइलोअ कोअते जाअखा जोरोअ आन जाअखा माअहुंउं गरज ने पोड़नारी. 10 पाला, तियाहा ठांएं तेबी तों जिवे के? तियाहा ठाईं देदो, आन वारो आयो, ताहां तो उगाइत ने जाय के? तों जिया जोरोम वाद्यो, तेहेंज कोइत तों उगात बी जाय."

11 फाशोअ यहोवाआ वसन माआ जागे पोत्यो: "तिया राड़गाट्या माअहुंहूं को, 12 केहें तुमू यीं गोठीइ अर्थ नाहां समजीइते के? फाशुउ तियांहां को, बाबेलोअ राजा येरुसालेमोम जात कोइत तियाआ राजाहा आन बाकी डायहांहां तोइत कोइते तियाआ जागे बाबेलोम पोताड़्या. 13 ताहां राजाआ पारवाड़ी मेऱ्याआ एका माट्योहो लेत कोइत तियाअरी वायदो कोअयो, आन तियाहा ताबाम रोअलाआ शप्पत खावाड़्यी आन देसोअ आखा पुडारी माट्योहों लेत गोयू. 14 याआ काजे के तों राज्य लुलो रोअहूं जोवे आन मुंड बी ने उसो कोअहूं जोवे, एतोज नाहां, पोन वायदो पालन कोअहूं जोवे. 15 तेबी ये कोड़ा आन वोडी सेना मागे तेहें काजे तियाआ दुत मिसरोम मोकलीत कोइत तियाअरी राड़ कोअयी. केहें तो फुले फले के? केहें एहेलेहे कामे कोअनारो वासाय के? केहें तो तियाआ वायदो तोड़ीत कोइत बी तो वासाय के?✝

16 "प्रभु यहोवा कोहे, माआ जिवनोअ शप्पत जिया राजाआ खावाड़ल्यी शप्पत तिये विणकामोअ समज्यी, आन जियाआ वायदो तिये तोड़्यो, तियाआ जागे मोन्ज्ये बाबेलोमेहेंज तो तियाआज जागे मोइत जाय, जिये तियाहा राजा बोणावयुतो. 17 जाहां ते जाअखीला माअहुंहूं माइलाआ काजे ताड़ बांदे, आन गोड बांदे, ताहां फारो तियाआ वोडी सेना आन जाअखीलिही मोंड्ली ओत कोइत बी लोड़ायीमेहें तियाआ मदत ने कोए. 18 काहाके तिये शप्पतेहे विणकामोअ समज्यी, आन तो वायदो तोड़ी देदो; पाला, तिये वसन आप्यो तेबी एहेले एहेले कामे कोअये, तियाहा काजे तो वासाइत ने सेके."

19 "प्रभु यहोवा एहें कोहे: माआ जिवनोअ शप्पत, तिये माआ शप्पत विणकामोअ समज्यी, आन माआ वायदो तोड़्योहो; ओ पाप आंय तियाआज बोसी टाकीहीं. 20 आंय माआ जाल तियापोअ टाकीहीं आन तो माआ फांदाम गुसवाय; आन आंय तियाहा बाबेलोम पोताड़ीत कोइत माआ विश्वास तोड़्युहू काजे न्याय कोठड़ीम उबू कोअहीं. 21 तियाआ आक्खा टोलामेऱ्येए जेते बी नाहें, तें आक्खे तारवाइ वाअहीं माआय, आन जे वासात जाय ते शारु ओरी वेरा सेर ओत जाय. ताहां आंय यहोवाज एहेलोहो कोअयोहो ओं तुमुहूं मुंदू पोड़ीत जाय."

22 फाशुउ यहोवा एहें कोहे:

"आंय बी देवदारोअ साड़ोअ उसी सिगीमेहें रोत थोड़ीक लेताविहीं,

आन तियाआ आखाम रोत उसेए कोवली लोग तोड़ीत कोइत

एका जाअखीलाहा उसा डोगोपोअ ठाअहीं,

23 मोन्ज्ये इस्राएलोअ उसा डोगोपोअ ठाअहीं;

ताहां ते डिरा फोड़ीत कोइत मजबुत आन हाजो देवदार साड़ बोणीत जाय,

तियीं डाल्यीइ निसे सावलामेहें बाती बातीइ आक्खे सिड़े

पांजरा बोणावे.

24 आंय यहोवाज रानोमेऱ्याआ आखा उसा साडोहो निसे,

आन निसा साड़ोहो उसे कोअये,

आन निला साड़ोहो उगवी देदे,

आन उगाअला साड़ोहो निलेगार कोअये.

आंय यहोवाज ओं कोयो

आन तेहेलोहो कोइत बी देखाड़े."