1 यहोवाआ ओं वसन माआ जागे पोतो: 2 "ए मोनवीइ पोर्‍या, सोरोअ पुडाऱ्योहों को, यहोवा देव एहें कोहे: तु मोनोमेहें सेकलात कोइत एहें कोहे, ‘आंय देव होय, आंय दोऱ्याआ विसमेहें देवोअ राजगादीपोअ बोठुहू,’ पोन केतुहू बी तु सोताहा देवोअ होस देखाड़ीही, तेबी तु देव नाहां, माहुंउंज होय. 3 पाल, दानियेलो रोत तु वादार बुद्दीमान होय; कोड्ली बी उंडेए गोठी तापरोत निकात ने रोय; 4 तुमे ताआ ओकले वाअहीं आन हुशारी वाअहीं धन हेंगाल्यो, आन ताआ मोटीमेहें हुनो-सांदी मिक्योहो; 5 तु ताआ ओकलेए जोरोवाअहीं वापारो कोइत ताआ धन वादाड़्यो; तिहीं वाअहीं ताआ मोन‍ फुगीत गोयोहो."

6 तिहीं वाअहीं यहोवा देव एहें कोहे: "तु ताआ मोन देवोअ होस देखाड़ेहे, 7 तियाहा काजे पाल, आंय तापोअ पारका माअहुंउं ताड़ लेतावहीं, जे आखी जातीइ रोत वादार जोराखे होय, ते ताआ ओकलेए होबापोअ तियांआं तारवाआ सालाड़े आन ताआ पुरी होबा बिगाड़े. 8 ते ताहूं मोतोअ दोओम उतारे; पोरापोर दोऱ्याम मोअनाराआ होसे ताआ मोत ओवे. 9 तु ताआ माअनाराआ आगाड़ी ‘आंय देव होय,’ एहें कोइत कोही के? तु ताआ दुखाड़नाराआ आथोम देव नाहां, माहुंउंज ठरही. 10 तु पारका माअहुंउं आथे बिगर खतनावाला माअहुंउं होस मोअही; ओं माआ कोअलोअ होय, एहें कोइत यहोवा देव कोहे."

11 फाशोअ यहोवाआ ओं वसन माआ जागे पोतो: 12 "ए मोनवीइ पोर्‍या, सोरोअ राजाआ बाप्तिम विखाआ गित बोणावीत कोइत तियाहा को, यहोवा देव एहें कोहे: तु हाजाम हाजू होय; आन तु ओकले वाअहीं पोआत आन आखाम रोत बाहरी होय. 13 तु देवोअ एदेन बोगिसाम ओतू; तापोअ आभुशण, माणिक, पद्यराग, हिरा, फिरोजा, सुलेमानी मणी, यशब निलमणी, मरकद, आन रात्ली आखी जातीइ मणी आन हुनाआं आंगड़े ओते; ताआ डोफणे आन पावी ताजमेहें बोणावयीते; जेदिहीं ताहूं बोणावयुतो, तेदिहीं ते बी तियार कोअयीते. 14 तु टापनारु अभिशिक्त करुब ओतू, आंय ताआ तेहेलीही योजना कोअयीते, तु देवोअ पवित्र डोगोपोअ ओतू; तु आगीइ होस जोपकीइनारा मोंड्याआ विसमेहें सालतु फिरतुतो. 15 ताहूं बोणावयू तेदिहीं रोत तामेहें पाप देखाअयू ताअहूं जाआं ताआ वागीइलोअ हाजोज ओतो. 16 पोन वादार लेणा-देणा वाअहीं तु वोडाऱ्यु बोणित पापी ओत गोयू; या वाअहींज आंय ताहूं एठु समजीत कोइत देवोअ डोगोपोअ रोत उताऱ्यू, आन ए टापनारा करुब आंय ताहूं आगीइ होस समकीइनारा मोंड्याआ विसमेहें रोत आरवी देदुहू. 17 ताआ होबा वाअहीं ताआ मोन फुगीत गोयोतो; आन तु नावासी ओवू कोत ताआ बुद्दी बिगड़ीत गोयीते. आंय ताहूं पुंयपोअ विसीत आस्टी देदू; आन बाकी राजहां ताआ तोमाशू पालुहूं जोवे काजे आंय ताहूं तियांआं सामने मिक्यू. 18 खोटो वापारो कोइत तुमे जाअखीलाहा पाप कोअया, तियां वाअहीं तु सोका जागा बिगाड़्या, तियाहा काजे तामेहें रोत आग निहीत ताहूं खात जाय, एहेलोहो आंय कोअयोहो, आन ताहूं पालनाराआ नोजरेए सामनेज आंय धरतीपोअ ताहूं खाँआं वाली देदुहू. 19 देसो देसोअ ताहूं ओलखीइनारे आखे माअहें तावाअहीं बोगलात गोयेहे; ताआ दशा पालित माहें बित गोयेहे; काहाके तु एकसोट्युज आरवात गोयुहू."

20 यहोवाआ ओं वसन माआ जागे पोतो: 21 "ए मोनवीइ पोर्‍या, सिदोनोअहें ताआ सोब फेरवीत तियाआ विरुद्दाम भविश्यवाणी कोअ; 22 आन को, प्रभु यहोवा एहें कोहे: ए सिदोन, आंय ताआ विरुद्दाम होय, आन तामेहें आंय माआ महिमा कोआड़हीं; आंय तियाहा डोंड आपीहीं आन तियामेहें सोताहा पवित्र ठोरवाअहीं, ताहां माअहुंहूं मुंदू जाय के आंय यहोवा होय. 23 आंय तियामेहें मोराय मोकलीहीं, आन तियाआ सोड़केपोअ रक्त वोहाड़ीहीं; आन तियाआ मेरेमेरे तारवाआ साले; ताहां तियाआ विसमेहें दुखाअले माहें पोड़े, आन तियांहां मुंदू जाय के आंय यहोवा होय."

24 "इस्राएलोअ घराणाआ आसेपासेए रोनारा जेत्ता बी देस होय, तियांमेएं कोडोज तियांहां बुडनारु काटू ने बोणे आन टोसनारु हुयटू ने रोय; ताहां तियांहां मुंदू जाय के आंय यहोवा देव होय."

25 "यहोवा देव एहें कोहे: जाहां आंय तियां आखा माहूंमेहें वेरासेर ओवला इस्राएल घराणाहा टोलू कोअहीं, आन देसो देसोअ माअहुंउं सामने तियांवाअहीं पवित्र ठरिहीं, ताहां तें याकोबोहो आंय आपल्या देसोमेहें वोहती कोए. 26 तें तिहीं बेफिकऱ्ये वोहती कोइत रोये; तें कोएं बांदे आन दाराक्शाआ वाड़्यी लागाड़ीत कोइत बेफिकऱ्ये रोये; ताहां आंय तियांअरी वोडायीइ वेवारो कोअनारा तियां आखा माअहुंहूं डोंड आपीहीं, जे तियांआं शारु सोमकीर होय, ताहां तियांहां मुंदू जाय के आंय यहोवा देवुज होय."✝